OBHEASACHO LEKH 34
Bible-antlea Bhasaunneam Thaun Xikat
“Xannim tim somzotolim.”—DAN. 12:10.
GIT 98 The Scriptures —Inspired of God
KITEM XIKTOLIM a
1. Bible-antleo bhasaunneo xikonk amkam kednam avddonk xokta?
BEN nanvacho tornnatto oxem mhunntta: “Mhaka Bible-antlea bhasaunneam vixim obheas korunk khub avoddtta.” Tumkam-i avoddtta kai vo teo somzonk tumchean zaunchench na oxem tumkam dista? Thoddea lokank tor bhasaunneam vixim xikonk bejar ieta. Punn Jehovan teo bhasaunneo Bible-ant kiteak boroun dovorleat, tem tumi zannam zatolim tednam tumkam ghoddie teo avddonk lagtoleo.
2. Hea lekhant ami kitem xiktolim?
2 Tor hea lekhant, ami Bible-antleo bhasaunneo kiteak xikonk zai ani tanche vixim obheas korunk ami kitem korunk zai tem polloitolim. Magir Danielan sanglolea don bhasaunneancher ami dhean ditolim, ani teo somzololean amkam aiz koso faido zata tem zannam zatolim.
AMI BIBLE-ANTLEO BHASAUNNEO KITEAK XIKONK ZAI?
3. Bible-antleo bhasaunneo somzonk ami kitem korunk zai?
3 Bible-antleo bhasaunneo somzonk, ami konnachi tori modot gheunk zai. Kiteak? Chintat, tumi poilim kednanch pavonk nant toslea eka onvollkhi zagear voitat. Punn tea zageachi ani thoinchea rosteanchi bori vollokh aslolo tumcho ek ixtt tumchea sangata asa. Tor tumi tachim kitli upkari astolim nhoi! Jehova pasun tea ixtta sarko zaun asa. Ami sodʼdheak khoinchea kallar jietat ani fuddarak kitem zatolem tem to ekdom bore toren zannam. Tor ami tea ixttachi modot ghetli toxi, Bible-antleo bhasaunneo somzonk ami khaltikaien Jehova lagim modot magonk zai.—Dan. 2:28; 2 Ped. 1:19, 20.
Bible-antlea bhasaunneam vixim obheas kelʼlean, fuddarak ghoddttolea ghoddnneam pasot toiar ravonk amkam modot zata (Peregraf 4 polloiat)
4. Jehovan aplea Utrant bhasaunneo kiteak boroun dovorleat? (Jeremias 29:11) (Chitr pasun polloiat.)
4 Eka mogall avoi-bapai bhaxen, Jehovak pasun aplim bhurgim khuxal aslolim, ani tancho fuddar boro zalʼlo zai. (Jeremias 29:11 vachat.) Aplea bhurgeancho fuddar koso astolo tem avoi-bapaik khobor na. Punn Jehovak sarkem khobor asa. Ani fuddarak ghoddttolea mhotvachea ghoddnneam vixim ami zannam zalʼlim taka zai dekhun, tannem aplea Utrant bhasaunneo boroun dovorleo, jeo tachea thaun mogall dennim zaun asat. (Iz. 46:10) Punn tantunt boroilam tem khorench ghoddttolem mhunn ami koxi khatri korunk zata?
5. Max-achea onnbhovantlean tornnatteamnim kitem xikonk zata?
5 Amchim tornnattim voitat tea iskolamnim chodd korun oslim munxam astat, zankam Bible-ant boroilam tea vixim titlem kaim poddon vochonk na. Ani thodde pavtti, tanchea utrank ani korneank lagon, Sakxi aslolim tornnattim aple patienni vixim dubhavunk xoktat. Oxench Max nanvachea eka tornnatteak ghoddlem. To sangta: “Hanv iskolant xiktalom tednam mhojim mummy-daddy mhaka xikoitat tem khoreaninch sot asa kai, ani Bible khorench Devachem Utor kai, mhunn hanv dubhavunk laglom.” Tor tannem aplea mummy-daddy-k hea vixim sanglem tednam tannim kitem kelem? To mhunntta: “Mhojea mummy-daddy-k hea vixim usko zalʼlo. Punn tim ragar zaunk nant.” Toxench tannim Max-ak, Bible-antlean tachea prosnanche zobab dile. Ani Max-an pasun kitem tori kelem. To sangta, “Hanvem svota zaun Bible-antlea bhasaunneancher obheas kelo, ani hanv jem xiklolom tea vixim sobhentlea tornnatteam lagim uloilom. Tea uprant, Bible khorench Devachem Utor mhunn mhaka khatri zali!”
6. Tumchea monant dubhav ietat tednam tumi kitem korunk zai, ani kiteak?
6 Max-a bhaxen, Bible-ant boroilam tem sot asa kai mhunn tumchea monant dubhav ietat zalear, niraxi zainakat. Punn tea vixim kainch korinastana-i ravom nakat. Karonn dubhav, kollom koxi zaun asa. Ami ti soddun dili zalear, ti sovkas-sovkas korun amchi moladik vost pasun piddʼddear korunk xokta. Teach bhaxen, amche dubhav amcho visvas piddʼddear korina zaunk ami amkanch oxem vicharunk zai: ‘Fuddara vixim Bible jem sangta tem sot mhunn hanv mantam kai?’ Tumkam hea vixim dubhav asa zalear, atam meren purnn zaleat tea Bible-antlea bhasaunneam vixim obheas korat. Koxem?
BIBLE-ANTLEA BHASAUNNEAM VIXIM XIKONK AMI KITEM KORUNK ZAI?
Daniela bhaxen Jehovacher amcho visvas vaddounk, Bible-antlea bhasaunneancho obheas kortana ami sarko hetu dovrunk zai, khaltikai dakhounk zai, ani bariksannen obheas korunk zai (Peregraf 7 polloiat)
7. Bhasaunneancho obheas korunk Danielan kitem kelem? (Daniel 12:10) (Chitr pasun polloiat.)
7 Bhasaunneancho obheas kortana ami kitem korunk zai, tea vixim Danielan ekdom bori dekh dovorlea. To sarko hetu dovrun, mhunnche sot xikonk lagon bhasaunneancho obheas kortalo. Toxench, to khalti pasun aslo. Tem mhunnttlear, tannem Jehova sangata ghott ixttagot samballʼlli ani tacheo adnea pallʼlleo zalear, Jehova taka bhasaunneancho orth zannam zaunk modot kortolo mhunn tannem vollkhon ghetlem. (Dan. 2:27, 28; Daniel 12:10 vachat.) Ani Jehova lagim modot magon, to khorench khalto asa mhunn tannem dakhoilem. (Dan. 2:18) Tea bhair, to bhasaunneancho bariksannen obheas kortalo, mhunnche to jietalo tea kallar aslole Devachea Utrache kovlle vachtalo, ani tantunt sodh kortalo. (Jer. 25:11, 12; Dan. 9:2) Tor ami Danielachi dekh koxi gheunk zata?
8. Thoddim zannam Bible-antlea bhasaunneancho obheas kiteak kortat, punn ami kitem korunk zai?
8 Tumcho hetu kitem tem zannam zaiat. Tumi sarko hetu dovrun, mhunnche tumi sot zannam zaunk bhasaunneancho obheas kortat zalear, teo somzonk Jehova tumkam modot kortolo. (Ju. 4:23, 24; 14:16, 17) Punn obheas korunk thoddea lokancho hetu sarko asona. Zoxem, tim Bible Devachem Utor nhoi mhunn purave sodhunk, tantuntlea bhasaunneancho obheas kortat. Karonn oxem kelʼlean, tankam apleak zai te toren jieunk mellttolem oxem tankam dista. Punn ami tanchea bhaxen zaunchem nhoi. Amcho hetu sodanch sarko asonk zai. Hache bhair, ami anik kitem korunk zai?
9. Bible-antleo bhasaunneo somzonk ami anik kitem korunk zai? Somzaiat.
9 Khaltikai dakhoiat. Khaltea lokank Jehova modot kortolo mhunn tannem bhas dilea. (Jak. 4:6) Tor Bible-antleo bhasaunneo somzonk ami Jehova lagim magnneant modot magonk zai. Toxench, Jehova amkam sarkea vellar somzonni diunk uzar korta, tea chakrachi pasun amkam modot zai mhunn ami vollkhon gheunk zai. (Luk. 12:42) Karonn Bible-antlem sot somzonk to heach chakrak uzar korta. Ani oxem mhunnop sarkem zatolem. Karonn Jehova ek manddavollicho Dev zaun asa.—1 Kor. 14:33; Ef. 4:4-6.
10. Esther-achea onnbhovantlean tumi kitem xiklim?
10 Bariksannen obheas korat. Tumkam avoddtta tosli ek bhasaunni vinchun kaddat ani tacher obheas korat. Esther nanvachea bhoinnin oxench kelem. Mesiasachea iennea vixim kelʼleo bhasaunneo tika avoddttaleo. Tor ti tea vixim anik zannam zaunk sodhtali. Ti sangta: “Hanv 15 vorsachem aslem tednam, heo bhasaunneo khoreaninch Jezu ieunchea zaitim vorsam poilim boroilʼleo mhunn hanv purave sodhunk laglem.” Tinnem Dead Sea lagim mellʼllolea kovlleam vixim jem vachlem, tea vorvim tichi khatri anik vaddli. Ti sangta, “Tantuntleo thoddeo bhasaunneo Jezu prithumer ieunchea khub tempa poilim boroilʼleo. Tor teo Deva thaunuch asonk zai asleo. Tantuntleo thoddeo vostu somzonk, mhaka teo zaite pavtti vachunk poddleo.” Punn tinnem tancho obheas korunk itlo vavr kelo mhunn ti khub khuxal! Bible-antlea zaitea bhasaunneam vixim bariksannen obheas kelea uprant ti oxem mhunnonk pavli: “Bible-ant jem kitem sanglam tantunt kainch chuk na mhunn mhoji khatri anikui vaddli!”
11. Bible-antleo bhasaunneo koxeo ghoddon ietat tem zannam zalʼlean amkam koso faido zata?
11 Bible-antleo thoddeo bhasaunneo koxeo purnn zaleat teo ami polloitat tednam, Jehovacher ani to dita tea margdorxonacher amcho visvas anikui ghott zata. Toxench, hea bhasaunneantlean amkam fuddarak ek boro bhorvonso asa mhunn kollon ieta. Tor tancho obheas kelʼlean, amchea mukhar kosli-i oddchonn ailearui ami khuxal ravonk pavtat. Atam ami Danielan boroilʼleo don bhasaunneo polloum-ia jeo aiz purnn zatat, ani heo somzolʼlean amkam sarke nirnnoi gheunk modot zaunk xoktat.
LOKHONDD ANI MATIECHEA PAIM-AM VIXIM ZANNAM ZAVOP KITEAK GORJECHEM?
12. “Orde lokhonddache ani orde matieche” paim konnak suchit kortat? (Daniel 2:41-43)
12 Daniel 2:41-43 vachat. Raza Nebukadnezzarak ek vhodd murte vixim sopon poddlem ani Danielan tea sopnacho orth sanglo. Razan sopnant polloilʼlea murteche paim “orde lokhonddache ani orde matieche” asle. Hi bhasaunni ami Daniel ani Prokasovnni pustokant aslolea her bhasaunneam sangata sor kortat tednam, te paim Anglo-America-k suchit kortat mhunn amkam kolltta. Ani hi aiz sonvsarachi vorixtt razvottki zaun asa. Hea razvottke vixim sangtana, Danielan mhunnttlolem ki tem ‘raj ordem ghott ani ordem oskot astolem.’ Ordem oskot kiteak? Karonn tache nagrik zankam matiek suchit keleat, te lokhondda sarkea ghott aslole hea razvottkek oskot kortat. Hea pasot, Anglo-America-k, apleak zai tem soglem korunk mellona. b
13. Lokhonddachea ani matiechea paim-a vixim ji bhasaunni kelʼli tantuntlean ami koslim mhotvachim lisanvam xiktat?
13 Danielan tea murte vixim ani khas korun tichea paim-a vixim jem sanglem, tantuntlean ami zaitim mhotvachim sotam xiktat. Poilem, Sonvsarachi Vorixtt Razvottki, Anglo-America-n, apunn bollixtt asa mhunn dakhoun dilam. Udharonnak, Poilem ani Dusrem Vixv Zhuz jikhonk, mukhel zaun tacho hat aslo. Punn hi razvottki oskot zalea ani zait voita. Karonn tache nagrik eka-meka add ani sorkara add zhuztat. Dusrem, Anglo-America, sonvsarachi nimanni vorixtt razvottki zaun asa. Karonn Devachem Raj munxanchea soglea sorkarancho nas kortolem tednam, hi razvottki odhikarant astoli. Her raxttram ghoddie, Anglo-America-cho virodh korun tachea add zhuzot. Tori astana, tim tacho zago gheunk pavchimnant. Oxem ami kiteak mhunnonk zata? Karonn Devachea Rajeak suchit korta to “fator” tea murteche paim, mhunnche Anglo-America-cho churo korun uddoitolem.—Dan. 2:34, 35, 44-45.
14. Hi bhasaunni somzolʼlean amkam kitem korunk modot zata?
14 Lokhonddachea ani matiechea paim-am vixim kelʼli bhasaunni khorench ghoddon ietoli mhunn tumkam khatri asa? Hoi zalear, tumi tumchem jivit koxem jietat tantuntlean tem dison ietolem. Zoxem, beginuch hea noxttea sonvsaracho nas zatolo mhunn tumi zannant dekhun, tumi hea sonvsarachea girestkaie fattlean dhanvchimnant. (Luk. 12:16-21; 1 Ju. 2:15-17) Toxench hi bhasaunni somzolʼlean, porgottchem ani xikounchem kam kitlem mhotvachem tem tumkam kollttolem. (Mt. 6:33; 28:18-20) Tor he bhasaunnecho obheas kelea uprant tumkanch vicharat: ‘Devachem Raj soglea sorkarancho beginuch nas kortolem, hachi mhaka khatri asa mhunn hanv ghetam tea nirnnoi-antlean dison ieta kai?’
“UTʼTORECHO RAZA” ANI “DOKXINNECHO RAZA” HANCHE VIXIM ZANNAM ZAVOP KITEAK GORJECHEM?
15. Aiz “utʼtorecho raza” ani “dokxinnecho raza” konn zaun asat? (Daniel 11:40, NW)
15 Daniel 11:40, NW vachat. c Daniel odheai 11-nt, don razam vixim vo don sorkaram vixim sanglam, je eka-meka add zhuztat. Karonn te sonvsaracher tabo cholounk sodhtat. Hi bhasaunni ami Bible-antlea her bhasaunneam sangata sor kortat tednam, aiz “utʼtorecho raza” Russia ani tachim vangddi raxttram, ani “dokxinnecho raza” Sonvsarachi Vorixtt Razvottki, Anglo-America zaun asa mhunn kollon ieta. d
“Utʼtorecho raza” ani “dokxinnecho raza” amcho virodh korta hacho orth, Bible-antli bhasaunni purnn zata. Hem ami vollkhon ghetat tednam, amcho bhavarth ghott zatolo ani amkam chodd usko zaunchona (Peregraf 16-18 polloiat)
16. “Utʼtorecho raza” Jehovachea sevokam sangata koso vagta?
16 “Utʼtorecho raza,” tachea vattarantlea Jehovachea sevokank dhumallo dita. Thoddea Sakxeank tanchea bhavarthak lagon mar ghatla ani bondkhonnint pasun uddoileant. Punn “utʼtorecho raza” jem kitem korta tem polloun amchim bhav-bhoinnam bhieunk nant. Tachea bodlek, Jehova ani tachea Utracher tancho bhavarth anikui ghott zala. Karonn tancher ietat tea dhumalleam vorvim, Danielan sangloleo bhasaunneo purnn zatat mhunn tim pollounk xoktat. e (Dan. 11:41) Ani hem zannam zalʼlean, amcho bhorvonso ghott samballunk ani Jehovak visvaxi ravonk amkam modot zata.
17. ‘Dokxinnechea razachea’ vattarantlea Jehovachea lokank aiz meren koslea oddchonneancho fuddo korunk poddla?
17 Adlea tempar, ‘Dokxinnechea razan’ pasun Jehovachea sevokank dhumallo dilo. Udharonnak, Poilea ani Dusrea Vixv Zhuza vellar, zaitea bhavamnim zhuzak vochonk nakarlem dekhun tankam bondkhonnint uddoile. Toxench, Sakxeanchim thoddim bhurgim bavtteak solam korunk toiar naslim dekhun tankam iskolantlean kaddlim. Punn halinchea vorsamnim, hea razachea vattarantlea Jehovachea lokank, eke vegllech torechea porikxecho fuddo korunk poddla. Zoxem, election-a vellar umkoch candidate dusrea poros boro asa, vo umkich party jikhlear puro, oxem tankam disonk xokta. Tim vote ghalunk voichimnant tem khorem. Punn ghoddie kallzant ani monant tim tanchi bazu gheunk xoktat. Tea pasot ami amchea korneamnim toxench monant ani kallzant pasun, konnachich bazu ghena zaunk chotrai dovrunk zai!—Ju. 15:18, 19; 18:36.
18. ‘Utʼtorechea raza’ ani ‘dokxinnechea raza’ modem asloli dusmankai polloun amcher koslo porinnam zata? (Chitr pasun polloiat.)
18 “Dokxinnecho raza” ani “utʼtorecho raza” ‘xingamnim zhuztat’ tem polloun zaitea lokank ekdom chodd usko zaunk xokta. Karonn tankam Bible-antlea bhasaunneancher bhavarth na. (Dan. 11:40, NW) Hea donui razam lagim itle nuclear bomb asat ki tannim te uzar kele zalear, hea prithumecher konnuch jivo urcho na. Punn Jehova oxem kednanch zaunk diucho na mhunn ami zannant. (Iz. 45:18) Tea pasot, hea razam modem asloli dusmankai polloun amkam fuddara vixim usko zaina. Tachea bodlek, amcho bhavarth odik ghott zata, ani hea sonvsaracho xevott ekdom lagim asa mhunn amchi khatri vaddtta.
BHASAUNNEAM VIXIM OBHEAS KORIT RAVAT
19. Bible-antlea bhasaunneam vixim ami kitem ugddas dovrunk zai?
19 Bible-antleo thoddeo bhasaunneo koxeo purnn zatoleo tem ami noko. Provadi Danielan pasun jem boroilʼlem, tantuntlea thoddea vostuncho orth to somzonk na. (Dan. 12:8, 9) Punn ek bhasaunni koxe toren purnn zatoli tem amkam purnn toren somzona dekhun, ti ghoddchi na oxem nhoi. Tor Jehovan adim kelem toxem, atam pasun to sarkea vellar, ami zannam zaunk zai tem somzonk amkam modot kortolo mhunn ami khatri dovrunk zata.—Am. 3:7.
20. Bible-antleo khoincheo bhasaunneo beginuch ghoddcheo asat, ani ami kitem korit ravom-ia?
20 Sonvsarantlim raxttram beginuch, “Soglim xantin ani surokxotaien asat!” oxem mhunnttolim. (1 Tes. 5:3) Uprant sonvsarantle sorkar, khottea dhormancher akromonn kortole ani tacho nas korun uddoitole. (Prok. 17:16, 17) Magir te Devachea lokancher akromonn kortole. (Ez. 38:18, 19) Oxem zata tednam, Armageddonachem zhuz suru zatolem. (Prok. 16:14, 16) Heo sogleo ghoddnneo beginuch ghoddttoleo mhunn ami khatri dovrunk zata. Punn tednam meren, bhasaunneam vixim obheas korun ani dusreankui toxem korunk modot korun, ami amchea sorginchea Bapak kitlim upkari asat tem dakhoit ravom-ia.
GIT 95 The Light Gets Brighter
a Hea sonvsarachi poristhiti kitli-i vaitt zaum, amkam ek boro fuddar astolo mhunn ami bhorvonso dovrunk zata. Ami Bible-antlea bhasaunneam vixim xiktat tednam amkam ho bhorvonso melltta. Tor hea lekhant, ami Bible-antlea bhasaunneam vixim kiteak obheas korunk zai tem ami polloitolim. Toxench, Danielan sanglolea don bhasaunneancher ami dhean ditolim, ani teo somzololean amkam koso faido zata tem ami zannam zatolim.
b Jun 15, 2012-chea Pahrogopur-ant, “Jehovah Reveals What ‘Must Shortly Take Place,’” hea lekhache per. 7-9 polloiat.
c Daniel 11:40 (NW): “Xevottacho kall pavtoch, dokxinnecho raza tache koddem xingamnim zhuztolo. Punn utʼtorecho raza roth, ghoddesvar, ani zhuzachim khub tarvam gheun eka tufana vorim tacher poddttolo. To sobar desamnim ghustolo ani buddtte bhaxen soglem vhanvoun vhortolo.”
