TUMI apnnank dhinvaxi kallzachim, vo upkari dakhoitat toslim munxam mhunn chint’tat kai? Ami dor eklean hea prosna vixim chintunk zai. Amchea disamnim choddxe lok “onupkari” astole mhunn Bible-ant adim fuddench boroun dovorlolem. (2 Tim. 3:2) Dusreamnim aplea pasot kitem korunk zai vo kitem diunk zai mhunn chint’tat toslea lokam vixim tumi ghoddie zannam astolim. Haka lagon, dusreamnim tanchea pasot jem kelam tache pasot upkari aschi goroz na mhunn tankam ghoddie dista. Oslea lokam sangata ravonk tumkam bore dischem na nhoi?

Punn, Jehovache sevok oxe nant. Te he sol’le pallttat: “Sodanch dhinvaxi zaiat.” Ani “khoinche-i poristhitint argam diat.” (Kol. 3:15, Povitr Pustok - Novo Korar; 1 Tes. 5:18) Khorem mhunnttlear, upkari ascho ho gunn amkam faideak poddtta. Oxem mhunnonk amkam zaitim karonnam asat.

Ami sodanch upkari asonk ek mukhel karonn mhunnttlear ami oxem kortat tednam amkam amchea vixim borem dista. Ek munis dusreancho upkar attoita tednam taka svota borem dista, ani zachem tannem upkar attoilam taka-i borem dista. Oxem kiteak? Hem udharonn polloiat: Konnui tumkam lagon kitem-i korunk fuddem sorta mhunn chintat. Hacho orth, tumi tem mellon gheunk purti asat mhunn ti chintat nhoi? Tor tankam tumchi kallji asa, hem tumkam kollon ieta tednam tumkam aplea vixim borem dista. Ruthak pasun oxench dislem astolem. Boaz Rutha sangata udar kallzan vaglo. Apli konn tori kallji gheta hem zannam zaun Ruth khub khuxal zali astoli.—Ruth 2:10-13.

Khas korun Devak upkari asop gorjechem. Tumchea jivitant goroz teo vostu ani Deva sangata ixttagot zoddunk goroz teo vostu Dev tumkam dita ani di-it ravta, hea vixim tumi ghoddie thodde pavtti chintlam astolem. (D.S. 8:17, 18; Itihas 14:17) Punn Devan tumchea pasot ani tumchea mogacheam pasot jem borem kelam ani zaitim besanvam dileant, tea vixim fokot chintchea bodlek thoddo vell gheun niall korop gorjechem. Tumcho Rochnnar kitlo udar kallzacho tea vixim tumi niall kortat tednam, tachea pasot tumchem upkariponn anik vaddttolem ani to tumcho kitlo mog korta ani valor korta tem tumkam anik bore toren somzotolem.—1 Juanv 4:9.

Jehova amkam jem kitem dita tache vixim ami niall korunk zai ani taka dhinvasunk zai. (St. 100:4, 5) “Ami dusreank upkar attoitat tednam tim khuxal zatat” mhunn sangta.

Upkari asop kiteak borem tachem dusrem karonn mhunnttlear dusream sangata tumchi ixttagot ghott zatoli. Amkam sogleank dusreamnim amcho valor kelolo zai. Ek munis kallzan thaun dusrea eka munxacho upkar attoita tednam, te dogui bore ixtt zaunk pavtat. (Rom. 16:3, 4) Tea bhair, upkar attoitat tosle lok chodd korun eka-mekak modot korunk fuddem sortat. Dusrim tankam doia dakhoitat tednam tim tancho valor kortat ani tankam-i doia dakhounk fuddem sortat. Hoi, dusreank ami modot kortat tednam amkam khuxalkai melltta. Ani Jezun pasun tench sanglolem: “Dusream koddche gheunche poros dusreank divop odik vhodd bhag vo khuxalkai.”—Itihas 20:35.

Upkariponnacher obheas korun California University-cho, professor Robert Emmons, oso sangta: “Ami upkari asonk zai zalear amkam eka-mekachi goroz asa mhunn somzop gorjechem. Thodde pavtti ami dusreank kitem tori ditat ani thodde pavtti dusrim amkam kitem tori ditat.” Khorem mhunnttlear, jieunk ani jivitant  amkam khuxalkai mellonk eka-mekachi khub goroz asa. Udharonnak, dusrim amkam jevonn diunk puro vo ami duent poddttat tednam amkam modot korunk puro. (1 Kor. 12:21) Dusrim aplea pasot kitem kortat tem ek upkari aslolo munis valor korta. Toxem zalear, dusreamnim tumchea pasot jem kitem kelam tachea pasot upkar attounchi sonvoim tumkam asa kai?

Tumi upkari asat mhunn dakhounk anik ek karonn asa. Upkari aslolean tumi tumchea jivitant jem kitem vaitt asa tacher nhoi, punn jem kitem borem asa tacher dhean diunk tumkam modot zata. Oxem kelolean, tumchem dhean jivitantle somosiancher nhoi punn borea vostuncher astolem. Tumi jitlim upkari asat, titlim tumi dusreanchem borem tem polloitolim, ani tea udexim tumi anik upkari zaunk pavtolim. Tumchea jivita vixim tumi upkari astat tednam, apostl Paulun jem kitem sanglem tem tumi korunk xoktolim. Tannem sanglem: “Somia sovem sodanch khuxal ravat.”—Filp. 4:4.

Tumi upkari astat tednam jem borem na tacher tumi dhean diunchim nant. Toxench, tumi upkari astat tednam tumi nattkaien vo ragan bhorlolim asonk xokonant, ani tumi dukhi asonk xokonant. Upkariponn aslolea lokank girestkaiechi axa titli asona. Tanchea lagim jem asa tantunt tim dhadoxi astat ani chodd-ani-chodd vostu melloun gheunk tim vavrinant.—Filp. 4:12.

Hea nimannea disamnim, tumi tras sostana dukhi ani niraxi zalolim Soitan axeta. Ani Jezuche pattlavdar zalolean hem tumi zannant. Tujea lagim jem asa tea vixim tum dhadoxi na zalear ani bore na tea vixoi-ancher tum dhean dita zalear, to khuxal zatolo. Oslo sobhav aslolean, zankam tum bori khobor porgott’tta tankam tem manun gheunk chodd kotthin zatolem. Ami upkari astat tednam, Jehovachea povitr xokte udexim utpon zatat te gunn, amkam asat mhunn ami dakhoitat. Udharonnak, ami upkari astat tednam ami chodd sontostat ani Devacher amcho bhavarth anik vaddtta.—Gal. 5:22, 23.

Tumi Jehovache sevok zalolean, hea lekhant upkariponnam vixim jem sanglam tem tumkam sarkem dislem astolem. Punn, upkariponn dakhovop vo borem asa tacher dhean divop sompem na mhunn tumi zannant. Punn niraxi zainakat. Tumi upkariponn dakhounk ani vaddounk xoktat. Koxem? Tumchea jivitant koslea vixoi-am pasot tumi upkari asonk xoktat tea vixim dor disa vell kaddun chintat. Hem tumi jitle pavtti chodd kortat, titlem tumkam upkariponn dakhounk sompem zatolem. Tednam jivitachea somosiancher dhean ditat toslea lokam poros tumi ekdom chodd khuxal astolim. Dev ani dusrim tumkam khuxal korunk ani urba diunk jem kitem kortat tacher dhean diat. Khoinchea-i don vo tin vostu pasun upkari asat tea vixim tumi dor disak boroun dovrunk zata.

Ami dusreanche sodanch upkar attoitat tednam amcho “mendu veglleach toren kam korta. Taka lagon amchea vixim amkam borem dista.” Dusreanche upkar attoita to munis sodanch khuxal asta. Tumkam mell’llolea soglea borea vostum vixim chintat, tumchea jivitant jem borem ghoddtta tantunt khuxal zaiat, ani sodanch upkari zaiat. Jivitantlea borea vostuncher dhean dinastana ravchea bodlek, ‘Jehovak dhinvasat, karonn to kitlo boro.’ Hoi, “sodanch dhinvaxi zaiat.”—1 Itihas. 16:34; Kol. 3:15, Povitr Pustok - Novo Korar.