OBHEASACHO LEKH 35
GIT 123 Loyally Submitting to Theocratic Order
Sobhentlean Bhair Kaddloleank Vhoddilamnim Koxi Modot Korunk Zata?
“Poschatap korchi goroz na tea 99 nitivont munxam poros ek patki munis poschatap korta tednam sorgar soglim khub khuxal zatat.”—LUK. 15:7.
MUKHEL MUDʼDO
Thoddea munxank sobhentlean kiteak bhair kaddchim poddttat, ani osleank poschatap korunk ani porot Jehovachi maniotai mellonk vhoddilamnim koxi modot korunk zata tem ami hea lekhant polloitolim.
1-2. (a) Gombhir patok kortat ani poschatap korinant tanchea vixim Jehovak koxem bhogta? (b) Patok kortat tannim kitem kelʼlem Jehovak zai?
JEHOVA sogle torechi vagnnuk manun ghena. To patkacho dves korta. (St. 5:4-6) Bible-ant aslole tache kaide ami pallʼllole taka zai. Punn ami opurnn asat dekhun, ami poripurnn toren tache kaide pallunk pavchimnant mhunn to somzota. (St. 130:3, 4) Punn teach borabor, “favo naslolea doiechem nimit diun loz naslolim patki kamam kortat” tim taka manvonant. (Jud. 4) Khorem mhunnttlear, Armageddonachea zhuza vellar “Devachi bhokti korinant tea lokancho nas” zatolo mhunn amkam Bible-ant sanglam.—2 Ped. 3:7; Prok. 16:16.
2 Tori astana, Jehovak konnanchoch nas zalʼlo naka. Ami fattlea lekhamnim polloilʼlem toxem, “sogleank poschatap korunk sondhi mellʼlloli” taka zai mhunn Bible-ant spoxttponnim sanglam. (2 Ped. 3:9) Ani Jehovachi dekh gheun, vhoddil eka patkeak poschatap korunk ani porot Jehovachi maniotai mellonk pasiensan modot kortat. Punn thodde pavtti ek patki poschatap korina. (Iz. 6:9) Vhoddilamnim taka modot korit ravlear pasun, to aplim vaitt kamam soddun dina. Tor oslea poristhitint vhoddilamnim kitem korunk zai?
“NOXTTEA MUNXAK . . . BHAIR KADDAT”
3. (a) Gombhir patok kelam to munis poschatap korina tednam vhoddilamnim kitem korunk zai mhunn Bible sangta? (b) Poschatap korina tea munxak sobhentlean bhair kaddunk to svota zobabdar asa mhunn ami kiteak mhunnonk zata?
3 Gombhir patok kelam to munis poschatap korina tednam, vhoddilamnim 1 Korintkarank 5:13-nt sanglolem margdorxon pallop gorjechem. Thoim sanglam: “Tea noxttea munxak tumchea modlo bhair kaddat.” Apunn poschatap korina zalear, apleak sobhentlean bhair kaddttole mhunn tea patkeak khobor asta. Tor taka sobhentlean bhair kaddttat tednam, tea pasot toch zobabdar asta. Dusrea utramnim sangchem zalear, jem tannem a vomplam tench to lunvta. (Gal. 6:7) Oxem ami kiteak mhunnonk zata? Karonn vhoddilamnim porot-porot taka modot korunk proitn kelear pasun to poschatap korunk nakarta. (2 Raz. 17:12-15) Aplea korneam vorvim taka Jehovachi adnea pallunk naka mhunn to dakhoun dita.—D.S. 30:19, 20.
4. Poschatap korina tea munxak sobhentlean bhair kaddla mhunn akʼkhea sobhek kollounni kiteak kortat?
4 Poschatap korina tea munxak sobhentlean bhair kaddttat tednam, tea munxak bhair kaddla mhunn akʼkhea sobhek ek kollounni kortat. b Hi kollounni tea munxak loz zaunk kortat oxem nhoi. Punn tacho “sangat dovrop bond korat,” tem mhunnttlear tachea “sangata jevunk poriant bosonakat” mhunn Bible-ant dilʼli adnea bhav-bhoinnamnim pallunk lagon hi kollounni kortat. (1 Kor. 5:9-11) Jehovan hi adnea diunk borim karonnam asat. Kiteak? Apostl Paulun sanglolem: “Ilʼlem-xem khomir akʼkhem pitt ambott korta.” (1 Kor. 5:6) Tor poschatap korina tea munxak sobhentlean bhair kaddinant zalear, tacho vaitt probhav sobhentlea her bhav-bhoinnancher poddonk xokta ani Jehovachi adnea pallop gorjechem nhoi oxem tim chintit.—Mho. 13:20; 1 Kor. 15:33.
5. Sobhentlean bhair kaddlolea eka bhava vo bhoinni vixim amchem chintop kitem asonk zai, ani kiteak?
5 Punn sobhentlean bhair kaddlolea eka bhava vo bhoinni vixim amchem chintop kitem asonk zai? Ami tachea sangata vell sarop bond kortat tem khorem. Punn taka kosloch bhorvonso na oxem ami chintinant. To eka orthan, eka sanddlolea menddrea sarko zaun asa zo porot hinddant ieunk xokta mhunn ami ugddas dovortat. Tannem aplem jivit Jehovak somorpit kelʼlem. Punn sodʼdheak to ti bhas samballina ani hem khub dhokeachem asa. (Ez. 18:31) Punn vell asa ani Jehova taka doia dakhounk toiar asa tea meren, to porot ietolo mhunn ami bhorvonso dovrunk zata. Tor sobhentlean bhair kaddlolea eka patkeak vhoddilamnim koxi modot korunk zata?
SOBHENTLEAN BHAIR KADDLOLEANK VHODDIL KOXE MODOT KORTAT?
6. Sobhentlean bhair kaddlolea eka munxak modot korunk vhoddil kitem kortat?
6 Eka munxak sobhentlean bhair kaddlea uprant, porot Jehova lagim ieunk vhoddil taka modot korop bond kortat kai? Na. Taka sobhentlean bhair kaddttole mhunn taka kolloitat tednam, tannem porot ieunk koslim panvlam gheunk zatat tem vhoddilanchi somiti taka kolloita. Titlench nhoi, tannem poschatap kela vo na tem pollounk, vhoddil thoddea mhoineam uprant porot taka mellttole mhunn sangtat. Ani to munis porot vhoddilank mellonk toiar asa zalear, vhoddil taka poschatap korun porot Jehova lagim ieunk mogan urba ditole. Punn tea vellar to poschatap korina zalear, vhoddil taka porot-porot mellon poschatap korunk modot kortole.
7. Sobhentlean bhair kaddloleank vhoddil Jehova bhaxen doia-maia koxi dakhoitat? (Jeremias 3:12)
7 Vhoddil Jehovachi dekh gheun, sobhentlean bhair kaddloleank doia-maia dakhoitat. Gombhir patok kelem tankam Jehovan koxi doia-maia dakhoili? Adlea kallar Izraelitkaram Jehova add patok kortalim tednam, tannim poschatap kelea uprant apunn tankam modot kortolo mhunn Jehova ravonk na. Punn tannem poilem panvl gheun, porot-porot aplea provadeank tanchea lagim dhaddun tankam poschatap korunk modot keli. Toxench, hea masikachea dusrea lekhant ami polloilʼlem ki Hoseachi bail Gomer gombhir patok kortali tednam, Jehovan Hoseak tika bhogsun porot haddunk sanglem. Hantuntlean, apunn kitlo doia-maia dakhoupi Dev tem Jehova amkam xikounk sodhtalo. (Hos. 3:1; Mal. 3:7) Tor heach toren, vhoddil pasun Jehovachi dekh ghetat ani sobhentlean bhair kaddla to munis porot Jehova lagim ieum mhunn te kallzantlean axetat. Hea pasot te taka poschatap korunk modot korit ravtat.—Jeremias 3:12 vachat.
8. Sobhentlean bhair kaddloleam vixim Jehovak koxem bhogta tem sanddlolea putachea voparintlean amkam anik bore toren koxem somzota? (Lukas 15:7)
8 Toxench, hea masikachea dusrea lekhant polloilʼlea sanddlolea putachea voparicho ugddas korat. Tea bapain aplea putak polloilo tednam, tannem ‘dhanvon vochon taka veng marli, ani to mogan tache ume gheunk laglo.’ (Luk. 15:20) Tor aplo put aplea lagim ieun bhogsonnem magtolo mhunn to bapui ravonk na. Tachea bodlek, to tacho mog kortalo dekhun, to poilem panvl gheun tachea puta sorxim gelo. Apleak soddun geleant tanche vixim pasun Jehovak toxench bhogta. Ani Jehovachi dekh gheunk vhoddil apleachean zata tem soglem kortat. Jehovachim sanddlolim menddram porot ailʼlim tankam zai. (Luk. 15:22-24, 32) Ani ek patki porot ieta tednam, sorgar toxench prithumer khub khuxalkai asta!—Lukas 15:7 vachat.
9. Patki munxamnim kitem kelʼlem Jehovak zai?
9 Atam poriant ami polloilem toxem, gombhir patok kortat ani poschatap korinant tankam sobhentlean bhair kaddlolim Jehovak zai. Punn to munis porot aplea lagim ailʼlo Jehova zai dekhun, Jehova taka modot korit ravta. Patki munis poschatap korun porot Jehova lagim ieta tednam, Jehovak koxem bhogta tem amkam Hosea 14:5-ant kollon ieta. Thoim mhunnttlam: “Tanchem ovisvaxiponn Hanv pekoitolom, sogllea Mhojea Kallzan Hanv tancho mog kortolom, kiteak Mhozo rag tanche velo koddsorlo.” Hea utrantlean vhoddilank kitem urba melltta? To patki munis aplea chintpant ani vagnnukent ilʼloso pasun bodol korta zalear, vhoddilamnim rokddich taka modot korunk zai. Ani hea utrantlean tea patkeak kitem urba melltta? Hench ki Jehova tacho mog korta ani to zata titlea begin porot aplea lagim ailʼlo Jehovak zai.
10-11. Khub tempa poilim sobhentlean bhair kaddloleank vhoddilamnim koxi modot korunk zai?
10 Punn khub tempa poilim sobhentlean bhair kaddleant tea munxam vixim kitem? Tankam vhoddilamnim koxi modot korunk zai? Hea munxank jea patkak lagon sobhentlean bhair kaddlolim, tem patok korop tannim khub temp poilim bond kelem zait. Vo thoddea zannank, tankam koslea karonnank lagon sobhentlean bhair kaddlolim tem ugddas pasun na astolo. Punn kitem-i zaum, vhoddilamnim him munxam khoim asat tem sodhunk zai ani tankam bhett diunk zai. Tankam mellʼllea uprant, vhoddilamnim tanchea sangata magnnem korunk zai ani tankam porot sobhent ieunk urba diunk zai. Him munxam zaitim vorsam thaun Jehova ani tache songottnne thaun pois aslim mhunnttoch, Jehova sangata tanchi ixttagot khub oskot zalea mhunn dubhav na. Tor apnnak porot sobhent ieunchi khuxi asa mhunn to munis sangta zalear, to porot Sakxi zaunchea poilim pasun tachea sangata Bible obheas korunk vhoddil manddavoll korunk xoktat. Punn dor eka munxachea babtint, tacho Bible obheas konn ghetolo tem fokot vhoddil tharaitole.
11 Vhoddil Jehovachi dekh gheun doia-maia dakhoitat mhunnttoch, te sobhentlean bhair kaddlolea zata titlea zannank mellon, tankam sobhent porot ieunk urba ditole. Ani him munxam aplea chintpant ani vagnnukent bodol korun poschatap kortat tednam, tankam porot Sakxi korunk vhoddilamnim anik vell korcho nhoi.—2 Kor. 2:6-8.
12. (a) Vhoddilamnim khas korun khoinchea poristhitimnim chotrai dovrunk zai? (b) Umkech torechim gombhir patkam kelʼlea munxank Jehova kednanch bhogxichona oxem ami kiteak chintchem nhoi? (Futtnott pasun polloiat.)
12 Thoddea poristhitimnim, gombhir patok kelʼlea eka munxak porot sobhent gheunchea poilim vhoddilamnim chotrai dovrunk zai. Udharonnak, tea munxan bhurgeancher otʼteachar kelʼlo vo dhorm-broxtt kelʼlo vo aplem kazar moddunk manddnni kelʼli zalear, tannem khorench poschatap kela mhunn vhoddil khatri korun ghetole. (Mal. 2:14; 2 Tim. 3:6) Kiteak? Karonn vhoddilamnim sobhentlea bhav-bhoinnanchi rakhonn korunk zai. Teach borabor, zannem patok kelʼlem tannem apli vaitt vagnnuk soddun dilea ani kallzantlean poschatap kela zalear, Jehova taka porot apnnaitolo mhunn ami ugddas dovrunk zai. Tor tea patki munxan khorench poschatap kela mhunn vhoddilamnim khatri korun gheunk zai tem khorem, punn Jehova taka kednanch bhogxichona oxem tannim kednanch chintchem nhoi. c—1 Ped. 2:10.
BHAV-BHOINNAMNIM KITEM KORUNK ZATA?
13. Vhoddilamnim xittkailʼlea vo sudharnni korunk modot kel’lea eka bhava vo bhoinni sangata ani sobhentlean bhair kaddlolea eka munxa sangata ami koxim vagtat?
13 Ami fattlea lekhant polloilʼlem toxem, eka bhava vo bhoinnik xittkailam vo sudharnni korunk modot kelea mhunn kollounni kelear pasun ami tachea sangata vell sarunk zata. Karonn tannem aplem chukichem chintop ani vagnnuk bodolʼlea. (1 Tim. 5:20) Tor to azunui sobhecho bhag asa ani sarkem tem korit ravonk taka bhav-bhoinnanchea urbechi goroz asa. (Heb. 10:24, 25) Punn eka munxak sobhentlean bhair kaddttat tednam, poristhiti khub veglli asta. Oslea eka munxa sangata ami ‘vell sarop bond kortat’ ani ‘tachea sangata jevunk poriant bosonant.’—1 Kor. 5:11.
14. Sobhentlean bhair kaddlolea eka munxa vixim dor eka Kristanvan aplea Bible adarit ontoskornna pormonnem koslo nirnnoi gheunk zata? (Chitr pasun polloiat.)
14 Tor 1 Korintkarank 5:11-cho orth oso kai, ki sobhentlean bhair kaddlolea eka munxak ami mittingek apounk zaina vo to mittingek ailear taka zap korunk zaina? Na, toxem nhoi! Ami tea munxa sangata vell sarchimnant tem khorem. Punn to amcho ghorcho vo soiro zaun asa vo lagxilʼlo ixtt aslo zalear, taka mittingek apounchem kai na tem ami amchea Bible adarit ontoskornna pormonnem tharaunk zata. Ani to mittingek ailo zalear kitem? Adim ami tea munxak zap pasun korinaslim. Punn atam, dor eka Kristanvan aplea Bible adarit ontoskornna pormonnem, taka ek lhan zap diunchi kai na vo taka ieukar diuncho kai na tem tharaunk zata. Punn oxem kelear pasun, ami tea munxa sangata chodd ulounchimnant vo tea munxa sangata vell sarchimnant.
Sobhentlean bhair kaddlolea eka munxak mittingek apouncho kai na, vo to mittingek ieta zalear taka zap korchi kai na, hea vixim dor eka Kristanvan aplea Bible adarit ontoskornna pormonnem nirnnoi gheunk zata (Peregraf 14 polloiat)
15. 2 Juanv 9-11-nt apostl Juanv konnam vixim uloitalo? (“ Juanv Ani Paulu Ekach Torechea Patka Vixim Uloitale Kai?” hem boks pasun polloiat.)
15 Punn thoddim ghoddie chintit: ‘Oslea munxank zap kelear, ami tanchea noxttea kamamnim bhagidar zatat oxem Bible sangta nhoi?’ Khorem mhunnttlear, 2 Juanv 9-11-chea poilea ani uprantchea versamnim apostl Juanv oslea munxam vixim uloitalo, je dhorm-broxtt korpi asat ani dusreank Bible-a add voitat toslim kamam korunk uksaitat. (Vachat.) (Prok. 2:20) Tor oslea munxank vhoddil bhett pasun korinant. Tori astana, tim poschatap kortolim mhunn ami bhorvonso dovrunk zata. Punn tea mhunnosor, ami tankam zap korchimnant vo tankam mittingek pasun apounchim nant.
JEHOVA BHAXEN DOIA-MAIA ANI KAKUT DAKHOIAT
16-17. (a) Patkeamnim kitem kelʼlem Jehovak zai? (Ezekiel 18:32) (b) Vhoddilamnim Jehova sangata koxem kam korunk zata?
16 Hea masikent, Jehovak konnanchoch nas zalʼlo naka mhunn ami xiklim. (Ezekiel 18:32 vachat.) Punn patki munxamnim porot aplo favor melloun ghetlolo Jehovak zai. (2 Kor. 5:20) Tea pasot, taka soddun gelʼlea sogleank, poschatap korun portun aplea lagim ieunk Jehovan porot-porot urba dili. Ani vhoddil Jehova sangata kam korun, gombhir patkam keleant tankam poschatap korunk modot korunk vavr kortat.—Rom. 2:4; 1 Kor. 3:9.
17 Ek patki munis poschatap korta tednam, sorgar kitli khuxalkai asta tea vixim chintat! Dor ek pavtt ek sanddlolo menddro sobhent porot ieta tednam, amcho mogall Bap Jehovak khub khuxalkai bhogta. Ani Jehova jea toren doia-maia, kakut ani favo nasloli doia dakhoita tacher ami niall kortat tednam, Jehova pasot amcho mog vaddot voita.—Luk. 1:78.
GIT 111 Khuxal Ravonk Sobar Karonnam
a Hea lekhant, gombhir patok kelam to ek bhav oxem ami mhunnom-ia. Punn hantunt sangloli mahiti bhoinnank pasun lagu zata.
b 1 Korintkarank 5:13-nt Paulun sanglolea pormonnem, hea munxank ami sobhentlean bhair kaddlolim oxem mhunnttat. Tor Inglez bhaxent ami uzar kortalim tem “disfellowshipped” hem utor, ami atam thaun uzar korchimnant.
c Thoddeank bhogsonnem mellonk xokona oxem Bible sangta. Him munxam oslim asat, zannim sodanch Jehovacho virodh korunk vinchun kaddlam. Punn ekleak bhogsonnem favo zaunchem na, hea vixim fokot Jehova ani Jezu tharaunk xoktat.—Mk. 3:29; Heb. 10:26, 27.
