1. Abrahamak bhorvonso dovrunk borem karonn aslem oxem ami kiteak mhunnonk zata?

 JEHOVAN aplo ixtt Abrahamak bhas dilʼli ki tachea sonsti vorvim prithumechea soglea raxttrank axirvad mellttolo. (Ut. 15:5; 22:18) Ani Abrahamak Devacher ghott bhavarth aslo dekhun taka dilʼli bhas purnn zatolich mhunn taka purnn khatri asli. Punn Abraham 100 vorsancho, ani tachi bail 90 vorsanchi zalʼli. Punn tankam put zolmonk naslo. (Ut. 21:1-7) Torui Bible oxem mhunntta: “Tannem bhorvonso dovrun, apunn zaitea raxttrancho bapui zatolo mhunn bhavarth dovorlo.” (Rom. 4:18) Jehovan Abrahamak dilʼlo bhorvonso purnn kelo. Taka Izak zolmolo, zachi to zaitea tempa thaun vatt polloitalo. Tor Abrahamak itlo ghott bhavarth kiteak aslo?

2. Jehova apli bhas purnn kortoloch mhunn Abrahamak kiteak khatri asli?

² Jehova sangata Abrahamachi ixttagot ghott asli dekhun, ‘tannem jem bhasailam tem to purnn kortoloch mhunn taka ghott visvas aslo.’ (Rom. 4:21) Tachea ghott bhavarthak lagon to Jehovak manvolo ani taka nitivont mhunn lekhlo. (Jak. 2:23) Romkarank 4:18-nt sanglolea pormonnem Abrahamak bhavartha sangata bhorvonso-i aslo mhunn kolltta. Atam ami apostl Paulun bhorvonxea vixim Romkarank odheai 5-ant kitem sanglem tem polloum-ia.

3. Paulun bhorvonxea vixim kitem sanglem?

³ Amcho “bhorvonso amkam nirax korina” mhunn ami kiteak khatri dovrunk zata tem Paulun somzailem. (Rom. 5:5) Toxench, amcho bhorvonso koso vaddonk xokta tem-ui tannem  sanglem. Tor Romkarank 5:1-5 polloitana, vell gelo toso amcho bhorvonso koso vaddot gela tea vixim chintum-ia, ani ami to anikui ghott koso korunk zata tem polloum-ia. Tor poilim ami, amkam nirax korina mhunn Paulun sanglolo bhorvonso kitem zaun asa tem zannam zaum-ia.

4. Romkarank 5:1, 2-ant kitem sanglam?

⁴ Romkarank 5:1, 2 vachat. Him utram apostl Paulun Rom sobhentlea bhav-bhoinnank boroilʼlim. Tannim Jehova ani Jezuchi vollokh ghetloli, tancher bhavarth dovorlolo ani tim Kristanv zalʼlim. Tanchea ‘bhavarthak lagon Devan tankam nitivont mhunn lekhlim,’ ani povitr xokte udexim makhlim. Tor tanche lagim ek ekdom boro bhorvonso aslo ani to purnn zatoloch mhunn tannim khatri dovrunk zatali.

5. Makhlolea Kristanvank koslo bhorvonso asa?

⁵ Paulun uprant Efezantlea makhlolea Kristanvank, tankam aslolea bhorvonxea vixim oxem sanglem: ‘Tumchea pasot besanvam daiz mhunn samballun dovorleant.’ (Ef. 1:18) Ani Koloskarank boroilʼlea chittint, to bhorvonso khoim purnn zatolo tea vixim tannem oxem sanglem: “Hem tea bhorvonxea pasot asa zo sorgar tumchea pasot dovorlolo asa.” (Kol. 1:4, 5) Tor makhlolim Kristanvam mortat tednam, Jehova tankam jivont korun sorgar vhorta. Ani thoim tim Jezu sangata raj choloitolim.—1 Tes. 4:13-17; Prok. 20:6.

6. Eka makhlolea bhavan aplea bhorvonxea vixim kitem mhunnttlem?

⁶ Makhlolim Kristanvam tankam aslolo bhorvonso khub moladik mhunn lekhtat. 1991-ant tantuntlea eklean, bhav Frederick Franz-an hea bhorvonxea vixim taka koxem bhogta tem sanglem. Tannem mhunnttlem: “Amcho bhorvonso purnn zatoloch! 1,44,000-am modlea dor ekleak, Devan jem bhasailam tem mellttolench. Ani tem ami chintlolea poros ekdom borem astolem.” Tannem zaitim vorsam visvaxiponnan Jehovachi seva keli. Tannem oxem-i mhunnttlem: “To bhorvonso amkam  aiz pasun khub moladik zaun asa . . . Jitlim chodd ami to purnn zaunchi vatt polloitat, titloch to amkam anik valoracho zata. Amkam lakʼkhamnim vorsam ravonk poddlear pasun, ami khuxalkaien tachi vatt polloitolim. Ani poilim poros chodd, atam ho bhorvonso mhaka anikui moladik zala.”

7-8. Jehovachea choddxea visvaxi sevokank koslo bhorvonso asa? (Romkarank 8:20, 21)

⁷ Punn Jehovachi seva korpi choddxea visvaxi sevokank ek veglle torecho bhorvonso asa. Hoch bhorvonso Abrahamak aslo. To koslo? Devachea Rajea khala sasnak hea prithumer jieuncho. (Heb. 11:8-10, 13) Ho bhorvonso asloleancho fuddar ekdom boro astolo mhunn Paulun boroilem. (Romkarank 8:20, 21 vachat.) Tor Bible-ant fuddara vixim kitem bhasailam tem tumi poilech pavtti zannam zalim tednam, tumkam sogleam-von chodd kitem avoddlem? Tumkam patkantlean suttka mellttoli mhunn zannam zaun tumi khuxal zalim kai? Vo amchim melolim mogachim sobit bagent jivont zatolim mhunn zannam zaun tumi ojap zalim kai? Khorench, Jehovan dilʼlea “bhorvonxeachea adaran” fuddarak heo sobit vostu ghoddttoleoch mhunn ami vatt pollounk zata!

⁸ Tor amkam sorgar vo hea prithumer sasnak jieuncho bhorvonso asum, ho ek ekdom boro bhorvonso asa. Hea vorvim amkam khuxalkai melltta. Ani ho bhorvonso ami vaddoit ravonk xoktat. Koso? Hem zannam zaunk Paulun fuddem kitem mhunnttlem tem polloum-ia. Karonn oxem kelʼlean, amcho bhorvonso vaddot voitolo ani to amkam nirax korcho na mhunn amchi khatri anikui ghott zatoli.

9-10. Paulu bhaxen aiz Kristanvamnim kitem opekxa korunk zata? (Romkarank 5:3) (Chitram pasun polloiat.)

⁹ Romkarank 5:3 vachat. Sonkoxttank lagon amcho bhorvonso anikui ghott zaunk xokta, oxem Paulun mhunnttlem. Hem aikon ghoddie ami ojap zaunk xoktat. Punn khorem mhunnttlear soglea Kristanvank sonkoxtt sosunkuch poddttole. Pauluk pasun hea vixim khobor asli. Dekhun tannem Tesalonikentlea bhav-bhoinnank oxem mhunnttlem:  “Ami tumchea sangata asle tednam amkam sonkoxttancho fuddo korchoch poddttolo mhunn ami tumkam sangtale, ani toxench zalem.” (1 Tes. 3:4) Toxench, Korintkarank tannem oxem boroilem: “Bhav-bhoinnimno . . . amcher kosle-kosle sonkoxtt ailole tea vixim tumi zannam zalʼlim amkam zai . . . Ami ghoddie jive urchenant oxem amkam dislem.”—2 Kor. 1:8; 11:23-27.

¹⁰ Aiz amkam koslea-na-koslea sonkoxttacho fuddo korunk poddttolo mhunn ami opekxa korunk zata. (2 Tim. 3:12) Tumi Jezucher bhavarth dovortat ani tacho pattlav kortat mhunn tumkam dhumallo sosunk poddla? Ghoddie tumchea ixttamnim ani soireamnim tumchim fokannam keleant, vo tumchea sangata vaitt toren vagleant astolim. Vo tumi promannik asat dekhun, tumchea patranvan vo tumchea sangata kam kortoleamnim tumkam tras keleat zait. (Heb. 13:18) Vo tumi tumchea bhorvonxea vixim dusreank sangtat dekhun, sorkara thaun tumkam virodh sosunk poddla zait. Tor amkam koslea-i trasancho fuddo korunk poddom, ami khuxal asonk zai mhunn Paulun sanglem. Kiteak?

11. Ami koslea-i trasancho thiraien fuddo korunk ghott nichov kiteak korunk zai?

¹¹ Ami tras sostana pasun khuxal asonk xoktat. Karonn hea vorvim amkam ek mhotvacho gunn vaddounk modot zata. To koslo? Hea vixim Romkarank 5:3-ant oxem sanglam: “Sonkoxtt amkam thir ravonk modot korta.” Amkam sogleank tras sosunk poddttolech mhunn ami zannant. Tor thiraien tancho fuddo korunk ani visvaxiponnan Jehovachi seva korunk ami ghott nichov korunk zai. Oxem kelearuch, Jehovan amkam bhasailam tem amkam mellttolench mhunn ami khatri dovrunk zata. Jezun aplea udharonnant sanglolem tea khoddpi zomnir poddlolea bim-am bhaxen amkam zaunk naka. Karonn sot aikotach tannim urben tem manun ghetlem. Punn sotak lagon tankam “dukh-tras” vo “dhumallo” sosunk poddlo tednam, tannim bhavarth soddun dilo. (Mt. 13:5, 6, 20, 21) Amkam virodh vo tras sosunk avoddnant, ani te sosop sompem nhoi tem khorem. Punn ami thiraien te sostat ani Jehovachi seva korit ravtat tednam amkam faido zata. Koso?

12. Thir ravlolean kitem faido asa?

¹² Sonkoxttachea vellar thir ravlolean kitem faido asa? Hea vixim Jakoban oxem mhunnttlem: “Sosnikaiek aplem kam korunk diat, jea udexim tumi soglea vostumnim poripurnn ani dag naslolim astolim ani tumchea modem koslench unnemponn aschem na.” (Jak. 1:2-4) Tor sosnikai vo thirai, eka orthan kam korta mhunn Jakoban sanglem. Koslem kam? Sosnikai amkam anikui pasiens dakhounk, bhavarth vaddounk, toxench Devacher anikui chodd patieun ravonk modot korta. Thir ravlolean anik koslo mhotvacho faido asa tem polloum-ia.

13-14. Thir ravlolean amkam kitem melltta, ani hea vorvim kitem zaunk pavta? (Romkarank 5:4)

¹³ Romkarank 5:4 vachat. Paulun sanglem ki thir ravlolean amkam “Devachi maniotai melltta.” Hacho orth, amcher tras ietat dekhun Jehova khuxal zata oxem nhoi. Punn ami te tras sosun taka visvaxi ravtat tem polloun to khuxal zata. Hem zannam zalʼlean amkam kitli urba melltta nhoi!—St. 5:12.

¹⁴ Ami Abrahama vixim ugddas korunk zata. Tacher zaite tras aile. Punn to Jehovak visvaxi ravlo dekhun, taka Jehovachi maniotai mellʼlli. Jehovan taka nitivont ani aplo ixtt mhunnttlo. (Ut. 15:6; Rom. 4:13, 22) Jehova amkam-i Abrahama bhaxen lekhunk xokta. Ami tache sevent kitlo vavr kortat vo amkam kosleo zobabdareo asat tea vorvim nhoi, punn amkam tras aslear pasun ami visvaxiponnan tachi seva kortat tea vorvim to amkam apli maniotai dita. Ani amchi tank vo pirai kitli-i asum vo amchi  poristhiti koxi-i asum, ami soglim thir ravonk xoktat. Tumi sodʼdheak koslea-i trasacho fuddo kortat ani thir asat zalear, tumkam Jehovachi maniotai melltta mhunn ugddas dovrat. Hem zannam zalʼlean, tumcho bhorvonso anikui ghott zaunk pavtolo.

15. Romkarank 4:4, 5-ant Paulun kitem mhunnttlem, ani hem aikon thoddim kiteak ghusponk xoktat?

¹⁵ Tor Paulun sanglem tea bhaxen, trasanchea vellar thir ravlolean amkam Devachi maniotai melltta. Punn fuddem to oso mhunntta: “Ani taka lagon amkam bhorvonso melltta. Ani ho bhorvonso amkam nirax korina.” (Rom. 5:4, 5) Hem aikon thoddim ghoddie ghusponk xoktat. Kiteak? Karonn Romkarank 5:2-ant, Paulun Romant aslolea Kristanvank bhorvonso asa mhunn sanglolo. To mhunnttlear, “Deva koddlean mhoima mellttoli mhunn bhorvonso.” Tor thoddim oxem vicharit: ‘Tanche lagim bhorvonso aslolo zalear, Paulu atam kiteak portun bhorvonxea vixim uloita?’

16. Amcho bhorvonso koso vaddtta? (Chitram pasun polloiat.)

¹⁶ Paulun oxem mhunnttlem: “Karonn amcho bhorvonso vaddot asta.” Udharonnak, tumi poile pavtti jednam Devan dilʼlea bhorvonxea vixim aikolʼlem tednam, tumkam koxem dislolem? Tea vellar tumkam ghoddie tem ek sopon oxem dislem astolem. Punn tumi Jehova vixim ani tannem dilʼlea bhasaunneam vixim xikot gelim toxim, tumcho bhorvonso vaddot gelo.

17. Bautizma uprant pasun amcho bhorvonso koso vaddot voita?

¹⁷ Bautizma uprant pasun, amcho bhorvonso vaddot voita. Tumi bautizma uprant Jehova vixim xikot ravlim ani vaddavoll keli toxi, tumcho bhorvonso vaddot gelo. (Heb. 5:13–6:1) Tea bhair, Romkarank 5:2-4-a pormonnem, tumcher zaite tras aile astole. Punn tea vellar tumi thir ravlim dekhun, tumkam Jehovachi maniotai asa mhunn kollon aili. Ani hem zannam zalʼlean, Jehovan jem bhasailam tem to purnn kortoloch mhunn tumcho bhorvonso  anikui ghott zalo. Tor poilim poros, atam tumcho bhorvonso khub ghott asa. Ani tumchea akʼkhea jivitacher tacho probhav poddtta. Zoxem, tumchea famili sangata tumchi vagnnuk, tumi ghetat te nirnnoi, ani tumi vell koso uzar kortat tacher tacho probhav poddtta.

18. Jehovan amkam kosli gerentti dilea?

¹⁸ Hea bhorvonxea vixim, Paulun ek ekdom mhotvacho mudʼdo sanglo. To mhunnttlear, amkam aslolo bhorvonso purnn zatoloch mhunn to khatri dita. Hi khatri amkam, tannem Devachea preronnan Kristanvank boroilʼlea chittint vachunk melltta, zoim boroilam: “Ho bhorvonso amkam nirax korina, karonn amkam dilʼlea povitr xokte udexim Devacho mog amchea kallzamnim votoila.” (Rom. 5:5) Tor amcho bhorvonso purnn zatoloch mhunn amkam khatri melltta. Karonn hi gerentti amkam Devan dilea.

19. Amkam aslolea bhorvonxea vixim amkam kitem khatri asa?

¹⁹ Jehovan Abrahamak dilʼli bhas koxi purnn zali tea vixim chintat. Toxench tachea bhavarthak lagon to koso Jehovak manvolo ani Devacho ixtt zalo tem ugddasak haddat. Bible sangta: “Abrahaman pasiens dakhoilem tednam Devan taka hi bhasaunni keli.” (Heb. 6:15; 11:9, 18; Rom. 4:20-22) Ani Abrahamak dil’lo bhorvonso purnn zalo dekhun to niraxi zaunk na. Tor Abrahama bhaxen ami pasun visvaxi ravlear, Jehovan amkam jem bhasailam tem amkam mellttolench. Ani hea karonnak lagon ami khuxal zaunk xoktat! (Rom. 12:12) Paulun mhunnttlem: “Bhorvonso diupi Dev tumkam bhorpur khuxalkai ani xanti dium mhunn hanv magnnem kortam. Karonn tumi tacher bhorvonso dovorla, ani hea toren povitr xoktechea bollan tumcho bhorvonso vaddot vochom.”—Rom. 15:13.