1. Konnem-i gombhir patok kelear Jehova kitem korta?

 KORINT sobhentlea eka munxan gombhir patok kelem tednam apostl Paulun sobhek kitem korunk sanglolem, tem ami fattlea lekhant polloilem. Tea munxan poschatap korunk na dekhun taka sobhentlean bhair kaddlo. Punn hea lekhachea mukhel versantlean amkam kolltta ki konnem-i gombhir patok kelem zalear, Jehova taka poschatap korunk modot korcho proitn korta. (Rom. 2:4) Oxem korunk to vhoddilank koso uzar korta?

2-3. Eka bhavan vo bhoinnin gombhir patok kelam mhunn amkam kolltta zalear ami kitem korunk zai, ani kiteak?

² Ek bhav vo bhoinn gombhir patok korta mhunn vhoddilank khobor na zalear, te tea munxak modot korunk xokchenant. Punn amkam hea vixim khobor asa zalear, ami kitem korunk zai? Ami tea bhav vo bhoinni lagim ulounk zai ani tankam vhoddilanchi modot gheunk sangonk zai.—Iz. 1:18; D.I. 20:28; 1 Ped. 5:2.

³ Punn to bhav vo bhoinn vhoddilank hea vixim sangonk sodhina zalear kitem? Oslea vellar, taka goroz ti modot mellonk ami vochon vhoddilank tea vixim sangonk zai. Oxem kelʼlean, ami tea bhav vo bhoinnicho mog kortat mhunn dakhoitat. Karonn to tem gombhir patok korit ravlear, Jehova sangata tachi ixttagot piddʼddear zatoli. Toxench, tachea patka vixim Sakxi naslolea lokank kollʼllem zalear Jehova Deva vixim, toxench Jehovachea Sakxeam vixim tim vaitt ulounk xoktat. Tor kotthin aslear pasun, ami Jehovacho toxench tea bhav vo bhoinnicho mog kortat dekhun, ami dhir dakhounk zai ani vhoddilank tea gombhir patka vixim sangonk zai.—St. 27:14.

 GOMBHIR PATOK KORTAT TANKAM VHODDIL KOXE MODOT KORTAT?

4. Sobhent konnem-i gombhir patok adarlam zalear vhoddilancho dhei kitem zaun asa?

⁴ Sobhent konnem-i gombhir patok adarlam zalear tankam modot korunk sobheche vhoddil tanchea modle tin purte aslolea bhavank nemtat. a Hea bhavamnim mannsugen vagonk zai ani khaltikai dakhounk zai. Gombhir patok kortolea bhavak vo bhoinnik poschatap korunk te tacher dobhav ghalunk xokonant mhunn vhoddil vollkhon ghetat. (D.S. 30:19, 20a) Raza Davidan poschatap kelo toso, soglinch poschatap korchimnant mhunn vhoddil ugddas dovortat. (2 Sam. 12:13) Karonn thoddim Jehovache solʼle apnnaunk toiar asonant. (Ut. 4:6-8) Tori astana, patok kortoleank poschatap korunk modot korop ho vhoddilancho dhei zaun asa. Tor oxem korunk tankam Bible-antlim khoinchim totvam modot kortolim?

5. Gombhir patok kortolea bhavak vo bhoinnik vhoddil mellttat tednam tannim koxem vagonk zai? (2 Timotak 2:24-26) (Chitr pasun polloiat.)

⁵ Tea munxan gombhir patok kelam tori astana to Jehovak khub moladik asa mhunn vhoddil zannant. (Luk. 15:4, 6) Tea pasot, te taka mellttat tednam vhoddil tachea sangata krur toren uloinant vo vagonant. Toxench, apunn taka mellttole tednam fokot taka prosn vichartole ani mahiti melloun ghetole mhunn vhoddil chintinant. Tachea bodlek, 2 Timotak 2:24-26-ant sanglole gunn te dakhoitat. (Vachat.) Ani vhoddil tachea lagim xant, movall ani doiall toren uloitat. Karonn tachem chintop bodlunk te taka modot korunk sodhtat.

6. Gombhir patok kelʼlea bhav vo bhoinnik mellchea poilim vhoddil Jehovachem chintop apnnaunk koso vavr kortat? (Romkarank 2:4)

⁶ Jehovachem chintop kitem asa tem zannam zaunk vhoddil vavr kortat. Gombhir patok kelʼlea bhav vo bhoinni sangata vagtana, te Pauluchim him utram ugddas dovortat: “Doia dakhoun Dev tuka poschatap korunk modot korcho proitn korta.” (Romkarank 2:4 vachat.) Tor te Jehova bhaxen patkeam sangata doiall toren vagonk proitn kortat. Tea bhair, te gonvlli asat mhunnttoch sobhechea bhav-bhoinnanchi kallji ghetana, tannim Kristachem margdorxon pallunk zai ani tachi dekh gheunk zai. (Iz. 11:3, 4; Mt. 18:18-20) Tea bhav vo bhoinnik mellchea poilim, tankam poschatap korunk modot korcho proitn korop, ho aplo dhei zaun asa mhunn vhoddil ugddas dovortat. Tea pasot, te Bible ani Bible adarit prokaxonamnim sodh kortat. Toxench, tea munxak somzonk ani tachi poristhiti zannam zaunk te Jehova lagim magnnem kortat. Tea bhair, to bhav vo bhoinn koslea karonnank lagon tea vaitt kama vixim  chintunk ani tem korunk pavlo tem zannam zaunk te proitn kortat.—Mho. 20:5.

7-8. Vhoddil Jehovachi dekh gheun patkeank koxe pasiens dakhoitat?

⁷ Vhoddil Jehovachi dekh gheun pasiens dakhoitat. Jehova patkeam sangata koso vaglo tem te ugddas dovortat. Udharonnak, Jehova Kaina sangata pasiensan vaglo. Kain apli vagnnuk bodolna zalear porinnam vaitt zatolo, punn tannem aplem aikolear apunn taka besanvam ditolo mhunn Jehovan sanglem. (Ut. 4:6, 7) Toxench, Jehovan provadi Nathanak dhaddun Davidak solʼlo dilo. Nathanan ek udharonn uzar korun Davidak poschatap korunk modot keli. (2 Sam. 12:1-7) Tea bhair, Izraelitkaram Jehovachea add patok korit aslim tednam, Jehovan ‘thar ghenastana vo porot-porot’ tanchea lagim aplea ‘provadiank dhaddle.’ (Jer. 7:24, 25) Tor aplea lokamnim poschatap kelea uprantuch apunn tankam modot kortolo mhunn Jehova ravonk na mhunn kolltta. Tachea bodlek, tannim poschatap korunk Jehovan poilem panvl ghetlem.

⁸ Eka patkeak modot kortana vhoddil Jehovachi dekh ghetat. 2 Timotak 4:2-ant sanglam toxem, te patkeam sangata “khub pasiensan” vagtat. Tor eka patkeak modot kortana, vhoddilamnim sodanch tachea sangata xantponnim ani pasiensan vagonk zai. Karonn vhoddil ragar vo bejar zale zalear, to bhav vo bhoinn vhoddilancho solʼlo aikochona vo poschatap korunk pavchona.

9-10. Vhoddilamnim tea patkeak to kiteak patok korunk pavlo tea vixim chintunk koxi modot korunk zata?

⁹ To bhav vo bhoinn koslea karonnank lagon tem patok korunk pavlo tea vixim zannam zaunk vhoddil vavr kortat. Udharonnak, Jehova sangata tachi ixttagot kiteak oskot zali? To chukonastana Bible vachop kortalo vo porgottnnent bhag ghetalo kai? To sodanch ani kallzantlean Jehova lagim magnnem kortalo kai? To vaitt vondovnneo rokddeoch nakartalo kai? Tachim ixttam konn? To koslem monoronjon polloitalo vo aikotalo? Hea vixim tannem ghetlolea nirnnoi-ank lagon, tachea chintpacher ani itsancher koso probhav poddlo? Tannem kelʼlea patkak lagon amcho Bap Jehovak kitlem dukh bhoglem tem taka kollon ailam kai?

¹⁰ Jehova sangata tachi ixttagot kiteak oskot zali, ani to patok kiteak korunk pavlo tea vixim chintunk taka modot kortat, tosle prosn vhoddil taka vicharunk xoktat. (Mho. 20:5) Oxem kortana, tannim doiall toren ulounk zai, ani tannim zannam zaunchi goroz na tosli mahiti taka vicharchi nhoi. Tea bhair, Nathanan ek udharonn uzar kelem tea bhaxen, vhoddil pasun ek udharonn uzar korunk xoktat, jea vorvim tea bhavak vo bhoinnik, tannim Jehovak kitlo dukhoila tem somzonk modot zatoli. Oxem kelʼlean, vhoddil taka poilech pavtti mellttat tednam, tannem je nirnnoi ghetlole ani tannem jem kitem kelʼlem tea vixim taka dukh bhogonk xokta, ani to ghoddie poschatap korunk pasun fuddem sorot.

11. Jezu patkeam sangata koso vaglo?

¹¹ Vhoddil Jezuchi dekh gheunk khub vavr kortat. Jivont zalea uprant, Jezun Tarsusachea Sauluk ek chintunk laita toslo prosn vicharlo. Tannem mhunnttlem: “Saulu, Saulu, tum mhaka dhumallo kiteak dita?” (D.I. 9:3-6) Toxench ‘Jezebel nanvachea baile’ vixim Jezun mhunnttlem: “Hanvem tika . . . poschatap korunk vell dilo.”—Prok. 2:20, 21.

12-13. Vhoddil tea patkeak poschatap korunk vell koso diunk xoktat? (Chitr pasun polloiat.)

¹² Vhoddil Jezuchi dekh ghetat, ani to patki munis aplem chintop ani vagnnuk bodolcho na mhunn rokddech chintinant. Vhoddil taka poilech pavtti mellttat tednam, thoddim poschatap kortat punn thoddeank vell lagta mhunn te ugddas dovortat. Tor taka mellonk te porot manddavoll korunk xoktat. Thodde pavtti tea patki munxak poilech pavtti mellʼllea uprant, vhoddilamnim taka jem sanglam tea vixim to chintit  ani khaltikai dakhoun to Jehova lagim bhogsonnem magonk xokta. (St. 32:5; 38:18) Tor vhoddil taka porot mellttole tednam, tacho sobhav ghoddie vegllo asot.

¹³ Tor tea patki munxak poschatap korunk modot korunk, vhoddil taka somzon gheunk proitn kortat ani doia dakhoitat. Jehovan tanchea vavracher besanv ghalum mhunn te magtat. Ani to patki apli chuk vollkhon poschatap kortolo mhunn te bhorvonso dovortat.—2 Tim. 2:25, 26.

14. Eka patki munxan poschatap korunk konnacho hat asta, ani oxem ami kiteak mhunnonk zata?

¹⁴ Ek patki poschatap korta tednam, hi ek khub khuxalkaiechi khobor! (Luk. 15:7, 10) Tor hem soglem konnak lagon zata? Tea patki munxak nittaier haddunk vhoddil apleachean zata tem soglem kortat tem khorem. Punn patkeam vixim Paulun kitem sanglolem tacher dhean diat. Tannem mhunnttlem: “Ghoddie Dev tankam . . . poschatap korchi sondhi di-it.” (2 Tim. 2:25) Tor khoinchoch munis nhoi, punn Jehova eka patkeak aplem chintop ani vagnnuk bodlunk modot korta. Toxench, patki munxan poschatap kelea uprant kitem boro porinnam zaunk xokta tem Paulu fuddem sangta. Tem mhunnttlear, taka sotachem anikui chodd ginean melltta, to porot aplea sintidant ieta ani Soitanachea fasantlean suttonk taka modot zata.—2Tim. 2:26.

15. Poschatap kelʼlea munxak modot korunk vhoddil kitem korit ravtat?

¹⁵ Gombhir patok kelʼlea munxan poschatap kelea uprant, tacho bhavarth ghott samballunk ani Soitanacheo tallnneo nakarun sarkem tem korit ravonk, vhoddil taka anikui gonvlli bhett korit ravtat. (Heb. 12:12, 13) Hem khorem, ki tannem jem kitem kelem tem vhoddil konnakuch sangonant. Punn tankam ghoddie sobhek kitem sangonk poddot?

“SOGLEAM MUKHAR XITTKAI”

16. 1 Timotak 5:20-ant Paulun mhunnttlolim “sogleam mukhar” him utram konnank lagu zatat?

¹⁶ 1 Timotak 5:20 vachat. “Patok korit asat tankam sogleam mukhar xittkai” mhunn Paulun Timotak sanglem, zo ek vhoddil aslo. Tor “sogleam mukhar” oxem tannem mhunnttlem tednam, to akʼkhe sobhe vixim uloinaslo zait.  Punn to fokot tea thoddeach bhav-bhoinnam vixim uloitalo, zankam tea patka vixim khobor asli. To bhav tem gombhir patok korta tem tannim polloilʼlem zait, vo tea bhavan apnnem kelʼlea patka vixim tankam sanglem zait. Tor vhoddil fokot heach bhav-bhoinnank, tea patki munxak xittkaila vo sudharnni korunk modot kelea mhunn sangtole.

17. Eklean gombhir patok kelam mhunn bhav-bhoinnank khobor asa vo chodd korun tankam uprant kollttolem zalear vhoddil kosli kollounni kortole, ani kiteak?

¹⁷ Thodde pavtti, eka bhavan vo bhoinnin gombhir patok kelam mhunn sobhentlea zaitea bhav-bhoinnank khobor asot vo tea vixim tankam uprant khobor mellonk xokta. Hea babtint Paulun mhunnttlolem “sogleam mukhar,” sobhentlim soglim bhav-bhoinnam zaun asat. Tor tea bhavak vo bhoinnik xittkaila vo sudharnni korunk modot kelea mhunn vhoddil mittingek kollounni kortole. Kiteak? Hea vixim Paulu sangta ki oxem kelʼlean patkant poddona zaunk “urlolea lokank xittkaunni mellttoli.”

18. Ottra vorsam poros unnea piraiechea bautizm ghetlolea eka bhurgean gombhir patok kelam zalear vhoddil kitem kortole? (Chitr pasun polloiat.)

¹⁸ Punn 18 vorsam poros unnea piraiechea bautizm ghetlolea eka bhurgean gombhir patok kelam zalear vhoddil kitem kortole? Sobhentle vhoddil, don vhoddilank tankam mellonk manddavoll kortole. He donui vhoddil tea bhurgeak, tachea Kristi avoi-bapai sangata mellttole. b Tea bhurgean apli vagnnuk bodlunk ani poschatap korunk avoi-bapaimnim atam meren kitem kelam tem te zannam zaun ghetole. Ani to bhurgo avoi-bapaicho solʼlo manun gheta ani aplea chintpant ani vagnnukent bodol korta zalear, avoi-bapaimnim taka modot korit  ravchi ani vhoddilanchi somiti, tem mhunnttlear tin vhoddilamnim tankam mellchi goroz na mhunn te tharaitole. Karonn bhurgeank mogan xikounchi ani xist diunchi zobabdari Jehovan avoi-bapaik dilea mhunn vhoddil vollkhon ghetat. (D.S. 6:6, 7; Mho. 6:20; 22:6; Ef. 6:2-4) Tori astana, te vella-vellar avoi-bapaik mellon tea bhurgeak goroz ti modot melltta mhunn khatri korun ghetole. Punn to bhurgo aplea vagnnukent ani chintpant bodol korina ani poschatap korina zalear vhoddil kitem kortole? Oslea vellar, vhoddilanchi somiti tea bhurgeak tachea avoi-bapai sangata mellttoli.

“JEHOVA KHUB APLEMPONN DAKHOUPI ANI KAKUT KORPI DEV”

19. Gombhir patok kelam tea munxak modot kortana vhoddil Jehovachi dekh koxi gheunk sodhtat?

¹⁹ Jehovachi adnea pallinant tanchea thaun vhoddilamnim sobhechi rakhonn kelʼli Jehovak zai. (1 Kor. 5:7) Punn oxem kortana, patok kelam tea munxak poschatap korunk modot korunk pasun vhoddil apleachean zata tem soglem kortat. Taka modot kortana, to ek dis bodoltolo mhunn te bhorvonso dovortat. Karonn hea toren, “khub aplemponn dakhoupi ani kakut korpi” Jehova Devachi te dekh gheunk sodhtat. (Jak. 5:11) Apostl Juanv pasun tachea bhav-bhoinnam sangata mogan vaglo. Tannem mhunnttlem: “Mhojea mogall bhurgeamno, tumi patok korchem nhoi mhunn hanv heo vostu tumkam boroitam. Ani konnem-i patok kelam zalear amchea pasot ek modot korpi asa, zo Bapa lagim asa, mhunnche, Jezu Krist, zo nitivont asa.”—1 Ju. 2:1.

20. Ami xevottachea lekhant kitem polloitolim?

²⁰ Punn dukhachem mhunnttlear, thodde pavtti ek Kristanv poschatap korina. Tea pasot taka sobhentlean bhair kaddunk poddtta. Oslea vellar vhoddil kitem kortat tem ami xevottachea lekhant polloitolim.