OBHEASACHO LEKH 48
’Tumi Povitr Zaiat’
“Soglle tumche chalint povitr zaiat.”—1 PED. 1:15.
GIT 34 Walking in Integrity
KITEM XIKTOLIM *
1. Apostl Pedrun Kristanvank kitem solʼlo dilo, ani amchea lagim to solʼlo apnnaunk zaunchoch na oxem amkam kiteak disonk xokta?
AMKAM sasnak jieuncho bhorvonso hea prithumer asum vo sorgar asum, apostl Pedrun poilea xekddeantlea Kristanvank dilʼlea solʼleantlean ami xikonk zata. Tannem mhunnttlem: “Soglle tumche chalint povitr zaiat, kiteak Zannem tumkam apoileant To povitr; oxench Povitr Pustok sangta: ‘Hanv povitr dekhun tumi-i povitr zaiat.’” (1 Ped. 1:15, 16) Tor hea utrantlean, Jehova sogleam-von povitr asa ani tachi dekh gheun ami kortat tea soglea vostumnim povitr zaunk zata, mhunn amkam kollon ieta. Punn ami opurnn asat ani chuki kortat dekhun amchea lagim oxem korunk zaunchench na mhunn ami chintunk puro. Udharonnak, apostl Pedrun pasun thoddeo chuki kelʼleo. Tori punn, tachea udharonnantlean ami pasun ‘povitr zaunk zata’ mhunn amkam xikonk melltta.
2. Hea lekhant ami kitem xiktolim?
2 Hea lekhant ami hea prosnanche zobab polloitolim: Povitr asop mhunnttlear kitem? Jehovachea povitrtaie vixim Bible kitem sangta? Ami povitrtaien koxem vagonk zata? Ani ami povitr aslear Jehova sangata aslolea amchea ixttagoticher koslo porinnam poddtta?
POVITR ASOP MHUNNTTLEAR KITEM?
3. Ek povitr munis koso asta mhunn zaite lok chintʼtat, punn hache vixim amkam sarki mahiti khoim mellttoli?
3 Ek povitr munis umkech toreche khas kopdde nhesta ani tachea tonddacher kednanch hanso asona mhunn zaito lok chintʼtat. Punn tem khorem zaunk xokona. Karonn povitr zaun aslolea Jehova Devak, ek “khuxal Dev” mhunnttlolo asa. (1 Tim. 1:11, NW) Ani tachi seva kortat tankam bhagi vo khuxal mhunnttlolim asat. (St. 144:15) Toxench, umkech toreche khas kopdde nhestat ani dusreank dakhounk borim kamam kortat toslea munxank te sarke korinant mhunn Jezun sanglolem. (Mt. 6:1; Marku 12:38) Punn khorim Kristanvam zalʼlean, Bible kitem sangta tem amkam khobor asa dekhun povitr asop hacho khoro orth kitem tem ami zannant. Ami opurnn aslolean ami povitr asonk xokonant, oxem amkam disonk puro. Punn amcho mogall Dev Jehova amchean korunk zaina tem amkam korunk sangcho na, mhunn ami ugddas dovrunk zai. Dekhun Jehova amkam, ‘Tumi povitr zaiat,’ mhunn sangta. Tor ami povitr koxim zaunk xoktat tem zannam zaunchea poilim, povitrtai mhunnttlear kitem tem ami polloum-ia.
4. Povitr asop vo povitrtai mhunnche kitem?
4 Povitr asop, vo povitrtai mhunnche kitem? Bible-a pormonnem tacho orth, noitik ritin nitoll asop, sonvsarantlea lokam poros veglle ason Devachi seva korop, Jehova Devak manvota tea ritin tachi bhokti korop, ani tachea sangata lagxilʼli ixttagot asop mhunn amkam kollon ieta. Khorench, ami opurnn aslearui povitr Dev Jehova sangata ami ixttagot korunk zata. Hem kitlem ojapachem!
“POVITR, POVITR, POVITR . . . SORVESPOR”
5. Jehova vixim amkam visvaxi ainzam thaun kitem xikonk melltta?
5 Jehova sompurnn toren povitr asa. Oxem ami kiteak mhunnonk zata? Bible-ant, Jehovachea xinvasona bhonvtonnim aslole ainz, zankam serafim mhunnttat, tanchea utrantlean kollon ieta. Te mhunnttat: “Povitr, Povitr, Povitr Sorvsoktivont Sorvespor!” (Iz. 6:3) Tea bhair, te ainz pasun povitr asat. Ani hea pasot tankam Jehova lagim ravonk ek sondhi asa. Khorem mhunnttlear, te itle povitr asat ki te prithumer ietat zalear te ube ravtat to zago pasun povitr zaunk xokta. Hem amkam, Moizes zollttea jhilkutta fuddem aslo tednam kitem zalem tantuntlean kollon ieta.—Sutt. 3:2-5; Josh. 5:15.
Mha-iadnik aplea toklecher ek muddaso ghaltalo zacher ek bhangarachi patti asli ani tea pattier oxem boroil’lem aslem: ‘Jehova ek povitr Dev.’ (Peregraf 6-7 polloiat)
6-7. (a) Suttka 15:1, 11-nt sanglam toxem, Jehova povitr mhunn Moizesan koxem dakhoilem? (b) Jehova ek povitr Dev mhunn Israelitkar koxe ugddas korunk xoktale? (Masikachem fuddlem chitr polloiat.)
6 Moizesan Israelitkarank tambddo doria par korun haddlea uprant, tannem Jehovak ek git gailem zantunt Jehova kitlo povitr tem tannem Israelitkaranchea ugddasak haddlem. (Suttka 15:1, 11 vachat.) Punn Ejipt ani Kanaanachea devank bhozpi lok povitr asonkuch xokonasle. Karonn te tanchea devank aplea bhurgeanche iodn bhettoitale ani bhurxim onoitik kamam kortale. (Lev. 18:3, 4, 21-24; D.S. 18:9-11) Punn Jehova Devan aplea lokank oxem kednanch korunk sangonk na, karonn to sompurnn toren povitr. Toxench, mha-iadnik aplea toklecher ek muddaso ghaltalo zacher ek bhangarachi patti asli ani tea pattier oxem boroilʼlem aslem: ‘Jehova ek povitr Dev.’—Sutt. 28:36-38, NW.
7 Tea pattier boroilʼlim utram polloun Jehova khorench povitr mhunn lokank ugddas ietalo. Punn ek Israelitkar ghoddie mha-iadnika fuddem vochonk xokonaslo. Tor Jehova Dev povitr mhunn taka koxem kollon ieta aslem? (D.S. 31:9-12) Taka Somurtintlim him utram aikonk mellttalim: “Hanv tumcho Sorvespor, ani tumi povitr zaunk zai, kiteak hanv povitr.” “Tumi povitr . . . zaunk zai, kiteak hanv tumcho Sorvespor, ani povitr.” Somurtintilim him utram soglea Israelitkar dadle, bailam, ani bhurgeam mukhar vachtale.—Lev. 11:44, 45; 20:7, 26.
8. Levi-Xastr 19:2 ani 1 Pedru 1:14-16-ntlean amkam kitem xikonk melltta?
8 Jehovan Moizesak soglea Israelitkarank kitem sangonk lailem tem ami atam polloum-ia. Tem amkam Levi-Xastr 19:2-ant melltta. Jehovan Moizesak sanglem: “Israelachea sogllea bhurgeank ektthaim korun uloi ani tankam oxem sang: ‘Povitr zaiat karonn Hanv, Sorvespor tumcho Dev, povitr.’” (1 Pedru 1:14-16 vachat.) Aiz ami Somurti khala nant tem khorem, punn apostl Pedrun pasun Levi-Xastr 19:2-antlim utram, ulʼlekh korunk soglea Kristanvank povitr zaiat mhunn sanglem. Tor amkam kitem xikonk melltta? Amcho bhorvonso sorgar jieuncho asum vo prithumecher, ami Jehovacho mog kortat zalear Jehova povitr asa toso ami-i povitr asonk proitn korunk zai.—1 Ped. 1:4; 2 Ped. 3:13.
“SOGLEA TUMCHEA CHALINT . . . POVITR ZAIAT”
9. Levi-Xastr odheai 19 xiklolean amkam koso faido zaunk xokta?
9 Ami Jehova Devak khuxal korunk sodhtat dekhun, ami koxim povitr zaunk xoktat tem zannam zaunk ami proitn kortat. Hea vixim Levi-Xastr odheai 19-antlean Jehova amkam bore solʼle dita. Hea odheai-a vixim, Marcus Kalisch nanvacho ek Hebrev bhaxecho zannar oxem mhunntta: “Bible-antlea poilea panch pustokantlo ani Levi-Xastr pustokantlo, ho odheai ghoddie sogleam poros mhotvacho zaun asa.” Levi-Xastr odheai 19-antlim survatechim utram ‘Tumi povitr zaiat’ oxem mhunnttat mhunn ugddas dovrat. Tor hea odheai-ant aslolim lisanvam amkam amchea sodanchea jivitant povitr zaunk koxim modot kortat tem ami polloitolim.
Levi-Xastr 19:3-ant avoi-bapai vixim sanglolea kaideantlean ami kitem xiktat? (Peregraf 10-12 polloiat) *
10-11. Levi-Xastr 19:3-ant, ami kitem korunk zai mhunn amkam sanglam, ani oxem korop kiteak gorjechem?
10 Israelitkaramnim povitr asonk zai, hem sanglea uprant Jehovan tankam sanglem: “Zonn-eklean tumi tumche avoik, ani tumchea bapaik man diunk zai . . . Hanv Sorvespor tumcho Dev.”—Lev. 19:2, 3.
11 Tor amchea avoi-bapaik man divop khub mhotvachem oxem ami kiteak mhunnonk zata? Ek pavtt eka munxan “mhaka Sasnnik Jivit mellcheak hanvem kitem borem korunk zai?” mhunn Jezuk vicharlem. Tednam Jezun taka kitem zobab dilo tem ami ugddas korum-ia. Jezun dilʼlea zobabantlean tea munxan aplea avoi-bapaik man divop kitlem gorjechem tem amkam kollon ieta. (Mt. 19:16-19) Toxench, aplea avoi-bapaichi kallji gheunk fatti sortolea Farizevank Jezun mhunnttlem, oxem korun “tumi Devachi adnia nopoit keli.” (Mt. 15:3-6) Tea bhair, hi adnia Somurtichea Dha Updesantlo panchvo updes zaun asa, toxench Levi-Xastr 19:3-ant pasun amkam boroiloli melltta. (Sutt. 20:12) Ani dekhunuch, Jehovan hi adnia diunchea poilim oxem mhunnttlem: “Povitr zaiat karonn Hanv, Sorvespor tumcho Dev, povitr.” Hem amkam dakhoita ki povitr zaunk aplea avoi-bapaik man divop kitlem gorjechem zaun asa.
12. Levi-Xastr 19:3-ant dilʼlo solʼlo ami apnnaitat mhunn ami koxem dakhounk zata?
12 Tor Jehovan amkam dilʼlea adnia vixim ami chintʼtat tednam, ‘Hanv mhojea avoi-bapaik man ditam kai?’ mhunn ami chintunk puro. Ami adim oxem korunk chukleant mhunn amkam ghoddie dison ailam astolem. Punn nirax zainakat. Ami adim kelam tem ami bodlunk zaina tem khorem, punn amchea avoi-bapaik man diunk zata tem korunk, ami atam proitn korunk zata. Ani oxem korunk ami thoddeo vostu korunk zatat, zoxem, tanchea sangata ami anik vell sarunk zata. Toxench, tancheo gorjecheo vostu tankam mellonk, Jehova sangata tanchi ixttagot samballunk, ani tachi seva korit ravonk ami tankam modot korunk zata. Tea bhair, tankam goroz ti buzvonn ani urba diunk zata. Ami oxem kortat tednam Levi-Xastr 19:3-ant sanglolo solʼlo ami apnnaitat mhunn dakhoun ditat.
13. (a) Levi-Xastr 19:3-ant Jehovachea sevokamnim povitr zaunk anik kitem korunk zai mhunn sanglam? (b) Lukas 4:16-18-nt sanglolea pormonnem, aiz ami Jezuchi dekh koxi gheunk zata?
13 Toxench, Jehovachea sevokamnim povitr zaunk anik ek vost korunk zai asli mhunn hea versamnim sanglolem asa. Tem mhunnttlear, tannim Sonvar vo Sabatacho dis pallunk zai aslo. Sonvar pallop mhunnttlear, lokamnim aplea sodanchea kamam thaun visov gheun Jehovachea bhoktek vell diunk zai aslo. * Ani heach pasot, Jezu hea disa dev-mondirant vochon Devachea Utrantlean vachtalo. (Sutt. 31:12-15; Lukas 4:16-18 vachat.) Punn aiz ami Somurti khala nant ani hea pasot ami Sonvar pallinant. Tori astana, Israelitkar Sonvar koxe pallttale ani Sonvar pallʼllolean tankam koso faido zatalo, tantuntlean ami zaitem xikonk zata. Tor Levi-Xastr 19:3-ant, “tumi Sonvar pallunk zai,” hi Jehovan diloli adnia ami pallttat mhunn dakhoitolim zalear, Jezu bhaxen ami Jehovachea bhoktek vell diunk zai. Tor hi adnia pallunk ami anik vavr korunk zata kai? Ami oxem kortat zalear, Jehova sangata amchi ixttagot anik ghott zaunk pavtoli. Ani hem povitr zaunk ekdom gorjechem zaun asa.
JEHOVA SANGATA TUMCHI IXTTAGOT GHOTT KORAT
14. Levi-Xastr odheai 19-ant khoincho mhotvacho mudʼdho porot-porot sangla?
14 Amkam povitr zaunk modot korunk Levi-Xastr odheai 19-ant ek mhotvacho mudʼdho melltta. Tea odheai-ant, vers 4-achim xevottachim utram oxem sangtat: “Hanv Sorvespor tumcho Dev.” Tor him ani oslinch utram amkam tea odheai-ant 16 pavtti mellttat. Him utram aikotana amkam Dha Updesantlo poilo updes ugddasak ieta, zoim mhunntta: “Hanv Sorvespor tumcho Dev . . . Mhoje bhair tumkam anink dev asche nant.” (Sutt. 20:2, 3) Tor ami dor eklean povitr asonk zai zalear Jehova sangata amkam aslolea ixttagoti poros konnakui vo kiteakui ami chodd mhotv diunchim nant. Tea bhair, ami Jehova vixim sakx ditat dekhun tachea nanvak opman haddtta toslem ami kainch korchim nant.—Lev. 19:12; Iz. 57:15.
15. Levi-Xastr odheai 19-ant, zonvaranchea bhettounnea vixim aslolea versantlean ami kitem zannam zatat?
15 Israelitkar Jehovache kaide pallttale tednam te dakhoun ditale ki te Jehovak aplo Dev mhunn manun ghetat. Karonn Levi-Xastr 18:4-ant tankam oxem sanglolem: “Hanv tumkam ditam tea mhojea kaideank pallo diat. Hanv Sorvespor, Tumcho Dev.” Hantuntle thodde kaide amkam odheai 19-ant mellttat. Udharonnak, hea odheai-achea vers 5-8, ani 21, 22-ant bhettounnea vixim kaide dilʼle. Ani Israelitkaramnim, povitr ani Jehovak manta tea toren heo bhettounneo korunk zai asleo. Tor hea versantlean, Hebrevank 13:15 sangta tea pormonnem amche vakhannʼnneche iodn pasun Jehovak manta tea toren asonk zai mhunn ami zannam zatat.
16. Devachi seva kortat ani korinant tanchea modem ontor asonk zai mhunn Levi-Xastr 19-ant aslolem totv amkam koxem dakhoita?
16 Povitr zaunk, ami sonvsarachea lokam poros vegllim asonk zai. Punn hem korunk amkam kotthin zaunk xokta, karonn iskolantlim bhurgim, kamache vangddi ani amchea familiche sodoxio Jehovak manvona tem korunk amcher dobhav ghalunk xoktat. Tor hea vellar sarko nirnnoi gheunk amkam koxi modot zatoli? Levi-Xastr 19:19-ant dilʼlem totv atam ami polloum-ia. Thoim sanglam: “Don jinʼsanchea lugttanchim vostram ghalum nakat.” Ho kaido Israelitkarank dilʼlo, ani hea kaideak lagon tim her raxttram poros vegllim aslim mhunn dison ietalem. Punn aiz ami Somurti khala nant. Ani ami veg-vegllea torechim lugttam aslole kopdde nhestat, zoxem cotton ani silk. Tor Levi-Xastr 19:19-ant sanglolem totv ami koxim apnnaitolim? Iskolant, kamachea zagear, vo amchea familichea sodoxiam modem jim konn Bible-achi xikounn apnnainant tanchea bhaxen ami zaunk sodhinant. Ami tancho mog kortat tem khorem, punn ami Jehovacho lok dekhun ami jivitant ghetat tea nirnnoi-am udexim ami tanchea poros vegllim asat mhunn dakhoitat. Ani povitr asonk Devachea Utrak pallo diun sonvsarantlea her lokam poros vegllim asop gorjechem.—2 Kor. 6:14-16; 1 Ped. 4:3, 4.
Levi-Xastr 19:23-25-ant, Israelitkaramnim kitem xikonk zai aslem, ani hea versantlean tumi kitem xiktat? (Peregraf 17-18 polloiat) *
17-18. Levi-Xastr 19:23-25-antlean ami kitem xiktat?
17 Povitr asonk Jehova sangata amchi ixttagot ghott asonk zai. Ani Jehova sangata aple ixttagotik tannim poilo zago diunk zai mhunn Israelitkarank Jehovachea hea utrantlean kollon ietalem, zoim tannem mhunnttlem, “Hanv tumcho Sorvespor.” Hem koxem mhunn somzonk, Levi-Xastr 19:23-25-ant kitem sanglam tacher dhean diat. (Vachat.) Ek Israelitkar Bhasailʼlea Desant gelea uprant tin vorsam porian tannem roilolea khoinchea-i zhaddachem foll khaunk zainaslem. Ani chovtea vorsa tannem tem Jehovak bhettounk zai aslem. Fokot panchvea vorsa thaun tannim tea zhaddachem foll khaunk zatalem. Tor hea kaideantlean amkam kollon ieta ki ek Israelitkaran apnnak nhoi, punn Jehovak ani tachea bhoktek poilo zago diunk zai aslo. Toxench, Jehova tacheo gorjecheo vostu taka ditolo mhunn tannem khatri dovrunk zai asli. Ani to devmondirant voitana, udar kallzan tannem bhettounni korunk zai asli.
18 Levi-Xastr 19:23-25-ant dilolea kaideantlean, Jezun Dongravelo Updes ditana kitem sanglolem tem amkam ugddasak ieta. Tannem mhunnttlolem: “Tumchea jiva khatir kitem khaunchem-pieunchem . . . te vixim huskeum nakat.” Ani tannem fuddem sanglolem: “Tumkam hea sogllea vostunchi goroz mhonn tumcho sorgincho Bap tor zannoch.” Tor ami kitem xiktat? Jehova suknneanchi kallji gheta zalear to amcheo gorzo pasun purnn kortolo mhunn ami khatri dovrunk zata. (Mt. 6:25, 26, 32) Tor ami goroz asloleank “doiechim dennim” diun modot korunk fuddem sortat. Ani hem ami dusreank dakhounk korinant. Toxench, sobhecho korch bagounk ami udar kallzan denngim ditat. Ami oxem kortat tednam Jehova tem polloita ani to amcher besanv ghalta. (Mt. 6:2-4, NW) Hea toren, Levi-Xastr 19:23-25-ant dilolim lisanvam ami somzotat mhunn ami dakhoun ditat.
19. Levi-Xastr pustokacher dhean dilolean tumkam koso faido zala?
19 Tor hea lekhant, Deva bhaxen ‘sogle amche chalint povitr zaunk’ ami kitem korunk zai tem Levi-Xastr odheai 19-antlean ami xiklim. (1 Ped. 1:15) Ani amchi bori vagnnuk polloun Jehovachi seva korinant te lok taka mhoima diunk pavtole. Ani oxench thoddeamnim kelam. (1 Ped. 2:12) Punn Levi-Xastr odheai 19-ant amkam anikui lisanvam xikonk mellttat, jim ami fuddlea lekhant polloitolim. Ani tim amkam apostl Pedrun sanglam toxem ‘povitr zaunk’ modot kortolim.
GIT 80 “Taste and See That Jehovah Is Good”
^ per. 5 Jehova ek povitr Dev zaun asa. Tor tachi bhokti kortat tim-ui povitr aslolim taka zai. Ani ami Jehovacho mog kortat dekhun taka manvota tem ami korunk sodhtat. Punn opurnn aslolean ami povitrtaien Jehovachi seva korunk xoktat kai? Hoi, apostl Pedrun Kristanvak dilʼlea solʼleantlean ani Jehova Devan Israelitkarank dilʼlea kaideantlean ami povitr zaun tachi seva koxi korunk xoktat tem ami hea lekhant xiktolim.
^ per. 13 Sonvar vo Sabatacho dis ani tantuntlean ami xikonk zata tea lisanvam vixim zannam zaunk Dezembr 2019 Pahrogopur-ant aslolo, “Kam Korunk ani Visov Gheunk ‘Ek Vell Asa,’” ho lekh polloiat.
