• “Mhozo ghov porot-porot pordvar kortalo oxem mhaka distalem.”

• “Mhaka konnem tori lojek ghatlam, hanv borem disona ani hanv kainch faideachem na, oxem mhaka distalem.”

• “Hanv hea vixim konnakuch sangonk xokonaslem dekhun, hanv bhitorlea-bhitor fugar zatalem.”

• “Jehovak mhojea vixim kainch poddon vochonk na oxem mhaka distalem.”

Ghov pornography polloita dekhun bailek kitem bhogta, tem hea utrantlean kollon ieta. a Ani to zaitea mhoineam vo vorsam thaun lipon tem polloita zalear, tachea bailek ghoddie tacher anik visvas urchona. Ek bail sangta: “Mhaka mhojea ghova vixim kainch khobor na oxem mhaka dista. To mhojea thaun anik kitem-kitem lipoita mhunn konn zannam.”

Ho lekh tea bailam pasot toiar kela zanche ghov pornography-chea fasant poddleat. b Hantunt dilʼlea Bible-antlea totvam udexim tea bailank bhuzvonn mellttoli, Jehova tancho mog korta ani modot korunk toiar asa mhunn khatri mellttoli, toxench monachi xanti mellonk ani Jehova sangata ghott ixttagot samballunk modot zatoli. c

Tuzo ghov jem kitem korta tacher tum tabo dovrunk xokona tem khorem. Punn tuka anik monachi xanti mellonk tunvem thoddeo vostu korunk zatat. Zoxem:

Tuka zobabdar korinaka. Aplo ghov pornography polloita taka lagon apunn zobabdar, oxem eke bailek disonk xokta. Alice d chintʼtali: ‘Mhozo ghov mhaka soddun her bailank kiteak polloita?’ Tor tichea bhitor kitem tori unnemponn asa oxem tika distalem. Toxench thoddeo bailo, ti apli chuk oxem chin tʼtat ani poristhiti bigddonk apunn karonn oxem tankam dista. Zoxem Danielle mhunntta: “Mhozo ghov pornography polloitalo mhunn hanv ekdom ragar zatalem ani mhojem kazari jivit ibaddunk hanvuch karonn oxem mhaka distalem.”

Tuka-i oxench dista zalear ugddas dovor ki tuzo ghov kitem korta tea pasot Jehova tuka zobabdar tharaina. Karonn Jakob 1:14 sangta: “Zonn-ekleak ap-apli vondovnni vaittache vatten oddta ani  bhuloita.” (Rom. 14:12; Filp. 2:12) Tor Jehova tuka zobabdar korina, punn tum taka visvaxi asa tacho to valor korta.—2 It. 16:9.

Toxench, tujea bhitor kitem tori unnemponn asa, dekhun tuzo ghov pornography polloita oxem nhoi mhunn ugddas dovor. Hea vixoi-acher zannar oxem sangtat ki pornography polloita tea munxak sex korchi itsa itli chodd asta ki khoinchich bail ti itsa purnn korunk xokona.

Chodduch usko korinaka. Catherine-achea monant dis-bhor hench gunvta ki ticho ghov pornography polloita. Toxench Frances sangta: “Mhozo ghov khoim asa tem mhaka khobor na zalear, hanv abuz zatam. Mhaka sogloch vell usko zata.” Toxench, thoddeo bailo sangtat ki jea bhav-bhoinnank tanchea ghova vixim khobor asta, tanchea modem ti astat tednam tankam khub loz bhogta. Itlench nhoi, thoddim zannam sangtat ki tankam khub eksurponn bhogta. Karonn konnuch tanchi poristhiti somzonk xokona oxem tankam dista.

Oslea poristhitint oslem chintop ietach. Punn hea vixim chintit ravonakat. Na zalear tumkam anik chodd usko zatolo. Tachea bodlek, Jehova lagim tumchi ixttagot ghott korunk vavrat. Oxem kelʼlean, vell voita toso, tea poristhiticho fuddo korunk tumkam anik adar zatolo.—St. 62:2; Ef. 6:10.

Bible-ant sanglolea oslea bailam vixim tumi vachunk ani niall korunk zata, jim ekdom dukhi aslim. Punn Jehova lagim magnnem kelʼlean tankam bhuzvonn mellʼlli. Jehovan tanche tras kaddun uddounk nant, punn monachi xanti dili. Udharonnak, aplea poristhiti vixim Hana ekdom “khontibhorit” asli. Tori astana, tinnem Jehova lagim “zaito vell prarthon” kelem. Fuddem kitem ghoddttolem tem tika khobor nasli. Punn magnnem korun tika monachi xanti mellʼlli.—1 Sam. 1:10, 12, 18; 2 Kor. 1:3, 4.

Sobhentlea vhoddilanchi-i modot gheiat. Karonn te tumchea pasot “varo suttʼta tedna asro” ani “tufan uprasta tedna xeronn” zatole. (Iz. 32:2) Itlench nhoi, te tumkam tumche uske eke bhoinnik pasun sangonk urba diunk xoktat, ji tumkam bhuzvonn diunk xoktoli.—Mho. 17:17.

Pornography pollounchi sonvoim soddunk tum tujea ghovak modot korunk xokta kai? Ghoddie hoi. Karonn Bible dakhoun dita ki kosli-i somosia suttavi korunk vo bollixtt dusmanak harounk, “eklo aslolea poros dog zann aslear odik borem.” (Up. 4:9-12) Toxench, zannar sangtat ki ghovachi pornography pollounchi sonvoim soddunk, to ani tachi bail sangata mellon kam kortat tednam, choddxe pavtti to ti  sonvoim soddunk pavta, ani tachi bail portun tacher visvas dovrunk pavta.

Punn tujea ghovan hi vaitt sonvoim soddunk vavr kelearuch ani ghott nichov kelearuch to hi sonvoim soddunk pavtolo. Zoxem, hi sonvoim soddunk apleak boll di mhunn tannem Jehova lagim vinoti korun vhoddilanchi modot ghetlea kai? (2 Kor. 4:7; Jak. 5:14, 15) Pornography pollounchea tallnnent poddona zaunk tannem oslim pavlam ghetleant kai? Zoxem electronic sadhonam unnim uzar korop, vo taka tallnnent ghalunk xokta toslea poristhitim thaun pois ravop? (Mho. 27:12) To tuji modot gheunk ani tuka ukteponnim soglem sangonk toiar asa kai? Toxem zalear, tum taka modot korunk xoktoli!

Koxi? Hea vixim amkam Felicia-chem udharonn asa. Ticho ghov Ethan-ak lhanponnim thaun pornography pollounchi sonvoim asli. Tor Ethan-ak pornography pollounchi itsa zata tednam, tika hea vixim sompeponnim sangonk Felicia taka koxi modot korta? Ethan sangta: “Hanv mhoje baile thaun kainch lipoina. Tem mogan mhaka tallnneam thaun pois ravonk modot korta ani vella-vellar hea vixoi-acher mhoje lagim uloita. Toxench internet chodd uzar korina zaunk pasun tem mhaka modot korta.” Ethan pornography polloita dekhun, Felicia-k khub dukh zata tem khorem. Punn tem sangta, “Hanv ragan vaglear, tachi sonvoim soddunk taka modot zaunchi na. Tea pasot ami dogaim, tacheo oddchonneo tannem koxeo suttaveo korunk zatat tea vixim uloitat. Hea toren mhojem dukh somzonk taka adar zata ani taka apli sonvoim soddunk modot zata.”

Hea toren ghov-bailam eka-meka lagim uloitat tednam, ghovak tachi vaitt sonvoim soddunk modot zata. Titlench nhoi, bailek tacher porot visvas dovrunk sompem zata. Karonn ghov aplea oskotaie vixim, apunn khoim voita, kitem korta hea vixim aple baile thaun kainch lipoina tednam ti porot tacher visvas dovrunk pavta.

Tum-ui tujea ghovak hea toren modot korunk xokta oxem tuka dista? Hoi zalear, tumi sangata mellon ho lekh vachunk zata ani tea vixim ulounk zata. Tujea ghovacho dhei kitem astolo? Pornography soddop ani tuzo visvas zoddop. Tea bhair, tum tachea hea vaitt sonvoim-e vixim ulounk sodhta mhunn ragar zaunchea bodlek, tea sonvoim-ek lagon tuka kitle tras zatat, te tannem somzon gheunk proitn korunk zai. Toxench tuzo dhei kitem astolo? Hi sonvoim soddunk tuzo ghov zo kitem vavr korta tantunt taka tenko divop, ani porot tuzo visvas zoddun gheunk taka sondhi divop. Tor lok pornography kiteak polloita ani hi vaitt sonvoim koxi soddunk zata, tem tunvem ani tujea ghovan zannam zaunk poddttolem. e

Punn hea vixim uloitana tujea ani ghova modem vad-vivad zatolo oxem tuka dista zalear tunvem eka  vhoddilachi modot gheunk zata. Ani tumi taka thoddo vell tumchea sangata boson, tumchem ulovop zata tednam tumkam modot kor mhunn vinoti korunk zata. Tujea ghovan ti sonvoim soddlea uprant pasun, tacher porot visvas dovrunk tuka zaito vell lagonk xokta mhunn ugddas dovor. Tor soddun dium naka. Tuzo ghov ti sonvoim soddunk korta tea lhan-lhan kamancher dhean di. Ani vell voita toso, tumi dogaim pasiens dakhoilʼlean tumchem kazari jivit porot ghott zaunk xokta mhunn bhorvonso dovor.—Up. 7:8; 1 Kor. 13:4.

Tuzo ghov thoddo temp pornography pollovop bond korun porot polloita zalear, tannem khorench poschatap korunk na, vo to ti sonvoim soddunk pavcho na, oxem kai? Na. Chodd korun oxem nhoi. Karonn hachi taka sonvoim zalea zalear, ti soddunk taka ghoddie jivitbhor tachea add vavr korit ravonk poddot. Ani zaitea vorsam uprant pasun, to ti porot pollounk xokta. Tor tea sonvoim-echer zoit vhelam oxem taka dista zalear pasun, porot oxem zaina zaunk tannem soddunk adim jim panvlam ghetlolim, tantunt tannem anikui thir ravonk zai. (Mho. 28:14; Mt. 5:29; 1 Kor. 10:12) Tannem tachem ‘chintop ani sobhav novo korit ravonk,’ toxench ‘vaittacho dves korunk’ xikonk zai. Mhunnche pornography ani tacheach sarkim her burxim kamam, zoxem masturbation tannem pois korunk zai. (Ef. 4:23; St. 97:10; Rom. 12:9) Hem soglem korunk to toiar asa kai? Toxem zalear to sovkas-sovkas korun, purnn toren hi vaitt sonvoim ghoddie soddunk pavtolo. f

Punn tuzo ghov ti sonvoim soddunk sodhina zalear kitem? Tuka ghoddie zaite pavtti dukh bhogtolem, rag ietolo vo tuka ghat kela oxem distolem. Punn tuje sogle uske Jehovak sanglolean tuka monachi xanti mellttoli. (1 Ped. 5:7) Obheas, magnnem ani niall korun Jehova sangata tuji ixttagot ghott korit rav. Ani tum oxem korta tednam to-ui tuka lagim sortolo mhunn khatri dovor. Karonn Izaias 57:15-nt sanglam: “Khontibhorit ani khala poddloleam-i monxam sovem Hanv asam.” Ani tanchi khuxalkai porot mellonk to tankam modot korunk sodhta. Tor visvaxiponnan Jehovachi seva korit rav. Vhoddilanchi modot ghe. Ani ek-na-ek dis tuzo ghov kallzantlean poschatap korun ti sonvoim soddttolo mhunn bhorvonso dovor.—Rom. 2:4; 2 Ped. 3:9.