1-2. Ami dor eklean kitem korunk zai mhunn Angelito-cho onnbhov amkam dakhoita?

TUJIM avoi-bapui Jehovachim Sakxi zaun asat? Hoi zalear, Jehova sangata tanchi ixttagot asa mhunn tum pasun Jehovacho ixtt zatolo oxem na. Amchim avoi-bapui Jehovachi seva korum vo na korum, ami zonn eklean Jehova sangata ixttagot bandun haddunk zai.

² Angelito bhavachem udharonn polloum-ia. Tacho ak’kho kuttumb Jehovache Sakxi asat. Torui, to tornnatto astana, apun Devak itlo lagim asa oxem taka disonk na. To sangta, “Hanv Jehovachi seva fokot mhoji famil korta mhunn korunk sodhtalom.” Punn, Angelito-n Devachem Utor vachunk ani tacher niall korunk chodd vell ghalunk tharailem, ani to Jehova lagim anik chodd magnnem korunk laglo. Hacho porinnam? Angelito sangta, “Jehovak lagim soronk ekuch vatt mhunnttlear, hanvem svota zaun taka vollkhon gheunchi.” Angelito-chem udharonn polloitat tednam amchea monant he prosn ietat: Jehovak voilea-voir zannam zavop ani taka bore toren vollkhop, hanchea modem kitem forok asa? Ani ami Jehovak koxe toren vollkhonk zata?

3. Jehovak voilea-voir vollkhop ani taka bore toren vollkhop hanche modem koslo ontor asa?

³ Jehovachem nanv ani tannem sangleat vo keleat teo thoddeo vostu amkam khobor asa, dekhun taka ami vollkhotat oxem amkam disonk puro. Punn tacho orth, Jehovak ami bore toren vollkhotat oxem na. Jehova vixim ani tachea sobit gunnam vixim xikonk ami vell gheunk zai. Oxem kelearuch,  umkeach toren to kiteak sangta ani vagta tem amkam somzotolem. Ani hem amkam, ami chintat ani kortat tem Jehovak manvota vo na tem somzonk modot kortolem. Tor ami kitem kel’lem Jehovak zai mhunn amkam kolltta tednam ami toxench korunk zai.

4. Bible-achea udharonnacher bhasabhas kelolean amkam koxi modot zatoli?

⁴ Ami Jehovachi seva korunk sodhtat mhunn thodde lok amchi fokannam korunk puro, ani ami mittingek voitat mhunn te amcho anik chodd virodh korunk puro. Punn ami Jehovacher bhorvonso dovorlear, to amkam kednanch sanddchona. Oxem kelearuch, Deva sangata ami sasnak togta tosli buniad bandunk pavtolim. Ami Jehovak itle bore toren khorench vollkhonk xoktat kai? Hoi! Karonn, Moizes ani David Raza, opurnn asonui tannim hem korun dakhoilem. Tannim kitem kelem tem polloitana, hea don prosnache zobab ami zannam zatolim: Te Jehovak koxe zannam zaunk pavle? Ani tanchea udharonnantlean ami koslim lisanvam xikonk xoktat?

5. Moizesan kitem korunk vinchlem?

⁵ Moizesan Devachi seva korunk vichun kaddlem. Moizes 40 vorsancho zalo tednam, lokanim “apnnak Faraohche dhuvecho put” mhunnttlolo taka naka aslem. (Heb. 11:24) Moizesan ek vhodd podvi soddun dili. Ejiptant gulam zaun aslolea Israelitkarank apnnem tenko dilo zalear, lok dev mhunn mantale to bollixtt raza Faraoh, apnnacher khub ragar zatolo mhunn Moizesak khobor asli. Hantuntlean, Moizesak kitlo ghott bhavarth aslo tem dison ieta! Teach bhavarthak lagon, to Jehova sangata jivitbhor ek ghott ixttagot zoddunk pavlo.—Mho. 3:5.

6. Moizesachea udharonnantlean ami kitem xikonk zata?

⁶ Amkam koslem lisanv asa? Moizesa sarko, ami sogleamnim ek nirnnoi gheunk zai: Devachi seva korun tachea lokam sangata mellon ieunk ami vinchtolim kai? Tor amkam Devachi seva korunk zaite teag korunk poddot, ani Jehovak vollkhonant tanchea thaun amkam virodh ieunk puro. Punn amchea sorginchea Bapacher ami visvas dovorlo zalear, to amkam tenko ditoloch mhunn ami khatri dovrunk zata!

7-8. Moizes kitea vixim xikot ravlo?

⁷ Moizes Jehovachea gunnam vixim xikot ravlo ani tachi khuxi korit ravlo. Udharonnak, Israel raxttrak Ejiptantlea gulamponnantlim soddounk Jehovan Moizesak sanglem tednam, hem kam apleachean zaunchem na oxem taka dislem ani tannem porot-porot Jehovak apunn hea kamak purto na mhunn sanglem. Punn Devan taka doia-moia dakhoili, taka koxem bhogta tem somzolo ani taka modot keli. (Sutt. 4:10-16) Hea vorvim, Moizes Faraohk zoddttechim formonnam diunk xoklo. Uprant Jehovan apli xokti uzar korun, Faraohk ani tachea soineak Tambddea Doreant koxi nas keli ani Israelitkarank koxem salvar kele tem Moizesan polloilem.—Sutt. 14:26-31; St. 136:15.

⁸ Moizesan Israelitkarank Ejiptantle bhair haddlea uprant, te sodanch gunngunntale. Tori astana, Jehovan gulamponnantlean soddun haddlolea tea lokam sangata kitlea pasiensan vaglo tem Moizesan polloilem. (St. 78:40-43) Ani Moizesachem aikon Jehovan Israelitkarancho nas korunk na tednam Jehova kitlo khalto asa tem Moizesak kollon ailem.—Sutt. 32:9-14.

9. Hebrevank 11:27-a pormonnem, Jehova sangata Moizesachi ixttagot kitli ghott asli?

⁹ Suttke uprant, Jehova sangata Moizesachi  ixttagot itli ghott zal’li ki eke toren to aplea sorginchea Bapak pollounk xoktalo. (Hebrevank 11:27 vachat.) Ani hi ixttagot kitli ghott asli, tea vixim Bible oxem sangta: “Ek monis aplea ixtta kodde uloita toso Sorvespor Moizesa kodde tondda-tonddim uloitalo.”—Sutt. 33:11.

10. Jehovak bore toren vollkhonk, ami kitem korunk zai?

¹⁰ Amkam kitem lisanv asa? Jehovak bore toren vollkhonk, ami fokot tachea gunnam vixim zannam zalearuch puro nhoi punn ami tachi khuxi pasun korunk zai. ‘Soglea munxank soddvonn mell’lloli ani somestank purnn sotacho onnbhov mell’llolo’ hi aiz Jehovachi khuxi zaun asa. (1 Tim. 2:3, 4) Hi khuxi korunk ek vatt mhunnttlear dusreank Jehova vixim xikovop.

11. Ami dusreank Jehova vixim xikoitat tednam, ami taka anik bore toren koxim vollkhonk pavtat?

¹¹ Chodd korun, Jehova vixim ami dusreank xikoitat tednam ami taka anik bore toren vollkhonk pavtat. Udharonnak, aple ixtt zaunk sodhtat toslea lokam lagim Jehova amkam pavoita tednam, lokam pasot tachi doia-moia amkam dison ieta. (Juanv 6:44; Itihas 13:48) Amchea sangata Bible xiktat tim apleo vaitt sonvoim-o soddun diun aplea sobhavant bodol kortat tednam, Devachea Utrak asloli xokti amkam dista. (Kol. 3:9, 10) Ani amchea vattarantlea lokank modot korunk Jehova amkam tanchea lagim portun-portun dhaddtta tednam, lokam pasot Devak aslolem pasiens amkam dison ieta.—Rom. 10:13-15.

12. Suttka 33:13-ant sanglolea pormonnem, Moizesan kitem maglem, ani kiteak?

¹² Moizesan Jehova sangata aslole aplea ixttagoticho valor kelo. Jehovan Moizesak zaitim ojapachim kamam korunk uzar kelo, tori punn, Jehovak anik bore toren vollkhonk lagon Moizesan tachea lagim modot magli. (Suttka 33:13 vachat.) Moizesan Jehova lagim hea vixim maglem tednam, to 80 poros chodd piraiecho aslo. Tori astana, aplea mogall sorginchea Bapa vixim apnnem anik zaitem xikchem asa mhunn to somzolo.

13. Deva sangata aslolea amchea ixttagoticho ami valor kortat mhunn dakhounk ek vatt khoinchi?

¹³ Amkam kitem lisanv asa? Ami Jehovachi seva thoddo temp vo zaito temp korunk puro, punn tachea sangata aslolea ixttagoticho ami sodanch valor korunk zai. Ani ami hea ixttagoticho valor kortat mhunn dakhounk ek vatt mhunnttlear magnneant tachea lagim ulovop.

14. Deva vixim chodd xikonk magnnem kiteak mhotvachem?

¹⁴ Konna-i lagim ami ghott ixttagot dovortolim zalear tanchea lagim ami sodanch ulounk zai. Tor Jehova lagim ek ghott ixttagot dovrunk sodanch tachea lagim magnnem korat, ani tumchim chintnam ani bhavnam taka sangonk tumi kednanch fattim soronakat. (Ef. 6:18) Turkey desant ravpi Krista nanvachi ek bhoinn sangta: “Dor ek pavtt magnnem korun mhojim chintnam hanv Jehovak sangta tednam ani to mhaka modot korta tem polloita tednam, tachea pasot aslolo mhozo mog ani visvas anik chodd vaddtta. Jehova mhojea magnneank zobab dita tem polloun hanv Jehovak mhozo Bapui ani Ixtt korunk pavlem.”

15. Jehovan David Raza vixim kitem mhunnttlem?

¹⁵ David Raza zolmolo tednam tache avoi-bapui ani sorvbhonvtim soglo lok Jehovachi bhokti kortale. Punn tim kortat mhunn to Jehovachi bhokti korinaslo. Tannem Jehova sangata ek ghott ixttagot bandun haddli, ani Jehova tacho chodd mog  kortalo. Jehova Davida vixim uloitana to aplea “kallza sarko” mhunnttlem. (Itihas 13:22) David Jehovak itlo lagim koso soronk pavlo?

16. Rochnnek polloun David Jehova vixim kitem xiklo?

¹⁶ David rochnne thaun Jehova vixim xiklo. To tornnatto astana ani aplea bapaichim menddram rakhtana, tannem zaito vell ghora bhair uktea zagear sarlo. Ani ghoddie tea vellar Jehovachea rochnnecher to niall korunk laglo. Udharonnak, Davidan ratchea vellar mollbak polloitana, tannem fokot hozaramnim noketranch pollounk nant, punn Zannem tim rochleant tache gunn to vollkhonk pavlo. Tor David oso borounk pavlo: “Ontrall Devachi mhoima vornnita, mollob Tachea hatanchem kam porgott’ta.” (St. 19:1, 2) Munxank jea toren rochleant tem niallttana, taka Jehovachi zannvai dison aili. (St. 139:14) Jehovan kel’lea vostum vixim chintunk laglo tednam, Jehova mukhar apunn kitlo lhan tem taka dison ailem.—St. 139:6.

17. Devachea rochnnecher niall kelear ami kitem zannam zaunk xoktat?

¹⁷ Amkam kitem lisanv asa? Rochnne vixim zannam zaunk umed dakhoiat. Jehovan prithumer rochloleo sobit vostu pollounk vell kaddat; ani tachi ojapvont rochnna polloun khuxal zaiat! Tumchea sodanchea jivitant tumchea bhonvtonnim aslolea rochnnecher, zoxem zhaddam, zonvaram, lok hancher dhean diat, ani hanchea thaun Jehova vixim tumi kitem xiktat tacher niall korat. Tednam dor disa, tumchea mogall bapai vixim tumi chodd ani chodd xikonk pavtolim. (Rom. 1:20) Ani oxe toren dor disa tache pasot tumcho mog anik chodd vaddttolo.

18. Strotr 18-ant sanglolea pormonnem, Davidan kitem vollkhon ghetlem?

¹⁸ Jehova apleak modot korta mhunn David zannam zalo. Udharonnak, Davidan ek xinva ani vanxela thaun, aplea bapaichea menddrank rakhle tednam to tea zonglim zonvarank Jehovacheach adaran jivexim marunk pavlo mhunn taka kollon ailem. Rakes koso aslolea Goliathak Davidan jivexim marlo tednam, Jehovanuch apnnank modot keli mhunn taka sarkem kollon ailem. (1 Sam. 17:37) Ani nattkaien bhorlolea Saul Raza thaun, Jehovanuch apnnak salvar kelo mhunn Davidan sanglem. (St. 18, superscription, NW) David zor gorvixtt aslo zalear heo sogleo vostu apleach bollan apnnem keleat mhunn to chintolo aslo. Punn to khalto aslo dekhun, hem soglem to Jehovachea adaran korunk pavlo mhunn tannem vollkhon ghetlem.—St. 138:6.

19. Davidachea udharonnantlean ami kitem xiktat?

¹⁹ Amkam kitem lisanv asa? Ami fokot Jehovachi modot maglearuch puro nhoi. Punn to amkam kednam ani koso modot korta tem pasun ami vollkhuncho proitn korunk zai. Ami khalti asat zalear, ami amcheach bollan soglem korunk xokonant mhunn ami vollkhon ghetat, ani amchean zaina tem Jehovachea bollan ami korunk xoktat mhunn ami manun ghetat. Ani dor ek pavtt Jehova amkam modot korta mhunn ami polloitat tednam, tachea sangata amchi ixttagot anik chodd ghott zaunk pavtoli. Jehovachi seva zaitim vorsam kelolo Fiji desantlo ek bhav, Isaac-ak hem kollon ailem. To mhunntta: “Hanv mhojea jivita vixim chint’tana, Bible xikop hanvem suru kelo tea vella thaun aiz poriant Jehovan mhaka koxi modot kelea tem hanv pollounk xoktam. Hem vollkhololean, Jehova mhaka khoro zaunk pavlo.”

20. Deva sangata Davidak aslolea ixttagoti thaun ami kitem xiktat?

²⁰ Davidan Jehovache gunn apnnaile. Ami Jehovache gunn appnaunk xokta tea toren  tannem amkam rochleant. (Ut. 1:26) Ami jitlim Jehovachea gunnam vixim xiktat, titlea bore toren tachi ami dekh gheunk pavtolim. David aplea sorginchea Bapak bore toren vollkhonk xoklo dekhun dusream lagim vagtana to Devache gunn dakhounk pavlo. Ek udharonn polloum-ia. Davidan Bathsheba sangata pordvar kelo ani tachea ghovak jivexim marlo tednam tannem Jehova add patok kelem. (2 Sam. 11:1-4, 15) Punn dusreank doia dakhoil’lea Davidak Jehovan doia dakhoili. Jehova lagim Davidachi ek bori ixttagot asli dekhun Israelitkar Davidacho khub mog kortale ani Jehovan taka Israelachea dusrea razank ek udharonn koxem uzar kelem.—1 Raz. 15:11; 2 Raz. 14:1-3.

21. Efezkarank 4:24 ani 5:1-a pormonnem, ami ‘Devachi dekh’ ghetlear kitem porinnam zatolo?

²¹ Amkam kitem lisanv asa? Ami ‘Devachi dekh’ gheunk zai. Oxem kelolean amkam faido zata ani ami Jehova vixim anik zannam zaunk pavtat. Devache gunn ami apnnaitat tednam, tachim bhurgim mhunn ami dakhoitat.—Efezkarank 4:24; 5:1 vachat.

22-23. Jehova vixim ami xiktat tem apnnailear kitem zatolem?

²² Rochnnem udexim ani tachem Utor, Bible-a udexim ami Jehova vixim zannam zaunk pavtat mhunn ami xiklim. Moizes ani Davida sarkim, anik zaitea visvaxi sevokanchim udharonnam ami Bible-ant xikonk xoktat zanchi ami dekh gheunk zata. Jehovan aple vatten soglem kelam. Tor atam ami amchea vatten asa tem korunk zai, tem mhunnttlear ami amche dolle, kan, ani kalliz uktem korun tachea vixim zannam zaunk zai.

²³ Ami Jehova vixim zannam zaunk kednanch bond korchinant. (Up. 3:11) Ami tachea vixim kitlim zannant tem mhotvachem nhoi, punn tachea vixim zannam zalea uprant ami kitem kortat tem chodd mhotvachem. Ami xiktat tem apnnaitat ani amchea mogall Bapaichi dekh ghetat zalear, to amchea lagim sorot ravtolo. (Jak. 4:8) Apleak anik zannam zauncho proitn kortat tankam Jehova kednanch sanddchona mhunn to aplea Utrantlean amkam khatri dita.