1. Aplea sevokanchea magnneancho zobab diunk Jehova choddxe pavtti kitem korta?

 KONNUI Jehova lagim porot-porot magnnem korta tednam tachea magnneank zobab diunk Jehova tumkam uzar korunk xokta mhunn tumi zannam aslim? Tumi ek vhoddil, sahaiok sevok, pioneer sevok vo ek porgottnnar asum, vo tumi zannttim vo nenttim asum, vo ek bhav vo bhoinn asum, Jehova tumkam uzar korunk xokta. Aplo mog korta to konnui tache lagim modot magta tednam taka ‘adar [“bhuzvonn,” NW] diunk,’ Jehova zaite pavtti vhoddilank ani tachea her visvaxi sevokank uzar korta. (Kol. 4:11) Hea toren, Jehova ani amchea bhav-bhoinnanchi seva korunk ami kitlim khuxal zatat nhoi! Tor pidda, odruxttam vo dhumallea vellar, ami amchea bhav-bhoinnank modot ani bhuzvonn koxi diunk zata tem polloum-ia.

2. Pidda posorta tednam dusreank modot korunk amkam kiteak kotthin zaunk xokta?

² Pidda posorta tednam dusreank modot korunk amkam kotthin zaunk xokta. Udharonnak, ami amchea ixttank mellonk sodhtat astolim vo poixeanchi oddchonn aslole eke familik ami jevnnak apounk sodhtat astolim. Punn hea vellar, ami oxem kelem zalear ami amcho, ani tancho-i jiv dhokeant ghalunk xoktat. Toxench, amkam dusreank modot korunk zai astoli, punn amchea familichim sodoxio duent asat zalear, toxem korunk amkam kotthin zaunk xokta. Tori astana, amchea bhav-bhoinnank modot korunk ami fattim soronant. Ani oxem korunk amchean zata tem soglem ami kortat tednam Jehova khuxal zata. (Mho. 3:27; 19:17) Tor ami tankam koxi modot korunk zata?    

3. Bhoinn Desi-chea sobhent aslolea vhoddilam thaun ami kitem xiktat? (Jeremias 23:4)

³ Vhoddilamnim kitem korunk zata? Tumchea xellianchi bori vollokh  korun gheiat. (Jeremias 23:4 vachat.) Ami fattlea lekhant uloilʼlim ti bhoinn Desi, oxem mhunntta: “Amchea porgottnni grupant aslole vhoddil mhojea ani her bhav-bhoinnam sangata porgottnnent sodanch bhag ghetale, ani her vellar pasun te amchea sangata vell sartale.” b Oxem kelolean, COVID-19 pidda suru zali tednam, ani hea piddek lagon bhoinnichim thoddim familichim sodoxio bhair poddlim tednam, tika modot korunk vhoddilank sompem zalem.

4. Bhoinn Desi-k, vhoddil kiteak modot korunk pavle, ani hantuntlean vhoddilamnim kitem xikonk zata?

⁴ Bhoinn Desi fuddem oxem mhunntta: “Te vhoddil adinch thaun mhoje ixtt aslolean, mhaka koxem bhogta ani mhaka kosle uske asat tea vixim tanche lagim ulounk mhaka sompem zalem.” Tea bhair, Desi sangta: “Thodde pavtti, ekuch disak mhaka zaite vhoddil fon kortale vo message-o ghaltale. Ani te sangtale tim versam mhaka poilinch khobor aslim zalear pasun, tim mhojea kallzak lagtalim.” Hantuntlean vhoddilamnim kitem xikonk zata? Kotthin poristhiti ieunchea poilinch bhav-bhoinnanchi kallji gheiat. Tanche ixtt zaiat. Ani piddek lagon tumi tankam mellonk xokonant zalear tankam modot korunk her vatto sodhat.

5. Bhav-bhoinnank kiteachi goroz asa tem vhoddilamnim koxem zannam zaunk zata, ani tankam koxi modot korunk zata?

⁵ Tumchea bhav-bhoinnank kosli goroz asa tem zannam zaunk ek vatt mhunnttlear, prosn vicharop. Punn oxem kortana, tanchim bhavnam dukhoinakat. (Mho. 20:5) Tankam kosli modot zai tea vixim chintat. Tankam jevonn, vokhdam vo her gorjecheo vostu asat kai? Tanchem kam vochonk xokta kai? Vo tim bhaddeak ravtat zalear, tem bhaddem farik korunk tanche lagim poixe asat kai? Sorkara koddlean kosli-i modot melltta zalear, ti modot gheunk tankam tumcho adar zai kai? Bhav-bhoinnamnim, bhoinn Desi-k gorjecheo vostu diun ani her vattamnim modot keli. Punn khas korun, vhoddilamnim tika mog dakhoilo ani Bible-antlean urba dili dekhun, hea kotthin poristhitincho fuddo korunk tika modot zali. Ti mhunntta: “Vhoddilamnim mhojea sangata magnnem kelem. Tannim kitem maglolem tem mhaka sarkem ugddas na. Punn tednam mhaka koxem bhoglem tem mhaka azunui ugddas asa. Tea vellar Jehovan mhaka oxem mhunnttlolea sarkem zalem, ‘Hanv tujea sangata asa.’”—Iz. 41:10, 13.

6. Bhav-bhoinnank modot korunk ami kitem korunk zata? (Chitr polloiat.)

⁶ Ami kitem korunk zata? Sobhentlea vhoddilamnim bhav-bhoinnanchi kallji gheunk zai tem khorem. Punn ami sogleamnim eka-mekak urba dilʼli ani modot kelʼli Jehovak zai. (Gal. 6:10) Duent aslolea eka bhava vo bhoinni pasot ami lhanxem kitem kelear pasun tankam khub urba melltta. Udharonnak, eka lhan bhurgean, eka bhavak urba diunk ek kardd korunk zata vo ek  drawing kaddun diunk zata. Vo eka tornnattean, eke bhoinnik bazar korunk vo her vattamnim modot korunk zata. Toxench, konnui duent asat zalear ami tankam ghoddie jevonn randun diunk zata. Khorem mhunnttlear, pidda posorta tednam soglea bhav-bhoinnank urbechi goroz asta. Tor ami video conferencing-a udexim mittingek hajir zaum vo Raj-ghorant mellon ieum, mitting zalea uprant thoddo vell ravon, ami bhav-bhoinnam lagim ulounk zata. Toxench, vhoddilank pasun urbechi goroz asa. Thoddea bhav-bhoinnamnim vhoddilank thank-you karddam boroun dileant. Karonn pidde vellar vhoddilank anikui chodd kamam korunk poddleant. Tor ami soglim ‘eka-mekak dhir diunk ani eka-mekacho bhavarth ghott korunk’ amchean zata tem soglem kortat tednam kitlem borem zatolem nhoi!—1 Tes. 5:11.

7. Odruxtta vellar kitem zaunk xokta?

⁷ Ek odruxtt ghoddtta tednam ekuch khinna bhitor amchem jivit bodlonk xokta. Thoddea pavtti amchem ghor ani her vostuncho nas zaunk puro, vo amchea mogacheank ami mornnant sanddunk puro. Ani heo vaitt ghoddnneo herankuch nhoi, punn amchea bhav-bhoinnank pasun ghoddttat. Tor tankam modot korunk ami kitem korunk zata?

8. Odruxtt zaunchea poilim sobhechea ani familichea vhoddilamnim kitem korunk zata?

⁸ Vhoddilamnim kitem korunk zata? Odruxtt zaunchea poilinch toiari korunk bhav-bhoinnank modot korat. Toxench, surokxit ravonk ani vhoddilank sompork korunk bhav-bhoinnamnim kitem korunk zai, tem tim zannant mhunn khatri korun gheiat. Ami fattlea lekhant polloilʼli bhoinn Margaret, hea vixim oxem sangta: “Sobhecheo gorzo hea bhagant, vhoddilamnim amkam amchea vattarant uzo posronk xokta mhunn xittkaunni dili. Ani poristhiti gombhir zali zalear vo odhikareamnim ami ravtat thoinchean amkam bhair soronk sanglem zalear, ami rokddench bhair soronk zai mhunn tannim sanglem. Hea bhavamnim amkam sarkea vellar suchounni dili. Karonn panch sumanam uprant, amchea vattarant uzo laglo ani to ekdom bhirankull aslo. Toxench, familichea vhoddilamnim kuttumbik bhokti kortat tednam odruxtta vellar tanchea familicho dor ek sodoxio kitem kortolo tea vixim ulounk zata. Oxe toren tumi ani tumchea bhurgeamnim poilinch toiari keli zalear, odruxtta vellar tumkam chodd korun xant ravonk modot zatoli.

9. Odruxtt zaunchea poilim ani uprant vhoddilamnim kitem korunk zata?

⁹ Tumi porgottnni grupache dekhrekh korpi zaun asat zalear, odruxtt ghoddchea poilinch tumchea porgottnni grupant aslolea bhav-bhoinnancho halincho potʼto ani fon number tumche lagim asa mhunn khatri korun gheiat. Tumi ek list korunk zata ani vellchea-vellar, tantunt sarki mahiti asa kai na mhunn pollounk zata. Oxem kelʼlean, odruxtt ghoddtta tednam tumi tumchea grupant aslolea dor eka porgottnnarak kosli goroz asa tem zannam zaunk pavtole. Uprant tea vixim tumchea sobhentlea vhoddilanchea sohokariak kolloiat ani to ti mahiti tumchea sorkittachea dekhrekh korpeak kolloitolo. Hea toren tumi sangata mellon kam kortat tednam tumi tumchea bhav-bhoinnank bore bhaxen modot korunk pavtole. Zoxem, bhoinn Margaret-achea vattarant uzo posorlo tednam tancho sorkittachi dekhrekh korpi, 36 voram porian zagoch aslo. Karonn ghor soddunk poddlolea sumar 450 bhav-bhoinnank vhoddil sompork korunk, ani tankam kosli goroz asa tem zannam zaunk proitn kortale tednam to tankam modot kortalo. (2 Kor. 11:27) Hea toren, ravonk ek zago zai aslo, tea bhav-bhoinnank te modot korunk pavle.

10. Bhav-bhoinnank Bible-antlean urba divop ani niraxi zaleant tankam modot korop mhotvachem mhunn vhoddil kiteak lekhtat? (Juanv 21:15)

¹⁰ Bhav-bhoinnank, Bible-antlean urba diunchi ani niraxi zaleant tankam bhuzvonn diunchi zobabdari vhoddilank asa. (1 Ped. 5:2) Ek odruxtt zata tednam sogleant poilim dor ek bhav ani bhoinn surokxit asa ani tankam jevonn, ravonk ek zago ani nhesonk kopdde asat mhunn vhoddilamnim  khatri korun gheunk zai. Punn odruxttak sampoddloleank, odruxtt zaun zaite mhoine uprant pasun, Bible-antlean urba diunchi ani her modotichi goroz asta. (Juanv 21:15 vachat.) Hea vixim Xakha Somitint kam korpi bhav Harold, zo odruxttak sampoddlolea zaitea bhav-bhoinnank mellʼlla, to oxem sangta: “Tea bhav-bhoinnank, tankam kitem ghoddlem tantuntlean bhair soronk khub vell lagonk puro. Tim atam asat te poristhitint tim jieunk proitn kortat astolim. Punn tannim aplea mogacheank mornnant sanddleant zalear vo tankam moladik aslolem kitem tori tannim hogddailam zalear vo tim morpachinch vanchleat zalear, tem soglem khub temp porian tanchea monant uronk puro. Teo ghoddnneo tankam porot ugddas ieunk puro ani tea pasot tim ekdom niraxi zaunk puro. Punn tankam oxem bhogta dekhun tankam unno bhavarth asa oxem nhoi. Karonn oxem konnakui bhogonk xokta.”

11. Odruxttak sampoddlolea familink vhoddilamim koxi modot di-it ravonk zata?

¹¹ “Dukhest astoleam borabor dukhest zaiat,” ho solʼlo vhoddil ugddas dovortat. (Rom. 12:15) Tea pasot, odruxtta thaun salvar zaloleank, Jehova ani Kristi bhav-bhoinnam tancho khub mog kortat mhunn te khatri ditat. Toxench, magnnem, Bible obheas, mittingek hajir zavop ani porgottnni korop, heo vostu korit ravonk hea familink vhoddil modot kortat. Tea bhair, avoi-bapaimnim aplea bhurgeank, koslench odruxtt nas korunk xokona toslea vostuncher dhean diunk modot korunk, te avoi-bapaink urba ditat. Zoxem, avoi-bapaimnim tanchea bhurgeank, Jehova sodanch tancho Ixtt astolo ani sodanch tankam modot korunk toiar astolo mhunn ugddas korunk zata. Toxench, sonvsarbhor aslolea bhav-bhoinnanchi ek vhodd famil tankam asa, jim tankam modot korunk sodanch toiar asa mhunn tankam somzaunk zata.—1 Ped. 2:17.

12. Odruxttak sampoddloleank modot korunk ami kitem korunk zata? (Chitr polloiat.)

¹² Ami kitem korunk zata? Tumi ravtat thoim lagxilʼlea vattarant ek odruxtt zalam zalear tumi koxi modot korunk zata tem tumchea vhoddilank vicharat. Tumi ghoddie odruxttak sampoddlolea bhav-bhoinnank vo tankam modot kortat tea bhav-bhoinnank, thoddea vella pasot tumger ravonk diunk zata. Vo tumi odruxttak sampoddloleank jevonn ani her gorjecheo vostu vhoron diunk zatat. Punn eka poixilʼlea zagear odruxtt ghoddlam zalear tumi kitem korunk zata? Tumi tea bhav-bhoinnam pasot magnnem korunk zata. (2 Kor. 1:8-11) Toxench, tumi sonvsarbhorchea kamam pasot denngim diun, odruxttank sampoddloleank modot korchea kamant tenko diunk zata. (2 Kor. 8:2-5) Ani tumi odruxtt zalam tea zagear vochon modot korunk sodhtat zalear tumi tumchea vhoddilam lagim ulounk zata. Tumkam thoim apoitat zalear, tumi kednam ani koxi modot korunk zata tea vixim tumkam proxikxonn mellttolem.

13. Amchea kamacher bondi aslolea desamnim amchea bhav-bhoinnank kosleo oddchonneo asat?

¹³ Amchea kamacher bondi aslolea desamnim, dhumalleak lagon amchea bhav-bhoinnanchem jivit anikui kotthin zalam. Sonvsarbhorchea her bhav-bhoinnam bhaxen tankam-i poixeanchi oddchonn asta, tim duent poddttat, ani tim aplea mogacheank mornnant sanddttat. Toxench, bondi aslolean vhoddil ghoddie tankam mellonk xokonant, vo tankam ukteponnim goroz ti urba diunk xokonant. Oxench, ami fattlea lekhant uloilʼlim tea Andrei nanvachea vhoddilak ghoddlem. Tachea porgottnni grupant aslole eke bhoinnik poixeanchi oddchonn asli. Uprant ticho accident zalo ani tika zaitim operation-am korunk poddlim. Ani hea pasot, ti kam korunk xokonasli. Punn bondi ani pidda ason pasun, tika modot korunk bhavamnim apleachean zata tem soglem kelem. Ani Jehova hem soglem polloitalo!

14. Vhoddil Jehovacher patietat mhunn koxe dakhoitat?

¹⁴ Vhoddilamnim kitem korunk zata? Bhav Andrei-n Jehova lagim magnnem kelem ani te bhoinnik modot korunk apleachean zata tem kelem. Ani Jehovan bhav Andrei-chea magnneank zobab diun, tea bhoinnik modot korunk xoktalim, toslea veg-vegllea bhav-bhoinnank tika adar diunk fuddem kaddlim. Thoddim bhav-bhoinnam, bhoinnik dotorager vhoron haddttalim. Ani thoddim zannam tika poixe diun modot kortalim. Tanchean zata te bhaxen tea bhoinnik modot korunk Jehovan tankam fuddem kaddlim. Ani bondi ason pasun, tannim dhiran sangata mellon tika modot keli dekhun Jehovan tanchea vavracher besanv ghatlem, ani te bhoinnik goroz tem soglem dilem. (Heb. 13:16) Tor vhoddilamno, tumi bondi aslolea desant ravtat zalear bhav-bhoinnank modot korunk dusreank vinchun kaddat. (Jer. 36:5, 6) Punn sogleam-von mhotvachem mhunnttlear, Jehovacher patieun ravat. Bhav-bhoinnanchi kallji gheunk to tumkam modot korunk xokta.

15. Bondi aslear pasun ami bhav-bhoinnam sangata amcho ekvott koso samballunk zata?

¹⁵ Ami kitem korunk zata? Bondi aslolea desamnim amkam ghoddie lhan-lhan zomeamnim mellon ieunk poddot. Tor poilim poros ami atam amchea bhav-bhoinnam sangata xanti samballop anikui chodd gorjechem. Ami eka-meka sangata nhoi, punn Soitana add zhuzonk zai! Ami bhav-bhoinnanchea chukincher dhean diunchea bodlek, amcheo somosia rokddeoch suttaveo korunk proitn korunk zai. (Mho. 19:11; Ef. 4:26) Eka-mekak modot korunk ami poilem panvl gheunk zai. (Tit. 3:14) Bhav Andrei-chea grupant aslole bhoinnik her bhav-bhoinnamnim modot keli tednam tanchea akʼkhea porgottnni grupacher boro  porinnam zalo. To mhunnttlear, ek famili bhaxen tancho sombond anikui ghott zalo.—St. 133:1.

16. Koloskarank 4:3, 18 pormonnem, dhumallo sostat tea bhav-bhoinnank ami koxi modot korunk zata?

¹⁶ Sorkaran amchea kamacher bondi ghatlear pasun, aiz lakʼkhamnim bhav-bhoinnam visvaxiponnan Jehovachi seva kortat. Ani thoddea zannank tanchea bhavarthak lagon bondkhonnint pasun ghatleant. Tor ami hea bhav-bhoinnam pasot ani tanchea famili pasot magnnem korunk zata. Toxench, tankam tenko ditat, gorjecheo vostu mellonk modot kortat, ani tanchea pasot kortant zhuztat, tea bhav-bhoinnak lagon pasun ami magonk zata. Him bhav-bhoinnam oxe toren dusreank modot kortat dekhun tankam pasun bondkhonnint ghalunk xoktat. Tori astana, tim dhiran dusreank modot korunk fuddem sortat. Tor tanchea sogleam pasot ami magnnem korit ravonk zai. c (Koloskarank 4:3, 18 vachat.) Karonn amchea magnneam vorvim tankam modot zaunk xokta mhunn ami kednanch visorchem nhoi!—2 Tes. 3:1, 2; 1 Tim. 2:1, 2.

17. Dhumallea pasot tumi atanch koxi toiari korunk zata?

¹⁷ Tumi ani tumchea familin dhumallea pasot atanch toiari korunk zata. (D.I. 14:22) Dhumallo ieta tednam kitem soglem vaitt zatolem, tache vixim chodd chintinakat. Tachea bodlek, Jehova sangata tumchi ixttagot ghott korat, ani tumchea bhurgeank pasun toxench korunk modot korat. Thodde pavtti tumkam usko zaunk puro. Tea vellar, kallzantlean Jehova lagim magnnem korat. (St. 62:7, 8) Jehovacher visvas dovrunk koslim karonnam asat tea vixim ek famil zaun uloiat. d Odruxtt ieunchea poilinch toiari kelʼlean modot zata, teach bhaxen dhumallo ieunchea poilinch toiari kelʼlean tumchea bhurgeank modot zatoli. Karonn Jehovacher visvas dovrunk tumi tankam xikoilolean, dhumallo ieta tednam tim dhirvont astolim ani xant ravonk pavtolim.

18. Fuddarak kitem zaunchem asa?

¹⁸ Jehova dita tea xanti vorvim ami surokxit asat oxem amkam bhogta. (Filp. 4:6, 7) Ani aiz amchea jivitant pidda, odruxttam vo dhumallo ailo zalear pasun, Jehova dita tea xanti udexim amkam xant ravonk modot zata. Toxench, khub vavr korpi vhoddilam udexim Jehova amkam urba dita. Ani ami sogleamnim eka-mekak modot korunk to amkam sondhi dita. Tor amchea modem asloli xanti, ieuncheo asat tea anikui kotthin poristhitincho toxench ‘vhodd sonkoxttacho’ fuddo korunk amkam toiar kortat. (Mt. 24:21) Tea vellar ami amchea modem asloli xanti samballunk zai ani dusreankui toxench korunk modot korunk zai. Vhodd sonkoxtta uprant, usko zata toslea kotthin poristhitincho amkam fuddo korunk poddchona. Karonn tea vellar Jehova amkam diunk sodhtalo ti khori xanti ami sodankal onubhovtolim.—Iz. 26:3, 4.