Dusri Somurt 22:25-27-ant sanglam tem, to dadlo niropradi asa vo na tacher dhean dina, bodlek tem cheddu koxem niropradi zaun uronk xokta tacher dhean dita, karonn to dadlo guneanvkari mhunn tharailolem. Hem zannam zaunk bhonvtonnchea versacher dhean dium-ia.

Polinchim versam, ek dadlo eka soirik zal’lea cheddva sangata “xara bhitor” kuddicho sombond dovorchea vixim uloita. Oxem kel’lean to pordvar korta, karonn soirik zal’li eke ostorek kazari mhunn lekhtat. Tor to guneanvkari zata. Punn tea cheddva vixim kitem? ‘Tem xarant aslem tednam tannem bob marunk zai asli.’ Tannem toxem kel’lem zalear, dusrim tachi bob aikon taka modot korunk ieta aslim. Punn tannem bob marunk na. Tor, tem-ui pordvarant bhagidar aslem, ani hea pasot dogaim-kui guneanvkari tharaitale.—D.S. 22:23, 24.

Punn tea kaideant anik eke poristhiti vixim sanglam: “Konn-eklo dusreache hoklek, xara bhair vo khedde-ganvant, toxem boll korta. Tedna fokot tea dadleak moronn favo. Tea cheddvak kaich korchem nhoi, kiteak moronn favo toslem tannem kaich korunk na. Hem, konn-eklo dusreachea angar veta ani tacho jiv kaddta taka somor zata. Hea monxan eksurea zagear, soirik zal’lea cheddvak boll kelem; cheddvan bob marli, punn konn tachea adarak ailona.”—D.S. 22:25-27.

Oslea poristhitint, neai korpi tem cheddum sangta tem khorem mhunn patietale. Kiteak? Karonn “cheddvan bob marli, punn konn tachea adarak ailona,” oxem te somzotale. Tor tannem pordvar korunk na. Punn tea dadlean, bolatkar ani pordvar kela mhunn tharaitale karonn to tea soirik zal’lea cheddvak ‘boll korta ani tachea-xim nhidta.’

Tor, ho kaido tem cheddu koxem niropradi zaun uronk xokta tacher dhean dita tem khorem. Punn ho kaido tea dadleak pordvar ani bolatkar kela mhunn guneanvkari tharaitalo. Ami khatri dovrunk zata ki te neai korpi “barkaien choukoxi” kortole ani Devan zaitea pavtti sanglolea tea dorjea pormonnem te neai kortole.—D.S. 13:14; 17:4; Sutt. 20:14.