1. Amkam koslo ek vhodd sueog asa?

JEHOVACHEA sobhecho bhag asop, ho ek vhodd sueog zaun asa! Sobhent bhav-bhoinnam sangata Jehovachi bhokti kortana amkam khub xanti ani khuxalkai melltta. Tor sobhent tumkam koslem kam asa?

2. Apostl Paulun boroilolea zaitea chittimnim tannem khoinchem udharonn uzar kelem?

² Hea vixim amkam eka udharonnantlean xikonk melltta. Hem udharonn apostl Paulun aplea zaitea chittimnim uzar kel’lem. Tea dor eka chittint Paulun sobhek munxachea kuddik, ani sobhentlea dor eka sodoxiak kuddichea sandheank sor kele.—Rom. 12:4-8; 1 Kor. 12:12-27; Ef. 4:16.

3. Hea lekhant ami koslea tin mhotvachea lisanvancher bhasabhas kortolim?

³ Jehovachea sobhent ami dor eklim valorachim. Sobha ghott korunk amcho dor ekleacho bhag asa. Ami khoinchea-i kullachim asum, amchea lagim kitle-i poixe asum, amchi famil khoinchi-i asum, amchi sonskrutai kosli-i asum, vo amchea lagim kitlem-i xikxonn asum, sobhent aslolim ami dor eklim moladik asat. Ami hea lekhant Pauluchea udharonna thaun xikonk zata tea tin mhotvachea lisanvancher bhasabhas kortolim. Poilem, Jehovachea sobhent ami dor eklim valorachim asat mhunn ami xiktolim. Dusrem, Jehovachea sobhent ami valorachim nant mhunn amkam disot zalear ami kitem korunk zata, tea vixim ami bhasabhas kortolim. Ani  tisrem, sobhent Jehovan amkam dilolem kam ami kiteak korit ravonk zai, tea vixim ami bhasabhas kortolim.

4. Romkarank 12:4, 5-antlean amkam kitem xikonk melltta?

⁴ Pauluchea udharonnantlean ami xiktat tem poilem lisanv mhunnttlear, Jehovachea familint ami dor eklim valorachim asat. Tannem tem udharonn ditana oxem sanglem: “Amche kuddik sobar sandhe asat, punn soglle sandhe tench kam korinant; toxench, ami sobar zannam zaun-ui, Krista sovem amcho ekchar zal’lean, ami ekuch kudd, ani amche-modlo zonn-eklo he kuddichea dusrea sogllea sandheank zoddlolo asa.” (Rom. 12:4, 5) Tor Paulu kitem mhunnonk sodhtalo? Sobhent amkam dor ekleak veg-vegllem kam asa. Tori astana, Jehova amkam valorachim mhunn lekhta.

5. ehovan sobhek koslim “dennim” dileant?

⁵ Sobhent kam asloleam vixim ami chintat tednam amchea monant ghoddie vhoddil ieunk puro. (1 Tes. 5:12; Heb. 13:17) Jehovan Krista udexim aplea sobhent fuddakar ghetat tankam “dadleanchea rupant dennim” mhunn dileant hem khorem. (Ef. 4:8, NW) He ‘dadle’ mhunnttlear, Sonchalon Monddolache Vangddi, Sonchalon Monddolak modot korunk nemlole bhav, Xaka Somitiche bhav, sorkittachi dekh-rekh korpi, songottnnent aslolea veg-vegllea korsant xikoupi bhav, sobhentle vhoddil ani sobheche sevok. Povitr xokte udexim, hea soglea bhavank nemleat. Te Jehovachea moladik xellianchi kallji ghetat ani bhav-bhoinnank ghottai ditat.—1 Ped. 5:2, 3.

6. 1 Tesalonikekarank 2:6-8-ant sanglolea pormonnem, povitr xokte udexim nemlole bhav kitem korunk vavurtat?

⁶ Veg-veglleo zobabdareo samballunk lagon hea bhavank povitr xokte udexim nemleat. Munxachea kuddint aslole veg-veglle sandhe ap-aplem kam kortat tednam ak’khea kuddik faido zata. Teach toren, hea bhavanchea mhenotik lagon sobhek khub faido zata. Te apnnank vakhann’nni melloun gheuncho proitn korinant. Bodlek te aplea bhav-bhoinnank dhir ditat ani tim sotant ghott ravchim mhunn te khub vavurtat. (1 Tesalonikekarank 2:6-8 vachat.) Aplea gorzam poros dusreancheo gorzo poileo dovrun vavurpi purte asolea hea bhavam pasot ami Jehovache khub upkari!

7. Purnn vellachi seva kortolea zaitea bhav-bhoinnank koslim besanvam onnbhovunk mellttat?

⁷ Sonvsarbhor, sobhentlim thoddim bhav-bhoinnam purnn vellachi seva kortat. Zoxi, mixinori, khas pioneer vo niemit pioneer. Hea bhav-bhoinnamnim porgottnnent ani xis korchea kamant chodd vell ghatla dekhun, tim zaiteank Jezuche xis zaunk modot korunk pavleant. Hea bhav-bhoinnam lagim ghoddie zaito poiso vo vostu nasot, punn Jehovan tanchem jivit besanvamnim bhorlam. (Marku 10:29, 30) Hea bhav-bhoinnancho ami khub mog kortat. Ani tim sobhecho bhag zaun asat mhunn ami tancho khub valor kortat!

8. Sobhentlo dor ek porgottnnar Jehovachea mukhar kiteak valoracho?

⁸ Povitr xokte udexim nemlole bhav ani purnn vellachi seva kortat tinch sobhent valorachim asat kai? Na! Sobhentlo dor ek porgottnnar Devak ani sobhek valoracho zaun asa. (Rom. 10:15; 1 Kor. 3:6-9) Karonn sobhechea sogleam-von mhotvachea dhei-am modlo ek dhei mhunnttlear, lokank Somi Jezu Kristache xis korop. (Mt. 28:19, 20; 1 Tim. 2:4) Tor sobhentlim soglim, bautizm ghetlolim ani gheunk naslolim porgottnnaram aplea jivitant hea kamank sogleam-von chodd mhotv ditat.—Mt. 24:14.

9. Sobhent aslolea amchea bhoinnancho ami kiteak valor kortat?

 ⁹ Sobhent aslolea bhoinnank Jehova mhotvachem kam diun tankam man dita. Apli seva visvaxiponnan kortolea oslea bailancho, avoincho, vidvancho, ani ankvar bhoinnincho to valor korta. Devachem kalliz khuxal kelolea zaitea bailam vixim amkam Bible-ant vachunk melltta. Tannim zannvai, bhavarth, urba, dhir, poramos, osle gunn dakhoun ani borim kamam korun ek bori dekh dovorlea. (Lukas 8:2, 3; Itihas 16:14, 15; Rom. 16:3, 6; Filp. 4:3; Heb. 11:11, 31, 35) Oslea bailanchi Bible-ant toknnai kelea. Osle sobit gunn asloleo bailo amchea sobhamnim asat dekhun ami Jehovachim kitlim upkari nhoi!

10. Ami amchea zanttea bhav-bhoinnancho kiteak valor kortat?

¹⁰ Sobhent zaitim zanttim bhav-bhoinnam asat mhunn pasun ami khuxal. Thoddea sobhamnim aplea ak’khea jivitant Jehovachi seva visvaxiponnan kelolim zanttim bhav-bhoinnam asat. Ani thoddim zanttim bhav-bhoinnam halinch sot xikleant. Punn zantteponnak lagon amchea hea choddxea bhav-bhoinnanchi bolaiki bori asona. Hea oddchonneancho tankam fuddo korcho poddtta dekhun, tanchean sobhent ani porgottnnechea kamant chodd korunk zaina. Tori astana, him zanttim bhav-bhoinnam porgottnnent apleachean zata titlem kortat ani herank urba ani proxikxonn diunk aplea lagim asa ti sogli takot uzar kortat! Khorench, Jehovak ani amkam him bhav-bhoinnam khub valorachim.—Mho. 16:31.

11-12. Tumchea sobhent aslolea tornnatteam thaun tumkam koxi urba mell’llea?

¹¹ Amchea tornnattea bhav-bhoinnam vixim pasun chintat. Tim Soitan ani tachem noxttem chintop aslolea sonvsarant vaddttat dekhun tankam zaitea oddchonneancho fuddo korcho poddtta. (1 Juanv 5:19) Tori astana, tim mittingent zobab ditat, porgotttnnent bhag ghetat, ani her vellar dhiran aplea bhavartha vixim sangtat tednam amkam urba melltta. Tornnatteamno, tumi Jehovachea sobhent khub valorachim!—Stotr. 8:2.

¹² Punn sobhent apunn valorachim asat mhunn thoddea bhav-bhoinnank chintunk kotthin zaunk puro. Tor ami dor eklim sobhent  valorachim asat mhunn chintunk amkam kitem modot korunk xokta? Polloum-ia.

13-14. Apunn sobhent valorachim nhoi mhunn thoddeank kiteak disonk puro?

¹³ Paulun dil’lea udharonnantlean ami xikonk zata tea dusrea lisanvacher ami atam dhean dium-ia. Aiz zaiteank fuddo korcho poddtta toslea eka somosia vixim Paulu amkam chintunk laita. Ti somosia mhunnttlear, sobhent apunn valorachim nhoi mhunn thoddim chintat. Paulu boroita: “Hanv hat nhoi, dekhun hanv kuddicho nhoi, oxem pai mhonnot zalear, to pai kuddicho nhoi zata? Hanv dollo nhoi, dekhun hanv kuddicho nhoi, oxem kan mhonnot zalear, to kan kuddicho nhoi zata?” (1 Kor. 12:15, 16) Tor Paulu hanga koslem lisanv xikounk sodhtalo?

¹⁴ Tumi tumkam sobhentlea heram sangata sor kortat zalear tumi valorachim nhoi mhunn tumkam disonk puro. Sobhentlea thoddeank xikounk, manddavoll korunk vo dekh-rekh korunk bori kola asonk puro. Ani tumkam titli kola na oxem tumkam disot. Hantuntlean tumi khaltim asat mhunn kollon ieta. (Filp. 2:3) Punn zagrut ravat. Bori kola asloleam sangata tumi tumkam sor korit ravtat zalear tumi nirax zaunk puro. Ani Paulun sanglolea bhaxen, tumi sobhent faideachim nhoi oxem tumkam disonk puro. Tor oslim bhavnam ietat tednam tacho fuddo korunk tumkam kitem modot korunk xokta?

15. 1 Korintkarank 12:4-11-ant sanglolea pormonnem, amkam koslim-i dennim asum, ami kitem ugddas dovrunk zai?

¹⁵ Hea vixim chintat: Poilea xekddeantlea thoddea Kristanvank Jehovan povitr xokte udexim dennim dilim. (1 Korintkarank 12:4-11 vachat.) Punn soglea Kristanvank ekach bhaxechim dennim diunk na. Jehovan tankam veg-vegllea torechim dennim ani tank dili. Tori astana, dor ek Kristanv taka valoracho aslo. Aiz povitr xokte udexim vizmitam korchim dennim amkam nant. Punn hem totv aiz pasun amkam lagu zata. Amkam soglea torechi kola aschi na. Punn Jehova dor ekleacho valor korta.

16. Apostl Paulucho khoincho sol’lo ami apnnaunk zai?

¹⁶ Tor ami amkam her Kristanvam sangata  sor korchea bodlek, apostl Paulun dil’lo ho sol’lo apnnaum-ia: “Zonn-eklean ap-apli vagnnuk topasun kaddchi ani, ti bori zalear, dusream lagim sor korinastana, tachean vo tichean apnnachech khatir khuxalkai bhogum-ieta.”—Gal. 6:4.

17. Paulun dil’lo sol’lo ami apnnaitat zalear amkam koso faido zatolo?

¹⁷ Devachea preronnan Paulun dil’lo ho sol’lo ami apnnaitat ani amcheoch kornneo topastat zalear, dusreank naslolim dennim vo tank amkam asa mhunn amkam kollon ieunk xokta. Udharonnak, eka vhoddilachean manchier thaun ekdom borim bhaxonnam diunk zaina astolem. Punn xis korchem kam to ekdom borem korta astolo. Vo tachean her vhoddilam bhaxen bori manddavoll korunk zaina astoli. Punn to ek khub doiall ani mogall vhoddil dekhun bhav-bhoinnam tachea lagim ieun Bible-antle sol’le gheunk fatti soronant astolim. Vo to ek boro poramos korpi bhav mhunn dusrim taka vollkhotat astolim. (Heb. 13:2, 16) Amkam aslolea tankicher ani denneancher ami dhean ditat zalear sobhe pasot ami kitem borem korunk xoktat tem polloun amkam borem disonk xokta. Tednam amchea bhavank amchea poros veglli tank asa tem polloun amkam ghoddie tanchi nattkai zaunchi na.

18. Ami amchi kola koxi vaddounk zata?

¹⁸ Sobhent amkam koslem-i kam asum, Jehovachi seva ami anik bore toren korunk ani amchim kola vaddounk ami dor eklean proitn korunk zai. Hem bore toren korunk, Jehova aplea songottnne udexim amkam ekdom borem proxikxonn dita. Udharonnak, amchi porgottnni ami anik bore toren korunk sumanachea modlea mittingent amkam proxikxonn melltta. Hem proxikxonn tumi uzar kortat kai?

19. Raj-Porgottnnaranchea Korsak voicho tumcho dhei melloun gheunk tumi kitem korunk xoktat?

¹⁹ Proxikxonn gheunk anik ek bori manddavoll mhunnttlear, Raj-Porgottnnarancho Kors. Hea korsant 23 tem 65 vorsam modlea piraiechea bhav-bhoinnank vochonk melltta. Hea korsak tumi kednanch pavchimnant mhunn tumkam disonk puro. Punn hea korsak tumi kiteak vochonk zaunchem na tem chintchea bodlek, tumi tea korsak kiteak vochonk zai tem boroun dovrat. Uprant, tea korsak vochonk kitem korop gorjechem asa tem korunk manddavoll korat. Jehovachea modotin, ani tumchea koxtti vavra udexim tumchean zaunchench na mhunn chintlolem tem tumi korunk pavtolim.   

20. Romkarank 12:6-8-a thaun ami kitem xiktat?

²⁰ Pauluchea udaronnna thaun ami xiktat tem tisrem lisanv Romkarank 12:6-8 (Vachat) vachlear kolltta. Hanga Paulu, sobhentlea bhav-bhoinnank veg-veglli tank asat mhunn portun dakhoun dita. Punn amkam koslim-i dennim vo kola asum, ti ami sobhek ghott korunk uzar korunk zai mhunn to hanga zor dita.

21-22. Robert ani Felice-ache onnbhova thaun ami kitem lisanv xiktat?

²¹ Robert nanvachea eka bhavachem ami atam ek udharonn polloum-ia. * To eka bhailea desant Jehovachi seva kortalo. Punn tachea uprant taka tachea desant aslolea Bethel-ant seva korunk dhaddlo. Ho bodol tachea khoinchea eka chukik lagon zaunk na mhunn bhavamnim taka khatri dili tori astana, taka toxench dislem. To mhunntta: “Zaite mhoine poriant hanv khuxal naslo. Mhoji seva hanvem bore toren korunk na oxem mhaka dislem. Ani thodde pavtti mhaka Bethel soddun vochonk koxem dislem.” To porot khuxal koso zaunk pavlo? Ami poilim kel’lea seve udexim Jehovan proxikxonn dilolean, ami atam kortat ti seva borea toren korunk pavtat mhunn  eka vhoddilan tachea ugddasak haddlem. Adim kel’lea seve vixim chintint ravchea bodlek, atam kitem korta tacher dhean diunchi goroz asa mhunn Robert somzolo.

²² Bhav Felice Episcopo-k pasun oxench kitem ghoddlem. Tannem ani tachea bailen 1956-ant Gilead Kors kelea uprant tim Bolivia-nt sorkittachi dekh-rekh korpeachem kam korunk gelim. 1964-ant tankam ek cheddo zolmolo. Felice mhunntta: “Sorkittachem kam amkam khub avoddttalem. Tem soddunk amkam khub kotthin zalem. Ek voros poriant hanv samko nirax aslom. Punn Jehovachea modotin hanvem mhojem chintop bodol’lem, ani bapui zalolo tea mhojea novea zobabdarecher hanv dhean diunk laglom.” Tumkam pasun Robert vo Felice-a bhaxen dista? Tumkam poilim aslole sueog, atam na dekhun tumi nirax zatat kai? Toxem zalear, tumi tumchem chintop bodol’lolean tumi khuxal zaunk xoktat. Jehovachi ani tumchea bhav-bhoinnanchi seva korunk tumi atam kitem korunk xoktat tacher dhean diat. Tumkam aslolim dennim ani tank dusreank modot korunk uzar korit ravat. Tednam tumi sobha ghott korunk modot kortolim, ani tumkam khuxalkai mellttoli.

23. Ami kitem korunk vell kaddunk zai, ani fuddlea lekhant ami kitem bhasabhas kortolim?

²³ Ami dor eklim Jehovak valorachim zaun asat. Tachea familichim ami bhag zalolim taka zai. Amchea bhav-bhoinnank ami koxi urba diunk zata tea vixim chintunk ami vell kaddttat, ani tea pormonnem vavurtat zalear, ami sobhent valorachim nhoi oxem ami chintchimnant. Punn, ami amchea bhav-bhoinnank koxim lekhunk zai? Ami tankam mog ani resped koso diunk zata? Hea mhotvachea vixoi-acher ami fuddlea lekhant bhasabhas kortolim.