1. Jehovan dilʼlea sasnik jivitachea bhorvonxeacher niall kelʼlean kitem zata?

 APLEA utrak pallo ditat tankam apunn “Sasnnik Jivit” ditolo mhunn Jehovan bhas dilea. (Rom. 6:23) Hea bhorvonxeacher ami bariksannen niall kortat tednam Jehova pasot amcho mog anikui vaddtta. Hea vixim chintat. Jehova amcho itlo mog korta ki to amkam sasnachem jivit dita, jea udexim tache koddlean ami kednanch pois zaunchimnant.

2. Ami sasnak jietolim mhunn Jehovan dilʼli bhas zannam zalolean amkam koxi modot zata?

² Ami sasnak jietolim mhunn Jehovan dilʼli bhas, amcher atam ietat te tras sosunk amkam modot korta. Amchea dusmanamnim amkam jivexim martole mhunn dhomki dilear pasun, ami Jehovachi seva korop bond korchimnant. Karonn Jehovak visvaxi ravon ami melear pasun, to amkam jivont kortolo, ani uprant ami kednanch morchimnant mhunn amkam bhorvonso asa. (Ju. 5:28, 29; 1 Kor. 15:55-58; Heb. 2:15) Tor ami sasnak jieunk xoktat mhunn ami kiteak khatri dovrunk zata, tea vixim ami fuddem thoddim karonnam polloum-ia.

3. Jehova amkam sasnik jivit diunk xokta mhunn amkam kiteak khatri asa? (Stotr 102:12, 24, 27)

³ Jehova jivitachi Zhor zaun asa, ani to sodankal jieta. (St. 36:9) Tea pasot, to amkam sasnachem jivit diunk xokta mhunn ami zannant. Stotr 90:2-ant, Jehova “sasnnak thaun sasnnak porian” asa mhunn sanglam. Toxench, Stotr 102-ant pasun oxench kitem sanglolem asa. (Stotr 102:12, 24, 27 vachat.) Tea bhair, amchea sorginchea Bapai vixim provadi Habakukan oxem boroilem: “Sorvespora, mhojea Deva, purvilea kallam-iugam thaun asa To, ani kodinch morona To mhozo povitr Dev  nhoi Ga Tum?” (Hab. 1:12) Tor hea versantlean Jehova adinch thaun asa ani sodanch urtolo mhunn amkam purave mellttat.

4. Jehova sasnak thaun asa ani sasnak astolo, hem somzonk amkam kotthin zata zalear ami uskeunk zai kai? Somzaiat.

⁴ Punn Jehova “sasnnacho Dev,” hem somzonk tumkam kotthin zata kai? (Iz. 40:28) Tumchea bhaxen her zaiteam lokank pasun oxench dista. Elihun Jehova vixim oxem mhunnttlolem: “Tachim vorsam amchean mezunk zainant.” (Job 36:26) Punn umkech eke vostu vixim amkam somzona dekhun tem khorem zaunkuch xokona oxem nhoi. Udharonnak, suriachea uzvadda vorvim vo udka vorvim, electricity koxi toiar zata tem amkam ghoddie somzona astolem. Punn tem amkam somzona dekhun toxem ghoddonkuch xokona oxem nhoi. Teach bhaxen, Jehova adinch thaun asa ani to sasnak astolo hem amkam munxank somzonk kotthin zata dekhun toxem zaunkuch xokona oxem nhoi. Karonn Rochnnara vixim jem sot asa, tem amkam kitem somzota vo somzona tacher tharlolem na. (Rom. 11:33-36) Hea vixvantli kosli-i vost rochʼchea poilim, tem mhunnttlear, suria ani noketram rochʼchea poilim thaun pasun Jehova asa. Tor Jehovan “aple podven prithvi rochlea” ani ‘ontrall vistarche’ poilim thaun to asa mhunn ami khatri dovrunk zata. (Jer. 51:15; D.I. 17:24) Ami sasnak jieunk xoktat mhunn patieunk amkam anik koslem karonn asa?

5. Adanv ani Evek koslo bhorvonso aslo?

⁵ Jehovan prithumer rochlolea soglea jivea vostum modem tannem fokot munxank sasnak jieunk rochleant. Tem mhunnttlear, tankam sasnak jieuncho bhorvonso asa. Punn tannem Adanvak oxi xittkaunni dilʼli: “Borea ani vaittachi zannvai ditea rukhachem foll mat khaum noie, kiteak tem khaxi tea disa tum mortoloi.” (Ut. 2:17) Adanv ani Even Jehovachem aikolʼlem zalear tim kednanch morchim naslim. Toxench, Jehova ghoddie tankam uprant “jivitachea rukhachem” foll khaunk ditolo aslo. Oxem zalʼlem zalear, Devan sanglolea bhaxen tim ‘sodam sorvodam jietolim’ aslim. b—Ut. 3:22.

6-7. (a) Jehovan munxank sasnak jieunk rochleant mhunn patieunk anik koslim karonnam asat? (b) Tumi sasnak jietolim tednam tumi kitem korunk axetat? (Chitram polloiat.)

⁶ Ami amchem akʼkhem jivtibhor jitli mahiti zannam zaunk xoktat, tachea poros odik mahiti samballun dovrunk amchea menduk tank asa mhunn thodde vidneanik sangtat. Hem kitlem ojapachem zaun asa! 2010-nt Scientific American  Mind, hantuntlea eka lekhant sanglolem ki amcho mendu sumar 25 lakh GB mahiti samballun dovrunk xokta. Hacho orth, ami 30 lakh voram vo 300 poros chodd vorsam T.V. lavun dovorli zalear tacher ieta ti sogli mahiti amcho mendu samballun dovrunk xokta. Ani amcho mendu ghoddie hachea poros anik chodd mahiti samballun dovrunk xokta. Tor hantuntlean, amchea mendunt fokot 70 vo 80 vorsanchich mahiti nhoi, punn tachea poros anik khub mahiti uronk xokta tea toren Jehovan to rochla mhunn amkam kollon ieta.—St. 90:10.

⁷ Toxench, Jehovan amchea bhitor ek itsa ghatlea. Bible hea vixim oxem sangta: “Sasnak jieunk Jehovan tanchea kallzant ghatlam.” (Up. 3:11, NW) Ani heach karonnak lagon, ami mornnak amcho dusman mhunn lekhtat. (1 Kor. 15:26) Hea vixim chintat. Ami khub duent poddttat tednam atam anik kainch korunk zaina, oxem chintun ami soddun ditat kai? Na. Ami dotora lagim voitat ani borim zaunk vokhdam ghetat. Amchi bholaiki bori uronk vo amkam zalʼlem duens pois korunk, amchean zata tem soglem ami kortat. Toxench, amcho mogacho konnui morta tednam ti nennttim vo zannttim asum, amkam zaito temp porian khub dukh bhogta. (Ju. 11:32, 33) Khorench, ami sasnak jielolim amchea mogall Rochnnaracho udʼdhex naslo zalear, to amkam hi itsa ani tank diuncho naslo! Punn ami sasnak jieunk xoktat mhunn patieunk anikui karonnam asat. Tor Jehovan aplo udʼdhex bodlunk na mhunn ami kiteak khatri dovrunk zata tem zannam zaunk, Jehovan adim kitem kelem ani aiz to kitem korta tacher ami atam dhean dium-ia.

8. Jehovachea udʼdhexa vixim Izaias 55:11-ntlean amkam kosli khatri melltta?

⁸ Adanv ani Even kelʼlea patkak lagon tanchea soglea bhurgeancher moronn ailem. Punn Jehovan aplo udʼdhex bodlunk na. (Izaias 55:11  vachat.) To azun porian tachea visvaxi sevokank sasnachem jivit diunk sodhta. Ani aplo udʼdhex purnn korunk tannem aiz porian jem kitem mhunnttlam ani kelam tantuntlean tacho udʼdhex bodlonk na mhunn amkam kollon ieta.

9. Jehovan apunn kitem kortolo mhunn bhas dilea? (Daniel 12:2, 13)

⁹ Meleant tankam apunn jivont kortolo ani tankam sasnak jieunk sondhi ditolo mhunn Jehovan bhas dilea. (D.I. 24:15; Tit. 1:1, 2) Ani Jehova meleant tankam jivont korunk khub axeta mhunn Jehovacho visaxi sevok, Jobak pasun khatri asli. (Job 14:14, 15) Toxench, munxam melim zalear tankam jivont zaunchea bhorvonxea sangata, sasnak jieunk sondhi asa mhunn provadi Daniel pasun zannam aslo. (St. 37:29; Daniel 12:2, 13 vachat.) Tea bhair, Jezuchea disamnim jietolea Judevank pasun, Jehova aplea visvaxi sevokank “sasnik jivit” diunk xokta mhunn khobor asli. (Luk. 10:25; 18:18) Itlench noi, Jehova meleant tankam jivont kortolo ani tankam sasnak jieunk sondhi mellttoli hea vixim Jezu pasun zaite pavtti uloilʼlo. Ani svota Jezuk, Jehovan melʼleantlo jivont kelo.—Mt. 19:29; 22:31, 32; Luk. 18:30; Ju. 11:25.

10. Adlea kallar zalʼlea jivontponnam thaun amkam kosli khatri melltta? (Chitr polloiat.)

¹⁰ Jehova ek Jivit Diupi Dev zaun asa, ani meleant tankam jivont korunk taka xokti asa. Oxem ami kiteak mhunnonk zata? Karonn Zarefathachea vidvechea putak jivont korunk tannem provadi Elijak hi xokti dili. (1 Raz. 17:21-23) Toxench uprant, Jehovache modotin, provadi Elishan, Shunamit bailechea putak jivont kelo. (2 Raz. 4:18-20, 34-37) Tor heo ani osleo her ghoddnneo, meleant tankam jivont korunk Jehovak xokti asa mhunn dakhoun ditat. Prithumer astana Jezun pasun, Jehovan taka meleant tankam jivont korchi xokti dilʼli mhunn dakhoun dilem. (Ju. 11:23-25, 43, 44) Atam Jezu sorgar asa, ani taka “sorgar ani prithumer . . . soglo odhikar dilʼlo asa.” Tor “fonddamnim asat tim soglim” jivont zatolim ani tankam sasnak jieunk bhorvonso astolo mhunn Jehovan dilʼli bhas Jezu purnn korunk xokta.—Mt. 28:18; Ju. 5:25-29.

11. Soddvonne udexim amkam sasnak jieunchi sondhi koxi melltta?

¹¹ Punn prosn ieta, Jehovan aplea opurbaiechea Putak vollvolleanchem moronn kiteak sosunk dilem? Hea vixim Jezun oxem mhunnttlem: “Devan sonvsaracho itlo mog kelo ki tannem aplea ekleach Putak dilo. Tacher bhavarth dovortat tea sogleancho nas zaina zaunk punn tankam sasnachem jivit mellchem mhunn tannem oxem kelem.” (Ju. 3:16) Tor amchea patkam pasot aplea Putachi soddvonn diun, Jehovan amkam sasnik jivit melloun gheunk ek vatt ukti keli. (Mt. 20:28) Jehovachea udʼdhexachea hea mhotvachea bhaga vixim somzaitana, apostl Paulun oxem sanglem: “Kiteak, zoxem eka monxa vorvim moronn ailem, toxench eka monxa vorvim melʼleanchem punorjivontponn-ui ieta. Hoi, zoxem Adanva sovem sogllim mortat, toxench Krista sovem soglleank Dev punorjivont kortolo.”—1 Kor. 15:21, 22.

12. Prithume pasot aplo udʼdhex ghoddoun haddunk Jehovan kitem kelam?

¹² Jezun aplea xisank Devachem Raj ieum ani tachi khuxi sorgar zata toxi sonvsarant zaum mhunn magonk xikoilem. (Mt. 6:9, 10) Tor munxam hea prithumer sodankal jietolim tednam prithume pasot Devachea udʼdhexacho ho bhag purnn zatolo. Hem ghoddoun haddunk, Jehovan aplea Putak aplea Rajeacho Raza mhunn nemla. Apli khuxi purnn korunk Jezu sangata kam korunk, Jehova prithume voilea 1,44,000 munxank ektthaim korta.—Prok. 5:9, 10.

13. Jehova aiz kitem korta, ani vhodd urponjecho bhag aslole lok kitem kortat?

¹³ Toxench, aiz Jehova hea prithumer “ek bhov vhodd lokachi urponz” ektthaim korta ani aplea Razvottke khala jieunk tankam  proxikxonn dita. (Prok. 7:9, 10; Jak. 2:8) Aiz zhuzak lagon, ani lok eka-mekacho dves kortat dekhun, prithume voilea zaitea lokam modem futt poddlea. Punn hea vhodd urponjentlo lok eka-mekacho dves korop pois korunk, tanchean zata tem soglem kortat. Aplea kornneam vorvim tannim eka orthan apleo tolvari moddun tanche nangor keleat. (Mik. 4:3) Toxench, zaiteancho jiv kaddttat toslea zhogddim-zhuzant bhag gheunchea bodlek, tim khorea Deva vixim ani tachea udʼdhexa vixim lokank xikoun tankam “khorem Jivit” melloun gheunk modot kortat. (1 Tim. 6:19) Punn tim Devachea Rajeak tenko ditat dekhun tanchim familichim sodoxio tancho virodh korunk puro, vo poixeanche vatten tankam oddchonneo ieunk puro. Tori astana, tankam goroz teo sogleo vostu tanchea lagim asat mhunn Jehova khatri korun gheta. (Mt. 6:25, 30-33; Luk. 18:29, 30) Hea soglea vorvim, Devachem Raj khoreponnim asa ani tea Rajea vorvim Jehova aplo udʼdhex purnn korit ravtolo mhunn amkam khatri melltta.

14-15. Jehovan sasnak mornnacho bhosm kortolo mhunn dilʼli bhas koxi purnn zatoli?

¹⁴ Jezu atam sorgar Devachea Rajeacho Raza zaun asa. Ani Devan jeo bhas dileat, teo sogleo to purnn kortolo. (2 Kor. 1:20) 1914 thaun, Jezu tachea dusmanancher zoit vhorta. (St. 110:1, 2) Beginuch to ani tachea sangata raj choloupi makhlolim Kristanvam, hem zhuz kabar kortolim ani soglea noxttea lokancho nas kortolim.—Prok. 6:2.

 ¹⁵ Kristachea Ek Hozar Vorsanchea Razvottkechea Vellar, melolim jivont zatolim ani Devachem aikotat tim poripunn zatolim. Ani nimanni porikxa zalea uprant, zancho Jehova nitivont mhunn neai kortolo, tanchi ‘hi prithum daiz zatoli ani thoim tim sasnak jietolim.’ (St. 37:10, 11, 29) Ani tednam amcho ‘nimanno dusman mornnacho bhosm zatolo’ mhunn ami kitlim khuxal astolim nhoi!—1 Kor. 15:26.

16. Ami kiteak lagon Jehovak visvaxi ravonk sodhtat?

¹⁶ Ami hea lekhant polloilem toxem, ami sasnak jieunk xoktat ho amcho bhorvonso Devachea Utracher adarit asa. Ani hoch bhorvonso, amkam hea nimannea disanchea kotthin vellar, Jehovak visvaxi ravonk modot korunk xokta. Punn amkam sasnak jieuncho bhorvonso asa, heach karonnak lagon ami Jehovak manvota tem korunk sodhtat kai? Na. Ami Jehovacho ani Jezucho kallzantlean mog kortat dekhun ami tankam visvaxi ravonk sodhtat. (2 Kor. 5:14, 15) Ani heach mogak lagon, tanchi dekh gheunk ani amkam aslolea bhorvonxea vixim dusreank sangonk ami fuddem sortat. (Rom. 10:13-15) Tor ami svarth pois korunk ani udar kallzachim zaunk xiktat tednam Jehovak sodankal aplim ixttam mhunn zai, toslim munxam ami zaunk pavtolim.—Heb. 13:16.

17. Amchea modlea dor eklean koslo tharav gheunk zai? (Matev 7:13, 14)

¹⁷ Jehovan amkam sasnak jieunk ek vatt ukti kelea. Punn jivitak pavoita tea vatter ami choltolim kai na tem amchea modlea dor eklean atanch tharaunk zai. (Matev 7:13, 14 vachat.) Tor ami sasnak jietolim tednam jivit koxem astolem tea vixim ami fuddlea lekhant polloitolim.