JEHOVAN amkam zaitim borim dennim dileant, ani him dennim ami koxim uzar kortolim ti svotontrtai pasun dilea mhunn ami tachi kitlim upkari nhoi! Bible oslea eka dennea vixim oxem sangta: ‘Soro amkam urba haddtta.’ (Up. 10:19; St. 104:15) Punn soreak lagon zaite lok tras sostat tem ami polloilam astolem. Toxench, soro pieunchea vixim sonvsarbhor aslolea lokanchem chintop veg-vegllem asa. Tor Kristanvank hea vixim bore nirnnoi gheunk koxi modot zaunk xokta?

Ami khoinsorui ravom vo amchi sonskruti kosli-i asum, amchea bhonvtonnim ravtat tea lokanchem chintop nhoi, punn Devachem chintop ami apnnaunk zai. Oxem kelear ami khuxal astolim.

Tumi polloilam astolem ki sonvsarbhor zaito lok, khub pavtti ani bhorpur pietat. Kiteak? Thoddim zannam apleak borem dista mhunn ani thoddim aplem tension pois korunk pietat. Toxench thoddea zagear, zaito soro pieta to munis ek ‘khoro dadlo’ oxem lok chintʼtat.

Punn amchea mogall Rochnnaran amkam zannvaieche solʼle dileat. Udharonnak, chodd soro pielʼlean porinnam kitlo vaitt zata tea vixim tannem amkam poilinch sangon dovorlam. Eka bebdea munxachi poristhiti koxi asta ani taka kosle tras sosunk poddttat, tea vixim Mhonnʼnneo 23:29-35-ant kitle bariksannen somzailam tem ami vachlam astolem. a Europe-antlo Daniel nanvacho ek vhoddil, Sakxi zaunchea poilim tachem jivit koxem aslem tea vixim oxem sangta: “Hanv ekdom chodd soro pietalom. Ani haka lagon, hanvem vaitt nirnnoi ghetle, zancho porinnam mhaka bhogunk poddlo. Ani tea vellacho aiz pasun ugddas kortana mhaka bejesanv zata.”

Eka Kristanvak sorea vixim sarko nirnnoi gheunk, ani chodd soro pielʼlean bhogunk poddttat tea porinnama thaun pois ravonk koxi modot zaunk xokta? Tannem sorea vixim Devachem chintop apnnaun tea pormonnem nirnnoi gheunk zai.

Tor Bible sorea vixim kitem sangta, ani lok koslea karonnank lagon soro pietat tem atam polloum-ia.

Thoddo soro pielear tantunt kainch vaitt na, mhunn Bible-antlean kolltta. Upodexok 9:7-ant oxem sanglam: “Tuzo unddo sontosan kha, kallzache khuxalkaien tuzo soro pie.” Tor soro pielear amkam khuxalkai melltta mhunn Bible-ant sanglam. Toxench, Jezu ani Jehovache her visvaxi sevok pasun thodde pavtti soro piele.—Mt. 26:27-29; Luk. 7:34; 1 Tim. 5:23.

Punn thoddo soro pievop ani pieun ttaitt zavop, hachea modem vhoddlo ontor asa mhunn Bible-antlean kollon ieta. Zoxem tantunt sanglam: “Soro pieun ttaitt zainakat.” (Ef. 5:18) Toxench,“bebdikai korpi . . . Devachea Rajeache daiji zaunchenant.” (1 Kor. 6:10) Hantuntlean, chodd soro pievop ani bebdikai korop, Jehovak manvona mhunn kolltta. Tor ‘lok kortat mhunn ami korum-ia’ oxem chintchea bodlek, sorea vixim nirnnoi ghetana ami Jehovak manvota tem korunk zai.

Punn zaito soro pielear pasun tankam to lagona mhunn thoddim ghoddie chintit. Oslem chintop khub dhokeachem. Karonn ‘chodd soro pieta’ to dadlo vo bail, ek gombhir patok korunk xokta ani Jehova sangata tachi ixttagot tuttonk xokta mhunn Bible-antlean spoxtt kollon ieta. (Tit. 2:3; Mho. 20:1) Toxench ‘hispa bhair pieta’ to munis, Devachea Rajeant bhitor sorcho na mhunn Jezun pasun xittkaunni dilʼli. (Luk. 21:34-36) Tor khub soro pielʼlean bhogunk poddttat tea trasantlean pois ravonk eka Kristanvan kitem korunk zata?

Sorea vixim amchea bhonvtonnim aslolea lokanchem chintop ami apnnaitat zalear, tem dhokeachem zaun asa. Bible sangta: “Tumi khatat, pietat vo jem kitem kortat tem soglem Devak mhoima mellonk korat.” (1 Kor. 10:31) Tor ami jevnna vixim vo pieupa vixim ghetat te nirnnoi Jehovak manvotat toxe asonk zai. Hea vixim atam ami thoddea prosnancher ani Bible-antlea totvancher dhean dium-ia:

Dusreamnim mhojim fokannam korina zaunk, vo tanche mukhar mhoji loz zaina zaunk hanv pietam kai? Suttka 23:2 sangta: “Choddan chodd lok korta mhonn tachi dekh gheum nakat.” Jehovachi bhokti korinant tea lokanchi dekh ghena zaunk, Jehovan Izraelitkarank dil’lo ho solʼlo amkam-i lagu zata. Sorea vixim amchea chintpacher ani nirnnoi-ancher ami amchea ixttancho probhav poddonk ditat zalear, ami sovkas-sovkas korun Jehovachea dorjeam pormonnem jievop bond korunk xoktat, ani tachea sangata amchi ixttagot tuttonk xokta.—Rom. 12:2.

Hanv kitlo ghott asa tem dakhounk pietam kai? Thoddea zageancher, kitlo-i soro pielear tantunt kainch vaitt na mhunn lok chintʼtat. (1 Ped. 4:3) Punn 1 Korintkarank 16:13 sangta: “Zagrut ravat, bhavarthant ghott zaiat, dhirvont zaiat, ani xoktivont zait ravat.” Soro pieta to munis xoktivont zaunk xokta kai? Na. Karonn soro pielʼlean ek munis sarke toren chintunk xokona, ani hea pasot to vaitt nirnnoi gheunk pavta. Khorem mhunnttlear, chodd soro pieta to munis xoktivont nhoi, punn oskot asa mhunn dison ieta. Ani hea vixim Izaias 28:7 sangta ki soreak lobdolʼlo asa to munis lokta ani chukiche nirnnoi gheta.

Sarkem tem korunk goroz ti xokti amkam Jehova koddlean melltta, jea vorvim ami zagrut ravonk ani bhavarthant ghott asonk xoktat. (St. 18:32) Oxem kelear ami chotur ravtolim, ani Jehova sangata amchi ixttagot piddʼddear zata toslea dhokeam thaun pois ravtolim. Jezuchi pasun Jehova sangata ghott ixttagot asli dekhun, to dhirvont aslo ani sodanch sarkem tem kortalo. Ani hea karonnank lagon zaito lok taka man ditalo.

Hanv mhojem tension pois korunk pietam kai? Eka stotrkaran oxem boroilem: “Mhojea kallzant huske choddtat tedna Tuji [Jehovachi] buzvonn mhojea otmeak sukh-sontos dita.” (St. 94:19) Tor tumkam usko zata tednam soreacher nhoi, punn Jehovacher patieun ravat. Oxem korunk ek bori vatt mhunnttlear, zaite pavtti Jehova lagim magnnem  korop. Toxench onnbhov aslolea bhav-bhoinnam koddlean faideak poddttat tosle solʼle magat. Oxem kelʼlean zaitea zannank faido zala. Khorem mhunnttlear, soro pielʼlean amche uske pois zainant, punn sarkem tem korunk amcho nichov oskot zait voita. (Hos. 4:11) Bhav Daniel zachea vixim ami poilim uloilʼlim to oxem sangta: “Mhaka khub usko zatalo, ani mhojem ontoskornn mhaka khatalem dekhun hanv soro pietalom. Punn oxem kelʼlean mhoje tras anikui vaddle, dusream sangata mhoji ixttagot tuttli ani hanvem mhozo man hogddailo.” Punn taka koxi modot zali tea vixim to sangta: “Mhaka soreachi nhoi, punn Jehovachea modotichi goroz asa mhunn hanvem vollkhon ghetlem. Ani Jehovachea modotin hanv mhojea oddchonneancho fuddo korunk pavlom.” Tor amchi poristhiti kitli-i vaitt asum, Jehova amkam modot korunk sodanch toiar asa.—Filp. 4:6, 7; 1 Ped. 5:7.

Ami chodd soro pienant oxem amkam dista zalear pasun, ami kitlo pietat ani kitle pavtti pietat tea vixim ami chintunk zai. Ami amkanch vicharunk zata: ‘Mhojea familintlea konnem-i vo mhoje lagxilʼlea ixttan mhojea pieupa vixim mhaka xittkaila kai?’ Hoi zalear, amkam kollonastana soro pieupachi sonvoim zaunk laglea astoli. ‘Hanv poilim poros chodd pietam kai?’ Ek munis soreak lobdolʼlo na zalear pasun, to poilim poros chodd pi-it ravlo zalear taka tachi sonvoim zatoli mhunn ami ugddas dovrunk zai. ‘Thoddea disam pasot soro pienastana ravonk mhaka kotthin zata kai?’ Hoi zalear, amkam soro pieupachi sonvoim zalea ani ti soddunk amkam ghoddie dotorachi goroz poddttoli.

Tor soro pielʼlean itle tras ani dhoke asat dekhun thoddim Kristanvam tim soro pieunchim nant mhunn tharaitat. Vo dusreank soro boro lagona mhunn ghoddie tim pienant astolim. Tor tumchea eka ixttan to soro pieuncho na mhunn tharaila zalear tachim fokannam korinakat. Punn tachea nirnnoi-ak man diat. Oxem kelʼlean, tumi taka doia dakhoitolim.

Thoddim Kristanvam tim kitlo soro pietolim ani kitle pavtti pietolim tem poilinch tharaitat. Zoxem thoddim, sumanak ekuch pavtti vo thodde pavtti jevnna vellar ilʼloso ghetolim mhunn tharaitat. Vo thoddim zannam ti kosle torecho soro pietolim tem pasun tharaitat. Zoxem, tim thoddo-so  wine vo beer ghetolim, punn her koslo-i soro vo hot drink, juice-ant vo softdrink-ant mix korun pasun pieunchimnant mhunn tharaitat. Hea toren ek Kristanv pieupa vixim svota pasot kaide korta tednam, te pallunk taka sompem zata. Tor eka Kristanvan osloch nirnnoi kela, ani to tea pormonnem jieta zalear, dusrim aplea vixim kitem chintʼtolim mhunn tannem usko korcho nhoi.

Ami soro pietolim vo na hea vixim nirnnoi ghetana, dusreank koxem bhogtolem tem pasun ami chintunk zai. Hea vixim Romkarank 14:21 oxem sangta: “Tum mas khaina vo drakxancho soro piena vo tujea bhavak addkholl korta tosli kosli-i vost korina zalear odik borem.” Ami ho solʼlo koso apnnaunk zata? Bhav-bhoinnank mog dakhoun. Ami soro pietat tem polloun, amchea eka bhavak vo bhoinnik vaitt dista mhunn amkam kolltta zalear, tea vellar ami soro pieunchimnant. Oxem kelʼlean, ami tankam resped ani mog dakhoitolim. Toxench, amchea poros chodd amkam dusreanchi kallji asa mhunn pasun kollon ietolem.—1 Kor. 10:24.

Toxench, sorkaran pasun sorea vixim kaide keleat astole. Zoxem, ek munis umkech piraier pavtoch soro pieunk xokta, ani gaddi choloitana vo koslem-i mexin uzar kortana soro pieuncho nhoi mhunn kaide asat zait. Tor ek Kristanvan he kaide pallop ekdom gorjechem.—Rom. 13:1-5.

Jehovan amkam zaitim dennim dileant, ani tim koxim uzar korchim tem tharaunk tannem amkam svotontrtai dilea. Hem pasun ek dennem zaun asa. Tor ami kitem khatolim ani kitem pietolim tem vinchun kaddttana, Jehovak manta tem toren amchi svotontrtai uzar korun, hea denneacho ami valor kortat mhunn dakhoum-ia.