1. Abrahamachea bhavartha vixim chintʼtana amchea monant koslo prosn ieunk xokta?

 ZAITEA lokamnim Abrahama vixim aikolam. Punn tache vixim tankam titli khobor na. Punn tumi Abrahama vixim zaitem zannant. Zoxem, ‘bhavarth dovortat tancho sogleancho bapui’ taka mhunnttla. (Rom. 4:11) Tor tumi chintit: ‘Hanv Abrahama itlo ghott bhavarth dakhounk pavtolo kai?ʼ Hoi, tumi dakhounk pavtolim.

2. Ami Abrahama vixim bariksannen obheas korop kiteak gorjechem? (Jakob 2:22, 23)

² Abrahamak aslo toslo ghott bhavarth vaddounk ek vatt mhunnttlear, tache vixim bariksannen zannam zavop. Abrahaman sodanch Jehovan taka sanglem tem kelem. Zoxem, to aplem ganv-ghor soddun eka porkea desant gelo, khub vorsam tombumnim jielo ani aplea ekleach putak bolidan mhunn bhettounk toiar zalo. Kiteak? Karonn taka Jehovacher ghott bhavarth aslo. Tachea bhavarth ani korneank lagon Jehovak to manvolo ani tannem taka aplo ixtt mhunnttlo. (Jakob 2:22, 23 vachat.) Abrahama bhaxen amkam-i Jehovachi maniotai mellʼlloli ani ami-i tachim ixttam zalʼlim taka zai. Tea pasot Jehovan, Pauluk ani Jakobak, Abrahama vixim boroun dovrunk prerit kele. Tor ami Romkarank odheai 4 ani Jakob odheai 2-ant, Abrahama vixim kitem sanglam tacher dhean dium-ia. Karonn Paulun ani Jakoban dogaimnim, Abrahama vixim kitem tori mhotvachem sanglam.

3. Paulun ani Jakoban khoinchea Bible versacho ulʼlekh kelo?

 ³ Paulun ani Jakoban Utpoti 15:6-ant aslolea utrancho ulʼlekh kelo, zoim mhunnttlam: “Abraman Sorvesporacher visvas tthevlo ani dekhun Sorvesporan taka promannik kelo [“nitivont lekhlo,” NW].” Tor ek munis Jehovak manvota tednam, to taka nitivont vo guneanva-mekllo mhunn lekhta. Jehovan patki ani opurnn munxank nitivont mhunn lekhop kitlem ojapachem zaun asa nhoi! Tor tannem amkam-i Abrahama bhaxen lekhunk ami kitem korunk zai? Hem zannam zaunk, Jehovan Abrahamak nitivont mhunn kiteak lekhlo tem polloum-ia.

4. Munxank nitivont zaunk kitem addaita?

⁴ Romkarank boroilʼlea chittint Paulun sanglem ki soglim munxam patkim asat. (Rom. 3:23) Toxem zalear, patki munxam Devachea nodren nitivont koxim zaunk xoktat ani taka khuxal koxim korunk xoktat? Soglea khorea Kristanvank hea prosnacho zobab mellonk Paulun Abrahamachem udharonn dilem.

5. Jehovan Abrahamak nitivont kiteak mhunnttlo? (Romkarank 4:2-4)

⁵ Jehovan Abrahamak nitivont kiteak mhunnttlo? To Moizesa udexim dilʼle Kaide pallttalo dekhun nhoi. (Rom. 4:13) Karonn Izrael raxttrak te Kaide diunchea 400 vorsam poilim Jehovan Abrahamak nitivont mhunnttlolo. Tor Abraham Kanan desant aslo tednam, Jehovan taka favo nasloli doia dakhoili ani tachea bhavarthak lagon taka nitivont mhunnttlo.—Romkarank 4:2-4 vachat.

6. Jehova eka patki munxak nitivont mhunn koso lekhunk xokta?

⁶ Paulu sangta ki Jehova eka munxak ‘tachea bhavarthak lagon nitivont mhunn lekhta.’ (Rom. 4:5) Hem koxem tem zannam zaunk Paulun fuddem kitem mhunnttlem tem polloum-ia. Tannem sanglem: “Jea munxan kaido purnn toren pallunk na tori astana Devan taka nitivont mhunn lekhlo, tea munxak Davidan pasun khuxal mhunnttlo. Tannem mhunnttlem: ‘Zanchim vaitt kamam bhogxileant ani zanchim patkam dhampleant tim khuxal. Jehova jea munxachea patkancho hixob dovorcho na, to munis khuxal.’” (Rom. 4:6-8; St. 32:1, 2) Tor apnnacher bhavarth dovortat tankam Jehova purnn toren bhogxita, ani hea toren to munis tachea bhavarthak lagon Devachea mukhar nitivont zata.

7. Jehovache adle visvaxi sevok khoinchea orthan nitivont asle?

⁷ Abraham, David, ani her visvaxi sevokam opurnn aslear pasun Jehovan tankam nitivont mhunnttlim. Karonn tankam bhavarth aslo. Punn jea konnank bhavarth na, tim nitivont zaunk xokonant. (Ef. 2:12) Paulun Romkarank boroilʼlea chittint somzailʼlem ki Devacher bhavarth dovortat tinch tachim ixttam zaunk pavtat. Abraham ani Davidak Jehovacher bhavarth aslo dekhun te tache ixtt zaunk pavle. Tor Devache ixtt zaunk amkam-i tacher bhavarth asop gorjecho.

8-9. Paulun ani Jakoban jem boroilem tea vixim thoddeank koslem chukichem chintop asa, ani kiteak?

⁸ Salvar zaunk fokot bhavarth asop gorjecho, vo bhavartha sangata kamam-i gorjechim hea vixim xemboramnim vorsam thaun dhormik fuddaream modem vad-vivad chaluch asa. Thodde padri vo pastor xikoitat ki salvar zaunk fokot bhavarthuch aslear puro. Te ghoddie oxem mhunnttat tem tumi aikolam astolem: “Jezucher bhavarth dovrat ani tumi salvar zatolim.” Oxem sangtana thodde zann Pauluchea hea utrancho pasun ulʼlekh kortat: “Jea munxan kaido purnn toren pallunk na tori astana Devan taka nitivont mhunn  lekhlo.” (Rom. 4:6) Punn thodde padri sangtat ki salvar zaunk bhavartha sangata kamam-i korop gorjechim. Tor igorz je zage povitr asat mhunn sangta tea zageancher lokamnim bhett diunk zai, ani tannim boreo korneo korunk zai mhunn te sangtat. Tor te ghoddie Jakob 2:24-antlim utram sangot: “Eka munxak fokot tachea bhavarthak lagon nhoi punn taka tachea kamank lagon nitivont mhunnttat.”

⁹ Hea karonnank lagon, Bible-ache thodde zannar sangtat ki Devachi maniotai melloun gheunk eka munxan kitem korunk zai tea vixim Paulu ani Jakobachem chintop veg-vegllem aslem. Thodde dhormik fuddaream pormonnem, Paulun fokot bhavarth gorjecho mhunn sanglolem. Punn Jakoban bhavartha sangata kamam-i gorjechim mhunnttlolim. Hea vixim Bible-acho ek professor oxem sangta: “Paulun fokot bhavarth gorjecho oxem kiteak sanglolem tem Jakobak borem somzonk na. Ani Paulun dilʼli somzonni taka manvonk na.” Punn Paulun ani Jakoban jem boroilʼlem, tem tannim Jehovachea preronnan boroilʼlem mhunn ami ugddas dovrunk zai. (2 Tim. 3:16) Tor tannim toxem kiteak mhunnttolem tem somzonk, tanchea chittimnim tannim anikui kitem sanglem tacher ami dhean diunk zai.

10. Paulu khas korun khoinchea “kamam” vixim uloitalo? (Romkarank 3:21, 28) (Chitr pasun polloiat.)

¹⁰ Romkarank odheai 3 ani 4-ant Paulu khoinchea “kamam” vixim uloitalo? To khas korun “kaideant sanglolea kamam” vixim uloitalo. Tem mhunnttlear, Jehovan Izraelitkarank Moizesa udexim dilʼlea Kaideam vixim. (Romkarank 3:21, 28 vachat.) Oxem ami kiteak mhunnonk zata? Karonn Pauluchea disamnim thoddim Judev Kristanvam, tannim azun Moizesa udexim dilʼle Kaide pallunk zai mhunn chintʼtalim, oxem dison ieta. Dekhun  Paulun Abrahamachem udharonn diun tankam somzailem ki ek munis “kaideant sanglolea kamam” vorvim nhoi, punn bhavartha vorvim nitivont zata. Hem zannam zaun kitlem borem dista nhoi! Karonn amkam kollon ieta ki amkam Devacher ani Jezucher bhavarth aslear amkam Devachi maniotai mellonk xokta.

11. Jakob khoinchea “kamam” vixim uloitalo?

¹¹ Tor Jakob khoinchea “kamam” vixim uloitalo? Jakob odheai 2-ant, to Paulun sanglolea ‘kaideant dilʼlea kamam’ vixim uloinaslo. Punn ek Kristanv dor disak aplea jivitant jim kamam korta tea vixim uloitalo, jea vorvim taka Devacher khorench bhavarth asa kai na tem kollon ietalem. Hem somzonk, Jakoban sanglolea don udharonnancher dhean dium-ia.

12. Bhavarth ani kamam mellon asat mhunn somzaunk Jakoban koslim udharonnam dilim? (Chitr pasun polloiat.)

¹² Aplea poilea udharonnant, Kristanvamnim bhedbhav korcho nhoi mhunn Jakoban sanglem. Hem somzaunk tannem eka munxa vixim sanglem, zo eka girestak khub manan lekhta, punn eka goribak kochro koso lekhta. Tor to munis apleak bhavarth asa mhunn sangot, punn tachea kamam vorvim tacho bhavarth dison iena mhunn Jakoban sanglem. (Jak. 2:1-5, 9) Tachea dusrea udharonnant, Jakoban eka munxa vixim sanglem zo “khoinchea-i bhava vo bhoinni koddem kopdde nant ani eka disak pavta titlem jevonnui na” mhunn polloita, punn taka modot korina. Ho munis pasun apleak bhavarth asa mhunn sangot, punn to tachea kamam vorvim dison iena. Tea pasot tacho bhavarth kainch faideacho nhoi. Dekhun Jakoban mhunnttlem, “Kamam bogor bhavarth melolea sarko asa.”—Jak. 2:14-17.

13. Bhavarth korneamnim dakhovop gorjecho mhunn Jakoban koxem somzailem? (Jakob 2:25, 26)

¹³ Amchea kamam vorvim bhavarth dison ieta mhunn dakhounk, Jakoban Rahabachem  udharonn dilem. (Jakob 2:25, 26 vachat.) Tinnem Jehova vixim aikolʼlem ani Jehova Izraelitkarank modot korta mhunn tinnem vollkhon ghetlolem. (Josh. 2:9-11) Tor tika bhavarth aslo. Ho bhavarth tinnem korneamnim koso dakhoilo? Tinnem don Izraelitkar, je lipon choukoxi korunk ailʼle, tancho jiv vanchoilo. Rahab opurnn asli ani videxi aslolean ti Moizesa udexim dilʼlea Kaidea khala nasli. Tori astana, Abrahama bhaxen tika nitivont mhunnttli. Tor ami Rahaba koddlean kitem xiktat? Amkam bhavarth aslearuch puro nhoi. Ami to korneamnim dakhounk zai.

14. Bhavarth ani kamam vixim Paulu ani Jakobachem chintop vegllem naslem mhunn ami kiteak sangonk zata?

¹⁴ Tor bhavarth ani kamam vixim Paulu ani Jakobachem chintop vegllem naslem. Tannim tem fokot veglle toren somzailem. Paulun Judev Kristanvank mhunnttlem ki Kaideant dilʼlim kamam korun Devachi maniotai mellona. Ani Jakoban sanglem ki soglea Kristanvamnim borea korneam vorvim aplo bhavarth dakhounk zata.

15. Korneam vorvim bhavarth dakhounk thoddeo vatto khoincheo? (Chitram pasun polloiat.)

¹⁵ Korneam vorvim amcho bhavarth dakhounk, ami Abrahaman kelʼlim tinch kamam korunk zai mhunn Jehova opekxa korina. Ami veg-vegllea vattamnim amcho bhavarth dakhounk zata. Zoxem, sobhent poilech pavtti ietat tankam ami ieukar diunk zata, gorjek sampoddlolea bhav-bhoinnank ami modot korunk zata, ani amchea famili sangata bore toren vagonk zata. Oxem kelear amkam Devachi maniotai ani besanvam mellttolim. (Rom. 15:7; 1 Tim. 5:4, 8; 1 Ju. 3:18) Toxench, ami korunk zata tem ek mhotvachem kam mhunnttlear, urben porgottnni korop. (1 Tim.  4:16) Tor Jehovan bhasailam tem to purnn kortoloch ani to sangta tem sodanch sarkem, ho bhavarth amkam asa mhunn ami sogleamnim amchea korneam vorvim dakhounk zata. Oxem kelear to amkam nitivont mhunn lekhtolo ani aplim ixttam mhunnttolo.

16. Abrahamak dilʼlea bhorvonxea vorvim taka bhavarth dovrunk koxi modot zali?

¹⁶ Bhorvonso dovrop kitlo gorjecho tem pasun ami Abrahama koddlean xiktat. Hea vixim Romkarank odheai 4-ant sanglam. Jehovan Abrahamak ek ekdom boro bhorvonso dilʼlo. To mhunnttlear, to ‘hixob naslolea raxttrancho’ bapui zatolo mhunn taka sanglolem. (Ut. 12:3; 15:5; 17:4; Rom. 4:17) Punn Abraham 100 vorsancho ani Sara 90 vorsanchi zalʼli. Torui tankam put zolmonk na. Ani munxanche nodren, tankam bhurgo zaunkuch xokona oxem distalem. Tor Abrahamak Jehovacher bhavarth dovrunk kotthin aslem. “Tori astana, tannem bhorvonso dovrun, apunn zaitea raxttrancho bapui zatolo mhunn bhavarth dovorlo.” (Rom. 4:18, 19) Ani Jehovan Abrahamak dilʼlo bhorvonso purnn zalo. Taka Izak zolmolo, zachi to khub tempa thaun vatt polloitalo.—Rom. 4:20-22.

17. Jehova amkam nitivont ani aplim ixttam mhunn lekhtolo oxem ami kiteak mhunnonk zata?

¹⁷ Abrahama bhaxen ami Jehovachim ixttam zaunk xoktat, ani to amkam nitivont mhunn lekhunk xokta. Hea vixim Paulun pasun oxem sanglem: “‘Taka nitivont mhunn lekhlo’ hem fokot tacheach pasot borounk naslem, tem amchea-i pasot boroilʼlem. Amkam-i nitivont mhunn lekhtole, karonn ami tea Devacher bhavarth dovortat, zannem amcho Somi Jezuk meloleantlo jivont kela.” (Rom. 4:23, 24) Tor Abrahama bhaxen ami pasun bhavarth dovrop, boreo korneo korop ani bhorvonso dovrop gorjechem. Punn Romkarank odheai 5-ant, Paulu bhorvonxea vixim anik kitem sangta tem ami fuddlea lekhant polloum-ia.