OBHEASACHO LEKH 31
GIT 12 Great God, Jehovah
Tumkam Patkantlean Ani Mornnantlean Soddounk Jehovan Kitem Kelam?
“Devan sonvsaracho itlo mog kelo ki tannem aplea ekleach Putak dilo.”—JUANV 3:16.
MUKHEL MUDʼDO
Patkacher zoit mellounk, taka manvota tea toren tachi bhokti korunk ani sasnachem jivit mellonk, Jehovan amchea pasot kosli manddavoll kelea tem ami hea lekhant polloitolim.
1-2. (a) Patok mhunnttlear kitem, ani amkam kosli gerentti asa? (“Utrachi Somzonni” hem pasun polloiat.) (b) Hea lekhant ani hea Pahrogopur-ant aslolea her lekhamnim ami kitem polloitolim? (Hea masikent, “Vachpeam Pasot Ek Note” hem pasun polloiat.)
JEHOVA tuzo kitlo mog korta tem tum zannam zaunk sodhta kai? Hoi zalear, amkam patka ani mornna thaun suttka diunk Jehovan kitem kelam hacher ami obheas korunk zai. Patok a ek oslem dusman zaun asa, zachea add ami svota zaun kednanch zhuzonk pavchimnant. Ami soglim patki. Ami dor disak patok kortat ani patkak lagon mortat. (Rom. 5:12) Punn Jehova amkam gerentti dita ki to amkam patka ami mornna thaun suttka ditoloch!
2 Sumar 6,000 vorsam thaun, Jehova patki munxank aplim ixttam zaunk modot korit asa. Karonn munxank rochleant tednam thaun, Jehova amcho khub mog korta ani patka add zhuzonk amkam modot korunk tannem zaitem kelam. Patkak lagon ami mortat hem to bore bhaxen zannam. Ani ami melolim taka naka, punn ami sasnak jielʼlim taka zai. (Rom. 6:23) Tum pasun sasnak jielʼlo Jehovak zai! Tor hea lekhant ami tin prosnanche zobab polloitolim: (1) Patki munxank Jehovan koslo bhorvonso dila? (2) Jehovak manvololim zaunk adlea kalla voilea opurnn munxamnim kitem kelem? (3) Munxank patka ani mornna thaun soddounk Jezun kitem kelem?
PATKI MUNXANK JEHOVAN KOSLO BHORVONSO DILA?
3. Amchim poilim avoi-bapui patki koxim zaunk pavlim?
3 Jehovan poilea dadleak ani bailek rochlim tednam tim khuxal aslolim taka zai aslem. Tea pasot, tannem tankam eke sobit bagent dovorlim, tankam kazarachea ekvottant ektthaim haddlim ani tankam khuxalkai melltta toslem kam dilem. Tem mhunnttlear, akʼkhi prithum tanchea sonstin bhorunk ani Eden bage bhaxen sobit korunk tankam sueog aslo. Jehovan tankam fokot ekuch adnea dilʼli ani tannim mudʼdom zaun ti adnea moddlear tim mortolim mhunn tankam sanglolem. Uprant kitem zalem tem ami zannant. Ek noxtto dut zo Jehovacho toxench munxancho mog korinaslo, tannem Adanv ani Evek Jehovachea add vochonk uksailim. Ani Jehovacher visvas dovorchea bodlek, Adanv ani Even to noxtto dut Soitanacher visvas dovorlo ani Jehovan tankam kitlo mog dakhoilʼlo tem tim visorlim. Tannim Jehovachi adnea moddli. Hea karonnak lagon Jehovan sanglolem toxench zalem. Tim Jehovachea add gelim tea disa thaun tankam patkacho porinnam bhogunk poddlo. Tem mhunnttlear, tim zannttim zaun melim.—Ut. 1:28, 29; 2:8, 9, 16-18; 3:1-6, 17-19, 24; 5:5.
4. Jehova patkacho dves kiteak korta? (Romkarank 8:20, 21)
4 Amkam ek mhotvachem lisanv xikonk Jehovan hi dukhachi ghoddnni Bible-ant boroun dovorli. Karonn hea vorvim, Jehova patkacho itlo dves kiteak korta tem amkam kolltta. Patkak lagon Jehova sangata amchi ixttagot piddʼddear zata ani tem amkam mornnak pavoita. (Iz. 59:2) Ani oxench zalʼlem Soitanak zai! To Jehovacho ani munxakullacho dves korta. Ani teach pasot tannem Adanv ani Evek patok korunk naddlim ani aiz pasun to toxem korit asa. Tor Adanv ani Even patok kelem tednam, apunn jikhlo mhunn Soitanan chintlem astolem. Punn Jehova kitlo mogall tem to somzonk chuklo. Adanv ani Eveche sonsti pasot Jehovan aplo udʼdhex bodlunk na. To munxakullacho mog kortalo dekhun tannem rokddoch tankam sogleank bhorvonso dilo. (Romkarank 8:20, 21 vachat.) Adanv ani Evechea sonsti modlim thoddim aplo mog kortolim ani apleachem aikonk sodhtolim mhunn to zannam aslo. Tea pasot, tankam mornna ani patka thaun soddounk ani apleak lagim soronk Jehovan ek manddavoll keli. Ti kosli?
5. Jehovan munxakullak ek bhorvonso kednam dilo? Somzaiat. (Utpoti 3:15)
5 Utpoti 3:15 vachat. Apunn Soitanacho nas kortolo ani ek ‘sonsot’ utpon kortolo mhunn Jehovan rokddench sanglem. Hea vorvim, tannem munxakullak ek bhorvonso dilo. Hi sonsot, Soitanacho nas kortoli asli ani Eden bagent suru zalʼle sogle tras suttavi kortoli asli. (1 Ju. 3:8) Punn oxem zaunchea poilim, Soitan tea sonstichea khonttek chabcho aslo vo taka jivexim marcho aslo. Hea vorvim, Jehovak khub dukh zatolem aslem. Punn tem pasun sosunk to toiar aslo. Karonn tea sonsti vorvim koroddamnim lokank, xevottak patok ani mornnantlean suttka mellttoli asli!
JEHOVAK MANVOLOLIM ZAUNK ADLEA KALLA VOILEA OPURNN MUNXAMNIM KITEM KELEM?
6. Abel, Noah ani her visvaxi munxamnim Jehovak lagim soronk kitem kelem?
6 Vell soron gelo toso patki munxam apleak lagim koxim soronk xoktat tem Jehovan kolloilem. Adanv ani Eve Eden bagent Jehovachea add gelea uprant, tancho dusro put Abel Jehovacher bhavarth dovrunk poilo aslo. To Jehovacho mog kortalo, taka manvota tem korunk sodhtalo, ani tache lagim ixttagot korunk sodhtalo dekhun tannem Jehovak bolidan bhettoilem. To ek gonvlli aslo. Tor tannem aplea hinddantlea thoddea lhan menddranchem Jehovak bolidan bhettoilem. Hea vixim Jehovak koxem bhoglem? “Sorvesporak Abel ani tachi bhettovnni manovlim.” (Ut. 4:4) Heach toren, Jehovacho mog kortalim ani tacher visvas dovortalim toslea her munxamnim, zoxem Noah-n dilʼlim bolidanam pasun Jehovan manun ghetlim. (Ut. 8:20, 21) Oxem korun, Jehovan dakhoun dilem ki patki munxank pasun apli maniotai mellonk xokta ani tim apleak lagim soronk xoktat. b
7. Abraham aplea putak bhettounk toiar zalo hantuntlean ami kitem xiktat?
7 Jehovacho sevok Abrahamak pasun tacher ghott bhavarth aslo. Jehovan taka ek ekdom kotthin kam korunk sanglem. Tem mhunnttlear, Jehovan taka tachea ekleach putak Izakak bolidan mhunn bhettounk sanglo. Hea vixim chintunuch Abrahamak khub dukh zali astoli. Tori astana, to Jehovachi adnea pallunk fuddem sorlo. Punn to aplea putak marchoch aslo tednam, Jehovan taka addailo. Tor Izakacho jiv salvar zalo. Punn hea ghoddnnentlean ami ek mhotvachem lisanv xiktat. Jehova fuddarak aplea opurbaiechea Puta sangata oxench korcho aslo. To munxancho itlo mog korta dekhun, to aplea Putak tanchea pasot bolidan mhunn bhettounk toiar zalo.—Ut. 22:1-18.
8. Zonvaranche iodn kitem dakhoun ditale? (Levi-Xastr 4:27-29; 17:11)
8 Thoddea xekddeam uprant, Jehovan Izraelitkarank dilʼlea Kaideant sanglem ki tankam aplea patkanchem bhogsonnem mellonk tannim iodn bhettounk zai asle. (Levi-Xastr 4:27-29; 17:11 vachat.) He iodn dakhoun ditale ki fuddarak Jehova ek vhoddlo iodn bhettoitolo, jea udexim to munxank patka thaun purnn toren salvar kortolo. Jehovan aplea provadeam vorvim sanglem ki eka sonsti thaun eklo zolmotolo ani iodn mhunn bhettoilʼlea eka menddrea sarko, taka tras sosunk poddttole ani taka martole. Ho Devacho ek khas Put zaun aslo. (Iz. 53:1-12) Chintat, munxank patka ani mornna thaun soddounk, Jehova aplea ekleach Putak bhettoitolo mhunn tannem bhas dili. Hem tannem tujea pasot, hoi, tujea pasot kelem!
MUNXANK PATKA ANI MORNNA THAUN SODDOUNK JEZUN KITEM KELEM?
9. Juanv Batistan Jezu vixim kitem mhunnttlem? (Hebrevank 9:22; 10:1-4, 12)
9 29 K.X.-ant, Juanv Batistan Nazaretkar Jezu vixim oxem mhunnttlem: “Polloiat, Devacho Menddro zo sonvsarachim patkam kaddun uddoita!” (Ju. 1:29) Him utram, Jezuch Devan bhasailʼli khas sonsot mhunn dakhoun ditalim. Jezu vorvim tankam bhorvonso mellcho aslo. Karonn Jezu aplo jiv bolidan korun munxank patka thaun suttka diuncho aslo.—Hebrevank 9:22; 10:1-4, 12 vachat.
10. Jezu patkeank ‘apounk ailʼlo’ mhunn tannem koxem dakhoilem?
10 Jea munxank tannim kelʼlea patkank lagon niraxiponn bhogtalem, tancher Jezun khas korun dhean dilem ani tankam modot keli. Karonn patok munxachea trasanchem mull karonn mhunn to zannam aslo. Tor zankam aplea patkank lagon tras bhogunk poddttale, tankam Jezu modot korunk fuddem sorlo. Tannem ek udharonn diun oxem mhunnttlem: “Bholaiken bore asat tea lokank nhoi, punn duent asat tankam voizachi goroz asa.” Fuddem tannem mhunnttlem: “Hanv nitivont lokank nhoi, punn patkeank apounk ailam.” (Mt. 9:12, 13) Ani Jezun toxench kelem. Ek patki bailen aplea dukhamnim tache paim dhuile tednam, Jezu tichea sangata doiall toren uloilo ani tichim patkam bhogxilim. (Luk. 7:37-50) Toxench, Samariechi ek bail, ji onoitik jivit jietali, tika Jezun mhotvachim sotam sanglim. (Ju. 4:7, 17-19, 25, 26) Tea bhair Jehovan Jezuk mornnacher pasun zoit vhoronk xokti dili, zaka lagon Jezu dadleank, bailank ani bhurgeank pasun jivont korunk pavlo.—Mt. 11:5.
11. Patki munxam Jezu lagim ieunk ani tache lagim ulounk kiteak bhieunk nant?
11 Patki munxam Jezu lagim ieunk ani tache lagim ulounk kiteak bhieunk nant tem ami somzonk xoktat. Karonn tankam koxem bhogta tem Jezu bore bhaxen somzolo ani tanchea sangata doiall toren vaglo. (Luk. 15:1, 2) Toxench, apleacher bhavarth dovortoleank Jezun xabaski dili ani tankam taronn mellonk sondhi dili. (Luk. 19:1-10) Jea toren Jezu lokam lagim uloilo ani vaglo, tantuntlean Jehova khub doiall, to patkeancho khub mog korta ani tankam modot korunk axeta mhunn tannem dakhoilem. (Ju. 14:9) Ani patki lokamnim tanchem jivit bodlunk ani aplo pattlav korunk Jezu tankam modot korunk sodhtalo.—Luk. 5:27, 28.
12. Aplea mornna vixim Jezun aplea xisank kitem sanglem?
12 Apunn dusream pasot aplo jiv bolidan diuncho asa mhunn Jezuk khobor asli. Apleak visvasghat kortole ani khambear khillaitole mhunn tannem aplea xisank eka poros chodd pavtti sanglolem. (Mt. 17:22; 20:18, 19) Juanv Batistan ani provadeamnim sanglolea pormonnem, tachea mornna udexim to sonvsarachem patok kaddun uddoitolo mhunn Jezuk khobor asli. Aplem jivit bolidan mhunn bhettoilea uprant, to ‘soglea torechea lokank aplea lagim voddun haddcho aslo’ mhunn Jezun xikoilem. (Ju. 12:32) Jezu Kristachea bolidanacher visvas dovrun ani tachea panvlamnim cholon, patki munis pasun Jehovak manvolole zaunk xoktale. Tannim oxem kelear tankam “patka thaun suttka” mellttoli asli. (Rom. 6:14, 18, 22; Ju. 8:32) Taka lagon, Jezun amchea pasot ap-khuxen ani dhiran itlem vollvolleanchem moronn soslem.—Ju. 10:17, 18.
13. Jezuk kitem soglem sosunk poddlem, ani tachea mornna vorvim ami Jehova vixim kitem zannam zatat? (Chitr pasun polloiat.)
13 Jezuchea eka lagxilʼlea ixttan tacho ghat kelo. Uprant tachea dusmanamnim taka dhorun vhelo, tacho opman kelo ani tacher boglanttam ghatlim. Tannim tacher mornnachem formonn marlem ani taka khub vollvollailo. Magir Romi soinikamnim taka khambear khillailo. Jezun he sogle dukh ani tras visvaxiponnan sosle. Punn Jezuk sosunk poddle te vollvolle polloun, Jehovak tachea poros chodd dukh zali. Jehovak zai zalear to hem soglem addaunk xoktalo. Punn tannem toxem korunk na. Kiteak? Amchea mogak lagon. Jezun sanglem: “Devan sonvsaracho itlo mog kelo ki tannem aplea ekleach Putak dilo. Tacher bhavarth dovortat tea sogleancho nas zaina zaunk punn tankam sasnachem jivit mellchem mhunn tannem oxem kelem.”—Ju. 3:16.
Amkam patkantlean ani mornnantlean soddounk Jezuk jivexim marlo tednam, amchean chintunk zaina titlem dukh Jehovak zalem (Peregraf 13 polloiat)
14. Jezuchea bolidana thaun tumi kitem xiktat?
14 Adanv ani Evechea patki sonsticho Jehova khub mog korta mhunn Jezuchem bolidan ek vhoddantlo-vhodd puravo zaun asa. Hea vorvim, Jehova tuzo khub mog korta mhunn tannem dakhoun dilam. Tujea pasot tannem aplea ekleach Putak bolidan koso bhettoilo, ani zaitem dukh soslem. (1 Ju. 4:9, 10) Karonn to tuka patka ani mornna thaun soddounk sodhtalo. Tor ami patki asonui, amchea modlea dor ekleak tachi seva korunk to modot korunk sodhta ani fuddarak to purnn toren patok kaddun uddounk axeta!
15. Jehovan dilʼlea soddvonnechea dennea vorvim faido mellonk ami kitem korunk zai?
15 Jehovan dilʼlea soddvonnechea dennea vorvim amkam patkanchem bhogsonnem mellonk xokta. Punn tem mellonk ami kitem tori korunk zai. Tem kitem? Hea vixim Juanv Batist ani Jezun sanglem: “Poschatap korat, karonn sorginchem Raj ieunchem zalem.” (Mt. 3:1, 2; 4:17) Tor Jehova sangata ixttagot zoddunk ani amkam patkanchem bhogsonnem mellonk, ami poschatap korunk zai. Punn poschatap mhunnttlear kitem, ani tea vorvim patki asonui Jehovak manvota tem korunk amkam koxi modot zatoli? Hacho zobab ami fuddlea lekhant polloum-ia.
GIT 18 Soddvonne Pasot Upkari
a UTRACHI SOMZONNI: Bible-ant “patok” hem utor thodde pavtti, Jehova chukichem mhunn sangta tem ami kortat vo to sarkem mhunn sangta tem ami korinant taka lagu zata. Toxench, Adanvachea patkak lagon amkam dor ekleak aslolea opurnntaiek pasun tem lagu zata. Ani hea patkak lagon aiz ami soglim mortat.
