1. Hebrevank 12:1-a pormonnem, jivitachi dhanvodd sompounk ami kitem korunk zai?

 KRISTANVAM eke dhanvddent asat mhunn Bible-ant sanglam. Ani hi dhanvodd dhanvon sompoitat, tankam sasnachem jivit melltta. (2 Tim. 4:7, 8) Tor ami dhanvot ravonk amchean zata tem soglem korunk zai. Karonn hi dhanvodd sompchich asa. Apostl Paulun tachi dhanvodd dhanvon sompoili. Ani ti jikhonk amkam koxi modot zatoli tem tannem sanglem. Tannem mhunnttlem: “Aplea bharan amkam chepun dovorta tem sogott ami soddun dium-ia . . . xevottak porian thiraien dhanvot ravum-ia.”—Hebrevank 12:1 vachat.

2. ‘Aplea bharan amkam chepun dovorta tem sogott ami soddun diunk zai,’ hacho orth kitem?

²‘Aplea bharan amkam chepun dovorta tem sogott ami soddun diunk zai,’ oxem Paulun mhunnttlolem. Hacho orth, amkam goroz nant teo sogleo vostu bhair uddovop. Karonn oslea vostunk lagon ami thokonk xoktat, ani amchi dhanvodd sovkas zaunk xokta. Tor amchea lagim osleo vostu asat kai, mhunn ami rokddench vollkhon teo bhair uddounk zai, jea vorvim ami thiraien dhanvonk pavtolim. Punn thodde bhar asat je ami ubarunk zai ani bhair uddounk zainant. Na zalear, ami tea dhanvddent dhanvonk purtim aschimnant. (2 Tim. 2:5) Tor ami kosle bhar ubarun vhoronk zai?

3. (a) Galasiekarank 6:5-a pormonnem, ami kitem vhoronk zai? (b) Hea lekhant ami kitem xiktolim, ani kiteak?

³ Galasiekarank 6:5 vachat. Paulun hea versant, ami amchea  sangata vhoronk zai tea bhara vixim oxem sanglem: “Dor eklo aplem vojem apunnuch ukoltolo.” Tor ami dor eklean kitem kelʼlem Jehovak zai tea vixim apostl Paulu hanga sangtalo. Ani hem dusrim amchea pasot korunk xokonant. Hea lekhant “aplem vojem” hantunt kitem mellon asa, ani tem ami koxem vhoronk zata tem ami polloitolim. Toxench, ami ghoddie goroz nant tosle bhar gheun dhanvtat astolim. Tor te kosle bhar, ani te ami koxe bhair uddounk zatat tem-ui ami polloitolim. Ami svotachem vojem vo bhar vhortat, ani goroz nant te bhair uddoitat tednam, jivitachi dhanvodd dhanvon sompounk amkam modot zatoli.

4. Somorponnachi bhas pallop kiteak kotthin nhoi? (Chitr pasun polloiat.)

⁴ Somorponnachi bhas. Ami Jehovak amchem jivit somorponn kelʼlem tednam, tachi bhokti korunk ani taka manvota tem korunk ami taka bhas dilʼli. Ani hi bhas ami pallunk zai. Oxem korop ek gombhir zobabdari zaun asa tem khorem, punn tem kotthin nhoi. Karonn Jehovan amkam tachi khuxi korunk rochleant. (Prok. 4:11) Toxench tannem amchea bhitor, taka vollkhon gheunchi ani tachi bhokti korchi itsa ghatlea, ani amkam tacheach sarki rochleant. Hea karonnank lagon  ami Jehova sangata ixttagot zoddunk pavtat, ani tachi khuxi korun amkam khuxalkai melltta. (St. 40:8) Itlench nhoi, Jehovachi khuxi pallʼllolean ani tachi Putachi dekh ghetlolean amkam ‘novean ghottai melltta.’—Mt. 11:28-30.

5. Jehovak dilʼli somorponnachi bhas purnn korunk tumkam koxi modot zatoli? (1 Juanv 5:3, 4a)

⁵ Tumi to bhar koso ubarun vhoronk zata? Tumkam don vostu modot kortoleo. Poilem mhunnttlear, Jehova pasot tumcho mog vaddoit ravat. Oxem korunk, Jehovan tumchea pasot atam poriant kitem-kitem kelam ani fuddarak koslim besanvam ditolo tacher niall korat. Jehova pasot tumcho mog jitlo vaddttolo, titlich tachi adnea pallunk tumkam sompem zatolem. (1 Juanv 5:3, 4a vachat.) Dusrem mhunnttlear, Jezuchi dekh gheiat. Jezu modotik lagon Jehova lagim magnnem kortalo, ani tannem aplem dhean inamacher dovorlem. Dekhun to Jehovachi khuxi purnn korunk pavlo. (Heb. 5:7; 12:2) Tor Jezu bhaxen, modotik lagon Jehova lagim magnnem korat. Ani sasnachea jivitachea bhorvonxeacher dhean diat. Jehova pasot tumcho mog vaddtta, ani tumi Jezuchi dekh ghetat toxim, tumi Jehovak dilʼli somorponnachi bhas purnn korunk pavtolim.

6. Ami amcheo familicheo zobabdareo kiteak purnn korunk zai? (Chitr pasun polloiat.)

⁶ Amcheo familicheo zobabdareo. Jivitache dhanvddent, ami amchea famili poros Jehova ani Jezucho chodd mog korunk zai. (Mt. 10:37) Punn hacho orth oso nhoi, ki amkam familichi kainch zobabdari na. Tachea bodlek, Jehovak ani Jezuk manvololim zaunk amchea modlea dor eklean familint asloli amchi zobabdari purnn korunk zai. (1 Tim. 5:4, 8) Ami oxem kortat tednam, ami chodd khuxal astolim. Khorem mhunnttlear, ghov ani bail eka-meka sangata mogan ani respedan vagtat, avoi-bapui aplea bhurgeancho mog kortat ani tankam proxikxonn ditat, toxench bhurgim avoi-bapaichi adnea pallttat, tednanch ek famil khuxal astoli mhunn Jehova zannam.—Ef. 5:33; 6:1, 4.

7. Familintlea dor eklean apli zobabdari koxi pallunk zata?

⁷ Tumi to bhar koso ubarun vhoronk zata? Ghov-bail, avoi-bapui ani bhurgeam pasot Bible-ant je solʼle dileat te apnnaiat. Karonn aiz sonvsarantle lok Bible-antle solʼle apnnaunchea bodlek, apleak kitem borem dista vo dusrim kitem kortat vo vhodd-vhodd zannar kitem sangtat tem apnnaitat. (Mho. 24:3, 4) Toxench, Bible-acher adarit aslolim prokaxonam vachat. Karonn tantunt, Bible-antlim totvam amchea sodanchea jivitant ami koxim apnnaunk zatat tem sanglolem asta. Zoxem, Tumcho Kuttumb Khuxal Zaunk Xokta hea pustikent, ani Sasnak Khuxalkaien Jieiat! pustokachea odheai 49 ani 50-ant, Bible-antlim totvam dilʼlim asat, jim zoddpeank, avoi-bapaink ani tornnatteank modot korunk xoktat. b Tumchea familintlim her zannam Bible-antle solʼle apnnainant zalear pasun, tumi te apnnaitolim mhunn ghott nichov korat. Oxem kelʼlean, tumchea familik faido zatolo ani Jehova tumkam zaitim besanvam ditolo.—1 Ped. 3:1, 2.

8. Ami ghetat tea nirnnoi-ancho amcher koslo porinnam zaunk xokta?

⁸ Ami ghetat tea nirnnoi-anchi zobabdari. Amkam kitem korunk zai tem svota zaun vinchun kaddunk Jehovan amkam svotontrtai dilea. Ani ami bore nirnnoi gheun khuxal aslolim taka zai. Punn ami chukiche nirnnoi ghetat tednam, tacho porinnam amkam bhogunk poddtta. (Gal. 6:7, 8) Tor vaitt nirnnoi ghetlolean, vo chintinastana uloilʼlean vo vaglolean amkam zo porinnam bhogunk poddtta, tea pasot amich zobabdar asat mhunn ami manun ghetat. Ami jem kelam taka lagon ghoddie amchem ontoskornn amkam khata astolem. Ani oxem zavop eke vatten borem. Karonn amchea chukim pasot ami zobabdar mhunn vollkhon ghetlolean, ti chuk  manun gheunk, ti sarki korunk, ani ti porot korina zaunk ami fuddem soronk xoktat. Ani oxem kelʼlean jivitachi dhanvodd dhanvot ravonk amkam adar zaunk xokta.

9. Tumi chukicho nirnnoi ghetla zalear kitem korunk zata? (Chitr pasun polloiat.)

⁹ Tumi to bhar koso ubarun vhoronk zata? Tumi chukicho nirnnoi ghetla zalear kitem korunk zata? Tumi jem kelam tem tumchean bodlunk zaina mhunn manun gheiat. Toxench, tumi oxem kiteak kelem tachim karonnam diunk vochonakat vo tumkanch guneanvkari korinakat vo ti chuk dusreancher ghalinakat. Karonn oxem kelear, tumi gorje bhair tumcho vell ani takot ibadd kortolim. Tachea bodlek, tumchi chuk manun gheiat ani atam tumi kitem korunk xoktat tacher dhean diat. Tumchea chukik lagon tumchem ontoskornn tumkam khata zalear, khaltikaien Jehova lagim magnnem korat, tumchi chuk manun gheiat, ani Jehova lagim bhogsonnem magat. (St. 25:11; 51:3, 4) Toxench, tumi konnakui dukhoilam zalear, tache lagim bhogsonnem magat, ani goroz poddlear vhoddilanchi modot gheiat. (Jak. 5:14, 15) Tumchea chukim thaun xikat, ani teo porot korina zaunk proitn korat. Tumi oxem kortat zalear, Jehova tumkam doia dakhoitolo ani goroz ti modot kortolo mhunn tumi khatri dovrunk zata.—St. 103:8-13.

10. Svota koddlean chodduch opekxa korop kiteak ek vojem zaun asa? (Galasiekarank 6:4)

¹⁰ Svota koddlean chodduch opekxa korop. Ami amkam dusream sangata sor kelem zalear, ami amchea koddlean chodduch opekxa korunk lagtolim. Ani tem amkam vojem koxem zatolem. (Galasiekarank 6:4 vachat.) Toxench, ami amkam sodanch dusream sangata sor korit ravlear, amkam tanchi nattkai zaunk xokta, ani tanchea poros ami borim asat mhunn dakhounk proitn korunk xoktat. (Gal. 5:26) Amchea koddlean zaunchem na, tem ami dusreank polloun korunk proitn kortat zalear, amkanch tras zatole. Tea bhair, amkam zai tem zaunk vell lagta tednam ami niraxi zaunk xoktat mhunn Bible sangta. (Mho. 13:12, NW) Tor amchea koddlean zaunchench na tem korunk ami opekxa kortat zalear, ami anikui niraxi zatolim. Ani ami itlim thoktolim ki jivitachea dhanvddent amchi dhanvodd sovkas zatoli.—Mho. 24:10.

11. Svota koddlean chodduch opekxa korina zaunk tumkam kitem modot korunk xokta?

¹¹ Tumi to bhar koso bhair uddounk zata? Tumche lagim korunk zaina, tachi Jehova opekxa korina. Tor tumi pasun svota koddlean tosli opekxa korchi nhoi. (2 Kor. 8:12) Toxench, Jehova tumkam dusream sangata sor korina mhunn khatri dovrat. (Mt. 25:20-23) Tumi purnn kallzan tachi seva kortat, taka visvaxi asat, ani sosnikai dakhoitat, hem taka chodd valorachem. Tumi ghoddie atam zaitem korunk sodhtat astolim. Punn tumchi pirai, bholaiki vo poristhitik lagon, tumi ghoddie titlem korunk xokchimnant mhunn khaltikaien vollkhon gheiat. Tumche piraiek vo bholaikek lagon, umkench kam korunk kotthin zatolem oxem tumkam dista zalear, Barzilai-a bhaxen mannsugen vagon tumchean tem korunk zaunchem na mhunn sangat. (2 Sam. 19:35, 36) Toxench Moizesa bhaxen, dusreanchi modot gheiat, ani sarkem zatolem zalear, tumcheo thoddeo zobabdareo dusreank vanttun diat. (Sutt. 18:21, 22) Hea toren tumi svota koddlean chodduch opekxa korinant tednam, tumi ekdom thokchimnant ani jivitache dhanvddent dhanvot ravonk pavtolim.

12. Dusreamnim ghetlolea vaitt nirnnoi-am khatir ami zobabdar kai? Somzaiat.

¹² Dusreanchea vaitt nirnnoi-am khatir svotak zobabdar tharavop. Ami dusream pasot nirnnoi gheunk xokonant. Toxench, dusreamnim ghetlolea vaitt nirnnoi-anchea porinnama thaun ami tankam vanchounk xokonant. Udharonnak, ek put vo dhuv Jehovachi seva korop bond korunk xokta. Oxem zata tednam, avoi-bapaik ji dukh bhogta ti utramnim sangonk zaina. Punn jim avoi-bapui aplea bhurgeamnim ghetlolea vaitt  nirnnoi-a khatir svotak zobabdar tharaitat, tim eka orthan jivitachea dhanvddent ek vhoddlem vojem gheun dhanvtat. Ani tannim oxem kelʼlem Jehovak naka.—Rom. 14:12.

13. Aplea bhurgean ghetlolea vaitt nirnnoi-a vixim avoi-bapain kitem ugddas dovrunk zai?

¹³ Tumi to bhar koso bhair uddounk zata? Jehovan amkam dor ekleak, ami kitem kortolim tem svota zaun vinchun kaddunk svotontrtai dilea, mhunn ami ugddas dovrunk zai. Hantunt ami Jehovachi seva kortolim kai na, ho nirnnoi pasun mellon asa. Avoi-bapaimno, tumi poripurnn nant mhunn Jehova zannam. Tumi tumchea bhurgeank bore dekhin vaddounk tumchem boreantlem-borem kelʼlem taka zai. Punn tumchim bhurgim ghetat tea nirnnoi-am pasot tim svota zobabdar asat, tumi nhoi. (Mho. 20:11) Tori astana, tumi kelʼlea chukim vixim chintit ravon, tumi tumkanch zobabdar tharaitat astolim. Toxem zalear, tumkam koxem bhogta tem Jehovak magnneant sangat ani tache lagim bhogsonnem magat. Fatti kitem ghoddlem tem tumi bodlunk xokonant mhunn to zannam. Teach borabor, tumchea bhurgeamnim ghetlolea vaitt nirnnoi-achea porinnama thaun, tumi tankam vanchoilʼlim Jehovak naka. Punn tuzo put vo dhuv Jehova lagim porot ieunk ilʼloso pasun vavr korta zalear, to udar kallzan taka porot apnnaitolo mhunn ugddas dovrat.—Luk. 15:18-20.

14. Ami guneanvkari bhavnam kallzant dovorlolim Jehovak kiteak naka?

¹⁴ Guneanvkari bhavnam kallzant dovrop. Ami patok kortat tednam amchem ontoskornn amkam khata, ani ami svotak guneanvkari tharaitat. Punn guneanvkari bhavnam amchea kallzant dovorlim zalear, ami ek vhodd bhar ubarlolea bhaxen zata, zo ami bhair udoilʼlo Jehovak zai. Tor ami amchi chuk manun ghetlea, poschatap kela, ani ti porot korina zaunk ami favo tim panvlam ghetat zalear, Jehovan amkam bhogxileant mhunn ami visvas dovrunk zata. (D.I. 3:19) Ani him panvlam ghetlea uprant, ami amkanch guneanvkari tharailolem Jehovak naka. Karonn oxem kelʼlean amkanch tras zatole mhunn to zannam. (St. 31:10) Tor ami guneanvkari bhavnam kallzant dovorlim zalear, jivitachea dhanvddent dhanvop ami soddun diunk xoktat.—2 Kor. 2:7.

15. Guneanvkari bhavnam kallzant dovorna zaunk ami kitem korunk zai? (1 Juanv 3:19, 20) (Chitr pasun polloiat.)

 ¹⁵ Tumi to bhar koso bhair uddounk zata? Guneanvkari bhavnam kallzant dovorchea bodlek, Jehova thaun amkam “khorem bhogsonnem” melltta mhunn ami ugddas dovrunk zai. (St. 130:4, NW) Kallzantlean poschatap kortoleank bhogxitana, Jehova oxi bhas dita: “Hanv . . . tanchea patkancho anink ugddas korcho na.” (Jer. 31:34) Hacho orth, amkam bhogxilea uprant Jehova tim patkam porot kednanch ugddasak haddina. Tor ami atam amchea patkancho porinnam bhogtat zalear, tacho orth Jehovan amkam bhogsunk nant oxem nhoi, mhunn ugddas dovrat. Ani tumchea patkank lagon, sobhent tumkam asloleo thoddeo zobabdareo tumi hogddaileat zalear, tea vixim chintun-chintun bejar zainakat. Karonn Jehova tumchea patkam vixim chintit ravona ani tumi-i toxem kelʼlem taka naka.—1 Juanv 3:19, 20 vachat.

16. Inam melltta tea toren dhanvonk ami kitem korunk zai?

¹⁶ Jivitachea dhanvddent ‘amkam inam mellttoloch tea toren dhanvonk’ zai. (1 Kor. 9:24) Oxem korunk ami khoinche bhar vhoronk, ani khoinche bhar bhair uddounk zai, tem vollkhop gorjechem asa. Hea lekhant ami tachim thoddim udharonnam polloilim. Punn hache bhair, anikui oxe bhar astole je ami ubarleat zait. Zoxem, Jezun mhunnttlolem: “Hispa bhair khaun ani pieun ani jivitachea uskeank lagon tumchim kallzam zodd zatolim.” (Luk. 21:34) Oslim versam ami khoim sudharnni korunk zai tem zannam zaunk modot korunk xoktat. Hea vorvim, amchea jivitachi dhanvodd ami sompounk pavtolim.

17. Jivitachea dhanvddent amkam inam mellttoloch mhunn ami kiteak khatri dovrunk zata?

¹⁷ Jivitachea dhanvddent amkam inam mellttoloch mhunn ami khatri dovrunk zata. Karonn Jehova amkam goroz ti ghottai ditolo. (Iz. 40:29-31) Tor tumchi dhanvodd sovkas zaunk dium nakat. Apostl Pauluchi dekh gheiat. Tachea mukhar aslolo inam melloun gheunk to aplea soglea bollan dhanvlo. (Filp. 3:13, 14) Hi dhanvodd tumchea pasot dusro konn dhanvonk xokona. Punn Jehovachea adaran tumi jikhonk xoktat. Tor goroz te bhar vhoronk ani goroz naslole bhair uddounk Jehova tumkam modot kortolo. (St. 68:19) Ani Jehova tumchea sangata asa zalear, tumi thiraien ti dhanvodd dhanvonk, ani ti jikhonk pavtolim!