Apostl Paulun Tesalonikentlea Kristanvank oxem boroilem: “Hea chittint boroileat teo vostu konnui pallina zalear, oslea munxacher nodor dovrat.” (2 Tes. 3:14) Adim hem margdorxon vhoddilam pasot aslem mhunn ami chintʼtalim. Sobhentlea konn ekleak Bible-antlean dilʼlo solʼlo to porot-porot nakarit ravtalo zalear, oslea munxancher nodor dovorchea vixim vhoddil ek bhaxonn ditale. Ani tea uprant, mitting vo porgottnne bhair bhav-bhoinnam hea munxa sangata vell sarinaslim.

Punn hea vixim atam bodol zala. Paulun dilʼlea hea solʼleantlean, umkeach poristhitimnim nodor dovorchea vixim dor eka Kristanvan nirnnoi gheunk zai mhunn kolltta. Tea pasot, hea fuddem nodor dovorchea vixim vhoddilamnim bhaxonn diunk poddchem na. Tor ho bodol kiteak kelo? Ho solʼlo ditana Paulu kitea vixim uloitalo tem ami polloum-ia.

Sobhent aslolim thoddim zannam “manddavolli pormonnem cholonant” mhunn Paulun polloilʼlem. Tannem tankam zaite pavtti Devachea Utrantlean solʼlo dilʼlo. Punn tim aikonk toiar naslim. Hachea poilim pasun, Paulun hea bhav-bhoinnank bhett dili tednam tannem tankam oxem sanglolem: “Konnankui kam korunk naka zalear, tannem jevchem-i nhoi.” Punn oxem sanglea uprant pasun, kam korun aplem pott bhorunk xoktalim tim toxem korinaslim. Itlench nhoi, ti goroz nastana dusreanchea kamant meter zatalim. Tor bhav-bhoinnamnim oslea munxam sangata koxem vagonk zai aslem?—2 Tes. 3:6, 10-12.

“Oslea munxacher nodor dovrat” mhunn Paulun sanglem. Hea utrank uzar kelʼlea Grik utrantlean, tea munxak vollkhop ani tacho vaitt probhav apleacher poddona zaunk chotur ravop mhunn kolltta. Paulun ho solʼlo vhoddilankuch nhoi, punn sobhentlea soglea bhav-bhoinnank dilʼlo. (2 Tes. 1:1; 3:6) Tor Bible-a thaun melltta to solʼlo konnui porot-porot nakarta mhunn ek Kristanv polloita zalear, tachea sangata apunn ‘vell sarop bond kortolo’ mhunn to nirnnoi gheunk xokta.

Tor hacho orth, taka sobhentlean bhair kaddlolea bhaxen Kristanvamnim tachea sangata vagonk zai kai? Na. Karonn Paulun mhunnttlem: “Taka ek bhav koso somzait ravat.” Tor Kristanvam ho solʼlo apnnaun, mitting ani porgottnne bhair tachea sangata vell sarchimnant. Kiteak? Ami tachea sangata vell sarop bond kelolean, taka “loz bhogtoli” mhunn Paulun sanglem. Ani hea pasot, to apli vaitt vagnnuk bodlunk xokta.—2 Tes. 3:14, 15.

Tor aiz ami sogleamnim Paulun dilʼlo solʼlo koso apnnaunk zata? Sogleam-von poilim, Paulun sanglolea pormonnem, ek umkoch munis khorench ‘manddavolli pormonnem cholona’ mhunn ami khatri korun gheunk zai. Tor Paulu hanga konnam vixim sangtalo? To oslea eka munxa vixim sangonaslo, zachem chintop amchea poros vegllem asa, punn tem Bible-a totvam add na. Toxench, to oslea-i munxa vixim sangonaslo, zannem amkam dukhoilam zait. Punn to oslea munxa vixim uloitalo, zaka porot-porot Bible-antlean solʼlo dilea uprant pasun to solʼlo to nakarit ravtalo.

Aiz eka bhavak vo bhoinnik, porot-porot Bible-antlean solʼlo melltta to tim nakartat a mhunn ami polloitat zalear, ami mitting ani porgottnne bhair tanchea sangata vell sarchimnant mhunn nirnnoi gheunk zai. Punn ho nirnnoi ami svota zaun ghetat dekhun amchi famil, tem mhunnttlear ami zanchea sangata ravtat, tanchea bhair ami konnam-i lagim hea vixim ulounchimnant. Punn tea bhavan vo bhoinnin aplo sobhav ani vagnnuk bodolʼli zalear, ami poilim bhaxen tanchea sangata vell sartolim.