1. Jehovan jivi rochna kiteak rochli?

EKA vellar, Jehova ekloch aslo ani taka khuxal ravonk dusreanchi goroz nasli. Punn dusreamnim jivit jieunk ani khuxal ravonk taka itsa asli dekhun, tannem rochunk suru kelem. Mogak lagon Jehovan hem soglem kelem.—St. 36:9; 1 Juanv 4:19.

2. Jehovan sogleo vostu rochleo tednam Jezuk ani ainzank koxem dislem?

² Poilim, Jehovan aplo Put Jezuk rochlo. Magir tannem aplea puta sangata lak’khamnim aizank, ani her ‘sogleo vostu rochleo.’ (Kol. 1:16) Aplea Bapai sangata kam korunk Jezu khub khuxal zalo. (Mho. 8:30) Ani sorginche ainz pasun khuxal zale. Jehovan ani tacho Huxar Vavraddi Jezun sorg ani prithum rochtana, tankam hem soglem poilem pollounk mell’llem. Ainzamnim apli khuxalkai koxi dakhoili? Prithum, tantunt asloleo vostu ani munxank Jehova Devan rochle tednam ainz ‘khuxalbhorit zaun zoizoikar’ korit asle. (Job 38:7; Mho. 8:31.) Jehovachea rochnne udexim, tacho mog, tachi zannvai ani pasiens dison ieta.—St. 104:24; Rom. 1:20.

3. 1 Korintkarank 15:21, 22-a pormonnem, Jezuchea bolidana udexim kitem favo zata?

³ Apnnem rochlolea sobit prithumer munis sasnank jielolo Jehovak zai aslo. Punn Adanv ani Even Jehova add patok kelem, zaka lagon uprant tim ani tanchi sonsot sasnank jieunk pavonk nant. (Rom. 5:12) Punn Jehovan kitem kelem? Munxakullak vattaunk, apunn kitem kortolo tem tannem rokddench sanglem. (Ut. 3:15) Adanv ani Evechea bhurgeank patka ani mornna thaun soddounk Jehovan aplo Put, Jezuchea soddvonnechem bolidan diunchi manddavoll korunk tharailem. Tea manddavolle udexim, tachi seva korunk vinchtat tankam sasnachem jivit favo  zaunchem aslem.—Juanv 3:16; Rom. 6:23; 1 Korintkarank 15:21, 22 vachat.

4. Hea lekhant ami khoinchea prosnancher bhasabhas kortolim?

⁴ Meloleank jivont korchea Devan dil’lea bhorvonxea vixim amkam zaite prosn ieunk xoktat. Udharonnak, punorjivontponn koxem zatolem? Amchim mogachim punorjivont zatolim tednam ami tankam vollkhonk pavtolim kai? Punorjivontponn amkam khoinchea toren khuxalkai haddttolem? Ani punorjivontponna thaun ami Jehovacho mog, zannvai ani pasiensa vixim kitem xikonk xoktat? Hea dor eka prosna vixim ami atam bhasabhas korum-ia.

5. Punorjivont zatole te lok ekach vellar nhoi, punn manddavollin punorjivont zatole mhunn ami kiteak mhunnonk zata?

⁵ Jehova aplea Puta udexim lak’khamnim meloleank jivont kortolo tednam to ghoddie tankam ekach vellar jivont korcho na. Kiteak? Karonn to toso korta zalear prithumer zaito lok bhoron ghoddie sogloch goddbodd zatolo. Ani Jehova kitench goddboddan korina. Bodlek, munxamnim xanten jieunk zai zalear soglem manddavollin korunk zai mhunn to zannam. (1 Kor. 14:33) Munxakulla pasot Jehovan Jezu sangata hi prithum toiar keli tednam tannem sogleo vostu ekech pavtti rochunk nant. Hachea udexim tannem apli zannvai ani pasiens dakhoilem. Toxench, Hozar Vorsanchea Razvottkechea vellar Armaged’dona thaun salvar zaloleam sangata, punorjivont zaloleam pasot goroz teo vostu prithumer toiar kortana to hech gunn dakhoitolo.

6. Itihas 24:15-ant sanglolea pormonnem, Jehova konnank punorjivont kortolo?

⁶ Chodd mhotvachem mhunnttlear, Armaged’dona thaun salvar zatat tannim, punorjivont zatat tankam Devachea Rajea vixim ani tachea dorjeam vixim xikounchi  goroz asa. Karonn tea vellar choddxea “vaitt” munxanchem punorjivontponn zatolem. (Itihas 24:15 vachat.) Kristachea soddvonne thaun faido mellonk, ani sasnank jieunk tannim aplea jivitant zaite bodlav korche poddttole. Jehovachem ginean naslolea lak’khamnim lokank, Deva vixim sot xikounk kitem kam mellon asa tea vixim chintun polloiat. Aiz ami Bible obheas ghetat toxim, tea vellar-ui dor ekleak ek-eklo Bible xikoupi astolo kai? Tednam sobha astoleo kai, ani tim tea sobhechim bhag astolim kai? Fuddem jivont zatolim tankam xikounk thoim proxikxonn mellttolem kai? Kitem zatolem tem amkam magir kollttolem. Punn Kristachea Hozar Vorsachea Razvottkechea xevottak, Jehovachea “vollkhin sogllo des upott bhoron ietolo” mhunn ami zannant. (Iz. 11:9) Tea Hozar Vorsachea vellar amkam kitlem khuxalkaichem kam astolem!

7. Punorjivontponn zaloleanchim unneponnam somzon gheunk Devachea lokank kiteak sompem zatolem?

⁷ Kristachea Hozar Vorsachea Razvottkechea vellar, Jehovachi maniotai mellonk tachea soglea sevokank aplea jivitant bodlav korit ravchem poddttolem. Tor punorjivont zatat tim Jehovachea dorjeam pormonnem jieunk ani aplim chintnam bodolcho proitn kortat tednam tanchim unneponnam somzon gheunk Devachea lokank sompem zatolem. (1 Ped. 3:8) Jehovache lok khalte asat, ani Jehovachi maniotai melloun gheunk te aplea jivitant bodlav korit asat tem polloun punorjivont zatat tim tanchea sangata Jehovachi bhokti korunk sodhtolim.—Filp. 2:12.

8. Punorjivont zalolea amchea mogachea lokank ami vollkhonk pavtolim mhunn ami kiteak mhunnonk xoktat?

⁸ Punorjivont zalolea amchea mogachea lokank ami vollkhonk pavtolim oxem mhunnonk amkam zaitim karonnam asat. Udharonnak, Jehovan jea toren adim lokank punorjivont kele, tantuntlean amkam kollon ieta. Te morchea adim jea toren distale, uloitale, ani chintale, teach toren Jehovan tankam porot jivont kele. Ek munis moron punorjivont zata tem, Jezun ek munis nhidon utt’tta taka sor kelem. (Mt. 9:18, 24; Juanv 11:11-13) Lok nhidentlean utt’ttat tednam, te nhidonk voichea poilim koxe distale ani vagtale, teach toren te distat ani vagtat. Mhunnche, nhidonk voichea poilim tankam asloleo iadi tankam ugddas astat. Lazara vixim chintat. To moron char dis zal’le ani tachi kudd kusonk lagloli. Punn Jezun taka punorjivont kelo tednam tacheo bhoinno taka vollkholeo ani to pasun tankam vollkholo.—Juanv 11:38-44; 12:1, 2.

9. Melolim tim poripurnn zaun kiteak punorjivont zaunchim nant?

⁹ Sobit bhagent “apunn boro na” mhunn konnuch sangcho na oxem Jehovan bhasailam. (Iz. 33:24; Rom. 6:7) Hacho orth, punorjivont zatoleanchi bolaiki bori astoli. Punn tim rokddinch poripurnn zaunchimnant. Karonn toxem zalem zalear, tanchim mogachim tankam ghoddie vollkhonk pavchimnant. Tor Kristachea Hozar Vorsachea Razvottkechea vellar, soglim munxam hollu-hollu poripurnn zatolim oxem dista. Karonn Hozar Vorsachea Razvottkechea xevottakuch, Jezu apli razvottki aplea Bapachea adhin kortolo. Punn tachea poilim tea razvottke udexim to munxank poripurnn korun, Jehovak zai tim her soglim kamam purnn kortolo.—1 Kor. 15:24-28; Prok. 20:1-3.

10. Punorjivontponn zatolem tednam tumkam koxem distolem?

¹⁰ Tumchim mogachim punorjivont zatat tednam tankam mellonk tumkam koxem distolem tea vixim chintat. Tumi ghoddie  sontosan bhoron hastolim vo roddttolim. Vo tumi khuxalkaien Jehovak gitam gaitolim. Punn ek mat khorem, punorjivontponn hem sobit dennem dil’lea pasot, tumchi kallji gheupi Bapai pasot ani tachea mogall Puta pasot tumcho mog ekdom chodd vaddttolo.

11. Juanv 5:28, 29-a pormonnem, Devachea dorjeam pormonnem jietat tankam kitem onnbhovunk mellttolem mhunn Jezu sangta?

¹¹ Punorjivont zatat tim aplem jivit bodlun, Devachea dorjeam pormonnem jietat tednam tankam kitli khuxalkai bhogtoli tea vixim chintat. Osle bodlav kortat tinch, Sobit Bagent sasnank jietolim. Punn jim konn Deva add voitat, tankam Sobit Bagent jieun, thoinchi xanti ibaddunk Jehova diuncho na.—Iz. 65:20; Juanv 5:28, 29 vachat.

12. Prithumer aslolea lokank Jehova koslim besanvam ditolo?

¹² Devachea Rajea khala, Mhonn’nneo 10:22 (NW)-ant sanglolim utram khorim zatat tem Devache lok polloitole: “Jehovacho axirvad girestkai haddtta, ani to tachea sangata kainch dukh dina.” Jehovachea povitr xoktechea modotin tache lok chodd ani chodd Jezu bhaxen zatole ani poripurnn zatole. (Juanv 13:15-17; Ef. 4:23, 24) Dis voitat toxe, tanchi bolaiki bori zatoli ani te bore lok zaunk pavtole. To vell kitlo khuxalkaiecho astolo! (Job 33:25) Punn, punorjivontponnachea bhorvonxeacher niall kelolean tumkam atam koxi modot zaunk xokta?

13. Jehova amkam kitlea bore toren vollkhota mhunn Stotr 139:1-4 sangta, ani hem khorem asa mhunn punorjivontponnachea bhorvonxea udexim amkam koxem kollon ieta?

¹³ Ami atam meren bhasabhas kel’lea pormonnem, Jehova lokank punorjivont kortolo tednam tancheo iadi ani sobhav morchea poilim aslo tosoch astolo. Hacho orth, Jehova tumchea pasot kitem kortolo tem chintat. Jehova tumcho itlo mog korta ki hem korunk tumi kitem chintat, tumkam koxem bhogta, tumi kitem mhunntttat, ani tumi kitem kortat, tacher to dhean dita ani tem ugddas dovorta. Tor, tumkam punorjivont korta zalear to tumi poilim aslim toxim tumkam sompeponnim jivont korunk xoktolo. Jehovak amchea dor ekleachi bori vollokh asa mhunn Raza Davidak khobor asli. (Stotr 139:1-4 vachat.) Jehova amkam itlea borea toren vollkhota hem zannam zalolean amkam koxem bhogta?

14. Jehova amkam kitlea borea toren vollkhota tea vixim ami chintat tednam amkam koxem disonk zai?

¹⁴ Jehova amkam itlea bore toren vollkhota dekhun amkam uskeunchi goroz na. Kiteak? Jehova tumchi khub kallji gheta mhunn ugddas dovrat. To dor eka munxak khas vo moladik mhunn lekhta. Amchea jivitant ghoddleat teo sogleo ghoddnneo to ugddas dovorta. Hem kitlem buzvonnechem nhoi! Tor ami eksurim asat mhunn kednanch chintchem nhoi. Dor disa, dor ek minott Jehova amchea sangata asa ani to amkam modot korunk toiar asa.—2 It. 16:9.

15. Jehova zannvaiecho Dev mhunn punorjivontponna udexim koxem dison ieta?

¹⁵ Ekleak mornnachi bhirant asa zalear, tache dusman taka mornnachi dhomki diun, to korunk sodhina tem korunk tacher dobhav ghalunk xoktat. Soitanachea tabeant asat te lok, hi dhomki uzar korun lokank tanchea ixttancho ghat korunk vo chukichem tem korunk tancher dobhav ghaltat. Punn tosli dhomki amcher cholona. Karonn amche dusman amkam jivexim marlear pasun, amcho Dev Jehova amkam porot jivont korunk xokta mhunn ami zannant. (Prok. 2:10) Jehova sangata asloli amchi ixttagot konnuch moddunk xokona mhunn amkam khatri asa.  (Rom. 8:35-39) Punorjivontponnacho bhorvonso diun, Jehovak kitli zannvai asa ti tannem dakhoun dilea! Amkam ho bhorvonso aslolean, Soitanachea tabeant asat te, ami korunk sodhinant tem korunk amkam jivexim marchi dhomki dilear pasun ami bhienant. Tea bhair, ho bhorvonso aslolean Jehovak visvaxi ravonk amkam khub dhir melltta.

16. Tumi tumkanch kosle prosn vicharunk zai, ani tumkam Jehovacher kitlo bhorvonso asa mhunn zannam zaunk hea prosnanche zobab tumkam koxe modot korunk xoktat?

¹⁶ Jehovache dusman jivexim marchi dhomki ditat zalear, Jehova tumkam porot jivont kortolo mhunn tumkam khatri asa kai? Toslea eka vellar tumkam Jehovacher bhorvonso astolo mhunn tumi koxi khatri korun gheunk zata? Hem korunk ek vatt mhunnttlear, tumi tumkanch he prosn vicharunk zatat, ‘Hanv dor disa gheta tea nirnnoi-a udexim mhaka Jehovacher bhavarth asa mhunn dison ieta kai?’ (Lukas 16:10) ‘Mhojem jivit polloitana, hanvem Devachem Raj poilea zagear dovorlear, Jehova mhojeo gorzo purnn kortolo mhunn tannem kel’lea bhasaunnecher mhaka bhorvonso asa mhunn dison ieta kai?’ (Mt. 6:31-33) Hea prosnanche zobab tumi hoi mhunn ditat zalear, Jehovacher tumkam bhavarth asa mhunn tumi dakhoun ditolim. Ani fuddarak tumkam kosle-i tras ieum, tancho fuddo korunk tumi toiar astolim.—Mho. 3:5, 6.

17. (a) Jehovak pasiens asa mhunn punorjivontponna udexim koxem dison ieta? (b) Jehovan dakhoilolea pasiensa pasot ami upkariponn koxem dakhounk zata?

¹⁷ Hea noxttea sonvsaracho nas korunk, Jehovan umkoch dis ani vell tharaila. (Mt. 24:36) Tor, to tachea poilinch nas haddchona. Taka meloleank jivont korunk zai, tori astana to pasiensan ravla. (Job 14:14, 15) Punorjivont korchea vellachi to vatt polloit asa. (Juanv 5:28) Jehovan dakhoilolea pasiensa pasot upkari zaunk amkam zaitim karonnam asat. Chintat, Jehovan pasiens dakhoilam dekhun amkam ani zaitea lokank ‘aplem jivit bodlunk’ vell mell’lla. (2 Ped. 3:9) Zata titlea lokank sasnak jieunchi sondhi mellonk zai mhunn Jehova axeta. Tannem dakhoil’lea pasiensa pasot ami upkariponn koxem dakhounk zata? “Sasnik jivit zoddunk favo asat” tankam sodhunk ami zata tem kortat tednam ani tankam Jehovacho mog korun tachi seva korunk modot kortat tednam ami hem korunk pavtat. (Itihas 13:48, NW) Oxem kel’lean Jehovachea pasiensa thaun amkam faido zala toso dusreankui faido zatolo.

18. Ami dusream sangata pasiensan kiteak vagonk zai?

¹⁸ Hozar vorsachea xevottak ami soglim  poripurnn zatolim. Punn tednam meren, Jehova pasiens dakhoita dekhun to amchim patkam bhogsunk toiar asa. Tor, ami Jehovachi dekh gheum-ia ani dusreanchea borea gunnancher dhean diun, tanchea sangata pasiensan vagum-ia. Atam eke bhoinnichem udharonn polloum-ia. Ticho ghov ekdom chodd usketalo ani tannem mittingent voichem bond kel’lem. Ti mhunntta, “Tea vellar mhaka khub dukh zalem. Amchea jivitant ho ek vhodd bodol aslo karonn ami jem kitem sangata mellon korunk sodhtalim, tem ami korunk pavlim na.” Tori astana, eka mogall baile bhaxen ti aplea ghova sangata pasiensan vagli. Ti tacher patieun ravli ani tacher tika aslolo visvas tinnem kednanch soddun diunk na. Tinnem aplea somosiancher dhean diunchea bodlek, Jehova bhaxen, aplea ghovachea borea gunnancher dhean dilem. Ti mhunntta, “Mhojea ghovak sobit gunn asat, ani aple uske pois korunk to apleachean zata tem korit asa.” Tor, kotthin oddchonneancho fuddo kortolea famili ani sobhechea sodoxeam sangata pasiensan vagop kitlem gorjechem!

19. Ami kitem korcho nichov korunk zai?

¹⁹ Prithum rochloli tednam Jezu ani ainz khuxal zale. Punn hi ak’khi prithum Jehovacho mog ani seva kortolea poripurnn lokamnim bhorta tednam te kitle khuxal zatole tem chintat. Aplea vavracho munxakullak koso faido zala tem polloun, sorgar Krista sangata raz choloitoleank kitli khuxalkai mellttoli tea vixim chintat. (Prok. 4:4, 9-11; 5:9, 10) Toxench, hea vella vixim chintat: Duens, dukh, tras ani moronn na zatole tednam ami dukhi zaun dukham gollounchea bodlek khuxechim dukham golloitolim. (Prok. 21:4) Tednam meren, tumi tumchea mogall, zannvai aslolea, ani pasiens dakhoita toslea tumchea Bapachi dekh gheun cholcho nichov korat. Tumi toxem kortat zalear, tumkam kosle-i tras ieum, tumi sodanch khuxal astolim. (Jak. 1:2-4) “Punorjivontponn astolem” mhunn Jehovan bhas dilea dekhun ami tachim kitlim upkari asat!—Itihas 24:15.