Tumi hea vorsachim Pahrogopur masikam dhean diun vachleant kai? Toxem zalear hea prosnanche zobab tumi diunk xoktat kai tem polloiat:

Ami amchea ‘monachi novsornni korop’ mhunnttlear kitem? (Rom. 12:2)

Ami fokot thoddeo boreo korneo kelearuch puro, oxem nhoi. Tachea bodlek, ami bhitorlean koslim munxam asat tachi ami topasnni korunk zai. Ani Jehovachea dorjeam pormonnem ami goroz te bodlav korunk zai.—w23.01, p. 8-9.

Sonvsarantlea ghoddnneancher dhean ditana ami chotur koxem ravonk zata?

Aiz sonvsarbhor ghoddttat tea ghoddnneancher dhean diunk amkam borim karonnam asat. Punn tea ghoddnneam vixim aikon odmas launchea bodlek, amchem ulovop songottnnen dilolea mahiticher adarit asta tednam, amche modem aslolo ekvott samballunk ami modot korunk pavtat. (1 Kor. 1:10)​—w23.02, p. 16.

Jezucho bautizm ani tachea pattlavdaranchea bautizma modem kitem ontor asa?

Aplea pattlavdaram bhaxen, Jezun aplem jivit Jehovak somorponn korchi goroz nasli. Karonn Jehovak somorponn kelʼlea raxttrant to zolmolʼlo. Toxench, to poripurnn ani patok naslolo munis aslo. Tor taka poschatap korchi goroz nasli. ​—w23.03, p. 5.

Bhav-bhoinnank zobab diunk sondhi mellonk ami kitem korunk zata?

Ami lhan zobab diunk zatat. Toxench, ami zaitea mudʼdeam vixim sangchem nhoi. Karonn peregrafant asa tem soglem ami sanglem zalear, dusreank sangonk chodd kainch urchem na.​—w23.04, p. 23.

Izaias 35:8-ant sangloli “Povitr Vatt” kitem zaun asa?

Jehovan aplea lokank Babilona thaun Izraelant vochonk ek vatt ukti kelʼli vo manddavoll kelʼli, zaka “Povitr Vatt” mhunnttlea. Amchea disam vixim kitem? 1919-achea xemboramnim vorsam poilim, Dev-bhirantichea thoddea munxamnim hi vatt toiar korunk khub koxtti vavr kelo. Hantunt Bible bhaxantor korpachem ani Bible chhapʼpachem kam pasun mellon aslem. Aiz Devache lok hea ‘Povitr Vatten’ cholot asat, jea vorvim tankam Devachea Rajea udexim zaitim besanvam mellttolim.​—w23.05, p. 15-19.

Mhonnʼnneo odheai 9-ant dileat te solʼle khoinchea don bailam vixim asat?

Mhonnʼnneo odheai 9-ant, “murkh ostori” ani khore ‘zannvaieche ostore’ vixim sanglam. Murkh ostorechem apounnem manun ghetat tim fonddant pavtat, punn khore zannvaiechea ostorechem apounnem manun ghetat tim ‘zannvaiechea rostean’ cholonk pavtat ani tankam jivit melltta. (Mho. 9:1, 6, 13, 18)​—w23.06, p. 22-24.

Lota sangata vagtana Jehovan khaltikai ani somjikai koxi dakhoili?

Jehova Sodom xaracho nas korcho aslo tednam, tannem Lotak dongrar pollon vochonk sanglem. Punn Lotan, laginch aslolea Zoar xarant vochonk Jehova lagim vinoti keli tednam, Jehovan taka toxem korunk dilem.​—w23.07, p. 21.

Ghov pornography polloita zalear tachea bailen kitem korunk zata?

Apunn zobabdar mhunn tinnem chintchem nhoi, ani Jehova sangata apli ixttagot ghott korunk tinnem vavrunk zai. Toxench, ekdom dukhi aslim, punn Jehova lagim magnnem kelʼlean bhuzvonn mellʼlli toslea bailam vixim tinnem Bible-ant vachunk zata. Tea bhair, tinnem aplea ghovak pornography pollounchea tallnnent ghalunk xoktat toslea poristhitim thaun pois ravonk modot korunk zata.​—w23.08, p. 14-17.

Konnui amchea patienni vixim prosn vicharta tednam, somjikai amkam movallaien vagonk koxi modot korta?

Tannem amchim fokannam korunk vo amkam khala uddounk prosn vicharla oxem chintchea bodlek, tea prosna vorvim, tachea monant kitem chol’lam vo taka kitem sanglear faideak poddttolem tem ghoddie ami zannam zaunk xoktat, oxem ami chintunk zai. Oxem kelear, ami taka movallaien zobab diunk pavtolim.​—w23.09, p. 17.

Xokti melloun gheunchea vixim ami Marie thaun kitem xiktat?

Apunn Mesiasak zolmak haddttoli mhunn Mariek kollʼllem tednam, xokti mellonk tinnem dusreanchi modot ghetli. Gabriel devdutan toxench Elizabetan Devachim utram sangon tika urba dili. Ami pasun amchea bhav-bhoinnanchi modot gheun xokti melloun gheunk pavtolim.​—w23.10, p. 15.

Jehova amchea magnneank koso zobab diunk xokta?

To amchim magnnim aikotolo mhunn bhas dita, ani tim tachea udʼdhexak koxim zuddlolim asat tem monant dovorta. (Jer. 29:12) To ghoddie ek-sarkeach magnneank veg-veglle toren zobab di-it, punn to sodanch amkam modot kortolo.​—w23.11, p. 21-22.

Romkarank 5:2-ant ‘bhorvonxea’ vixim sanglolem asa. Toxem zalear vers 4-ant bhorvonxea vixim portun kiteak sanglam?

Konnui munis bori khobor aikota tednam taka sobit bagent khuxalkaien jiepacho bhorvonso mellonk xokta. Punn tacher oddchonneo ietat, to thiraien tancho fuddo korta, ani taka Jehovachi maniotai asa mhunn kolltta tednam tacho bhorvonso odik ghott ani anikui khoro zata.​—w23.12, p. 12-13.