Tea lekhant ami xiklolim ki soglea munxam mukhar ani devdutam mukhar ek mhotvacho vixoi asa. To mhunnttlear, Jehovachem nanv povitr korop. Hea vixoi-ak, Jehovacho raz-odhikar, mhunnche Jehovachi razvottki cholounchi rit sogleam-von bori asa kai na, ho vixoi zuddlolo asa. Tea bhair, munxam ani devdut Jehovak visvaxi ravtolim kai na, ho-ui vixoi zuddlolo asa.

Jehovachem nanv ani tem povitr korop ho vixoi ekdom mhotvacho, oxem atam ami kiteak mhunnttat? Hachim tin karonnam ami polloum-ia.

Poilem, Eden bagent Soitanan Jehovachem nanv piddʼddear kelem. Tannem Evek zo prosn vicharlolo tantuntlean Jehova ek udar kallzacho Dev nhoi, ani tannem Adanv ani Evek jem nirdexon dilʼlem tem sarkem naslem, vo tem pallunk kotthin aslem, oxem dakhoun diunk to proitn kortalo. Uprant tannem Jehovan sanglolem tachem urfattem sangon, Jehova ek fottkiro mhunn sanglem ani tachem nanv piddʼddear kelem. Tea pasot, to “fott marun nanv piddʼddear korpi” zalo. (Ju. 8:44, ftn.) Ani Eve Soitanacheo fotti aikon Jehovachea add geli. Hea vorvim, tinnem Jehovak ticho raza mhunn nakarlo. (Ut. 3:1-6) Soitan aiz pasun Jehova vixim fotti sangon tachem nanv piddʼddear korit asa. Ani jim Soitanacheo fotti manun ghetat tim Jehovachea add voitat. Tor Jehovachem povitr nanv piddʼddear zavop tachea lokam pasot ek vhoddlo onʼneai zaun asa. Ani sonvsarant aslolem soglea vaittponnachem ani dukh-trasanchem hem mull karonn zaun asa.

Dusrem mhunnttlear, soglea rochnnank faido zaunk Jehova aplem nanv povitr kortolo, ani tachea nanvacher ghatlolem boglantt kaddun uddoitolo. Hem Jehovak sogleam-von mhotvachem zaun asa. Dekhun to oxem mhunntta: “Hanv mhojem vortem nanv povitr kortoloch.” (Ez. 36:23, NW) Toxench Jezun mhunnttlem: “Tujem nanv povitr zaum.” (Mt. 6:9) Hea utrantlean, Jezun dakhoun dilem ki soglea visvaxi sevokanchea magnneant sogleam-von mhotvachem kitem asonk zai. Tea bhair, Jehovachea nanvak mhoima mellop kitlem mhotvachem zaun asa, tem Bible-ant zaite pavtti sanglam. Zoxem thoddea versamnim oxem sanglam: “Tachea Nanvachi vhoddvik vollkhun, Sorvesporachem vondon korat.” (1 It. 16:29; St. 96:8) ‘Tachea nanvachea mhoimek gitam gaiat.’ (St. 66:2) ‘Sodankal tujem nanv vakhannttolom.’ (St. 86:12) Toxench, Jezu Jeruzalemantlea Devmondirant aslo tednam, tannem ek pavtti oxem mhunnttlolem: “Bapa, tujea nanvachi mhoima kor.” Tednam Jehovan sorgar thaun taka oso zobab dilʼlo: “Hanvem tachi mhoima kelea ani porot kortolom.”—Ju. 12:28. a

Tisrem mhunnttlear, Jehovacho udʼdhex, tachea nanvak zuddlolo asa. Hem somzonk, Kristachea Ek Hozar Vorsanchea Razvottkechea xevottak, nimanni porikxa zalea uprant, Jehovachea nanvak kitlem mhotv astolem tea vixim chintat. Tea vellar soglea devdutank ani munxank Jehovachea nanva vixim koxem bhogtolem? Hea prosnacho zobab zannam  zaunk ami porot, eka-mekak zuddon aslole vixoi, te mhunnttlear, munxanchem visvaxiponn ani Jehovacho raz-odhikar, hancher dhean dium-ia. Tea vellar munxank, tim Jehovak visvaxi asat mhunn dakhoun diunchi goroz poddchina. Karonn tim poripurnn astolim, tanchi purnn toren porikxa zalʼli astoli ani tankam sasnachea jivitachem inam favo zalʼlem astolem. Toxench, fokot Jehova sogleam-von bore toren raz cholounk xokta, hem-ui dakhoun diunchi goroz poddchina. Karonn tea vellar, sorgar ani prithumer jietolea sogleam modem ekvott astolo, ani tim Jehovacho raz-odhikar manun ghetolim. Punn Jehovachea nanva vixim kitem?

Tednam meren, Jehovachea nanvacher ghatlolem boglantt puson voitolem ani tem purnn toren povitr zatolem. Punn sorgar ani prithumer aslolea soglea Jehovachea sevokank, tachem nanv sodanch ekdom mhotvachem astolem. Karonn Jehova ojapacheo vostu korit asa tem tim polloitolim. Hea vixim chintat. Ek hozar vorsam raz choloilea uprant, Jezu khaltikaien razvottki porot Jehovachea hatant ditolo. Dekhun Devuch “sogleam pasot soglem zatolo.” (1 Kor. 15:28) Tea uprant, prithumer aslolim munxam ekdom khuxal astolim. Karonn tankam, “Devachim bhurgim mhunn mhoimebhorit svotontrtai mellttoli.” (Rom. 8:21) Ani Jehova purnn toren aplo udʼdhex purnn kortolo. To mhunnttlear, sorgar ani prithumer aslolim soglim, ek famil zatoli.—Ef. 1:10.

Hem soglem ghoddlea uprant, sorgar ani prithumer aslolea Jehovachea familik koxem bhogtolem? Tea vellar pasun, Jehovachea nanvak vakhannʼnni haddunk ami khub axetolim mhunn kainch dubhav na. Stotrkar Davidan pasun Devachea preronnan oxem boroilʼlem: “Jehova Devak vakhannʼnni mellom . . . Tachem voibhovi Nanv sodankal vhodd zaum.” (St. 72:18, NW, 19) Tor sasnachea sasnak Devachea nanvachi vakhannʼnni korit ravonk, amkam anik zaitim borim karonnam mellot ravtolim.

Jehova kosle torecho Dev zaun asa, tem amkam tachea nanva voilean kollon ieta. Tachea nanva vixim chintʼtana, amkam khas korun tachea moga vixim ugddas ieta. (1 Ju. 4:8) Ami sodankal ugddas dovortolim ki Jehovan mogak lagon amkam rochlim, mogak lagon soddvonnechi manddavoll keli, ani to nitivontponnan ani mogan raz choloita. Itlench nhoi, fuddarak pasun Jehova aplea sevokank koso mog dakhoita tem ami sodankal pollounk pavtolim. Haka lagon, ami sasnachea sasnak amcho mogall Bap Jehovak lagim sortolim, ani tachem vortem nanv vakhannttolim.—St. 73:28.