1. Juzek kosle kotthin poristhiticho fuddo korcho poddlo, ani tannem kitem kelem?

 JAKOBACHO put Juzek, eka kotthin poristhiticho fuddo korcho poddlo. Ek dis tachea dhoniache bailen taka oxem mhunnttlem: “Mhoje sorim nhid.” Punn Juzen tem korunk nakarlem. Tor aiz ghoddie konnui chintit, ‘Juzen toxem korunk kiteak nakarlem?’ Tacho dhoni Potiphar tor ghorant naslo. Toxench, Juze tea ghoracho chakor aslo. Ani tannem tea bailek na mhunnttlem zalear, ti taka trasant ghalunk xoktali. Juze hem soglem zannam aslo. Tori astana, tinnem tacher porot-porot onoitik sombond dovrunk dobhav ghatlear pasun tannem tem nakarlem. Tor Juzen oxem kiteak kelem? Tem amkam tachea utrantlean kolltta. Tannem mhunnttlem: “Iedem vhoddlem noxtteponn korun kiteak mhonn Deva add hanv pap adarum?”—Ut. 39:7-12.

2. Pordvar korop Jehovache nodren ek patok mhunn Juzek koxem kollʼllem?

² Punn Jehova Devan Israelitkarank, “pordvar korum nakat,” oxem boroilʼlem aslem to Moizesacho Kaido sumar donxim vorsam uprant dilʼlo. (Sutt. 20:14) Tor Juzek, pordvar korop Jehovache nodren ek “vhoddlem noxtteponn” mhunn koxem kollon ailem? Juze, Jehovak itle bore toren vollkhotalo ki tache nodren pordvar korop ekdom vaitt mhunn tannem somzon ghetlem. Udharonnak, Jehova Devan ekuch dadlea ani baile modem kazar ghoddoun haddlolem mhunn Juze bore bhaxen zannam aslo. Toxench, Jehovan don pavtti tachi ponji Saracho bolotkar zauncho koso addailo tem Juzen aikolʼlem astolem. Teach bhaxen, tachi aji Rebekachi pasun Jehovan koxi rakhonn keli tem Juze zannam aslo. (Ut. 2:24; 12:14-20; 20:2-7; 26:6-11) Juzen hea ghoddnneam vixim niall kelo tednam Jehovache nodren kitem sarkem  ani kitem chukichem tem to somzonk pavlo. Ani Juze Jehovacho khub mog kortalo dekhun tannem kitem kelʼlem Jehovak zai, tench korunk Juzen nichov kelʼlo.

3. Ami hea lekhant kitem polloitolim?

³ Juze bhaxen tumi pasun nitivontponnacho mog kortat mhunn kainch dubhav na. Punn opurnn zalolean, ami chotur nant zalear borea ani vaitta vixim, ami hea sonvsarachem chintop apnnaunk xoktat. (Iz. 5:20; Rom. 12:2) Tor oxem zaina zaunk, nitivontponn mhunnttlear kitem, nitivont ravlear amkam koso faido zatolo, ani ami khoinchea tin vattamnim Jehovachea dorjeam pasot amcho mog vaddounk zata tem ami hea lekhant polloum-ia.

4. Ek nitivont munis koso asta mhunn zaitea lokank dista?

⁴ Ek nitivont munis ekdom gorvixtt asta, to dusreanchi nit korta, ani apunn dusream poros boro mhunn to chintʼta, oxem zaitea lokank disonk puro. Punn osle gunn Devak matui avoddnant. Toxench, Jezu hea prithumer aslo tednam borea ani vaitta vixim aple svotache dorje tharaupi dhormik fuddareanchi vagnnuk ekdom chukichi asli mhunn tannem sanglem. (Up. 7:16; Lukas 16:15) Khorem mhunnttlear, ek nitivont munis apunn dusream poros boro mhunn kednanch chintina.

5. Bible-a pormonnem nitivontponn mhunnttlear kitem? Thoddim udharonnam diat.

⁵ Tachea bodlek, ek nitivont munis Jehovache nodren sarkem tench korta. Tor ek munis Jehovachea dorjeam pormonnem jieta tednam to ‘nitivont’ mhunn Bible dakhoita. Udharonnak, veapar-dhondo kortat tannim “fottkirim mapam-zhokam” uzar korchim nhoi mhunn Jehovan sanglolem. (D.S. 25:13-14) Hacho orth, tannim promannikponnan veapar-dhondo korunk zai aslo. “Promannikponn” hea utrak uzar kelʼlem Hebrev utor, “nitivontponn” oxem pasun bhaxantor korunk zata. Tor Devache nodren nitivont ravonk sodhtat tea Kristanvamnim, veapar-dhondo kortana soglea vattamnim promannik asonk zai. Toxench, eka nitivont munxak konnachea-i sangata onʼneai zalʼlo naka. Ani to ‘sogleach vattamnim Jehovak manvota tem korunk sodhta’ dekhun, apunn gheta te nirnnoi Jehova koso lekhtolo tacher to dhean dita. Khorench, nitivontponn ek ekdom sobit gunn!—Kol. 1:10.

6. Borea ani vaitta vixim Jehovachech dorje sarke asat mhunn ami kiteak khatri dovrunk zata? (Izaias 55:8, 9)

⁶ Jehova amcho Rochnnar zalolean, borea ani vaittachea dorje tharaunk fokot takach odhikar asa. Jehova nitivontponnachi Zhor zaun asa. Taka lagon, Bible-ant taka “Nitivontponnachem Sthan” oxem mhunnttlam. (Jer. 50:7) Toxench, Jehova poripurnn zaun asa. Tea pasot, kitem sarkem ani kitem sarkem nhoi tem to ekdom bore bhaxen zannam. Punn ami patki ani opurnn asat dekhun, borea ani vaitta modem ontor vollkhonk ami chukonk xoktat. (Mho. 14:12; Izaias 55:8, 9 vachat.) Toxem zalear, Jehovachea dorjeam pormonnem jieunk amkam kotthin asa kai? Na. Karonn amkam Devachea sarkinch rochleant, ani tachea nitivontponnachea dorjeam pormonnem ami jieunk xoktat. (Ut. 1:27) Itlench nhoi, oxem korunk amkam avoddtta. Ami amchea Bapaicho khub mog kortat dekhun tachi dekh gheunk ami amchean zata tem soglem kortat.—Ef. 5:1.

7. Amkam dorjeanchi goroz kiteak asa? Udharonn diun somzaiat.

⁷ Jehovache dorje amchi rakhonn kortat. Oxem ami kiteak mhunnonk zata? Hea vixim chintat. Eka desant aslolo dor ek ganv ani xar apleak zai tosle traffic signal-ache kaide kortat zalear kitem zatolem? Soglo guspagondoll zatolo, ani opghat pasun zaunk xokta. Toxench, dotor ani nurse-o duentancho ilaz korche vixim aslole kaide pallinastana, apnnank zai te bhaxen ilaz kortat zalear thoddea duentancho jiv pasun  vochonk xokta. Tor, borea ani vaittache umkech tharailole dorje asonant tednam amkanch luksonn zaunk xokta.

8. Jehovachea dorjeam pormonnem cholonk khub vavr kortat tankam koslim besanvam mellttolim?

⁸ Jehovachea dorjeam pormonnem cholonk ami khub vavr kortat tednam Jehova amkam zaitim besanvam dita. Tannem amkam oxi bhas dilea: “Des zatolo borea monxanchem daiz: thoim tim tthikann kortolim sasnnachea sasnnak.” (St. 37:29) Tor ami soglim zannam Jehovachea dorjeam pormonnem choltolim tednam akʼkhea sonvsarant kitli khuxalkai, xanti ani ekvott astolo tea vixim chintat. Ani ami oslench jivit jielolim Jehovak zai. Khorench, nitivontponnacho mog korunk amkam borim karonnam asat! Tor ami nitivontponnacho anikui mog koso korunk zata tea vixim atam ami tin vatto polloum-ia.

9. Nitivontponnacho mog korunk ami kitem korunk zai?

⁹ Poili vatt: Dorje tharaita tacho mog korat. Nitivontponnacho mog korunk, ami Jehovacho, zo borea ani vaittache dorje tharaita, tache pasot amcho mog vaddounk zai. Karonn ami Jehova Devacho jitlo chodd mog kortolim, titlich chodd tachea nitivontponnachea dorjeam pormonnem jieunk amchi itsa vaddttoli. Hea vixim chintat: Adanv ani Even Jehovacho mog kelʼlo zalear tim tachem aikotolim aslim.—Ut. 3:1-6, 16-19.

10. Jehovak anik bore toren vollkhonk Abrahaman kitem kelem?

¹⁰ Adanv ani Even kelʼli chuk ami korina zaunk, ami Jehova Deva vixim xikot ravonk zai, tachea gunnanchi tokhnnai korunk zai, ani tachem chintop somzonk proitn korunk zai. Ami oxem kelem zalear, Jehova Deva pasot amcho mog vaddttolo. Abrahama vixim chintat. To Jehovacho khub mog kortalo. Ani hea pasot, thodde pavtti, Jehovache nirnnoi taka somzonasle zalear pasun to tachea add vochonk na, punn Jehovak anik bore toren vollkhon gheunk tannem proitn kelo. Udharonnak, apunn Sodom ani Gomorracho nas kortolo mhunn Jehovan Abrahamak sanglem tednam “akʼkhe prithumecho Monsubidar,” vaittam sangata boreancho-i nas kortolo mhunn poilim Abraham bhielo. Jehova toxem kortolo mhunn Abraham manunuch gheunk xokonaslo. Hea pasot, tannem khaltikaien Jehovak eka-fattlean-ek prosn vicharle. Ani Jehovan pasiensan tachea prosnanche zobab dile. Hea vorvim, Jehova dor eka munxachem kalliz topasta, ani to kednanch vaitt munxam sangata borea munxancho nas korina mhunn Abrahamak kollon ailem.—Ut. 18:20-32.

11. Abraham Jehovacho mog kortalo ani taka Jehovacher visvas aslo mhunn tannem koxem dakhoun dilem?

¹¹ Sodom ani Gomorra vixim, Jehova ani Abrahamachem ulovop zalea uprant, Jehova pasot Abrahamacho mog ani resped anikui vaddlo mhunn dubhavuch na. Punn zaitea vorsam uprant, Abrahamak ek kotthin poristhiticho fuddo korcho poddlo, ani hea vellar Jehovacher aslolea tachea visvasachi porikxa zali. Jehovan taka, tachea ekleach putak, Izakak bolidan korunk lailo. Punn tednam meren Abrahaman Jehovachi bori vollokh korun ghetloli. Tor hea pavtti, tannem Jehova Devak ekui prosn vicharunk na. Tache bodlek, Jehovan sanglolem toxench korunk to fuddem sorlo. Punn hem kam korop, Abrahamak kitlem dukhachem aslem tea vixim chintat. Tor Jehovan sanglolem toxem korunk Abrahamak koxi modot zali? Abraham Jehova vixim jem kitem zannam zalo, tacher tannem bariksannem niall kelo astolo. Jehova ek mogall ani nitivont Dev ani to sodanch sarkem tem korta mhunn Abrahaman ugddasak haddlem astolem. Toxench, Izaka udexim apunn ek raxttr ghoddoun haddttolo mhunn Jehova Devan Abrahamak bhas dilʼli. Punn tednam meren, Izakak bhurgim naslim.  Tori astana, apostl Paulun sanglem toxem, aplea mogall putak melʼleantlo jivont korunk Jehova Devak xokti asa mhunn Abrahamak visvas aslo. (Heb. 11:17-19) Abraham Jehova Devacho khub mog kortalo dekhun aplo Bap sodanch sarkem tem kortolo mhunn taka khobor asli. Taka Jehovan dilʼlem kam, ekdom kotthin aslem tem khorem. Punn taka bhavarth aslo dekhun tannem Jehovachem aikolem.—Ut. 22:1-12.

12. Ami Abrahamachi dekh koxi gheunk zata? (Stotr 73:28)

¹² Tor ami Abrahamachi dekh koxi gheunk zata? Abrahama bhaxen, ami Jehova vixim xikot ravonk zai. Ami oxem kortat tednam Jehova sangata amchi ixttagot ghott zatoli, ani tacho ami anikui chodd mog korunk pavtolim. (Stotr 73:28 vachat.) Toxench, Jehova chintʼta tea toren chintunk ami amchea ontoskornnak proxikxonn diunk pavtolim. (Heb. 5:14) Hea vorvim, konnem-i amcher vaitt kam korunk dobhav ghatlo zalear ami tem nakartolim. Toxench, Jehovak dukh zata ani tachea sangata amchi ixttagot moddtta, toslem kainch ami korchimnant. Tor ami nitivontponnacho mog kortat mhunn anik khoinche toren dakhounk zata?

13. Nitivontponn melloun gheunk ami kitem korunk zai? (Mhonnʼnneo 15:9)

¹³ Dusri vatt: Jehovachea dorjeam pasot tumcho mog vaddounk dor ek dis vavr korit ravat. Amche muscle ghott korunk ami dor disak exercise korunk zai. Teach bhaxen, Jehovachea dorjeam pasot amcho mog vaddounk, ami dor ek dis khub vavr korunk zai. Punn ugddas dovrat ki Jehova amkam somzon gheta ani amchean korunk zaina tachi to opekxa korina. (St. 103:14) Toxench, ‘promannikponn vo nitivontponn adarunk sodtat vo melloun gheunk sodhtat tancho apunn mog korta’ mhunn Jehova amkam khatri dita. (Mhonnʼnneo 15:9 vachat.) Tor jea toren, ami Jehovache sevent ek umkoch dhei dovorla zalear to melloun gheunk ami khub vavr kortat, teach bhaxen nitivontponnacho mog korunk pasun ami khub vavr korunk zai. Oxem ami kortat tednam vaddavoll korunk ani vell voita toso sudharnni korunk Jehova amkam pasiensan modot kortolo.—St. 84:5, 7.

14. “Chhatichem kottʼttem” mhunnttlear kitem, ani ami tem kiteak ghalunk zai?

¹⁴ Toxench, Jehova sarkem mhunn sangta tem korop ek vojem koxem nhoi, mhunn to mogan  amkam ugddas korta. (1 Juanv 5:3, 4a) Tachea nitichea dorjeam pormonnem ami choltat tednam dor disa amchi rakhonn zata. Ani hi rakhonn amkam gorjechi. Kiteak? Apostl Paulun sanglolea zhuzachea angtranna vixim ugddas korat. (Ef. 6:14-18) Tea angtrannant aslolem “chhatichem kottʼttem” mhunnttlear Jehovache nitiche dorje. Jea toren ek chhatichem kottʼttem soinikachea kallzachi rakhonn kortalem, toxench Jehovache nitiche dorje hea sonvsarachea vaitt probhava thaun amchi rakhonn kortat. Tea pasot, amchea zhuzachea angtrannant chhatichem kottʼttem asop ekdom gorjechem.—Mho. 4:23.

15. Tumi chhatichem kottʼttem ghatlam mhunn koxem dakhoun diunk zata?

¹⁵ Tumi chhatichem kottʼttem ghatlam mhunn koxem dakhoun diunk zata? Dor disa nirnnoi gheunchea poilim, Jehovak ami kitem kelʼlem zai, tea vixim chintʼtat tednam ami hem kottʼttem ghatlam mhunn ami dakhoun ditat. Tor ami kitea vixim uloitolim, koslem songit aikotolim, koslem monoronjon polloitolim, vo koslim pustokam vachtolim, hea vixim nirnnoi gheunche poilim ami amkanch he prosn vicharunk zai: ‘Hacho mhojer koslo porinnam zatolo? Jehovak hem manvotolem kai? Vo, heo vostu, Jehovache nodren vaitt asat tim kamam, zoxem, onoitik kamam, hinvsa, as, ani mhojech vixim chintunk mhaka urba ditat kai?’ (Filp. 4:8) Tor Jehovak manvota tosle nirnnoi korunk tumi vinchun kaddttat zalear, vaitt vostum thaun tumchi rakhonn zatoli.

16-17. Ami Jehovachea nitivont dorjeam pormonnem cholonk xoktat mhunn Izaias 48:18-ntlean amkam koxi khatri melltta?

¹⁶ Punn tumi Jehovachea dorjeam pormonnem cholot ravonk pavtolim kai na, mhunn tumkam usko zala kai? Toxem zalear, Jehova Devan, Izaias 48:18-nt sanglolea udharonnacher dhean diat. (Vachat.) Thoim, amchem nitivontponn “doriachea lharam vori” zatolem mhunn Jehovan bhas dilea. Tor tumi eke doria deger ubim asat, ani thoim thambonastana eka-fattlean-ek ietat tim lharam tumi polloitat mhunn chintat. Tea xant zagear tim lharam polloitana, ek dis tim lharam bond zatolim mhunn tumkam usko zatolo kai? Na! Karonn hozaramnim vorsam thaun tim lharam ie-it asat ani tim sodankal ie-it ravtolim mhunn tumi zannant.

¹⁷ Tumchem nitivontponn pasun tea doriachea lharam vorim zaunk xokta. Koxem? Tumi koslo-i nirnnoi gheunchea poilim, Jehovak tumi kitem kelʼlem zai, tea vixim chintat. Ani uprant toxench korat. To nirnnoi gheunk kitlo-i kotthin asum, tumcho mogall Bap, dor disa aplea nitichea dorjeam pormonnem jieunk tumkam ghottai ditolo ani modot kortolo mhunn ugddas dovrat.—Iz. 40:29-31.

18. Ami dusreanchi nit kiteak korunk zaina?

¹⁸ Tisri vatt: Nit korpachem kam Jehovacher soddat. Jehovachea nitivont dorjeam pormonnem jieunk ami khub vavurtat. Punn teach borabor, ami amkanch dusream sangata sor korunk zaina, ani tanchea poros ami borim asat oxem chintunk zaina. Tim Jehovachea dorjeam pormonnem jietat kai na, tem tharavop amchi zobabdari nhoi. Karonn ami ugddas dovrunk zai, ki Jehova “akʼkhe prithumecho Monsubidar” zaun asa. (Ut. 18:25) Ani dusreanchi nit korcho odhikar tannem amkam diunk na. Ani heach pasot, Jezun hi adnea dili: “Dusreanchi nit korop bond korat ani Dev tumchi nit korcho na.”—Mt. 7:1. *

19. Jehovakuch nit korpacho odhikar asa mhunn Juzen koxem dakhoun dilem?

¹⁹ Juzen kitem kelem tea vixim chintat. To ek nitivont munis aslo. Tori astana, tachea bhavamnim taka khub marlo, taka ek chakor mhunn viklo ani tanchea bapaik to melo mhunn sanglem.  Punn zaitea vorsam uprant, Juze aplea bhavank porot mellʼllo. Tea vellar to Ejiptacho ek bollixtt rajpal aslo. Taka zai zalear, to aplea bhavank xikxa diun tancho bodlo gheunk xoktalo. Punn tednam Juzechea bhavamnim poschatap kelʼlo. Tori astana, Juze tancho bodlo gheit mhunn tankam bhirant asli. Punn Juzen tankam oxem mhunnon khatri dili: ‘Bhienakat, hanv kitem Devachea zagear asam?’ Tor Juzen, aplea sangata vaitt toren vagle tanchi pasun nit korunk na. (Ut. 37:18-20, 27, 28, 31-35; 50:15-21) Tannem khaltikaien nit korpachem kam Jehovacher soddlem.

20-21. Ami nit korpachem kam Jehovacher soddttat mhunn ami koxem dakhounk zata?

²⁰ Juze bhaxen ami pasun nit korpachem kam Jehovacher soddttat. Udharonnak, amchim bhav-bhoinnam koslem-i kam kortat tednam tim tem kiteak lagon kortat, tea vixim ami tanchi nit korinant. Karonn ami dusreanchim kallzam topasunk xokonant. Fokot ‘Jehova kallzancho tthav gheta.’ (Mho. 21:2) Toxench, Jehova soglea sonskrutaiechea ani desantlea lokancho mog korta. Ani ami pasun ‘amchim kallzam uktim korunk’ to amkam urba dita. (2 Kor. 6:13) Hea pasot, ami amchea bhav-bhoinnanchi nit nhoi, punn tancho sogleancho mog korunk sodhtat.

²¹ Punn ami fokot amchea bhav-bhoinnanchich nit korinant zalear puro kai? Na. Jehovachi bhokti korinant tanchi pasun ami nit korunk zaina. (1 Tim. 2:3, 4) Zoxem, sotant naslolea amchea eka soirea vixim ami oxem kednanch chintchim nant: “To kednanch sotant ieunchona!” Ami oxem chintat zalear ami nit kortat. Ani hem korop ekdom chukichem. Karonn Jehova aiz porian ‘sogle kodden aslolea soglea munxank’ jivit bodlunk ek sondhi dita. (Itihas 17:30) Tor ami sodanch ugddas dovrunk zai ki dusream poros apunn nitivont mhunn chintʼtat tankam Jehova kednanch nitivont mhunn lekhina.

22. Tumi Jehovachea nitivont dorjeancho mog korunk kiteak nichov kela?

²² Jehovachea nitivont dorjeancho mog kortat tednam ami khuxal astolim ani dusreank ek bori dekh dovrunk pavtolim. Ani tem polloun, tim amcho ani Jehova Devacho anik mog korunk pavtolim. Tor ami sodanch ‘nitivontponna khatir bhukelʼlim ani tanelʼlim’ asonk zai. (Mt. 5:6) Ami sarkem tem korunk khub vavr kortat tem Jehova polloita, ani taka tem manvota mhunn ami khatri dovrunk zata. Hea sonvsarant nitivont lok mellop khub kotthin tem khorem. Punn nirax zainakat. “Jehova nitivont munxancho mog korta” mhunn sodanch ugddas dovrat.—St. 146:8, NW.