“Prithumʼ bhorat ani tika tumchea hata khal dovrat” mhunn Jehovan adnea dili tednam hi prithum sovkas-sovkas korun ek sobit bag zatoli mhunn tannem dakhoun dilem. (Ut. 1:28) Tor fuddarak hea prithumer sasnak jietolim tannim hich adnea pallunk poddttoli. Punn aiz Eden bag na. Tor hi prithum ek sobit bag korunk amkam khub vavr korcho poddttolo. Armageddona uprant rokddench, padd keleat te zage saf korunk amkam khub kam korchem poddttolem. Khorench, hantunt khub vavr mellon astolo nhoi!

Hea kama vixim chintʼtana amkam ghoddie Babilona thaun porot ailʼlea Israelitkarancho ugddas ieunk puro. Tanchea desant 70 vorsam meren konnuch ravonaslo. Tor tankam thoim zaitem kam korchem poddlem. Punn Jehovache modotin tim ho des porot sobit korunk pavtolim mhunn Izaiasan bhasaunni kelʼli. Tannem mhunnttlolem: “Zaun gelam oronnem, tachi To kortolo Eden-bag; osadd poddlole zomnichi To kortolo Sorvesporachi bag.” (Iz. 51:3)  Ani khorench, Jehovan tancho des sobit korunk tankam modot keli! Toxench, Jehova amkam pasun hi akʼkhi prithum ek sobit bag korunk modot kortolo. Tor ami tea kamant bhag gheunk sodhtat mhunn ami atanch koxem dakhounk zata?

Ek vatt mhunnttlear, ami amchem ghor ani sorvbhonvtonnim aslolo zago nitoll dovrunk zai. Amchim xezarim kitem-i korum, te zage saf dovrunk amchean zata tem soglem ami korunk zai. Toxench ami amchem Raj-ghor, ani Zomatichem Hol nitoll dovrunk ani tem samballunk modot korunk zata. Tea bhair, amchean zata zalear, odruxttank sampoddloleank modot korunk ami ap-khuxen fuddem soronk zata. Ami oxem kortat tednam gorjek sampoddlolea amchea bhav-bhoinnank ami modot korunk toiar asat mhunn ami dakhoun ditolim. Tor ami amkanch vicharunk zata: ‘Jehovan mhaka hea prithumer sasnak jieunk sondhi dili zalear hanv thoim uzar korunk xoktam tosleo thoddeo kola hanvem atanch xikonk zatat kai?’

Jairusache dhuvek jivont kelea uprant, taka rokddench kitem tori khaunk diunchem mhunn Jezun sanglem. (Mk. 5:42, 43) Hea 12 vorsanchea cheddvachi kallji ghevop ghoddie sompem aslem. Punn fuddarak Jezun dilʼli bhas to purnn kortolo tednam tem mhunnttlear, “fonddamnim asat tim soglim tacho avaz aikotolim ani bhair ietolim” tednam amkam kitlo vavr korunk poddttolo nhoi! (Ju. 5:28, 29) Tea vellar kitem zatolem tea vixim Bible-ant amkam soglich mahiti diunk na. Punn jivont zaleant tankam jevonn, ravonk ek zago ani nhesonk kopdde, heo vostu mellonk ami tankam modot korchi poddttoli. Tor ami tankam tea vellar modot korunk toiar astolim mhunn atanch koxem dakhounk zata tem fuddem polloum-ia.

Amchea sobhent sorkittachi dekhrekh korpi ietolo mhunn kolloitat tednam ami taka jevnnak vhoronk toiar astat kai? Vo khas purnn vellachi seva korpi Bethel-antlea bhav-bhoinnank porgottnnechem kam korunk dhaddttat, vo eka sorkittachi dekhrekh korpeachi seva sompta tednam tea bhav-bhoinnank ravonk ek zago sodhunk ami modot korunk zata kai? Vo ami ravtat tea zagear ek pradexik vo khas odhivexon zata zalear odhivexona poilim ani uprant thoim  modot korunk, vo thoim ietat tea bhav-bhoinnank ieukar diunk ami ap-khuxen vavrunk toiar asat kai?

Itihas 24:15 pormonnem, fuddarak koroddamnim lok jivont zatolo mhunn amkam kollon ieta. Tanchea modlea zaiteank, morchea poilim Jehova vixim xikonk sondhi mellonk na. Punn jivont zalea uprant tankam hi sondhi mellttoli. a Ani onubhov aslolim Devachim visvaxi sevokam tankam xikounk modot kortolim. (Iz. 11:9) Charlotte nanvachi ek bhoinn, hem kam korunk axeun ravlea. Tinnem Europe, Dokxinn Amerika, ani Afrikent porgottnnechem kam kelam. Ti ekdom khuxal zaun oxem mhunntta: “Fuddarak jivont zatolea lokank xikounk hanv axeun ravtam. Adlea kallar jielʼlea khoinchea-i munxa vixim hanv vachtam tednam hanv oxem chintʼtam, ‘Hea munxak Jehovachi vollokh asli zalear tachem jivit kitlem borem astolem aslem.’ Tor tim jivont zalea uprant, Jehova vixim, ani tannim Jehovachi seva keli zalear tim kitlim khuxal astolim, tem hanv tankam sangonk anvddetam.”

Jezu hea prithumer ieunchea poilim jielʼlea Jehovachea visvaxi sevokank pasun zaitem xikonk astolem. Udharonnak, provadi Danielan fuddara vixim zaiteo bhasaunneo boroilʼleo. Punn teo koxeo ghoddon aileo tem taka khobor na. (Dan. 12:8) Tor tea vixim taka somzaunk ami kitlim khuxal zatolim nhoi! Ho amkam ek vhodd sueog astolo. Tea bhair, Ruth ani Naomi Mesiasachim purvozam koxim zaunk pavlim tea vixim tankam sangonk ami khub khuxal zatolim nhoi! Tor hea vaitt sonvsaracho dobhav ani addkholl nastana sonvsarbhor aslolea lokank xikounk ami khub sontostolim.

Jivont zatolim tankam xikounk ami atanch toiari kortat mhunn ami koxem dakhounk zata? Ek vatt mhunnttlear, ami chukonastana sonvsarbhor zata tea porgottnnechea kamant bhag gheunk zai, ani amchi xikoupachi kola vaddounk proitn korunk zai. (Mt. 24:14) Amche piraiek vo her karonnank lagon ami porgottnnechem kam korunk sodhtat titlem korunk xokonant zalear pasun, amchean zata tem soglem ami kortat tednam jivont zatolim tankam xikounk ami toiar asat mhunn ami dakhoun ditat.

Tor ami amkanch he prosn vicharunk zatat: ‘Hi prithum amchem daiz korun gheunk ami khoreaninch toiar asat kai? Hi prithum ek sobit bag korunk, toxench jivont zatolim tankam modot korunk ani xikounk ami axetat kai?’ Ami fuddarak hea prithumer sasnak jieunk toiar asat mhunn dakhounk, ami tea vellar kortolim toslea kamamnim atanch bhag gheunk zata.