1. Jehovan avoi-bapaink kosli zobabdari dilea?

JEHOVAN poilea zoddpeak rochlem tednam bhurgim aschim ek avodd tanchea bhitor ghatloli. Dekhun Bible sarkem sangta: “Bhurgim mhollear Sorvesporachim dennim.” (St. 127:3) Hacho orth kitem? Chintat, tuzo ek lagxilo ixtt aplo zaito poiso tujea lagim surokxit dovrunk dita. Tuka koxem distolem? Tannem tujer bhorvonso dovorlo mhunn tum khuxal zaunk puro. Punn tannem dil’le poixe tum koso samballun dovortolo mhunn tum uskeunk xokta. Amchea sogleam poros lagincho Ixtt, Jehova, avoi-bapaink samballun dovrunk poixeam poros ekdom chodd moladik kitem tori dita. To avoi-bapaink aplea bhurgeanchi dekhrekh korchi ani tankam khuxal dovorchi zobabdari dita.

2. Ami khoinchea prosnancher bhasabhas kortolim?

² Eka kazari zoddpeak bhurgim aschim vo na, ani kednam bhurgim aschim tea vixim konnem tharaunk zai? Aplea bhurgeank jivitant khuxalkai mell’lloli zai zalear avoi-bapain tankam modot korunk kitem korunk zata? Hea vixim bore nirnnoi gheunk Kristi zoddpeank modot zaunk Devachea Utrant aslolea thoddea totvancher atam ami bhasabhas korum-ia.

3. (a) Eka zoddpeak bhurgim zai vo naka tea vixim konnem nirnnoi gheunk zai? (b) Zoddpeachea ixttamnim ani familin Bible-antlem khoinchem totv monant dovrunk zai?

³ Thoddea zageamnim, kazara uprant rokddinch zoddpeank bhurgim asonk zai mhunn lok opekxa kortat. Zoddpeank hi rit pallunk aplea famili thaun ani heram thaun dobhav ieunk puro. Asia-ntlo ek bhav, Jethro, mhunntta, “Sobhent, bhurgim aslolim avoi-bapui, bhurgim na tea zoddpeank bhurgim asonk zai mhunn tancher dobhav ghaltat.” Asiant-lo anik ek bhav, Jeffrey,  oso mhunntta, “Bhurgim na tea zoddpeank zantteaponnant konnuch pollounk aschim na mhunn thoddim tankam sangtat.” Punn bhurgim aschim vo na, tem dor eka zoddpeamnim svota nirnnoi gheunk zai. Ti zobabdari tanchi; tor tannim nirnnoi gheunk zai. (Gal. 6:5) Familink ani ixttank ek novem kazari zoddpem khuxal aslolim zai tem khorem. Punn bhurgim asop vo nasop, ho nirnnoi tea zoddpeacho mhunn sogleamnim ugddas dovrunk zai.—1 Tes. 4:11.

4-5. Zoddpeamnim khoinchea don vixoi-ancher bhasabhas korunk zai, ani hem korunk sogleant boro vell khoincho? Somzaiat.

⁴ Apleak bhurgem zai mhunn ek zoddpem nirnnoi gheta zalear tannim hea don mhotvachea prosnancher bhasabhas korunk zai: Poilem, tankam tanchea kazari jivitant bhurgim kednam zalolim zai? Dusrem, tankam kitlim bhurgim aslolim zai? Hea vixim tea zoddpeamnim kednam bhasabhas kelear ekdom borem? Ani he don prosn kiteak itle mhotvache?

⁵ Chodd korun, eka zoddpean, bhurgim aschim vo na, tea vixim tannim kazara poilinch bhasabhas kelear tankam faideak poddttolem. Tednam kiteak? Karonn, tea vixoi-acher tanchem chintop ekuch bhaxen asop khub mhotvachem zaun asa. Tea bhair, tim bhurgeanchi zobabdari gheunk toiar asat vo na tea vixim tannim chintunk zai. Thoddim zoddpim aplem kazar zaun, ek vo don vorsam uprant bhurgem zai mhunn nirnnoi ghetat karonn avoi-bapui zalea uprant bhurgeam pasot tankam chodd vell ani takot uzar korchi poddtta. Oxem kelolean tim ekamekak anik chodd zannam zaunk ani ekamekak lagim soronk vell mellttolo mhunn chint’tat.—Ef. 5:33.

6. Ami jietat to kall monant dovrun thoddea zoddpeamnim koslo nirnnoi ghetla?

⁶ Her Kristanvamnim Noah-chea tin putanchi ani tanchea bailanchi dekh ghetlea. Tea tin zoddpeank rokddinch bhurgim zaunk nant. (Ut. 6:18; 9:18, 19; 10:1; 2 Ped. 2:5) Ami jietat to kall ‘Noah-chea disa’ sarko asa mhunn Jezun sanglem, ani ami ‘bhirankull kallar’ jietat mhunn kainch dubhav na. (Mt. 24:37; 2 Tim. 3:1) Hem monant dovrun thoddea zoddpeamnim porgottnnent chodd vell sarunk lagon sod’deak bhurgim naka mhunn nirnnoi ghetla.

7. Lukas 14:28, 29 ani Mhonn’nneo 21:5-ant aslolim totvam eka zoddpeak koxim modot korunk xoktat?

⁷ Bhurgim zai vo na, ani kitlim bhurgim astolim tea vixim nirnnoi ghetat tednam zoddpeamnim kitlo khorch zatlo tacho ‘odmas kaddop’ gorjechem. (Lukas 14:28, 29 vachat.) Bhurgeank vaddounk fokot poixech nhoi,  punn vell ani xoktechi pasun goroz asa mhunn bhurgim aslolim avoi-bapui sangtat. Tor, eka zoddpean hea prosnancher bhasabhas korop mhotvachem zaun asa: ‘Familicheo sodancheo gorzo purnn korunk ami dogaimnim kam korchem poddttolem kai? Amchea familint “sodancheo gorjecheo” vostu kitem tem ami tharailam kai? Ami dogaim kam kortolim zalear, amchea bhurgeank konn polloitolo? Tanchea chintnancher ani vagnnukecher konnacho probhav poddttolo?’ Hea prosnancher bhasabhas kortat tim zoddpim Mhonn’nneo 21:5-ant aslolim utram apnnaitat.—Vachat.

8. Eka Kristanv zoddpean koslea oddchonneancho fuddo korunk toiar ravonk zai, ani ek mogall ghov kitem kortolo?

⁸ Aplea bhurgeak vaddounk avoi-bapaik zaito vell ani xokti uzar korchi poddtta. Eka zoddpeak thoddeach vorsam bhitor zaitim bhurgim zaleant zalear, tanchea dor eka bhurgeak goroz titlem dhean diunk tankam kotthin zaunk puro. Oslea poristhitint kitem korchem tem kollona mhunn zaitim lhan bhurgim aslolim avoi-bapui sangtat. Tednam ti avoi sodanch thokonk puro. Oxem zal’lean tika sodam obheas korunk, magnnem korunk, ani porgottnnent bhag gheunk kotthin zaunk puro. Ani toxench tika mittingent purnn dhean diun tacho faido gheunk zaunchem na. Punn, ek mogall ghov aplea bhurgeank mittingent ani ghorant dhean diunche poddtta tednam apleachean zata titlo aplea bailek tenko ditolo. Udharonnak, tannem aplea bailek ghorantlim kamam korunk modot korunk zata. Aplea familintlea dor eka sodoxiank Kuttumbik Bhoktecho faido zaunk to ti chukoinastana korunk vavurtolo. Ani toxench to sodanch aplea famili sangata porgottnnent bhag ghetolo.

9-10. Aplea bhurgeank modot korunk sodhtolea avoi-bapain kitem korunk zai?

⁹ Aplea bhurgeank Jehovacho mog korunk modot korunk lagon avoi-bapain khoincheo thoddeo vostu korunk zatat? Tim aplea bhurgeank hea vaitt sonvsara thaun koxim rakhunk xoktat? Avoi-bapain gheunk zai tim thoddim pavlam polloiat.

¹⁰ Jehovachea modotik lagon magat. Manoah ani tachea bailechem udharonn polloum-ia. Tim Samsonachim avoi-bapui aslim. Apli bail eka putak zolm diunchi asa mhunn Manoah-k koll’llem tednam, tea putak koso vaddouncho tea vixim margdorxonak lagon, Manoah-n Jehova lagim magnnem kelem.

11. Avoi-bapain Fuddari 13:8-ant dilolea Manoah-chea udharonnantlean kitem xikonk zata?

¹¹ Bosnia ani Herzegovina, hea desantlim Nihad ani Alma, Manoah-chea udharonnantlean xiklim. Tim mhunnttat: “Borim avoi-bapui zaunk lagon, margdorxona pasot ami Manoah bhaxen  Jehova lagim maglem. Ani Jehovan amchea magnneancho veg-vegllea ritin zobab dilo—zoxem Bible-antlean, Bible adarit prokaxonantlean, sobhechea mittingentlean, ani odhivexonantlean.”—Fuddari 13:8 vachat.

12. Juze ani Marien aplea bhurgeank kosli dekh dovorli?

¹² Tumchea udharonnantlean xikoiat. Tumi kitem mhunnttat tem gorjechem asa; punn, tachea poros chodd tumi jem kortat tacho tumchea bhurgeancher chodd porinnam zaunk xokta. Juze ani Marie-n aplea bhurgeam pasot, mhunnche Jezuk pasun, ek borem udharonn dovorlem mhunn ami khatren sangonk zata. Aplea familik posunk lagon Juzen koxtti vavr kelo. Tea bhair, Jehovachea seve pasot tancho mog vaddoilo. (D.S. 4:9, 10) Somurti pormonnem, Juzen aplea sangata aplea familik “vorsachea vorsak” Pask Utsovak Jerusalemak vhorchi goroz nasli, toripunn to tankam gheun voitalo. (Lukas 2:41, 42) Aplea familik gheun thoim vochop ek kotthin, chodd vell gheta toslo provas vo chodd khorch zata mhunn tachea kallar aslolea thoddea bapain chintlem astolem. Tori astana, Juzek Jehovachi bhokti korunk avoddttali ani aplea bhurgeankui tannem toxench korunk xikoilem. Mariek pasun Devachea Utrachi bori vollokh asli. Tinnem aplea utramnim ani korneamnim, aplea bhurgeank Devacho mog korunk xikoilem mhunn kainch dubhav na.

13. Eka zoddpean Juzechi ani Mariechi dekh koxi ghetli?

¹³ Nihad ani Alma zanchea vixim ami atanch uloil’lim, tim Juze ani Mariechi dekh gheunk sodhtalim. Tanchi dekh ghetlolean tim aplea putak Jehovacho mog korunk ani tachi seva korunk xikounk pavli. Koxim? Tim mhunnttat, “Jehovachea totvam pormonnem jievop kitlem faideachem tem ami amchea putak, amchea jivitantlea chalintlean taka dakhoun dilem.” Nihad fuddem mhunntta, “Tumcho bhurgo koslo munis zalolo tumkam zai toslim munxam tumi poilim zaiat.”

14. Aplim bhurgim konnam lagim sangat dovortat tem avoi-bapain zannam zavop kiteak gorjechem?

¹⁴ Bore ixtt vinchun kaddunk tumchea bhurgeank modot korat. Aplim bhurgim konnam sangata ixttagot zoddttat ani tim kitem kortat tea vixim avoik ani bapaik dogaim-kui khobor asonk zai. Hacho orth, social media-cher vo fonacher, aplim bhurgim konnam lagim uloitat tem pasun avoi-bapaink khobor asonk zai. Bhurgim jea konnam sangata vell sartat, tim tanchea chintnancher ani korneancher probhav ghalunk xoktat.—1 Kor. 15:33.

15. Avoi-bapain Jessie-chea udharonnantlean kitem xikonk zata?

¹⁵ Kompiuttor vo mobile sadonam uzar korchea vixim avoi-bapaink titlem ginean na zalear tannim kitem korunk zata? Philippines desantlo, Jessie nanvacho ek bapui, oso mhunntta: “Amkam electronic sadonam vixim chodd khobor nasli. Tori punn amchea bhurgeank tachea thaun aslolea dhokea vixim sangonk ami fattim soronk nant.” Apleak tim sadonam uzar korunk khobor na mhunn Jessie-n aplea bhurgeankui tim sadonam uzar korunk addaunk na. To mhunntta: “Mhojea bhurgeank hea electronic sadonancho vapor korun ek novi bhas xikonk, mittingek toiari korunk, ani Bible sodanch vachunk tankam urba dili.” Message-o dhaddchea vixim ani internet-achea udexim ek-dusreak fottu dhaddchea vixim, jw.org^®-cher (Inglez bhaxen) “Teenagers” hea bhaga khala aslole bhurgeank lagon bore sol’le tumi avoi-bapaimno tumchea bhurgeam sangata vachun bhasabhas kelam kai? Tujer Konn Tabo Dovorta—Tum vo Tuzo Mobile? ani Social-Network Uzar Korchea Vixim Chotur Ravat * he viddeo tumi tanchea sangata bhasabhas kelea kai? Tumchim bhurgim electronic sadonam koxim bore toren uzar  korunk xoktat tea vixim tankam xikounk hi mahiti tumkam faideak poddttoli.—Mho. 13:20.

16. Zaitea avoi-bapain kitem kelam, ani tacho porinnam kitem zala?

¹⁶ Devachi seva korunk zannim ek borem udharonn dovorlam tanchea sangata aplea bhurgeamnim vell sarunk zaitim avoi-bapui khub proitn kortat. Udharonnak, Côte d’Ivoire hea desantlem ek zoddpem, N’Déni ani Bomine, choddxe pavtt, sorkittachea dekhrekh korpi bhavak aplea ghorant ravonk apoitale. N’Déni oso mhunntta: “Tanchea udexim amchea putacher ekdom boro porinnam poddla. Tannem pioneering korunk suru kelem ani to aiz oslea zageamnim vo sobhamnim bhett dita zoim sorkittache dekhrekh korpi bhett diunk pavonant.” Tor tumi tumchea bhurgeank oslea bhav-bhoinnam sangata vell sarunk manddavoll korunk zata kai?

17-18. Avoi-bapain aplea bhurgeank xikounk kednam suru korunk zai?

¹⁷ Tumchea bhurgeank zata titlea begin xikounk suru korat. Avoi-bapui aplea bhurgeank kitlim begin xikounk suru kortat, titlem boreak poddtta. (Mho. 22:6) Apostl Paulu sangata uprant gonvlli korchea kamant bhag ghetlolea, Timota vixim chintat. Taka “bhurgeponnar-thaun vo ekdom lhanponnim” thaun tachi avoi, Eunike, ani tachi aji Lois-an taka xikounk suru kelem.—2 Tim. 1:5; 3:15.

¹⁸ Côte d’Ivoire hea desantle anik ek zoddpem, Jean-Claude ani Peace, hanchem udharonn polloum-ia. Tim aplea sov-ui bhurgeank Jehovacho mog korunk ani tachi seva korunk modot korunk pavlim. Oxem korunk tankam kitem modot zali? Tannim Eunike ani Lois-achem udharonn ghetlem. Tim mhunnttat, “Amchim bhurgim lhan astanach, mhunnche zolmolea thoddeach tempa uprant, ami tankam Devachem Utor tanchea kallzant ghalcho proitn kelo.”—D.S. 6:6, 7.

19. Tumchea bhurgeanchea kallzant Devachem Utor khonchovop, hacho orth kitem?

¹⁹ Tumchea bhurgeanchea kallzant Jehovachem Utor ‘khonchovop vo monant bosovop,’ hacho orth kitem? Hacho orth, “ek vixoi zaitea pavtti sangon xikounn divop ani monant ghalop.” Hem korunk, avoi-bapaimnim aplea bhurgeam sangata sodam vell sarunk zai. Sanglolo toch sol’lo portun-portun sangon avoi-bapui kednam-kednam nirax zait. Punn, aplea bhurgeank Devachem Utor somzonk ani tem apnnaunk modot korchi hi ek sondhi mhunn avoi-bapain chintunk zata.

20. Bhurgeank vaddounchea vixim Stotr 127:4 koso lagu korunk zata tem somzaiat.

 ²⁰ Tumchea bhurgeank bore toren vollkhon gheiat. 127 Stotrant bhurgeank, bannank sor keleant. (Stotr 127:4 vachat.) Bann veg-vegllea toreche astat ani vhodd-lhan astat, teach toren, bhurgim pasun ek-dusream thaun vegllim astat. Tor, aplea dor eka bhurgeak koxem xikounchem tea vixim avoi-bapain chintunk zai. Aichea kallachea Israel desantlea eka zoddpean aplea don bhurgeank Jehovachi seva korunk modot keli. Hem korunk tankam kitem adar zalo tem tim sangtat, “Ami eka bhurgeacho eka vellar ani dusrea bhurgeacho dusrea vellar Bible obheas ghetalim.” Punn Bible obheas hea toren gheunk zai, vo bhurgeank sangata mellon gheunk zai hem dor familicho mostok tharaitolo.

21. Avoi-Bapaink Jehova thaun kosli modot mellonk xokta?

²¹ Aplea bhurgeank xikovop hem kotthin kam mhunn avoi-bapaink disonk puro, punn bhurgim Jehova koddlean ek dennem zaun asat. Jehova avoi-bapaink modot korunk sodanch toiar asa. To tanchim magnnim aikota. Tanchea magnneancho zobab to Bible-antlean, amchea prokaxonantlean, ani sobhent aslolea her onnbhovi avoi-bapaichea udharonnantlean ani tim ditat tea sol’leantlean dita.

22. Avoi-bapui aplea bhurgeank diunk xoktat teo boreantleo-boreo vostu khoincheo?

²² Eka bhurgeak vaddounk 20 vorsam lagtat mhunn thodde lok mhunnttat, punn avoi-bapui aplea bhurgeank xikounchem kednanch soddun dinant. Tim aplea bhurgeank sogleant boreantlem-borem diunk xoktat to zaun asa mog, aplo vell, ani Bible-adarit xikounn. Tim aplea bhurgeank xikoitat tednam, dor eka bhurgeacher ekuch bhaxen porinnam zatolo oxem na. Punn, Jehovacho mog kortolea avoi-bapui aslolea familint tim vaddttat tednam, choddxea bhurgeancher boro probhav poddtta. Asia-nt ravtoli ek bhoinn, Joanna Mae, oxi mhunntta: “Mhojea avoi-bapain mhaka dilolea xikounne vixim hanv chint’ta tednam, tannim mhaka xist dili ani Jehovacho mog korunk mhaka xikoilem tea pasot hanv tanchem khub upkari zaun asa. Tannim mhaka fokot zolm diunk na, punn mhaka ek orth-bhorit jivit jieunk xikoilem.” (Mho. 23:24, 25) Amchea lak’khanim bhav-bhoinnank oxench bhogta.