1. Paulun dilʼlo solʼlo apnnaunk bhavamnim kitem korunk zai?

 APOSTL Paulun Korintkarank oxem mhunnttlem: “Bhavamno, somzonnechea babtint bhurgeam sarke zaum nakat punn . . . vhoddleam sarke zaiat.” (1 Kor. 14:20) Aiz Jezuchi dekh ghetat tea soglea bhavamnim ho solʼlo apnnavop gorjecho. Oxem korunk, te kortat tea soglea vostumnim, tannim Devache kaide ani totvam apnnaunk zai. (Luk. 2:52) Punn bhavamnim anikui bore Kristanv zavop kiteak itlem mhotvachem?

2-3. Eka tornnattea bhavan anikui boro Kristanv zavop kiteak gorjechem?

² Bhavank familint toxench sobhent zaiteo zobabdareo astat. Tornnattea bhavamno, tumi ghoddie purnn vellache sevok, sobheche sevok ani uprant vhoddil mhunn seva korunk chintlam astolem. Toxench, tumi kazar zaunk ani bapui zaunk sodhtat zait. (Ef. 6:4; 1 Tim. 3:1) Tor heo zobabdareo bore bhaxen samballunk tumi anikui bore Kristanv zavop gorjechem. b

³ Oxem korunk, tumi thoddim panvlam gheunk zatat, toxench faideak poddttat tosleo kola xikonk zatat. Tor fuddaracheo zobabdareo bore bhaxen samballunk tumi kitem korunk zata tem fuddem polloum-ia.

4. Tornnattea bhavamnim konnanchi dekh gheunk zata? (Chitr pasun polloiat.)

⁴ Tumi konnanchi dekh gheunk zata tem chintat. Tornnattea bhavamno, tumi dekh gheunk zata toslea zaitea dadleanchim udharonnam Bible-ant asat. Te Jehovacho khub mog kortale ani zaitea vattamnim tachea lokanchi kallji ghetale. Toxench, tumchea familint ani sobhent osle bhav asat, zanchi tumi dekh  gheunk zata. (Heb. 13:7) Tea bhair, tumkam Jezuchem sogleam-von borem udharonn asa. (1 Ped. 2:21) Tor tanchea vixim obheas kortana, tankam kosle bore gunn asle tacher niall korat. (Heb. 12:1, 2) Uprant te gunn tumi koxe apnnaunk zatat tem chintat.

5. Tornnattea bhavamno, tumi tumchi chintpachi tank koxi vaddounk zata, ani oxem korop kiteak gorjechem? (Stotr 119:9)

⁵ Tumchi ‘somjikai vo chintpachi tank’ vaddoiat. (Mho. 3:21) Chintpachi tank aslolo munis, goddboddan kainch korina, punn kitem-i korchea poilim chintʼta. Tor tornnattea bhavamno, tumchi chintpachi tank vaddoiat ani ti sodanch uzar korat. Oxem korop kiteak gorjechem? Karonn hea sonvsarantle tornnatte, tanchea svotachea chintpa pormonnem vo tankam kitem sarkem dista tea pormonnem vagtat. (Mho. 7:7; 29:11) Toxench, T.V., pichʼcheram, internet, ani social media-cho tumchea chintpacher ani vagnnukecher probhav poddonk xokta. Tor chintpachi tank melloun gheunk, Bible-ant koslim totvam dileant tem zannam zaiat, tim tumkam koxim faideak poddttolim tea vixim chintat, ani tumchea nirnnoi-amnim tim apnnaiat. Oxem kelʼlean, tumi Jehovak manvota tem korunk pavtole. (Stotr 119:9 vachat.) Hea vorvim tumkam anikui bore Kristanv zaunk modot zatoli. (Mho. 2:11, 12; Heb. 5:14) Tor chintpachi tank tumkam koxi modot korunk xokta tea vixim atam don vatto polloum-ia: (1) bhoinnam sangata vagtana, ani (2) tumchea nhespa-dispa vixim nirnnoi ghetana.

6. Tornnattea bhavamno, bhoinnam sangata respedan vagonk chintpachi tank tumkam koxi modot kortoli?

⁶ Tornnattea bhavamno, chintpachi tank bhoinnam sangata respedan vagonk tumkam modot kortoli. Udharonnak, tumi eke bhoinnik anik bore toren zannam zaunk sodhtat zalear, tantunt kainch vaitt na. Punn tumi tiche lagim kazar zaunk sodhinant zalear, chintpachi tank aslolean tumi oxem kainch mhunnchenant, borounchenant, vo korchenant, jea vorvim tea bhoinnik tumi tiche lagim kazar zaunk sodhtat oxem distolem. (1 Tim. 5:1, 2) Punn tumi konnak tori date kortat zalear, tumi dogaim ekttim nant punn tumchea sangata sodanch konn tori asa mhunn tumi khatri korun ghetole. Hea toren tumi tea cheddvachem nanv piddʼddear zaunk diunchenant.—1 Kor. 6:18.

7. Nhespa-dispa vixim nirnnoi ghetana, chintpachi tank eka tornnattea bhavak koxi modot kortoli?

 ⁷ Toxench, ek tornnatto bhav nhespa-dispa vixim je nirnnoi gheta, tantuntlean to apli chintpachi tank uzar korta vo na tem dakhoun dita. Aiz kopddeancheo noveo-noveo style kaddpi choddxim zannam Jehovachi bhokti korinant, ani tim onoitik jivit jietat. Tor tim toiar kortat te kopdde ekdom ttaitt astat vo te kopdde nheslolean dadle bailo koxe distat. Tor chintpachi tank uzar korpi ek bhav, to kitem nhestolo tem vinchun kaddttana, Bible-antlea totvam pormonnem nirnnoi ghetolo ani bore bhaxen nhestat tea sobhentlea bhavanchi dekh ghetolo. Tachea nhespa vixim tannem svotak he prosn vicharunk zatat: ‘Hanv jem nhestam tea vorvim hanv mhoji chintpachi tank uzar kortam ani dusreank resped ditam mhunn dison ieta kai? Mhojea nhespa vorvim hanv Jehovacho sevok mhunn dusrim vollkhonk xoktat kai?ʼ (1 Kor. 10:31-33; Tit. 2:6) Apli chintpachi tank uzar korpi ek bhav, sobhentlea bhav-bhoinnankuch nhoi, punn Jehovak pasun khuxal kortolo.

8. Eka tornnattea bhavan patieupa sarko koso zaunk zata?

⁸ Patieupa sarke zaiat. Ek tornnatto munis, zo patieupa sarko asa, to apnnak dilʼleo zobabdareo bore bhaxen samballtta. (Luk. 16:10) Hea vixim amkam Jezuchem ekdom borem udharonn asa. Taka dilʼlea kamanchi tannem kednanch beporva korunk na. Tachea bodlek, Jehovan dilʼlem kam kotthin aslear pasun tannem tem purnn kelem. Udharonnak, to lokancho ani khas korun aplea xisancho mog kortalo dekhun, tannem ap-khuxen tanchea pasot aplo jiv dilo. (Ju. 13:1) Tor tornnattea bhavamno, Jezuchi dekh gheiat, ani tumkam kosli-i zobabdari mellom, ti purnn korunk tumchean zata tem soglem korat. Ani ek umkench kam koxem korchem tem tumkam kollona zalear, khaltikaien onnbhov aslolea bhavanchi modot gheiat. Tumkam dilʼlem khoinchench kam, korunk poddtta mhunn korinakat. (Rom. 12:11) Tachea bodlek, tumi jem kitem kortat tem “munxam pasot nhoi, punn Jehova pasot” korat. (Kol. 3:23) Oxem kelʼlean, tumi tem kam bore bhaxen purnn korunk pavtole. Punn opurnn aslolean tumi ghoddie chuki korunk xoktat. Tea vellar, khaltikaien tumcheo chuki manun gheiat.—Mho. 11:2.

9. Eka tornnattea bhavan faideak poddttat tosleo kola kiteak xikonk zai?

⁹ Anikui boro Kristanv zaunk eka tornnattea bhavan faideak poddttat tosleo kola xikonk zai. Oxem kelʼlean, to sobhent zobabdareo samballunk pavtolo, svotachi vo tachea familichi kallji gheunk modot zata toslem ek kam korunk pavtolo, ani dusream sangata borem natem samballunk pavtolo. Tor tannem khoincheo thoddeo kola xikonk zatat tem polloum-ia.

10-11. Ek tornnatto bhav bore toren vachunk ani borounk xiklolean, taka toxench sobhek koso faido zatolo? (Stotr 1:1-3) (Chitr pasun polloiat.)

¹⁰ Bore toren vachunk ani borounk xikat. Zo munis dor disa Devachem Utor vachunk ani tacher niall korunk vell kaddtta, to khuxal  asta ani taka tachea jivitant ies melltta mhunn Bible sangta. (Stotr 1:1-3 vachat.) Tor tornnattea bhavamno, dispottʼttim Devachem Utor vachunk vell kaddat. Oxem kelʼlean, tumi Jehovachem chintop zannam zaunk pavtole. Hea vorvim tumi bore bhaxen chintunk ani tumchea jivitant Bible-antlim totvam apnnaunk pavtole. (Mho. 1:3, 4) Ani osleach bhavanchi sobhent goroz asa. Kiteak?

¹¹ Amchea bhav-bhoinnank oslea bhavanchi goroz asa, je Bible-antlean tankam xikounk xoktat ani bore solʼle diunk xoktat. (Tit. 1:9) Tor tumi bore toren vachunk ani borounk zannant zalear, bhav-bhoinnank faideak poddttat ani tancho bhavarth ghott kortat toslim bhaxonnam ani zobab tumi toiar korunk pavtole. Toxench svotacho obheas kortana, vo mittingek, zomatik ani odhivexonak bhaxonnam aikotana, tumkam faideak poddttat tosle mudʼde tumi boroun dovrunk pavtole. Ani te uzar korun, tumi tumcho bhavarth ghott korunk toxench dusreank urba diunk xoktole.

12. Bhavamnim dhean diun aikopachi ani bore toren uloupachi kola koxi vaddounk zata?

¹² Dhean diun aikopachi ani bore toren uloupachi kola vaddoiat. Bhavamno, tumi oxem korop mhotvachem. Tumi dusreanchem kan diun aikonk zai ani tanchem chintop ani bhavnam somzon gheunk zai. (Mho. 20:5) Hem tumi koxem korunk zata? Dusrim uloitana, tancho avaz, tondd, ani hav-bhavacher dhean diat. Tumi chodd korun email, message-o vo osleo her vatto uzar korun dusream lagim uloitat zalear, dhean diun aikopachi ani bore toren uloupachi kola tumi vaddounk pavchenant. Tea pasot, dusreank mellon tanche lagim ulounk vavr korat.—2 Ju. 12.

13. Eka tornnattea bhavan anik kitem korunk xikonk zai? (1 Timotak 5:8) (Chitr pasun polloiat.)

¹³ Tumchea paim-ar ube ravonk xikat. Eka Kristi bhavak, svotachi toxench tachea familicho samball korchi zobabdari asa. Taka lagon tannem kam korunk zai. (1 Timotak 5:8 vachat.) Punn kam kortolo zalear, taka kola asop gorjechem. (D.I. 18:2, 3; 20:34; Ef. 4:28) Hi kola tannem koxi xikonk zata? Thoddea zageamnim tornnatte bhav ghoddie tanchea bapai koddlean vo tanchea soirea koddlean ek kola xikonk xoktat. Vo thoddea desamnim bhurgeank iskolant astanach ek kola xikoitat. Tea bhair, koslem-i kam kortana, tem bore bhaxen korunk ani tem korun sompounk, eka bhavak sonvoim asonk zai. Oxem kelʼlean, dusrim tacher visvas dovrunk pavtolim ani taka fuddarak ek kam mellttolem, jem to samballunk pavtolo. Atam meren ami xiklole gunn ani kola, eka bhavak fuddaracheo zobabdareo samballunk pasun modot kortole. Teo kosleo tem ami fuddem polloum-ia.

14. Tornnattea bhavamnim purnn vellachi seva korunk koxi toiari korunk zata?

¹⁴ Purnn vellacho sevok. Zaite Kristi bhav tornnatte piraieruch purnn vellachi seva korunk lagle. Hem te koxe korunk pavle? Poilim tannim sahaiok pioneer seva suru keli, ani uprant niemit pioneer mhunn seva korunk lagle. Oxem kelʼlean tankam kitem faido zalo? Te veg-vegllea lokam sangata bore bhaxen kam korunk xikle. Toxench, te poixe xanneponnan moddunk xikle. (Filp. 4:11-13) Tea bhair, tankam her torechi purnn vellachi seva korunk sondhi mellʼlli. Zoxem, bandkamacho sevok vo Bethel sevok.

15-16. Ek vhoddil vo sobhecho sevok mhunn purto zaunk eka bhavan kitem korunk zata?

¹⁵ Sobhecho sevok vo vhoddil. Soglea bhavamnim vhoddil zaun bhav-bhoinnanchi seva korunk dhei dovrunk zai. Oslo dhei dovorpi bhav, “ek borem kam korunk khuxi dakhoita” mhunn Bible-ant sanglam. (1 Tim. 3:1) Punn ek vhoddil mhunn seva korchea poilim, eka bhavan sobhecho sevok zaunk purto asonk zai. Sobheche sevok, bhav-bhoinnanchi kallji gheunk vhoddilank modot kortat. Ek bhav 17 tem 19, hea piraier pasun sobhecho sevok zaunk xokta. Ani ek sobhecho sevok 20 vorsanche piraier pasun vhoddil zaunk xokta. Tor ek bhav vhoddil asum vo sobhecho sevok asum, to khaltikaien bhav-bhoinnanchi seva korta ani urben porgottnni korta.

¹⁶ Ek vhoddil vo sobhecho sevok mhunn purto zaunk eka bhavan kitem korunk zata? Tannem kosle gunn vaddounk zai tea vixim Bible-ant sanglam. Ani taka Jehova Devacho, tachea familicho ani sobhecho mog aslearuch to he gunn vaddounk pavtolo. (1 Tim. 3:1-13; Tit. 1:6-9; 1 Ped. 5:2, 3) Tor vhoddil ani sobhechea sevokak asonk zai tea dor eka gunna vixim zannam zaunk proitn korat, ani te gunn tumchea jivitant vaddounk Jehovachi modot magat. c

17. Eka tornnattea bhavan, ek boro ghov ani familicho vhoddil zaunk kitem korunk zata? (Chitr pasun polloiat.)

¹⁷ Ghov ani familicho vhoddil. Jezun sanglolea pormonnem, thodde Kristi dadle ghoddie ankvar ravonk xoktat. (Mt. 19:12) Punn thodde kazar zatat. Tum kazar zaunk sodhta zalear, tum ghov ani familicho vhoddil zatolo. (1 Kor. 11:3) Eka ghovan aplea bailecho mog kelʼlo, tichea gorzanchi kallji ghetloli, ticho ek boro ixtt zalolo ani Jehova sangata tichi ixttagot ghott kelʼli Jehovak zai. (Ef. 5:28, 29) Hea lekhant polloilʼle gunn ani kola, zoxem chintpachi tank vaddovop, bailank resped divop, ani patieupa sarke zavop, tuka ek boro ghov ani familicho vhoddil zaunk modot kortole.

18. Eka tornnattea bhavan atanch thaun boro bapui zaunk koxi toiari korunk zata?

 ¹⁸ Bapui. Kazar zalea uprant, tum ghoddie ek bapui zait. Ani boro bapui zaunchea vixim Jehova thaun tunvem zaitem xikonk zata. (Ef. 6:4) Jehovan aplo Put Jezuk, apunn tacho mog korta ani to apleak manvololo asa mhunn ukteponnim sanglem. (Mt. 3:17) Tor fuddarak tum ek bapui zalo zalear, sodanch tujea bhurgeank tum tancho mog korta mhunn sang. Tim kortat tea borea kamam pasot tankam xabaski di. Tunvem Jehovachi dekh ghetli zalear tum tankam anikui borim Kristanvam zaunk modot kortolo. Tunvem atanch thaun ek boro bapui zaunk toiari korunk zata. Koxi? Tujea familik ani sobhechea bhav-bhoinnank tunvem mog ani kallji dakhounk zata. Toxench, tum tancho mog korta ani tim tuka valorachim asat mhunn tankam sangonk tunvem sonvoim korunk zata. (Ju. 15:9) Oxem kelʼlean tum Jehovak, tujea familik ani sobhechea bhav-bhoinnank moladik astolo. Ani fuddarak tum kazar zalo ani bapui zalo zalear, teo zobabdareo pasun tum bore toren samballunk pavtolo.

19-20. Tornnattea bhavamno, tumi anikui bore Kristanv koxe zaunk xoktat? (Masikachem fuddlem chitr polloiat.)

¹⁹ Tornnattea bhavamno, tumi apxinch anikui bore Kristanv zaunchenant. Punn tumkam vavr korunk poddttolo. Tor tumi kitem korunk zata? Tumi dekh gheunk zatat toslim borim udharonnam vinchun kaddat, tumchi chintpachi tank vaddoiat, patieupa sarke zaiat, faideak poddttoleo tosleo kola xikat, ani fuddaracheo zobabdareo samballunk toiari korat.

²⁰ Tumkam itlea vostuncher kam korchem asa mhunn kollʼllea uprant hem korop khub kotthin, oxem ghoddie tumkam thodde pavtt disot. Punn soddun dium nakat, tumchean tem zatolem! Karonn Jehova tumkam modot korunk axeta. (Iz. 41:10, 13) Toxench bhav-bhoinnam pasun tumkam modot korunk toiar asat. Tumi anikui bore Kristanv zatole tednam tumkam khuxalkai ani dhadosponn mellttolem. Tornnattea bhavamno, ami tumcho khub mog kortat! Ani tumi anikui bore Kristanv zaunk zo vavr kortat, tacher Jehovan besanv ghalum mhunn ami magtat. —Mho. 22:4.