1. Babilonkarank Daniel kiteak manvolo?

 BABILONKARAMNIM Danielak, tachea ganv-ghor Jeruzalema thaun ekdom pois Babilonant koidi korun vhelo. Tednam to tornnatto aslo. Babilonachea odhikareamnim, to ‘kuddin dhodd vo koslem-i unnemponn naslolo, rupest’ ani unch kulliecho aslo tem polloilem. Tor tannim tachem “bhailem rup” polloilem dekhun tankam to khub manvolo. (1 Sam. 16:7) Hea karonnank lagon, tannim taka rajmahalant seva korunk proxikxonn dilem.—Dan. 1:3, 4, 6.

2. Jehovak Daniela vixim koxem distalem? (Ezekiel 14:14)

² Punn Daniel rupest aslo, ani taka rajmahalant khas sueog asle mhunn nhoi, punn to kosle torecho munis aslo taka lagon Jehova tacho mog kortalo. Khorem mhunnttlear Daniel, Noah ani Joba bhaxen nitivont asa oxem Jehovan mhunnttlem. Noah-n ani Joban khub vorsam poriant visvaxiponnan Jehovachi seva kelʼli. Punn Jehovan, Daniel nitivont asa oxem mhunnttlolem tednam, to ghoddie fokot 20 vorsancho aslo zait. (Ut. 5:32; 6:9, 10; Job 42:16, 17; Ezekiel 14:14 vachat.) Daniel zaitim vorsam jielo ani tachea jivitant vhodd-vhodd oddchonneo aileo. Punn Jehovan taka kednach soddun diunk na, ani to tacho mog korit ravlo.—Dan. 10:11, 19.

3. Hea lekhant ami kitea vixim zannam zatolim?

³ Hea lekhant ami Danielachea oslea don gunnam vixim polloitolim, jea vorvim to Jehovacho opurbaiecho zalo. Sogleant poilim, te gunn khoinche, ani Danielan te khoinche poristhitint dakhoile tem ami polloitolim. Uprant, to he gunn koso vaddounk pavlo, ani ami tachi dekh koxi gheunk zata tem polloitolim. Ho lekh khas korun tornnatteam pasot asa tem khorem. Punn Danielachea udharonna thaun ami sogleamnim xikonk zata.

4. Danielan dhir koso dakhoilo? Ek udharonn diat.

⁴ Dhirvont munxank ghoddie bhirant disonk xokta. Punn tea bhirantek lagon, sarkem tem korunk tim fatti soronant. Danielan pasun oxench kelem. Tannem dhir dakhoilo tea don ghoddnneancher ami dhean dium-ia. Poili ghoddnni ghoddie, Babilonkaramnim Jeruzalemacho nas korun sumar don vorsam uprant ghoddli. Raza Nebukadnezzarak eke vhodd murte vixim bhirankull sopon poddlem. Tor tannem aplea vidvanank, tem sopon ani tacho orth te sangonant zalear, tankam to jivexim marun uddoitolo mhunn sanglem. (Dan. 2:3-5) Tea vidvanam modem Daniel pasun aslo. Tor tacho-i jiv dhokeant aslo. Hea pasot, Danielan rokddench panvl ghevop gorjechem aslem. Tor Daniel, “raza fuddeant gelo ani sopnacho orth razak diunk apnnak thoddo vell di mhunn tannem razak vinoti keli.” (Dan. 2:16, NW) Hantuntlean, Danielak kitlo dhir ani bhavarth aslo tem dison ieta. Karonn tannem hache poilim, khoincheach sopnacho orth sanglolo mhunn Bible dakhoina. Tor tannem kitem kelem? Tannem aplea ixttank, mhunnche Shadrak, Meshak, ani Abednegok “tanchi doia korchi ani tea gupit guttacho orth tankam ukto korcho oxem Sorginchea Deva lagim magat” mhunn sanglem. (Dan. 2:18) Ani Jehovan tanchem magnnem aikolem. Jehovache modotin, Daniel Nebukadnezzarachea sopnacho orth sangonk pavlo. Taka lagon tacho ani tachea ixttancho jiv salvar zalo.

5. Danielan anik khoinchea ghoddnnent dhir dakhoilo?

⁵ Danielan razak vhodd murtecho orth sangon thoddea tempa uprant, dusri ghoddnni ghoddli. Hea vellar pasun taka dhirachi goroz asli. Raza Nebukadnezzaran anik ek bhirankull sopon polloilem. Hea pavtti taka ek vhoddlo rukh dislo. Ani hea sopnacho orth pasun Danielan razak dhiran sanglo. Tachea sopnacho orth sangtana, tannem hem-ui sanglem ki raza piso zatolo ani thoddea tempa pasot raz cholounk pavchona. (Dan. 4:22) Hem aikon, Daniel aplo virodh korta oxem chintun, raza taka mornnachi xikxa diunk xoktalo. Tori astana, Danielan dhiran sopnacho orth sanglo.

6. Danielak dhir dakhounk koxi modot zali astoli?

⁶ Danielak aplea akʼkhea jivitant dhir dakhounk koxi modot zali astoli? Tachea avoi-bapain Devache Kaide pallʼlle. Toxench, Jehovan Izraelit avoi-bapaink aplea bhurgeank  xikounche vixim je Kaide dilʼle te tannim Danielak xikoile. Oxem korun, tannim Danielak lhanponnim thaun ek bori dekh dovorli. (D.S. 6:6-9) Tor Danielak fokot Dha Updesam vixinch nhoi, punn eka Izraelitkaran kitem khaunchem ani kitem khaunchem nhoi, hea vixim pasun bariksannen khobor asli. b (Lev. 11:4-8; Dan. 1:8, 11-13) Toxench, taka Jehovachea lokancho itihas pasun khobor aslo. Ani Devachea dorjeam pormonnem jieunk nant tankam koslo porinnam bhogcho poddlo tem-ui to zannam aslo. (Dan. 9:10, 11) Tea bhair, tachea jivitant oxem zaitem kitem ghoddlem jea vorvim tachi khatri vaddli ki fuddem kitem-i zaum, Jehova ani tache bollixtt dut sodanch tachea sangata astole.—Dan. 2:19-24; 10:12, 18, 19.

7. Daniel anik khoinchea karonnank lagon dhirvont zaunk pavlo? (Chitr pasun polloiat.)

⁷ Itlench nhoi, Devachea provadeamnim jeo bhasaunneo kelʼleo, tancho Danielan bariksannen obheas kelo. Hantunt, Jeremiasacheo bhasaunneo pasun mellon asleo. Taka lagon, uprant Danielak kollon ailem ki khub temp poriant Babilonant koidi aslolea Judevank beginuch suttka mellttoli. (Dan. 9:2) Ani Jehovacheo bhasaunneo purnn zatat tem Danielan polloilem tednam, Jehovacher tacho visvas anikui ghott zalo. Ani jea munxank Jehovacher ghott visvas asta, tim ekdom dhirvont astat. (Rom. 8:31, 32, 37-39 sor korat.) Sogleam-von mhotvachem mhunnttlear, Daniel zaite pavtti aplea sorginchea Bapa lagim magnnem kortalo. (Dan. 6:11) To tachea patkam pasot Jehova lagim bhogsonnem magtalo, aplea kallzant asa tem soglem taka sangtalo, ani Jehova lagim modot magtalo. (Dan. 9:4, 5, 19) To amchech bhaxen munis aslo. Tor to zolma thaunuch dhirvont asonk na. Punn obheas korun, magnnem korun, ani Jehovacher visvas dovrun to dhirvont zaunk pavlo.

8. Ami dhirvont koxim zaunk xoktat?

⁸ Tor ami koxim dhirvont zaunk xoktat? Amchim avoi-bapui amkam ghoddie dhirvont zaiat mhunn sangonk xoktat. Punn ho gunn amkam tanchea koddlean apxinch mellona. Dhirvont zavop, ek novi kola xikchea bhaxen zaun asa. Ek novi kola xikonk ek bori vatt mhunnttlear, xikoupeak bariksannen pollovop ani tachi dekh ghevop. Teach bhaxen, dhirvont zaunk dusrim koxim dhir dakhoitat tem ami bariksannen pollounk zai, ani tanchi dekh gheunk zai. Tor ami Daniela thaun kitem xiklim? Ami tachea bhaxen Devachea Utracho bariksannen obheas korunk zai. Jehova lagim kallzantlean ani zaite pavtti magnnem korun, tachea sangata ghott ixttagot korunk zai. Ani to sodanch amkam modot kortolo mhunn tacher visvas dovrunk zai. Oxem kelear, amchea bhavarthachi porikxa zata tednam ami dhir dakhounk pavtolim.

9. Dhir dakhoilʼlean kosle faide asat?

⁹ Dhir dakhoilʼlean zaito faido zata. Hea vixim amkam Ben-acho onnbhov asa. To Germany-nt eka iskolant xiktalo. Tachea iskolantlim soglim, sonvsar apxinch zalo hi xikounn mantalim. Ani Bible-ant rochnne vixim jem boroilam ti ek kanni oxi tankam distali. Ek pavtt klasint Ben-ak, Rochnnar asa mhunn to kiteak patieta hem sangonk sondhi dili. Tannem dhiran aplea bhavartha vixim sanglem. Hacho porinnam kitem zalo? Ben sangta, “Tticherin mhojem dhean diun aikolem, ani hanvem ji mahiti uzar kelʼli tacheo zaiteo kopi kaddun, tinnem klasintlea dor eka bhurgeak dileo.” Tor bhurgeamnim kitem kelem? Ben sangta, “Zaitea bhurgeamnim mhojem dhean diun aikolem ani mhoji tokhnnai pasun keli.” Tor hea udharonnantlean amkam kitem kollon ieta? Ami dhir dakhoitat tednam,  choddso lok amkam resped ditat, toxench khaltea kallzache lok Jehova vixim xikonk umed dakhounk xoktat. Khorench, dhir dakhoilʼlean zaito faido zata!

10. Visvaxiponn mhunnttlear kitem?

¹⁰ Bible-ant, “visvaxiponn” vo “visvaxi mog” hea utrak uzar kelʼlem Hebrev utor, Devak tachea sevokam pasot kitlo mog asa tem dakhoun dita. Toxench, hem utor Devachea sevokam modem kitlo mog asa tem dakhoun diunk pasun uzar kelam. (2 Sam. 9:6, 7, NW) Ani vell voita toso, visvaxi ravcho amcho nichov ghott zait voita. Tor Danielacho visvaxi mog koso ghott zait gelo, tem atam ami polloum-ia.

11. Danielan zanntte piraier Jehovak visvaxiponn koxem dakhoilem? (Masikachem fuddlem chitr polloiat.)

¹¹ Danielachea jivitant osleo zaiteo ghoddnneo ghoddleo jednam tachea visvaxiponnachi porikxa zali. Khas korun to 90 vorsam poros chodd piraiecho aslo tednam, taka ek ekdom kotthin poristhiticho fuddo korunk poddlo. Tednam mhunnosor Babilon, Midiani ani Parsi lokanchea tabeant aslem ani Raza Darius raz choloitalo. Razache odhikari Danielacho dves kortale ani to bhokti kortalo tea Devak pasun te resped dinasle. Tor taka jivexim marunk tannim ek ievzonn kaddli. Tannim raza koddlean ek hukum bhair kaddlo jea vorvim Daniel, konnak visvaxi ravtolo tem kollon ietolem aslem. Razak visvaxi asa mhunn dakhounk Danielan fokot ekuch vost korunk zai asli. Ti mhunnttlear, tannem 30 dis poriant, Jehova lagim magnnem korunk zainaslem. Punn to Jehovak ovisvaxi zaunk na. Hea karonnak lagon, taka xinvachea khonddint uddoilo. Punn tachea visvaxiponnak lagon, Jehovan taka salvar kelo. (Dan. 6:12-15, 20-22) Tor Daniela bhaxen Jehovak visvaxi ravonk ami kitem korunk zata?

12. Daniel Jehovak koso visvaxi ravonk pavlo?

¹² Ami polloilem toxem, ami konnacho-i khub mog kortat tednam ami taka visvaxi ravonk pavtat. Daniel pasun aplea sorginchea Bapacho khub mog kortalo dekhun to taka visvaxi ravonk pavlo. Tor tannem Jehova pasot aplo mog koso vaddoilo? Jehovak kosle gunn asat ani te to koxe dakhoita, tea vixim Daniel bariksannen chintʼtalo. (Dan. 9:4) Toxench, Jehovan aplea pasot ani aplea lokam pasot kitem kelam tacher to niall kortalo. Ani to Jehovak upkari aslo.—Dan. 2:20-23; 9:15, 16.

13. (a) Amchea tornnatteank khoinchea poristhitimnim Jehovak visvaxi ravonk kotthin zaunk xokta? Ek udharonn diat. (Chitr pasun polloiat.) (b) Video-nt dakhoilʼlea pormonnem, ‘Jehovachim Sakxi gay lokank tenko ditat kai?’ oxem tumkam konnem-i vicharlem zalear tumi kitem sangtolim?

 ¹³ Daniela bhaxen, aiz amchea tornnatteam bhonvtonnim oslim munxam asat, jim Devak, nhoi mhunn tachea dorjeank resped dinant. Itlench nhoi, Devacho mog kortat mhunn sangtat tancho pasun tim ghoddie dves kortat. Thoddim zannam, amchea tornnatteanchem visvaxiponn moddunk tancher dobhav ghaltat vo tankam sotaitat. Hea vixim Australia-nt ravpi, Gabriel nanvachea eka tornnattea bhavacho amkam onnbhov asa. c To iskolant xiktalo tednam taka ek ekdom kotthin poristhiticho fuddo korunk poddlo. Ek dis tticherin klasintlea soglea bhurgeank, tancho ek ixtt apunn ‘gay’ mhunn tankam sangta zalear, tim kitem kortolim mhunn tankam vicharlem. Ani uprant tticherin, tea ixttak tenko ditolim tankam eke vatten, ani tenko diunchimnant tankam dusre vatten ravonk sanglem. Gabriel sangta, “Fokot mhaka ani Sakxi aslolea anik eka bhavak soddun, klasintlim her soglim bhurgim eke vatten aslim. Karonn ekuch lingachea munxam sangata sombond dovrop hantunt kainch vaitt na oxem tankam distalem.” Magir poristhiti anikui bigoddli ani Jehovak visvaxi ravonk bhavak anikui kotthin zalem. Bhav sangta, “To period ek voracho aslo. Ani urlolo soglo vell poriant, tea bhurgeamnim toxench tticherin pasun amchim fokannam kelim ani amkam tomnne marle. Hanvem xantponnim ani bore bhaxen, hanv kitem patietam tem tankam sangonk proitn kelo. Punn tannim mhojem ekui utor aikon gheunk na.” Tor bhavak hea vixim koxem dislem? To sangta, “Klasintlea bhurgeamnim mhaka tomnne marle, tem mhaka avddonk na tem khorem. Punn hanv Jehovak visvaxi ravlom ani mhojea patienni vixim tankam sanglem dekhun, mhaka ekdom chodd khuxalkai bhogli.” d

14. Jehovak sodanch visvaxi ravonk ami kitem korunk zai?

¹⁴ Jehovak sodanch visvaxi ravonk, ami pasun Daniela bhaxen Jehova pasot mog vaddoit ravonk zai. Ani oxem korunk ami tachea gunnam vixim obheas korunk zai. Zoxem, Jehovan rochlolea vostum vixim ami obheas korunk zata. (Rom. 1:20) Jehova pasot amcho mog ani resped vaddounk, ami “Was It Designed?” hantunt dilʼle lekh vachunk zatat, vo video pollounk zatat. Toxench, Was Life Created? ani The Origin of Life—Five Questions Worth Asking, hea pustikamnim dilʼli mahiti ami vachunk zata. Hea prokaxonam vixim, Denmark-antli, Esther nanvachi ek tornnatti bhoinn oxem sangta: “Hantunt ekdom bore toren somzailam. Hea prokaxonamnim ami kitem patieunk zai vo zaina tem sangonk na. Punn khorem kitem asa tem dakhoilam, jea vorvim ami kitem patietolim tem ami svota zaun tharaunk zata.” Ami poilim uloilʼlim to bhav Ben sangta, “Hi mahiti vachun mhozo bhavarth anikui ghott zalo, ani Devanuch soglem rochlam mhunn mhaka khatri zali.” Khorench, ami hea prokaxonancho obheas kortat tednam, Bible-ant sanglolim him utram khorim mhunn amkam kollon ietolem, zoim mhunnttlam: “Sorvespora, amchea Deva, sogllea vostuncho Rochnnar Tum . . . dekhun, Tuji podvi vollkhun, soglleamnim Tuka mhoima ani bhovman diunk favo.”—Prok. 4:11. e

15. Jehovak sodanch visvaxi ravonk ami anik kitem korunk zata?

¹⁵ Sodanch Jehovak visvaxi ravonk ami anik kitem korunk zata? Ami Jezuchea jivita vixim bariksannen obheas korunk zata. Germany-nt  ravpi Samira nanvache eke tornnatte bhoinnin oxench kelem. Ti sangta, “Hanv Jezu udexim Jehovak anik bore toren vollkhonk pavlem.” Bhoinn lhan asli tednam, Jehova Devak bhavnam asat hem somzonk tika kotthin zatalem. Punn Jezuk koxem bhogta tem ti somzonk xoktali. Ti fuddem mhunntta, “Jezu bhurgeancho mog kortalo ani konnui tache lagim ukteponnim ulounk xoktalo dekhun, mhaka to khub avoddttalo.” Ti Jezu vixim jitli chodd xikli, titlich ti Jehovak anik bore toren vollkhonk pavli, ani tachea pasot ticho mog vaddlo. Kiteak? Ti mhunntta, “Sovkas-sovkas korun mhaka kollon ailem ki Jezu poripurnn toren aplea Bapachi dekh gheta, ani te dogui ek-sarkech zaun asat. Toxench, Jehovan Jezuk hea prithumer dhaddunk ek karonn mhunnttlear, Jezu vorvim munxakullak apleachi anik bori vollokh mellʼlloli taka zai asli, hem hanv zannam zalem.” (Ju. 14:9) Tor Jehova pasot tumcho mog vaddounk, tumi Jezu vixim anikui xikonk vell kaddunk zata. Oxem kelear, Jehova pasot tumcho mog vaddttolo ani tumi sodanch taka visvaxi ravonk pavtolim.

16. Visvaxi ravlolean amkam koslim besanvam mellonk xoktat? (Stotr 18:25; 37:28)

¹⁶ Ami dusreank visvaxi astat tednam, amkam pasun borim ixttam mellonk xoktat, jim amkam visvaxi astat. (Ruth 1:14-17) Toxench ami Jehovak visvaxi ravtat tednam, to amcho ek boro ixtt zaunk xokta ani amkam monachi xanti melltta. Karonn ami taka visvaxi ravlear, to-ui amkam visvaxi ravtolo mhunn bhas dita. (Stotr 18:25; 37:28 vachat.) Hea vixim chintat. Sorvpodvedar Rochnnara mukhar ami kainch nhoi. Tori astana, to amcho sodanch mog kortolo mhunn amkam bhas dita. Ani Jehova lagim amchi ixttagot ghott asta tednam khoinchich oddchonn, virodhi vo moronn pasun, ti moddunk xokona. (Dan. 12:13; Luk. 20:37, 38; Rom. 8:38, 39) Tor Danielachi dekh gheun ami sodanch Jehovak visvaxi ravom-ia!

17-18. Daniela thaun ami anik kitem xikonk zata?

¹⁷ Hea lekhant, ami Danielachea fokot don gunnancher dhean dilem. Punn tache thaun ami anik zaitem xikonk zata. Jehovan taka zaitim dorxonam ani sopnam dakhoilim. Tea bhair, bhasaunneancho orth sangonk taka tank dili. Tantuntleo zaiteo bhasaunneo ghoddon aileat, ani thoddeo fuddarak ghoddttoleo, zancho probhav sonvsaracher aslolea dor eka munxacher zatolo.

¹⁸ Fuddlea lekhant, Danielan sanglolea don bhasaunneam vixim ami polloitolim. Teo bhasaunneo somzolʼlean amkam sogleank, tornnatteank toxench zanntteank, atam bore nirnnoi korunk modot zatoli. Toxench, dhirvont ani visvaxi ravcho amcho nichov ami anikui ghott korunk pavtolim, jea vorvim beginuch ghoddcheo asat tea ghoddnneam pasot ami toiar astolim.