1-2. (a) Pon’nasavem voros mhunnchem kitem? (“ Pon’nasavem Voros Kitem Zaun Aslem?” hem boks polloiat) (b) Lukas 4:16-18-ant, Jezu kitea vixim uloilo?

THODDEA desamnim, ek raza vo ranni 49 vorsam razvottki choloilea uprant, tanchea razvottkechem pon’nasavem voros khas voros mhunn monoitat. Tea vorsak tea razachem vo ranniechem pon’nasavem voros mhunnttat. Hea khas vorsak lagon kelolim festam ghoddie ek dis, ek suman, vo tachea poros chodd vell asonk puro, punn tim uprant somptat, ani tantunt mell’llolo sontos ghoddie lok uprant visronk xoktat.

² Adlea Israelant, dor pon’nasavem Voros zata tednam tem ak’khem voros te fest monoitale. Tea Pon’nasavea Vorsachea utsova poros ek vortea Pon’nasavea Vorsa vixim atam ami bhasbhas korum-ia. Tea adlea Pon’nasavea Vorsachea manddavolli udexim lokank suttka mellttali. Hea manddavolli vixim amkam kiteak xikonk zai? Karonn Israelitkaranchea disamnim asloli Pon’nasavea disachi manddavoll Jehovan keloli ek khas manddavoll ugddasak haddtta. Hea manddavolle udexim amkam sasnak suttka melltta ani aiz tachea thaun amkam faido mellonk xokta. Hea manddavolle vixim Jezu uloilo—Lukas 4:16-18 vachat.

3. Levi-Xastr 25:8-12-ant sanglolea pormonnem, Israelitkarank Pon’nasavea Vorsachea manddavolli thaun koso faido zatalo?

³ Jezu suttke vixim uloitalo tednam to kitem mhunnonk sodhtalo tem somzonk poilem Jehovan aplea adlea lokam pasot kelolea Pon’nasavea disachea manddavolle vixim bhasabhas kelear boreak poddttolem. Jehovan Israelitkarank oxem sanglem: “Hea pon’na-savea vorsak tumi povitr voros mhonn-ttoleat ani desant ravtat titleank-ui suttka porgott’toleat. Hem voros tumkam utsovachem; hea vorsa tumche modlo zonn-eklo ap-aplea purvozanchea bhatta-vit’tant ani ap-aplea ganv-ghora porto ietolo.” (Levi-Xastr 25:8-12 vachat.) Hachea  poilinchea lekhant, Israelitkarank dor sumanachea Sabat disa thaun koso faido zalo hea vixim ami bhasbhas kel’li. Punn Pon’nasavea disachea manddavolli thaun Israelitkarank koso faido zalo? Chintat, ek Israelitkar rinnant buddla, ani tem rinn farik korunk lagon taka aplem bhatt vikchem poddlem. Punn Pon’nasavea Vorsa taka tachem bhatt porot mellttalem. Hea toren, to munis “aplea purvozanchea bhatta-vit’tant” porot ieunk xoktalo, ani fuddarak tachea bhurgeank mellonk zai tem daiz surokxit urtalem. Toxench, chintat anik ek munis rinnant buddtta ani tem rinn farik korunk taka aplea eka bhurgeak vo apnnakuch gulamponnant vikcho poddot. Punn Pon’nasavea Vorsa, to “ap-aplea ganv-ghora” porot ieunk xoktalo. Hea toren ek munis kainch fuddar nastana sasnak gulamponnant urcho naslo! Jehovak aplea lokanchi kitli kallji asli mhunn hantutlean amkam kollon ieta!

4-5. Adlea Pon’nasavea Vorsa vixim zannam zaunk amkam aiz kiteak itsa asonk zai?

⁴ Pon’nasavea Vorsachea manddavolli thaun anik koslo faido aslo? Jehovan sanglem: “Tumchea modem konnuch gorib asonk zaina, karonn tumcho Dev Jehova tumkam daiz koxem dita tea desant tumcher aplo axirvad ghaltoloch.” (D.S. 15:4, NW) Hem aichea sonvsara poros kitlem vegllem asa zoim, girest tim girestuch zait voitat, ani gorib tim gorib zait astat!

⁵ Adlea tempar, Pon’nasavea disachea manddavolle khala chakrank soddoitale, rinn bhogxitale, ani tankam tanchem daiz porot ditale. Punn aiz ami Kristanv aslolean ami hi manddavoll pallinant, karonn ami Moizesachea Somurti khala nant. (Rom. 7:4; 10:4; Ef. 2:15) Tori astana, Pon’nasavea disachea manddavolle vixim ami zannam zaunchi goroz asa. Kiteak? Karonn ami suttka vo svotontrtai onnbhovunk xoktat, ji amkam Jehovan Israelitkarank dilolea Pon’nasavea disachea manddavolle vixim ugddasak haddtta.

6. Munxakullak kitea thaun suttka zai?

⁶ Eka orthan, ami soglim gulamponnant asat—patkanchem gulamponn hem ek krur torechem gulamponn zaun asa, zachea thaun  amkam suttka zai. Ami patki aslolean, ami zanttim zatat, duent poddttat, ani mortat. Hem zaiteank aplem tondd harxant polloitana vo dotora lagim voitat tednam kollon ieta. Ami patok adartat tednam pasun ami nirax zatat. ‘Aplea monxasoimbant asa to patkacho nem apleak koidi korta’ mhunn apostl Paulun sanglem. Tannem fuddem mhunnttlem: “Kitlo nirbhagi monis hanv! Mhaka mornnache vatten oddun vhorta tea monxasoimbantlo konn mhaka nivarunk xokot?”—Rom. 7:23, 24.

7. Suttke vixim Izaiasan kitem bhakit kelem?

⁷ Khuxalkaiechem mhunnttlear, amkam patka thaun soddounk, vo vattaunk Devan ek manddavoll kel’li asa. Ani Jezu Krista vorvim hi soddvonn amkam melltta. Jezu prithumer ieunchea satxem poros chodd vorsam poilim provadi Izaiasan fuddarak zaunchi asa te eke vhodd suttke vixim bhakit kelolem. Tea vellar zaunchi asli ti suttka, Pon’nasavea Vorsa Israelitkarank mellttale te suttke poros chodd bore torechi zaun asli. Tannem boroilem: “Sorvesporacho Atmo mhojer asa, kiteak Sorvesporan mhaka obhixek kela. Goribank bori khobor diunk, khontibhorit kallzacheank buzvonn diunk, koidiank suttka porgottunk, bondkhonnint asloleank soddounk, Tannem mhaka dhaddla.” (Iz. 61:1) Hem bhakit konnak lagu zata?

8. Suttke vixim Izaiasan keloli bhasaunni konnak lagu zata?

⁸ Suttke vixim aslolem hem mhotvachem bhakit Jezun prithumer apli porgottnni suru kelea uprant purnn zaunk suru zalem. Jezu aplo ganv Nazaret-ant gelo tednam, thoinchea devstanant gelo. Tea vellar, thoim hajir zalolea Judevank Izaiasachim tinch utram tannem vachun sanglim. “Sorvesporacho atmo mhojer asa, kiteak tannem mhaka obhixek kela: goribank bori khobor diunk, koidiank suttka porgottunk, ani kudd’ddeank portun nodor diunk, zulumak sampoddloleank soddounk ani Sorvesporacheam upkaranchem voros porgott korunk tannem mhaka dhaddla.” Tim utram Jezun apnnakuch lagu kelim. (Lukas 4:16-19) Jezun hem bhakit koxem purnn kelem?

9. Jezuchea disamnim zaitim zannam kitea thaun suttka mellttoli mhunn axeun ravlolim?

⁹ Izaiasan bhakit keloli ani Jezun vachloli ti suttka vo svotontrtai, poilea xekddeantlea lokank mellonk lagli. Jezuchea hea utrantlean amkam hi khatri melltta: “Hem xastr-likhit aiz tumchea kanar poddtanch pallon ailem.” (Lukas 4:21) Jezuchim him utram aikololea zaitea lokamnim ghoddie to tankam Romachea hukuma thaun soddoitolo mhunn chintlem  astolem. Tankam tea don dadleam bhaxen dislem astolem, zannim mhunnttlem: “Tor Israelak soddoitolo to hoch mhonn ami ravtaleanv.” (Lukas 24:13, 21) Punn Jezun aplea pattlavdarank tea krur Romi odhikaream add vochonk kednanch sangonk na mhunn ami zannant. Tachea bodlek, “Somrazachem tem Somrazak diat” mhunn tannem sanglem. (Mt. 22:21) Tor Jezun tea vellar svotontrtai koxi haddli?

10. Jezun khoinche suttkechi vatt ugoddli?

¹⁰ Lokank suttka, vo svotontrtai diunk Devacho Put don toren modot korunk ailo. Poilem, dhormik fuddareanchea chukichea xikounne thaun soddounk Jezun lokank modot keli. He fuddari tea tempar zaitea Judevank munxancheo riti-rivazo ani chukichi xikounn pallunk laitale. (Mt. 5:31-37; 15:1-11) Devachi seva korunk modot kortat mhunn sangpi lok khud zaun eke ritin kudd’dde asle. Tannim Messias-ak ani tannem xikoilolea sotak nakarlem dekhun te kudd’ddech urle karonn te Devak vollkhonk pavonk nant ani tanchea patkank bhogsonnem mellonk na. (Juanv 9:1, 14-16, 35-41) Khaltea munxank khotte xikounne thaun koxi svotontrtai mellonk xokta tem Jezun sot xikoun ani borem udharonn dovrun dakhoun dilem.—Marku 1:22; 2:23–3:5.

11. Jezun khoinche dusre suttkechi vatt ukti keli?

¹¹ Dusrem, munxakullak patkachea gulamponnam thaun soddounk Jezun ek vatt ukti keli. Jezun aplem jivit bolidan korun soddvonn dilolean, tea bolidanacher bhavarth asa mhunn korneamnim dakhoitoleank, Deva thaun tanchea patkanchem bhogsonnem mellonk xoktalem. (Heb. 10:12-18) Jezun sanglem: “Hea pasot Put zor tumkam svotontr korit, tor tumi khoreponnim svotontr zatoleat.” (Juanv 8:36) Pon’nasavea Vorsa, Israelitkarank mellttolea tea suttke poros hi suttka khoreanich vorti zaun asli! Udharonnak, Pon’nasavea Vorsa eka chakrak suttka mellttali, punn to porot gulamponnant vochonk xoktalo, ani ek dis to mortolo aslo. Punn Jezu dita ti suttka sasnachi asa.

12. Jezun porgottlolea suttke thaun konnak poilo faido zalo?

¹² 33 K.X.-achea Pon’nasavea disa, Jehovan apostlank ani her visvaxi dadleank ani bailank povitr xokte vorvim obhixikt korun tankam aple put mhunn manun ghetle. Him uprant Jezu sangata sorgar razvottki cholounk punorjivont zaunchim aslim. (Rom. 8:2, 15-17) Nazaret-achea devsthanant Jezu jea suttke vixim uloilo tachea thaun faido zoddunk him poilim aslim. Hea fuddem tea dadleank ani bailank Judev dhormik fuddareanchea riti-rivazam ani khottea xikounnechea  gulamponnam thaun suttka mell’lli. Mornnak pavoita tea patkam thaun pasun Devan tankam soddoilim. Suttka diunk Jehovan keloli manddavoll, Kristi Xok 33 -ant Kristachea pattlavdarank obhixikt kele tednam suru zali, ani Kristachea Hozar Vorsachea Razvottkechea xevottak ti somptoli. Atam thaun tednam meren koslim borim kamam ghoddttolim?

13-14. Jezun porgottloli suttka obhixikt Kristanvam bhair anik konnak mellonk xokta?

¹³ Amchea disamnim, soglea raxttrantle lak’khanim borea kallzache lok “her menddram” modle zaun asat. (Juanv 10:16) Hea lokank Devan Jezu sangata sorgar raj cholounk vinchun kaddunk nant. Punn, Bible sangta ki tankam hea prithumer sodankal jieuncho bhorvonso asa. Hoch tumcho-i bhorvonso asa kai?

¹⁴ Aiz pasun obhixiktank mellttat te bore faide tumkam-i mellttat. Jezuchea bolidanacher tumi bhavarth dovortat dekhun, tumchea patkanchea bhogsonnea pasot tumi Deva lagim magonk zata. Hea toren, tumkam Devachi maniotai melltta ji tumkam monachi xanti ditoli. (Ef. 1:7; Prok. 7:14, 15) Tea bhair, khotte xikounne thaun suttka mell’llolean tumi zoddlolea besanvam vixim chintat. Jezun sanglem: “Tumkam sot kollon ietolem ani sot tumkam svotontr kortolem.” (Juanv 8:32) Osli svotontrtai mell’llolean ami kitlim khuxal asat!

15. Fuddarak amkam koslim svotontrtai ani besanvam mellttoli mhunn ami opekxa korunk zata?

 ¹⁵ Anik ek vhodd svotontrtai mellttoli mhunn tumi opekxa korunk zata. Beginuch, Jezu khottea dhormancho ani noxttea sorkarancho nas kortolo. Punn Dev apli seva kortolea vhodd urponjek rakhtolo, ani tankam sobit bag zatolea prithumer besanvam ditolo. (Prok. 7:9, 14) Zaitea zannanchem punorjivontponn zatolem ani Adanvan kel’lea patkachea vaitt porinnamantlean tankam suttka mellttoli.—Itihas 24:15.

16. Munxakullak kosli vhoddli suttka mellchi asa?

¹⁶ Hozar Vorsachea Razvottkechea vellar, Jezu ani tachea sangata raj choloupi, munxakullak ekdom bori bolaiki mellonk ani Deva lagim ek ghott ixttagot bandun haddunk modot kortole. Pon’nasavea Vorsa Israelitkarank zoxi svotontrtai mell’lli, tea toren Hozar Vorsachea Razvottkechea vellar munxakullak eka vhodd promannan svotontrtai mellttoli. Hacho orth, Jehovachi seva kortolea visvaxi lokank patok naslolem poripurnn jivit mellttolem.

17. Izaias 65:21-23 Devachea lokam pasot kitem bhasaita? (Masikachem fuddlem chitr polloiat.)

¹⁷ Izaias 65:21-23-ant, prithumer jivit koxem astolem tea vixim bhakit kelam. (Vachat.) Tea vellar munis kainch kam nastana allxi zaun boscho na. Tachea bodlek, Devachea lokank tea vellar faideachem ani dhadosponn haddtta toslem kam astolem mhunn Bible sangta. Tea Hozar Vorsachea Razvottkechea xevottak, “aplea bhurgeanchea mhoimebhorit svadhinponnant rochnnek vantto diunche pasot, khud Dev tika kusddeponnachea gulamponnantli soddoun svotontr kortolo” mhunn ami khatri dovrunk zata—Rom. 8:21.

18. Amkam ek boro fuddar astolo mhunn ami kiteak khatri dovrunk zata?

¹⁸ Israelitkarank kam korunk ani visov gheunk Jehovan manddavoll kel’li toxench, to Kristachea Hozar Vorsachea Razvottkechea vellar aplea lokam pasot toxench kortolo. Devachi bhokti korunk tednam pasun vell astoloch. Punn tednam, ani aiz amkam khuxalkai mellttoli zalear Devachi bhokti korop gorjechi zaun asa. Kristachea Hozar Vorsachea Razvottkechea vellar sogle visvaxi lok khuxal astole, karonn amkam sogleank dhadosponnachem kam astolem ani ami soglim Devachi seva kortolim.