1. Jehovachea khaltikaie vixim Davidan kitem mhunnttlem?

JEHOVA khoroch khalto asa mhunn ami mhunnonk zata kai? Hoi, karonn Davidan ek pavtt oxem mhunnttlolem: “Tuje rakhnnecho ddhall, Tunvem mhaka dilai Tujea boreponnan [“tujea khaltikaien ,” NW] mhaka vaddoilai.” (2 Sam. 22:36) Him utram mhunnttana Davidak ghoddie tea disacho ugddas ailo, jednam provadi Samuel tachea Bapaichea ghora ail’lo. Att putam modlo David sogleam-von dhaktto aslo. Tori astana, tea disa provadi Samuelan taka fuddaracho Raza mhunn obhixikt kelo. Raza Sauluchea bodlek Jehovan taka vinchun kaddlo.—1 Sam. 16:1, 10-13.

2. Hea lekhant ami kitem bhasabhas kortolim?

² Stotr 113-ant, stotrkaran Jehova vixim jem kitem sanglam tem David manun gheta aslo mhunn kainch dubhav na: “Sorgar ani prithumecher nodor marta. Khalteak To dhullintlo ubarta, durbolleak xennantlo voir kaddta . . . kunvram modem taka bosoita.” (St. 113:6-8) Hea lekhant poilim, khaltikai ho gunn Jehovan koso dakhoila tea vixim ami bhasabhas kortolim ani tantuntlean mhotvachim lisanvam xiktolim. Tachea uprant, Saulu Raza, provadi Daniel ani Jezuchea udharonnantlean ami khaltikaie vixim anik xiktolim.

3. Jehova amchea sangata koso vagta, ani tantuntlean kitem dison ieta?

³ Opurnn munxam sangata Jehova jea toren vagta, tantuntlean tachi khaltikai dixtti poddtta. Tim tachi bhokti kortat tednam to fokot ti manun ghena, punn to tankam aplim ixttam mhunn lekhta. (Jak. 2:23) Punn amchea patkank bhogsonnem mellona zalear, ami tachim ixtt zaunk xokonant. Tor amchea sangata ixttagot korunk Jehovan amchea patkank lagon aplea Putachem bolidan diun amkam kitli kakut ani doia-moia dakhoilea!

4. Jehovan amkam kitem dilam, ani kiteak?

⁴ Jehova khalto asa mhunn anik ek ritin pasun dison  ieta. Rochnnar zal’lean, borem ani vaitt vinchi svotontrtai dinastana tachean amkam rochunk zatalem. Punn tannem toxem korunk na. Tannem amkam aplea rupan rochleant, ani amkam zai tem vinchun kaddchi svotontrtai dilea. Ami Jehovacho mog kortat, ani tachi adnea pall’llolean amkam faido zata mhunn ami zannant. Hea karonnank lagon, ami purnn kallzan tachi seva keloli taka zai. Ami lhan vo osokt disom, punn ami kortat ti seva to moladik mhunn lekhta. (D.S. 10:12; Iz. 48:17, 18) Jehova khalto asa dekhun ami tachim khub upkari!

5. Jehova amkam khaltim zaunk koso xikoita? (Masikachem fuddlem chitr polloiat.)

⁵ Jehova amchea sangata jea toren vagta, tantuntlean to amkam khaltim zaunk xikoita. Jehova vixvant sogleam-von zannvaiecho. Tor taka konnacheach sol’leachi goroz na. Tori astana, to dusreanchem aikota. Udharonnak, Jehovan sogleo vostu rochtana aplea Putachi modot ghetli. (Mho. 8:27-30; Kol. 1:15, 16) Jehova sorvpodvedar, tori punn to dusreankui zobabdareo dita. Udharonnak, tannem Jezuk aplea Rajeacho Raza mhunn nemla. Toxench, Jezu sangata razvottki cholounk, 1,44,000 munxankui to odhikar dita. (Lukas 12:32) Punn Jezuk, Raza ani Porom Iadnik mhunn nemchea poilim, Jehovan taka proxikxonn dilem. (Heb. 5:8, 9) Teach toren, Jezu sangata razvottki choloitoleankui to proxikxonn dita. Punn tankam zobabdari dilea uprant, to tanchea soglea kamamnim hat ghalina. Tachea bodlek, te aplem kam kortole mhunn tancher to visvas dovorta.—Prok. 5:10.

6-7. Amkam asloleo zobabdareo dusream sangata vanttchea vixim ami amchea sorginchea Bapa thaun kitem xiktat?

⁶ Amchea sorginchea Bapaik konnacheach modotichi goroz na. Tori astana, to aple thodde odhikar dusreank dita. Tor ami pasun toxench korunk zai! Udharonnak, tumi familintle vo sobhentle ek vhoddil zaun asat  kai? Toxem zalear, Jehovachi dekh gheiat. Dusream sangata tumchem kam vanttat. Ani zobabdari dilea uprant tanchea soglea kamamnim hat ghalinakat. Tumi Jehovachi dekh ghetat tednam tem kam purnn zatolem. Teach borabor tumi dusreank proxikxonn diunk pavtolim, ani Jehovacher tankam aslolo bhorvonso tumi ghott korunk pavtolim. (Iz. 41:10) Odhikar asloleamnim, Jehova thaun anik kitem xikonk zata?

⁷ Aplim sorginchim bhurgim, mhunnche ainz kitem mhunnttat tem zannam zaunk Jehovak itsa asa mhunn Bible dakhoita. (1 Raz. 22:19-22) Avoi-bapaimno, tumi Jehovachi dekh koxi gheunk zata? Tumkam ek kam korchem asta tednam tem kam koxem korunk zata tea vixim tumchim bhurgim kitem mhunnttat, tem tumchean tankam vicharunk zata. Ani tannim sanglam tem faideachem asa zalear, tem kam tea toren korunk zata.

8. Abraham ani Sara sangata Jehova respedan koso vaglo?

⁸ Jehova pasiens dakhoita tednam pasun amkam tachi khaltikai dixtti poddtta. Udharonnak, Sodom ani Gomorra nas korunk Jehovan ek nirnnoi ghetlolo. Punn tea vixim Abrahaman respedan portun-portun taka prosn vicharle. Apli seva kortolea Abrahamachem Jehovan pasiensan aikolem. (Ut. 18:22-33) Abrahamachi bail Sara sangata Jehova koso vaglo tem pasun ugddas korat. Ti zantteponnant gorbest zatoli mhunn bhasail’lem tednam ti hasonk lagli. Punn Jehova ticher ragar zaunk na. (Ut. 18:10-14) Bodlek, to tichea sangata respedan vaglo.

9. Avoi-bapaimnim ani vhoddilamnim Jehovachea udharonnantlean kitem xikonk zata?

⁹ Avoi-bapaimno ani vhoddilamno, tumi Jehovachea udharonnantlean kitem xikonk zata? Tumchim bhurgim vo sobhentlim thoddim, tumi ghetlole nirnnoi manun ghenant tednam, tumi kitem kortolim? Tumi rokddinch tanchem chintop chukichem mhunn sangtolim? Vo tim toxem kiteak chintat tem tumi zannam zauncho proitn kortolim? Odhikarant aslolim, Jehovachi dekh ghetat tednam familik ani sobhek faideak poddtta. Atam meren, Jehovachea udharonnantlean ami khaltikaie vixim xiklim. Atam ami Bible-antlea her udharonnantlean, khaltikaie vixim kitem xikonk zata tem polloum-ia.

10. Dusreanchem udharonn uzar korun Jehova amkam koso xikoita?

¹⁰ Jehova amcho Vhodd “Guruji” zal’lean tannem amkam xikonk zaitim udharonnam dovorleant. (Iz. 30:20, 21) Bible-ant Devak manvota tosle gunn aslolea lokanchim udharonnam asat. Tanchea udharonnancher ami niall kortat tednam, khaltikai ani her gunnam vixim ami xiktat. Toxench, osle bore gunn dakhounk na tankam kitem zalem, tantuntlean pasun ami xikonk xoktat.—St. 37:37; 1 Kor. 10:11.

11. Sauluchea vaitt udharonna thaun ami kitem xiktat?

¹¹ Saulu Razak kitem ghoddlem, tachea vixim chintat. Tornnatto aslo tednam to khalto aslo. Apleak unneponnam asat mhunn tannem manun ghetlem. Ani chodd zobabdareo gheunk pasun to fatti sorlo. (1 Sam. 9:21; 10:20-22) Punn thoddeach tempa uprant, to raza zalo tednam to gorvixtt zalo. Ani jeo vostu korunk taka hok’k naslo, teo vostu to korunk laglo. Eka vellar, to Samuelachi vatt polloitalo tednam tannem pasiens dakhounk na. Jehova aplea sevokank salvar kortolo mhunn tacher patieunchea bodlek tannem iodn bhettoilo, zo bhettounk taka odhikar naslo. Hacho porinnam kitem zalo? Saulun Jehovachi maniotai hogddaili ani Jehovan taka raza mhunn nakarlo. (1 Sam. 13:8-14) Sauluchem udharonn amkam ek xittkaunni zaun asa. Jem korunk amkam hok’k na, tem ami korchem nhoi.

12. Khaltikai dakhounchea vixim Daniel-an amkam ek borem udharonn koxem dovorlam?

 ¹² Provadi Daniel Saulu sarko naslo. Tannem ek borem udharonn dovorlem. Daniel ek khalto munis aslo ani margdorxonak lagon to sodanch Jehova lagim magtalo. Udharonnak, Nebukadnezzar-achea sopnacho orth sangonk Jehovan taka uzar kelo tednam apnnank man gheunchea bodlek, tannem soglo man khaltikaien Jehovak dilo. (Dan. 2:26-28) Hantuntlean amkam kitem lisanv asa? Ami ghoddie borim bhaxonnam ditat astolim, vo amkam porgottnnent zaite bore onnbhov mell’lleat astole. Punn hacho soglo man ami Jehovak diunk zai mhunn ami visorchem nhoi. Jehovachea modoti bogor ami hem soglem korunk xokonaslim mhunn ami khaltikaien manun gheunk zai. (Filp. 4:13) Ami oxem kortat tednam ami Jezuchi pasun bori dekh ghetat. Tem koxem?

13. Juanv 5:19, 30-ant aslolea Jezuchea utrantlean khaltikaie vixim ami kitem xiktat?

¹³ Devacho Put Jezu, poripurnn aslo. Tori astana, to Jehovacher patieun ravlo. (Juanv 5:19, 30 vachat.) Tannem aplea sorginchea Bapa thaun odhikar kaddun gheunk kednanch proitn korunk na. Jezun “Devachi podvi kaddun gheunchi, mhunnchem apnnem Deva bhaxen zaunchem oxem kednanch chintunk na,” mhunn Filipkarank 2:6 (NW) sangta. Eka khaltea Puta sarko, Jezu aplea hok’ka bhair vochonk na. Bodlek, to aplea Bapaichea odhikarak sodanch khalto ravlo.

14. Jem kam korunk Jezuk odhikar naslo tem korunk sanglem tednam Jezun kitem mhunnttlem?

¹⁴ Jakob, Juanv ani tanchi avoi, ek podvi melloun gheunk Jezu lagim ail’lim. Ti podvi diunk Jezuk hok’k naslo. Tednam Jezun tankam kitem zobab dilo, tea vixim chintat. Sorginchea Rajeant aplea daveak ani uzveak konn bostolo tem fokot aplo sorgincho Bapui tharaitolo mhunn Jezun rokddench sanglem. (Mt. 20:20-23) Apunn aplea hok’ka bhair vochona mhunn Jezun hanga dakhoun dilem. To khalto aslo. Jehovan zo odhikar apleak diunk na, to uzar korunk Jezu kednanch fuddem soronk na. (Juanv 12:49) Jezuchi bori dekh ami koxi gheunk zata?

15-16. 1 Korintkarank 4:6-ant aslolo sol’lo ami koso apnnaunk zata?

¹⁵ 1 Korintkarant 4:6-ant aslolo sol’lo apnnaitat tednam ami Jezuchea khaltikaiechi dekh ghetat. Thoim amkam oxem sanglam: “Boroil’lem asa tache bhair vochum nakat.” Tor konnui amchea koddem ek sol’lo  magta zalear, ami jem kitem sanglam tench tannim korunk zai mhunn ami tancher dobhav ghalchimnant. Vo tea vixim chintinastana ami tanchea lagim ulounchimnant. Tache bodlek, ami tankam Bible-ant ani Bible adarit prokaxonamnim aslole sol’le dakhoitolim. Hea toren, ami soglem zannant mhunn ami tankam dakhoun dinant. Punn Jehovache sol’le amchea sol’leam poros bore asat mhunn ami khaltikaien dakhoun ditat.—Prok. 15:3, 4.

¹⁶ Jehovak man diunchea bhair, khaltim ravonk amkam anik borim karonnam asat. Khaltim aslolean amkam khuxalkai koxi melltta? Ani toxench, dusream sangata ixttagot samballunk koxi modot zata, hem ami atam bhasabhas kortolim.

17. Khalte lok kiteak khuxal astat?

¹⁷ Ami khaltim asat zalear khuxal astat. Kiteak? Ami khaltim astat tednam amchean soglem korunk zaina, ani amkam dusreanchea modotichi goroz asa mhunn ami manun ghetat. Tor, dusrim amkam modot kortat tednam ami tanchim upkari astat, ani amkam khuxalkai melltta. Udharonnak, Jezun dha koddkarank bore kele tea ghoddnne vixim chintat. Tanchea modlea fokot ekleanuch Jezu lagim porot ieun tache upkar attoile. Tea bhirankull duensa thaun to apnnankuch boro korunk xokonaslo. Tor, apnnank fokot Jezuch boro korunk xoktalo mhunn tannem khaltikaien manun ghetlem. Hea modoti pasot to upkari aslo, ani tannem Devak vakhannlo.—Lukas 17:11-19.

18. Ami khaltim aslolean dusream sangata ixttagot samballunk amkam koxi modot zata? (Romkarank 12:10)

¹⁸ Khaltim asat tim, borim ani ghott ixttam korunk pavtat. Kiteak? Dusreank tanchea poros bore gunn asat mhunn tim khuxalkaien manun ghetat ani tancher bhorvonso dovortat. Dusreank ek zobabdari melltta tednam ani tim ti zobabdari borea toren samballttat  tednam, khaltim asat tim khuxal zatat ani tankam xabaski ani man diunk fatti soronant.—Romkarank 12:10 vachat.

19. Ami kiteak lagon gorvixtt zaunchem nhoi?

¹⁹ Gorvixtt munxam dusreank xabaski diunk fatti sortat. Dusreamnim tankam vakhannlolem tankam zai. Oslim munxam chodd korun apnnank dusream sangata sor kortat ani dusream poros borim zaunk sodhtat. Tim dusreank proxikxonn dinant ani zobabdareo vanttimnant. Tim chodd korun oxim mhunnttat, “Khoinchem-i ek kam bore toren korunk zai zalear, tem hanvenuch korunk zai.” Ek gorvixtt munis, apunn dusream poros chodd mhotvacho mhunn chint’ta. (Gal. 5:26) Ani dusrim tachea poros borem kortat tednam taka nattkai zata. Oslea munxanchi ixttagot dusream sangata begin tutt’tta. Gorv ho gunn amchea bhitor asa mhunn amkam kollon ailem zalear, ‘monachi novsornni korunk’ ami kallzantlean Jehova lagim modot magonk zai. Oxem kelolean, gorvixtt munxam zaunchea poilinch, ami ho gunn amchea bhitorlo kaddun uddoitolim.—Rom. 12:2.

20. Ami khaltim kiteak asonk zai?

²⁰ Jehovan amkam ek borem udharonn dovorlam mhunn ami tache khub upkari! Jehova jea toren aplea sevokam sangata vagta, tantuntlean amkam tachi khaltikai dison ieta. Ani ami tachi dekh gheunk sodhtat. Tea bhair, Deva sangata khaltikaien chol’lolim borim udharonnam amkam Bible-ant mellttat ani ami tanchi dekh gheunk sodhtat. Jehovak favo to man ani vakhann’nni ami sodanch di-it ravum-ia. (Prok. 4:11) Tednam ami pasun amchea sorginchea Bapa sangata cholonk pavtolim, zo khaltea munxancho khub mog korta.