1. Eka Kristanvan vaddavoll korunk koslo vavr korunk zai?

 BHURGIM rokddinch vaddttat tem polloun, tim apxinch vaddlim kai mhunn chintun ami ojap zatat. Punn eka Kristanvachi vaddavoll apxinch zaina. Oxem korunk taka vavr korunk poddtta. b (1 Kor. 13:11; Heb. 6:1) Tem mhunnttlear, tannem Jehova sangata apli ixttagot ghott korunk zai. Tea bhair, Jehovak manvotat tosle gunn vaddounk, faideak poddttat tosleo kola xikonk ani fuddaracheo zobabdareo samballunk toiari korunk taka Jehovachea povitr xoktechi goroz asa.—Mho. 1:5.

2. Utpoti 1:27-a thaun ami kitem xiktat, ani hea lekhant ami kitem xiktolim?

² Devan munxank dadlo ani bail mhunn rochlim. (Utpoti 1:27 vachat.) Tim pollounk eka-meka thaun vegllim asat tem khorem. Punn her vattamnim pasun tim vegllim asat. Zoxem, Devan tankam veg-veglleo zobabdareo dileat. Ani heo zobabdareo purnn korunk, tannim tanchea bhitor bore gunn vaddounk zai ani boreo kola xikonk zai. (Ut. 2:18) Tor hea lekhant tornnattea bhoinnamnim anikui borim Kristanvam zaunk kitem korunk zai tem ami xiktolim. Ani fuddlea lekhant tornnattea bhavamnim kitem korunk zai tem xiktolim.

3-4. Tornnattea bhoinnamnim dekh gheunk zata toslim udharonnam tankam khoim mellonk xoktat? (Chitr pasun polloiat.)

³ Jehovacho khub mog kortalim ani tachi seva kortalim toslea zaitea bailam vixim Bible-ant sanglam. (jw.org-acher “Women in the Bible—What Can We Learn From Them?” ho lekh polloiat.)  Hea lekhachea mukhel versant sangleat tech gunn tankam asle. Te mhunnttlear, tim aplea “sonvoim-ancher tabo dovortat toslim” ani “soglea vostumnim visvaxi” aslim. Tea bhair amchea sobhamnim pasun osleo bhoinno asat, jeo kallzantlean Jehovacho mog kortat. Tanchea koddlean pasun tornnattea bhoinnamnim xikonk zata.

⁴ Tornnattea bhoinnimno, bori dekh dovorpi tumchea sobhentlea khoinchea bhoinnanchi tumi dekh gheunk sodhtat? Tanchea sobit gunnancher dhean diat. Ani uprant, tumi te koxe dakhounk zatat tea vixim chintat. Fuddlea peregrafamnim anikui borim Kristanvam zaunk amkam khoinche tin mhotvache gunn asonk zai tem polloum-ia.

5. Eke bhoinnik anikui bori Kristanv zaunk khaltikai kiteak gorjechi?

⁵ Poilo gunn mhunnttlear, khaltikai. Ek bhoinn khalti asa zalear, Jehova lagim toxench dusream lagim tichem natem borem astolem. (Jak. 4:6) Udharonnak, 1 Korintkarank 11:3-ant Jehovan sobhent ani familint, fuddakar gheunk konnak zobabdari dilea tem sanglolem asa. Tor ek bhoinn Jehovacho mog korta ani khalti asa zalear, ti tea manddavollik tenko ditoli. c

6. Tornnattea bhoinnamnim khaltikaie vixim Rebeka thaun kitem xikonk zata?

⁶ Khaltikaie vixim amkam Rebekachem borem udharonn asa. Tika zannvai asli. Tor kednam kitem korchem ani tem koxem korchem tem tika khobor asli. Toxench, jivitant ghetlolea nirnnoi-amnim tinnem dhir dakhoilo. (Ut. 24:58; 27:5-17) Tori astana, ti dusreank man ditali ani khalti asli. (Ut. 24:17, 18, 65) Tor tornnattea bhoinnimno, tumi Rebeka bhaxen khalti asat ani Jehovan fuddakar gheunchi zobabdari dilea tankam tenko ditat zalear, tumi tumchea familik toxench sobhentlea bhav-bhoinnank borem udharonn zaun astolim.

7. Tornnattea bhoinnimno, mannsugen vagchea vixim tumi Esthera thaun kitem xiklim?

⁷ Dusro gunn mhunnttlear, mannsugen vagop. Bible sangta: “Mannsugen vagtat tanche lagim zannvai asta.” (Mho. 11:2, NW) Hea  vixim amkam Estherachem borem udharonn asa. Ti ranni zali tednam gorvixtt zaunk na, punn Mordekaian jem sanglolem tem tinnem aikolem ani tem pallʼllem. (Est. 2:10, 20, 22) Tor tornnattea bhoinnimno, tumi Esthera bhaxen dusreancho boro solʼlo magat ani to apnnaiat.—Tit. 2:3-5.

8. 1 Timotak 2:9, 10-a pormonnem, eke bhoinnin nhespa-dispa vixim ti mannsugen vagta mhunn koxem dakhounk zata?

⁸ Estheran anik eke vatten ti mannsugen vagta mhunn dakhoilem. Koxem? “Ti angan ani rupan sobit asli.” Tori astana, tinnem dusreanchem dhean apnnacher voddun haddunk na. (Est. 2:7, 15) Tor bhoinnimno, tumi hea babtint Estherachi dekh koxi gheunk zata? Oxem korunk ek vatt 1 Timotak 2:9, 10-nt sanglea. (Vachat.) Hanga sanglam ki “bailamnim moriadin ani sarkem chintop dovrun man haddtta tosle kopdde ghalunk zai.” Paulun uzar kelʼlea Grik utrantlean, bailamnim dusreanchem dhean tancher voddtta toxem nheschem nhoi, ani tanchea nhespa vorvim tim dusreanchea chintpak ani bhavnank man ditat hem dison ieunk zai mhunn kollon ieta. Tor amchea mogall bhoinnimno, tumi Paulun dilʼlo ho solʼlo apnnaitat mhunn ami tumchi khub tokhnnai kortat.

9. Abigaila thaun ami kitem xiktat?

⁹ Tisro gunn mhunnttlear, somjikai dakhovop. Somjikai aslolea munxak, sarkem kitem ani chukichem kitem tem vollkhonchi tank asta ani to sarkem tench korta. Hea vixim amkam Abigailachem borem udharonn asa. Tichea ghovachea eka vaitt nirnnoi-ak lagon, tancho akʼkho ghorabo nas zauncho aslo. Punn tinnem somjikai dakhoili ani rokddench panvl ghetlem dekhun tancho jiv salvar zalo. (1 Sam. 25:14-23, 32-35) Somjikai aslolean kednam ulounchem ani kednam vogi ravchem hem pasun ami zannam zatolim. Toxench dusream lagim uloitana, amkam zannam zauncho hokʼk na vo tankam borem dischem na toslem kainch ami tanche lagim vicharchimnant.—1 Tes. 4:11.

10-11. Bore toren vachunk ani borounk xiklolean, tumkam tosoch dusreank koso faido zatolo? (Chitr pasun polloiat.)

¹⁰ Tornnattea bhoinnimno, tumi faideak poddttat tosleo kola xikop gorjechem. Karonn tumi bhurgeponnar xiktat tantuntleo thoddeo kola jivitbhor faideak poddonk xoktat. Tumi kosleo thoddeo kola xikonk zatat?

¹¹ Bore toren vachunk ani borounk xikat. Thoddea sonskrutimnim vachop ani borovop cheddvam pasot nhoi oxem chintʼtat. Punn dor eka Kristanvan bore toren vachunk ani borounk xikop gorjechem. d (1 Tim. 4:13) Tor tumkam kotthin zata zalear pasun, hi kola xikonk proitn  korit ravat. Oxem kelʼlean tumkam koso faido zatolo? Tumkam fuddarak ghoddie ek kam mellonk xokta. Toxench, tumi Devachea Utrachim borim vidʼdhearthi ani xikoupi zaunk pavtolim. Ani sogleam-von mhotvachem mhunnttlear tumi Bible vachtat ani tacher niall kortat toxim, Jehova sangata tumchi ixttagot ghott zatoli.—Josh. 1:8; 1 Tim. 4:15.

12. Mhonnʼnneo 31:26-a thaun ami kitem xikonk zata?

¹² Dhean diun aikonk ani doiall ritin ulounk xikat. Oxem dor eka Kristanvan korop gorjechem. Hea vixim Jakoban ek boro solʼlo dilʼlo. Tannem mhunnttlem: “Dor eklean aikonk utsuk aschem, uloupant tabo dovorcho.” (Jak. 1:19) Tor dusrim uloitana tanchem dhean diun aikololean, ami tanchem ‘dukh somzon gheunk’ pavtolim. (1 Ped. 3:8) Punn tim kitem mhunnttat vo tanchim bhavnam kitem asat tem amkam somzona tednam, ulounchea poilim ami amkanch thodde prosn vicharunk zatat. (Mho. 15:28) Zoxe, ‘Mhojim utram khorim ani urba haddttat toxim asat kai? Mhojem ulovop man dita toxem ani doiall asa kai?’ Toxench dhean diun dusreanchem aikotat, ani doiall ritin uloitat toslea bhoinnam thaun ami xikonk zata. (Mhonnʼnneo 31:26 vachat.) Oxem korunk, tim kitem uloitat ani koxe ritin uloitat tem ami bariksannen aikonk zai. Tor ami hi kola jitle bore toren xiktat, titlinch ami borim ixttam korunk pavtolim ani tanchea sangata xanti samballunk pavtolim.

13. Tornnattea bhoinnimno, tumi ghor samballunk koxem xikonk zata? (Chitr pasun polloiat.)

¹³ Ghor samballunk xikat. Zaitea desamnim ghorantlim choddxim kamam bailo kortat. Hem koxem korchem tem tim aplea avoi koddlean vo onnbhov aslolea eke bhoinni koddlean xiktat. Hea vixim Cindy nanvachi ek bhoinn oxem sangta: “Koxtti vavr kelʼlean khuxalkai melltta, hi mhojea mummy-in mhaka xikoilʼli boreantli-bori vost zaun asa. Tinnem mhaka randunk, ghor nitoll dovrunk, xinvonk ani bazar korunk xikoilem. Haka lagon mhaka zaito faido zalo. Ani hanv Jehovache sevent anikui vavr korunk pavlem. Itlench nhoi, dusreancho poramos koso korcho tem hanv tichea koddlean xiklem. Hea vorvim hanv zaitea bhav-bhoinnank mellonk ani tanchi dekh gheunk pavlem.” (Mho. 31:15, 21, 22) Khorench, dusreancho poramos korpi ani koxtti vavr korpi bail, tichea famili pasot toxench sobhentlea bhav-bhoinnam pasot ek dennem zaun asa.—Mho. 31:13, 17, 27; D.I. 16:15.

14. Ami Crystal-a thaun kitem xiktat, ani ami amchem dhean kiteacher dovrunk zai?

¹⁴ Tumchea paim-ar ubim ravonk xikat. Dor eka Kristanvan aplea paim-ar ubo ravonk, ani aplea lagim asa tantunt dhadoxi ravonk xikop gorjechem. (Filp. 4:11) Crystal nanvachi ek bhoinn oxem sangta: “Iskolant xiktana, mhaka fuddarak boreak poddttole tosle subject vinchun kaddunk mummy-daddy-in mhaka modot keli. Daddy-in mhaka accounts xikonk lailem. Ani hem mhaka khorench boreak poddlem.” Punn kam korun poixe zoddlearuch puro nhoi. Te poixe koxe moddche tem-ui xikop gorjechem. (Mho. 31:16, 18) Oxem kel’lean ami gorje bhair rinnant poddchimnant, ani amche lagim asa tantunt dhadoxi astolim. Hea vorvim ami  Jehovachea sevecher dhean dovrunk pavtolim.—1 Tim. 6:8.

15-16. Ankvar bhoinno sobhe pasot dennem kiteak zaun asat? (Marku 10:29, 30)

¹⁵ Tornnattea bhoinnimno, tumi Devak manvotat tosle gunn vaddoitat ani faideak poddttat tosleo kola xiktat tednam, tumi fuddaracheo zobabdareo samballunk toiari korunk pavtolim. Tor tumi kitem korunk xoktat tem ami polloum-ia.

¹⁶ Tumi thoddea vella pasot ankvar ravonk xoktat. Thoddea sonskrutimnim cheddvamnim ankvar ravchem nhoi oxem mantat. Tori astana, amcheo thoddeo bhoinno Jezuchim utram monant dovrun ankvar ravtolim mhunn nirnnoi ghetat. (Mt. 19:10-12) Vo thoddim zannam her karonnank lagon ankvar ravtat. Punn tumi ankvar ravleant dekhun, Jehova ani Jezu tumkam unnea molachim lekhina mhunn ugddas dovrat. Khorem mhunnttlear sonvsarbhor asloleo amcheo ankvar bhoinno sobhe pasot ek dennem zaun asat. Tim sobhentlea bhav-bhoinnancho khub mog kortat, ani tankam kallji dakhoitat. Tea pasot tim eka orthan zaitea zannank bhoinno ani avoi-o koxeo zaun asat.—Marku 10:29, 30 vachat; 1 Tim. 5:2.

17. Tornnattea bhoinnamnim purnn vellachim sevokam zaunk kitem korunk zata?

¹⁷ Tumi purnn vellachi seva korunk xoktat. Sonvsarbhor zata tem porgottnnechem choddxem kam bhoinno kortat. (St. 68:11, NW) Tor tornnattea bhoinnimno tumi purnn vellachi seva korunk dhei dovrunk zata kai? Tumi ghoddie pioneer sevok, Bethel sevok, vo bandkamachea kamant bhag gheunk dhei dovrunk zata. Oxem kelea uprant, tumchea dhei-a vixim Jehova lagim magnnem korat. Purtim zaunk tumi kitem korunk zai, tem purnn vellachi seva korpi bhav-bhoinnank vicharat. Ani magir to dhei melloun gheunk tumi kitem korunk zai tem tharaiat, ani tea pormonnem kam korat. Tumi purnn vellachim sevokam zalim zalear, tumkam anikui zaitea vattamnim Jehovachi seva korunk sondhi mellttoli.

18. Eke bhoinnin ti konna lagim kazar zatoli tem chintun vinchun kaddop kiteak gorjechem? (Chitr pasun polloiat.)

¹⁸ Tumi kazar zaunk sodhtat zalear kitem? Hea lekhant polloilʼle gunn ani kola, tumkam ek bori bail zaunk modot korunk xoktat. Tumi kazara vixim chintʼtat zalear, tumi tumcho sangati chintun vinchun kaddop ekdom gorjechem. Karonn to munis familicho vhoddil zatolo, ani tumkam tachea adhin ravonk poddttolem. (Rom. 7:2; Ef. 5:23, 33) Tor kazar zauncho  mhotvacho nirnnoi gheunchea poilim, tumi tumkanch he prosn vicharunk zatat: ‘Hanv kazar zaunk sodhta to munis Jezuchi dekh gheta kai? To Jehovachi seva poilea zagear dovorta kai? To bore nirnnoi gheta kai? To apli chuki manun gheta kai? To bailank resped dita kai? To mhojea gorzanchi kallji ghetolo kai, Jehova sangata mhoji ixttagot ghott korunk mhaka modot kortolo kai, ani mhozo boro ixtt zaun astolo kai? To zobabdari bore toren samballtta kai? Udharonnak, taka sobhent kosleo zobabdareo asat? Ani to teo koxeo samballtta?’ (Luk. 16:10; 1 Tim. 5:8) Ugddas dovrat, tumkam ek boro ghov mellonk zai zalear, tumi pasun ek bori bail zaunk vavr korunk zai.

19. Eke bailek aplea ghovak “modot korpi” mhunnttlea. Hem kiteak borem zaun asa?

¹⁹ Bible-ant eke bore bailek tichea ghovak “ek favo tosli sangatin” ani ek “modot korpi” mhunnttlea. (Ut. 2:18, NW) Hacho orth ek bail valorachi nhoi oxem kai? Na! Karonn Bible-ant zaite pavtti Jehovak pasun “modot korpi” mhunnttla. (St. 54:4; Heb. 13:6) Tor ek bail ek bori modot korpi koxi zaunk xokta? Aplea ghovak tenko diun. Udharonnak, ghov famili pasot umko nirnnoi gheta tednam ti to manun ghetoli, ani to apnnaunk familik pasun modot kortoli. Toxench, ti Jehovacho mog korta dekhun ti aplea ghovak lojek ghalchina, punn tachea borea gunnam vixim uloitoli. (Mho. 31:11, 12; 1 Tim. 3:11) Tor tornnattea bhoinnamno, tumi Jehova pasot tumcho mog vaddoun ani tumchea ghorcheank toxench sobhentlea bhav-bhoinnank modot korpi zaun, fuddarak ek bori bail zaunk atanch toiari korunk zata.

20. Ek bore avoik lagon familicher koslo porinnam zata?

²⁰ Tumi avoi zaunk sodhtat zalear kitem? Kazara uprant tumkam bhurgim zaunk xoktat. (St. 127:3) Tor ek bori avoi zaunk tumi kitem korunk zai? Hea vixim tumi poilem chintunk zata. Hea lekhant xiklole gunn ani kola, tumkam ek bori bail ani avoi zaunk modot kortole. Tumi mog, doia ani pasiens dakhoitat tednam tumchi famil khuxal astoli. Toxench tumchea bhurgeank mog mellttolo ani tim surokxit asat mhunn tankam distolem.—Mho. 24:3.

21. Amchea bhoinnam vixim amkam koxem bhogta, ani kiteak? (Masikachem fuddlem chitr polloiat.)

²¹ Bhoinnamno, tumi Jehova pasot ani bhav-bhoinnam pasot jem kitem kortat taka lagon ami tumcho khub mog kortat. (Heb. 6:10) Jehovak manvotat tosle gunn vaddounk, tumchi famil toxench bhav-bhoinnank khuxalkai haddttat tosleo kola vaddounk, ani fuddaracheo zobabdareo samballunk tumi khub vavr kortat. Khorench, tumi Jehovache songottnne pasot khub moladik zaun asat!