1. Jezun morchea poilim tachea kuxik aslolea guneanvkari munxak kitem sanglem? (Lukas 23:39-43)

 JEZUK khambear khillailʼlo tednam tachea uzvea ani davea vatten don guneanvkari munxankui khillailʼle. Sovkas-sovkas korun tancho tiganchoi jiv voitalo tednam te khub vollvollttale. (Luk. 23:32, 33) Jezuchea kuxik aslole dogui munis taka thomnne martale. Tor te tache xis nasle mhunn amkam kollon ieta. (Mt. 27:44; Mk. 15:32) Punn morchea poilim tantuntlea eklea munxan poschatap kelo ani tannem Jezuk oxem mhunnttlem: “Jezu, tum Raza zata tednam mhozo ugddas kor.” Ani Jezun taka mhunnttlem: “Aiz hanv tuka khorench sangtam, tum mhojea borabor Sobit Bagent astolo.” (Lukas 23:39-43 vachat.) Jezun taka oxem mhunnttlem tem khorem. Tori astana, ‘sorginchea Rajea’ vixim Jezun porgottlo to sondex tea munxan manun ghetlolo mhunn kosloch puravo na. Ani ho munis aplea borabor sorginchea Rajeant astolo, oxem Jezun kednanch mhunnonk na. (Mt. 4:17) Tachea bodlek, Jezu tache lagim fuddarache Sobit Bage vixim uloilo. Oxem ami kiteak mhunnonk zata tem ami fuddem polloum-ia.

2. Poschatap kelʼlo guneanvkari ek Judev aslo mhunn ami kiteak mhunnonk zata?

² Poschatap kelʼlo guneanvkari chodd korun ek Judev aslo astolo. Ami oxem kiteak mhunnonk xoktat? Hea guneanvkaran dusreak oxem mhunnttlem, “Tuka-i tich khast favo zalea, torui tuka Devachi matui bhirant na?” (Luk. 23:40) Judev lok ekuch Devachi bhokti kortale. Punn her raxttranche lok zaitea devanchi bhokti kortale. (Sutt. 20:2, 3; 1 Kor. 8:5, 6) Tor he guneanvkari, Judev nasle zalear to munis oso prosn vichartolo aslo: “Tuka devanchi matui bhirant na?” Tea bhair, Jezu her raxttranchea lokam pasot nhoi, punn “Israelachea ghorachea sanddlolea menddrank” sodhunk ailʼlo. (Mt. 15:24) Toxench, Jehovan Israelitkarank meleant tim jivont zatolim mhunn kolloilʼlem. Ani poschatap kelʼlo tea guneanvkarak hem ghoddie khobor aslem zait. Toxench Jehova, Jezuk aplea Rajeacho Raza korunk melʼleantlo jivont kortolo oxem taka distalem mhunn  tachea utrantlean amkam kolltta. Tea bhair, Jehova apnnakui jivont kortolo mhunn taka bhorvonso aslo.

3. Jezu Sobit Bage vixim uloilo tednam poschatap kelʼlea guneanvkarachea monant kitem ailem astolem? Somzaiat. (Utpoti 2:15)

³ Ho guneanvkari ek Judev aslolean, taka Adanv ani Eve vixim pasun khobor asli astoli. Toxench, Jehovan tankam ravonk dilʼlea Sobit Bage vixim pasun to zannam aslo astolo. Tor Jezu tache lagim Sobit Bage vixim uloilo tednam tachea monant hea prithumer asat toslim, ek ekdom borem dista toslem garden ailem astolem.—Utpoti 2:15 vachat.

4. Jezun tea guneanvkarak mhunnttlolim utram ami vachtat tednam ami kitem chintunk puro?

⁴ Jezun tea guneanvkarak mhunnttlolim utram ugddas kortana Sobit Bagent amchem jivit koxem astolem tea vixim ami chintunk zai. Khorem mhunnttlear, Sobit Bagent amchem jivit koxem astolem tem amkam Raza Solomonachea razvottkentlean kollon ieta. Solomonache razvottke vellar khub xanti asli. Tor Solomona poros vorto Raza, to mhunnttlear, Jezu Krist, makhlolea Kristanvam sangata raj choloitolo tednam, tim hi prithum ek ekdom Sobit Bag kortolim mhunn ami khatri dovrunk zata. (Mt. 12:42) Tor ‘dusrea menddramnim,’ Sobit Bagent sasnak jieunk kitem korunk zai tem tannim zannam zaun gheunk zai.—Ju. 10:16.

5. Sobit Bage vixim chintʼtana tumchea monant kitem ieta?

⁵ Sobit Bage vixim chintʼtat tednam tumchea monant kitem ieta? Tumchea monant Eden bage bhaxen ekdom sobit dista toslem garden ieunk puro, zoim ekdom borem vatavoronn asa ani veg-veglle torechim zhaddam ani pormollit fulam asat. (Ut. 2:7-9) Toxench, “zonn-eklo ap-aple dak-veliche savllek ani ap-aplea anjirachea zhadda ponda bostolo,” hi Mika provadeachi bhasaunni tumkam ugddas ieunk puro. (Mik. 4:3, 4) Tea bhair, hea prithumer bhorpur jevonn astolem mhunn sanglam, tim Bible-antlim versam pasun tumchea monant ieunk puro. (St. 72:16; Iz. 65:21, 22) Tor Sobit Bagent aslolea eka mezar veg-vegllea torechem ruchik jevonn dovorlam ani tumi tumchea famili ani ixttam sangata, toxench jivont zaleant tanchea sangata boson tem jevtat mhunn tumi chintunk puro. Tanchea sangata uloun, hanson vell sarun tumi ekdom khuxal zatat. Hem soglem ek sopon nhoi. Oxem khorench ghoddttolem mhunn kainch dubhav na! Itlench nhoi, Sobit Bagent amkam khuxalkai haddtta toslem kamui ami kortolim.

6. Sobit Bagent ami kitem kortolim? (Chitr polloiat.)

⁶ Ami kortat tea kamam thaun amkam khuxalkai melltta, tea toren Jehovan amkam rochleant. (Up. 2:24) Ani Kristachea Ek Hozar Vorsanchea Razvottkechea Vellar ami khub bizi astolim. Ami koslea kamant bizi astolim? Vhodd sonkoxttantlean salvar zatat tea lokank, ani melʼleantlim jivont zatat tea lakʼkhamnim lokank, jevonn, nhesonk kopdde ani ravonk ek zago, hea vostunchi goroz astoli. Tor hea vostunchi manddavoll korpachem kam ami kortolim. Toxench Jehova  Devan, Adanv ani Evek hi prithum ek Sobit Bag korunk sanglolem toxem, ami pasun hi prithum ek Sobit Bag korunk khub vavr kortolim. Tea bhair, jivont zalʼlea lakʼkhamnim lokank xikoupachem kam amkam astolem. Jea lokank morchea poilim Jehova Devachi vollokh mellonk na, tankam ami Jehova ani tachea udʼdhexa vixim xikoitolim. Toxench, jivont zalʼlea Jehovachea visvaxi sevokank, tim melea uprant kitem zalem tea vixim ami xikoitolim. Hea soglea kamam thaun amkam kitli khuxalkai mellttoli nhoi!  

7. Amkam kosli khatri asa, ani kiteak?

⁷ Tor Sobit Bagent ami xantin jietolim, amkam goroz tem soglem amche lagim astolem ani thoim soglem manddavollin zatolem mhunn ami khatri dovrunk zata. Karonn Jehovachea Putachea razvottke khala amchem jivit koxem astolem, hacho tannem amkam poilinch ek dekhavo dilʼlo asa. To mhunnttlear, Raza Solomonachi razvottki.

8. Raza Davidan Stotr 37:10, 11, 29-antlim utram boroilea uprant tim koxim ghoddon ailim? (Hea masikent aslolo, “Vachpeam Thaun Prosn” polloiat.)

⁸ Raza Davidan, Jehovachea preronnan, fuddarak ek zannvaiecho ani visvaxi raza razvottki choloitolo tednam jivit koxem astolem tea vixim boroilem. (Stotr 37:10, 11, 29 vachat.) Ami fuddarache Sobit Bage vixim uloitana choddxe pavtti dusreank Stotr 37:11 vachun dakhoitat. Ani oxem korunk ek karonn mhunnttlear, Dongra Voilo Updes ditana fuddarak kosle lok jietole, tea vixim Jezu sangtalo tednam tannem Davidachim hinch utram uzar kelʼlim. (Mt. 5:5) Punn Davidan boroilʼlim utram Solomonachea razvottke vellar pasun ghoddon ailʼlim. Karonn Solomon Israelachi razvottki choloitalo tednam Israelant soglo lok xantin jietalo ani ‘dudh ani mhonvan vhanvtolea ganvant’ tankam goroz tem soglem tanche lagim aslem. Devan aplea lokank sanglolem: “Mhojea kaideam pormannem jieun tumi updesank man dixat zalear . . . Tumchea ganvant sovostkai vostoli, ani konnachich bhirant nastana tumi nhidtoleat.” (Lev. 20:24; 26:3, 6) Ani Solomonachea razvottke vellar, Jehovachim him utram khorench ghoddon ailim. (1 It. 22:9; 29:26-28) Toxench, dusrea devanchi bhokti kortolim noxttim munxam ‘nanch zatolim’ aslim mhunn Jehovan bhas dilʼli. (St. 37:10) Tor Stotr 37: 10, 11 ani 29-ant aslolim utram, adim Solomonachea razvottke vellar ghoddon ailim ani fuddarakui ghoddon ietolim mhunn amkam kollon ieta.

9. Solomonachi razvottki polloun Shebache rannien kitem mhunnttlem?

 ⁹ Solomonachea razvottkechea vellar khub xanti asli ani koslench unnemponn naslem. Hi khobor Shebache rannien aikoli tednam, hem khorench sot kai mhunn pollounk, ti poixilʼlean provas korun Jeruzalemant aili. (1 Raz. 10:1) Solomonachi razvottki polloilea uprant tinnem oxem mhunnttlem: “Mhaka sanglolem tem tuje zannvaiechem ordem porian nhoi . . . Tuji seva kortat ani zannvai aikotat tim kitlim bhagi!” (1 Raz. 10:6-8) Punn Solomonachea razvottke khala asloli poristhiti, Jezu fuddarak munxakulla pasot kitem kortolo tacho fokot ek dekhavo koso aslo.

10. Jezu khoinchea vattamnim Solomona poros ek ekdom boro raza zaun asa?

¹⁰ Jezu soglea vattamnim Solomona poros ek ekdom boro Raza zaun asa. Solomon opurnn aslo ani tannem zaiteo gombhir chuki kelʼleo, jea vorvim Devachea lokank zaite tras sosunk poddle. Punn Jezu poripurnn asa ani to kednanch chuki korina. (Luk. 1:32; Heb. 4:14, 15) Soitanan Jezuchi porikxa keli tea ekdom kotthin vellar pasun Jezu patkant poddonk na. Hea vorvim, apunn kednanch patok korcho na, toxench aplea khala aslole aple visvaxi porjek tras bhogunk poddttat toxem kainch korcho na mhunn Jezun puravo dilo. Khorench, amcher raj cholounk Jezu poros boro anik khoinchoch Raza na!

11. Jezu sangata konn razvottki choloitolim?

¹¹ Jezu sangata, munxakullachi kallji gheunk ani hea prithume pasot Jehovacho udʼdhex purnn korunk 1,44,000 zannam tache sangata raj choloitolim. (Prok. 14:1-3) Him 1,44,000 zannam prithumer aslim tednam tannim zaiteo oddchonneo ani tras sosle. Tea pasot, tim amche tras ani dukh bore bhaxen somzonk pavtolim. Punn tankam umkech torechem koslem kam astolem?

12. Jehova 1,44,000 zannank koslem kam ditolo?

¹² Jezu ani tachea sangata raj korpi, Solomona poros chodd kam kortolim. Tem mhunnttlear, Solomon ekuch desantlea lakʼkhamnim lokancho samball kortalo. Punn Jezu ani tachea sangata raj choloupi 1,44,000 zannam hea akʼkhea prithumer aslolea koroddamnim lokancho samball kortolim. Tor Jehovan hea makhlolea Kristanvank kitli vhoddli sondhi dilea nhoi!

13. Jezu sangata raj kortoleank kosli khas zobabdari astoli?

¹³ Jezu bhaxen, 1,44,000 zannam iadnik mhunn seva kortolim. (Prok. 5:10) Israelitkaram Moizesachea Kaidea khala aslim tednam iadnikamnim khas korun, soglea lokanchi bholaiki bori asa ani Jehova sangata tanchi ixttagot ghott asa mhunn khatri korun gheunk zai asli. Ani Moizesacho Kaido ‘fuddarachea denneanchi fokot ek savlli’ zaun asli. (Heb. 10:1) Tor Jezu sangata razvottki choloitat tankam pasun, prithumer aslolea soglea lokank bholaiken borim uronk ani Jehova sangata tanchi ixttagot ghott dovrunk modot korchi ek khas zobabdari astoli mhunn ami mhunnonk zata. Punn sorgar aslole he raza ani iadnik prithumer aslolea Jehovachea sevokam sangata koxe toren uloitolim vo tankam koxem margdorxon ditolim tem amkam sodʼdheak khobor na. Punn Jehova kosli-i manddavoll korum, fuddarache Sobit Bagent prithumer aslolea sogleank goroz tem margdorxon mellttolench mhunn ami khatri dovrunk zata.—Prok. 21:3, 4.

14. ‘Supurlo hindd’ ani ‘dusrea menddram’ vixim amkam kitem kollon ieta?

¹⁴ Aplea sangata raj choloitoleank Jezun ‘supurlo hinddʼ mhunnttla. (Luk. 12:32) Jezun eka dusrea zomea vixim pasun sanglem. Tankam tannem “dusrim menddram” mhunnttlim. He donui zome sangata mellon ekuch hindd zata. (Ju. 10:16) Aiz he donui zome sangata mellon kam kortat, ani oxench te Sobit Bagent pasun kortole. Punn tednam meren, ‘supurlo hindd’ sorgar astolo ani ‘dusrea menddrank’ hea prithumer sasnak jieunchi sondhi astoli. Tor Sobit Bagent jieunk  purtim aslolea ‘dusrea menddramnim’ kitem korunk zai?

15. (a) ‘Dusrea menddramnim’ makhlolea Kristanvank tenko koso diunk zata? (b) Ami chitrant dakhoilʼlea bhavachi dekh koxi gheunk zata? (Chitr polloiat.)

¹⁵ Poschatap kelʼlea guneanvkarak, Jezun tachea pasot jem kitem kelem tacho upkar attounk sondhi mellchea poilinch to melo. Punn aiz, ‘dusrea menddrancho’ bhag zaun aslolea amkam sogleank, Jezun amchea pasot jem kitem kelam tache upkar attounk zaiteo sondhi asat. Udharonnak, ami makhlolea Kristanvank tenko ditat tednam ami Jezucho kitlo mog kortat tem ami dakhoun ditat. Ani ami hea makhlolea Kristanvam sangata koxe toren vagtat tacher adarit Jezu amcho neai kortolo mhunn tannem sanglem. (Mt. 25:31-40) Ami urben porgottnnechea ani xikoupachea kamant bhag ghetat tednam ami makhlolea Kristanvank tenko ditat mhunn dakhoun ditat. (Mt. 28:18-20) Ani hem kam korunk songottnne thaun amkam zaitim sadhonam mellttat. Zoxem, halinch ailʼlem Sasnak Khuxalkaien Jieiat! hem pustok. Hea sadhonancho ami boro upeog korunk sodhtat. Tor ami azun porian Bible obheas ghenant zalear, hem pustok uzar korun ami zata titlea lokank Bible xikonk modot korunk dhei dovrunk zata kai?

16. Ami Sobit Bagent jieunk atanch toiari kortat mhunn koxem dakhounk zata?

¹⁶ Ami Sobit Bagent jietolim tednanch, Devak zai toslim munxam zatolim mhunn ami vatt polloit ravonk zaina. Ami atanch toslim munxam zaunk vavr korunk zai. Ami amchea utramnim ani kornneamnim promannik asonk ani boreo sonvoim-eo vaddounk proitn korunk zai. Toxench ami Jehovak, amchea kazari sangateak ani bhav-bhoinnank visvaxi asonk zai. Tor hea vaitt sonvsarant, Jehovachea unch noitik dorjeam pormonnem jieunk, ami atam jitlo vavr kortolim, titloch Sobit Bagent oxem korunk amkam sompem zatolem. Tea bhair, ami novea sonvsarant jieunk toiari kortat mhunn dakhoun ditat tosle gunn ani kola vaddounk pasun ami proitn korunk zai. Hea masikent aslolo, “‘Prithum Tumchem Daiz’ Korun Gheunk Tumi Toiar Asat Kai?” ho lekh polloiat.

17. Adim kelʼlea patkank lagon ami niraxi kiteak zaunk zaina? Somzaiat.

¹⁷ Toxench, ami adim gombhir patkam kelʼlim zalear ami teach vixim chintit ravon niraxi zaunk zaina. Karonn Jezuchea soddvonne udexim amkam amchea soglea patkanchem bhogsonnem melltta. Jezun Farizevank kitem mhunnttlolem tem ugddas korat. Tannem mhunnttlem: “Hanv nitivont  lokank nhoi, punn patkeank apounk ailam.” (Mt. 9:13) Punn Jezuchea soddvonnek lagon amkam bhogsonnem melltta dekhun ‘ami ap-khuxen patkam korit ravonk zatat’ oxem ami chintchem nhoi. (Heb. 10:26-31) Tachea bodlek, amchea gombhir patkak lagon ami khorench poschatap kela, Jehova Devachi ani vhoddilanchi modot ghetlea ani amcho vaitt sobhav soddun dila zalear, Jehovan amkam purnn toren bhogxileant mhunn ami khatri dovrunk zata.—Iz. 55:7; D.I. 3:19.

18. Sobit Bagent poschatap kelʼlea guneanvkarak tumi mellttat tednam tumi tachea lagim kitea vixim ulounk axetat?

¹⁸ Poschatap kelʼlo to guneanvkar ani tumi Sobit Bagent sangata asat mhunn chintat. Tor tumi eka-meka lagim kitea vixim uloitolim? Jezuche soddvonne vixim tumi dogaim kitlim upkari asat tea vixim tumi uloitolim nhoi! Ani Jezu morchea thoddeach voram poilim kitem-kitem ghoddlem tem ghoddie tumi taka vicharunk puro. Toxench, Jezun tea guneanvkarak to aplea sangata Sobit Bagent astolo mhunn sanglem tednam taka koxem dislem, tea vixim tumi taka vicharunk puro. Tea bhair, Soitanachea sonvsarachea nimannea disamnim kitem-kitem ghoddlem, mhunn to guneanvkar ghoddie tumkam vicharit. Tor hea guneanvkara sarkea munxam sangata Devachea Utracho obheas korop kitli vhoddli sondhi astoli nhoi!—Ef. 4:22-24.

19. Sobit Bagent sasnak jieun amkam bejar kiteak ieuncho na? (Masikachem fuddlem chitr polloiat.)

¹⁹ Sobit Bagent sasnak jieun amkam bejar ietolo kai? Kednanch na! Ami novea-novea munxank mellttolim. Ani amkam khuxalkai haddtta toslem kam astolem. Sogleam-von khas mhunnttlear, ami dor disak amchea sorginchea Bapak anik bore toren vollkhonk pavtolim. Jehova ani tache rochnne vixim ami sasnak xikot ravtolim. Tea bhair, Jehovan amkam dilam tea soglea pasot ami dhadoxi astolim. Ami jitlim chodd vorsam jietolim titlo Jehova pasot amcho mog anikui vaddttolo. Tor Jehovan ani Jezun ami sasnak jieunk xoktat mhunn bhas dilea dekhun, ami tankam ekdom chodd upkari asat nhoi!