Povitr zaunk Israelitkaramnim kitem korunk zai tea vixim sangtana Jehovan oxem sanglolem: “Tumi konnacheach vixim fott uloun tanchem nanv piddʼddear korum nakat. Tumi tumchea peleachea jiva add voichem nhoi. Hanv Jehova.”—Lev. 19:2, 16, NW.

Hea versant aslolea “jiva add voichem nhoi” hea utrancho orth kitem? Levi-Xasr pustoka vixim mahiti diupi Judevanchea eka pustokant oxem sanglam: “Hea versacho ho bhag . . . kitem sangonk sodhta tem sangonk kotthin karonn hea utrank uzar kelolea Hebrev utrancho orth, ‘peleachea voir ubo ravop vo tachea boglek ubo ravop’ oxem zata.”

Thodde zannar sangtat ki vers 16, vers 15-nt kitem sanglam taka zuddlolo asa. Thoim sanglam: “Onit korun favo naslole nirnnoi dium nakat. Durbollachea tonddak polleun uloum naka vo girestak fuslavunk sodum naka. Punn niti pormannem peleachi nit kor.” (Lev. 19:15) Toxem zalear, “jiva add voichem nhoi” hea utrancho orth oso zata, ki ek Israelitkaran korttacheo kesi zhuztana, veapar-dhondo kortana toxench familint pasun aplea peleacher onʼneai korcho nhoi, ani aplea faideak lagon aplea peleak tannem fottounchem nhoi. Ami hem pallunk zai tem khorem punn hea versacho orth ami anik ek toren somzonk zata.

Vers 16-chea poilea bhagacher dhean dilem zalear thoim Devan aplea lokank sanglolem ki tannim fott uloun dusreanchem nanv piddʼddear korchem nhoi. Ani hem chaddio korchea poros gombhir zaun asa. Chaddio kelolean vaitt zata tem khorem punn fott uloun dusreachem nanv piddʼddear korpi itlea fuddem pavta ki tannem toxem kelolean konnacho jiv gelear pasun taka porva asona. (Mho. 10:19; Up. 10:12-14; 1 Tim. 5:11-15; Jak. 3:6) Nabotak zalolea onʼneai-antlean amkam hem kollon ieta. Thoddea munxamnim tachea vixim fott uloun tachem nanv piddʼddear kelolean, lokamnim taka fatrailo. (1Raz. 21:8-13) Hantuntlean amkam hem kollon ieta ki ek munis fott uloun dusreachem nanv piddʼddear korta tednam, Levi-Xastr 19:16-chea dusrea bhagant sanglam toxem, to tachea jiva add voita.

Tea bhair, fott uloun dusreanchem nanv piddʼddear korpi, tea munxacho dves korta. 1 Juanv 3:15 oxem sangta: “Aplea bhavacho vo bhoinnicho dves kortat tim monxam prannghatki; khoicheach prannghatkia sovem Sasnnik Jivit kednanch urona mhonn tumi zannont.” Heach pasot, Jehovan Levi-Xastr 19:17-nt oxem sanglem: “Tujea bhavacho kallzant dves dhorum naka.”—Lev. 19:17.

Tor Levi-Xastr 19:16-chea dusrea bhagant, Kristanvank ek khor solʼlo dilʼlo asa. Tem mhunnttlear, ami vaitt chintnam pois korunk zai ani fott marun dusreanchem nanv piddʼddear korchem nhoi. Tor amkam konnui avoddna vo amkam dusreanchi nattkai zata dekhun, fott uloun ami tanchem nanv piddʼddear kortat zalear ami tancho dves kortat. Oxem korun ami tanchea “jiva add voitat.” Ani hem Kristanvamnim kednanch korchem nhoi.​—Mt. 12:36, 37.