OBHEASACHO LEKH 50
GIT 135 Xannim Zaun Jehovak Khuxal Korat
Avoi-bapaimno—Tumchea Bhurgeancho Bhavarth Ghott Korunk Tankam Modot Korat
‘Devachi bori, manvota tosli, ani poripurnn khuxi kitem ti tumi tumkanch khatri korun gheiat.’—ROM. 12:2.
MUKHEL MUDʼDO
Avoi-bapaimnim tanchea bhurgeam lagim Jehova ani Bible-a vixim koxem ulounk zata ani tancho bhavarth ghott korunk koxi modot korunk zata tem ami hea lekhant polloitolim.
1-2. Avoi-bapaimno, tumchim bhurgim amchea patienne vixim prosn vichartat tednam tumi kitem korunk zata?
EKA bhurgeak vaddounk khub vavr lagta nhoi? Tumkam lhan bhurgim asat zalear Jehovacher tancho bhavarth ghott korunk tumi kortat tea soglea vavra pasot ami tumkam xabaski ditat. Ani tumcho vavr polloun Jehova pasun khuxal zata. (D.S. 6:6, 7) Punn tumchim bhurgim vaddttat toxim, tim amchea patienne vixim tumkam prosn vicharit. Zoxem, Jehova amkam umkeoch vostu kiteak korinaka mhunn sangta, oxem tim tumkam vicharit.
2 Tanche prosn aikon survatek tumkam ghoddie usko zait. Ani Jehovacher ani Bible-acher tumchea bhurgeancho bhavarth unno zala kai, oxem pasun tumchea monant ieit. Punn khorem mhunnttlear, bhurgim vaddot voitat toxim tancho bhavarth ghott korunk tannim prosn vicharop gorjechem. (1 Kor. 13:11) Tor tumi bhieunchi koslich goroz na. Tumchim bhurgim vichartat te prosn uzar korun, tumi tankam tanchi chintpachi tank uzar korunk modot korunk zata, jea vorvim Jehovacher ani Bible-acher tancho bhavarth anikui ghott zaunk pavtolo.
3. Hea lekhant ami kitem polloitolim?
3 Hea lekhant avoi-bapaimnim tanchea bhurgeank, (1) Devacher ani Bible-acher tancho bhavarth ghott korunk, (2) Bible-antle noitik dorje pallop tanchea pasot kiteak borem tem somzonk, ani (3) tanchea bhavartha vixim dusreank sangonk, koxi modot korunk zata tem ami polloitolim. Toxench, bhurgeamnim prosn vicharop kiteak borem ani tancho bhavarth ghott korunk avoi-bapaimnim kosleo vatto uzar korunk zatat tem-ui ami polloitolim.
DEVACHER ANI BIBLE-ACHER TANCHO BHAVARTH GHOTT KORUNK TANKAM MODOT KORAT
4. Bhurgim tumkam kosle prosn vicharit, ani kiteak?
4 Avoi-bapaimno, tumi Jehovacher bhavarth dovortat dekhun tumchim bhurgim pasun apxinch Jehovacher bhavarth dovortolim oxem na. Tumchea bhaxen, tumchea bhurgeamnim-i tancho bhavarth vaddounk poddttolo. Tim vaddot voitat toxim, tim ghoddie osle prosn vicharit: ‘Dev asa mhunn kosle purave asat? Bible-ant jem sanglam tacher hanvem khoreaninch patieunk zata kai?’ Khorem mhunnttlear, amchi “somzochi tank” uzar korunk ani ‘soglea vostunchi khatri korun gheunk’ Bible amkam urba dita. (Rom. 12:1; 1 Tes. 5:21) Tor tumchea bhurgeancho bhavarth ghott korunk tumi tankam koxi modot korunk zata?
5. Avoi-bapaimno, Bible-acher tumchea bhurgeancho bhavarth ghott korunk tumi tankam koxi modot korunk zata? (Romkarank 12:2)
5 Bible sangta tem sot mhunn purave sodhunk tumchea bhurgeank modot korat. (Romkarank 12:2 vachat.) Tumchim bhurgim prosn vichartat tednam, tanche zobab sodhunk tannim sodh korchim sadhonam koxim uzar korunk zatat tem tankam dakhoiat. Udharonnak, Bible khoreaninch “Devachem utor” mhunn tankam purave mellonk tea vixim aslole lekh ani video sodhunk tankam urba diat. (1 Tes. 2:13) Hea vorvim, Bible munxanchem pustok nhoi mhunn tankam khatri zatoli. Udharonnak, tannim amchim prokaxonam uzar korun Asirient aslolea Nineve xara vixim sodh korunk zata. Adim, Bible-ache thodde khodd kaddpi mhunnttale ki Nineve xar asonkuch na. Punn sumar 1850-ant, zannarank zomni ponda puron aslolem Nineve xar mellʼllem, jea vorvim Bible-ant jem sanglam tem sarkem asa mhunn puravo mellʼllo. (Zef. 2:13-15) Nineve xarachea nisonttona udexim Bible-ant sangloli bhasaunni koxi purnn zali tem zannam zaunk, tannim Novembr 2021-achea Pahrogopur-ant, “Tumi Zannam Aslim?” ho lekh pollounk zata. Amchea prokaxonamnim kitem sanglam ani her patieupa sarkea pustokamnim kitem sanglam tem sor korunk tumchea bhurgeank modot korat. Hea vorvim, Bible-ant sanglam tem sarkem asa mhunn tancho bhavarth ghott korunk tankam modot zatoli.
6. Avoi-bapaimno, tumchea bhurgeank tanchi chintpachi tank uzar korunk tumi koxi urba diunk zata? Ek udharonn diat. (Chitr pasun polloiat.)
6 Tumchea bhurgeank tanchi chintpachi tank uzar korunk urba diat. Avoi-bapaimno, Bible vo Deva vixim tumchea bhurgeam lagim ulounk tumkam zaiteo sondhi asat. Zoxem tumi eka museum-ant, garden-ant, vo Jehovachea Sakxeanchea xakha ofisant bhett ditana oxem korunk zata. Udharonnak tumi eka museum-ant voitana, thoim asloli ek vost vo adim zalʼli ek ghoddnni Bible-ak koxi zuddloli asa tem tumi tumchea bhurgeank dakhounk zata. Hea toren Bible-ant sanglam tem sot mhunn somzonk tumchea bhurgeank modot zatoli. Ghoddie tumi tankam Moabit Fatra vixim sangonk zata. Ho fator 3,000 vorsancho asa ani tacher Jehovachem nanv asa. Ho fator France-achea Paris xarant, Louvre Museum-ant dovorla. Toxench hea fatracho ek nokʼkol, New York-achea Warwick xarant aslolea, Jehovachea Sakxeanchea Mukhel Ofisachea exhibit vo prodorxonant pollounk melltta. Hea prodorxonachem nanv asa, “Bible ani Devachem Nanv.” Hea fatracher, Moabacho Raza Mesha Izraelachea add gelo mhunn sanglam. Ani hench Bible-ant pasun boroilʼlem asa. (2 Raz. 3:4, 5) Tor Bible-ant sanglam tem sot asa mhunn tumchea bhurgeank purave mellttole tednam tancho bhavarth anikui ghott zatolo.—2 Itihas 9:6 sor korat.
Adlea kalla voilea vostum vixim uloun Bible-ant asa tem sarkem mhunn tumchea bhurgeanchi chintpachi tank vaddounk tankam modot korat (Peregraf 6 polloiat)
7-8. (a) Rochnnent aslole sobit akar polloun ami kitem xikonk xoktat? Ek udharonn diat. (Chitr pasun polloiat.) (b) Rochnnar asa mhunn tumchea bhurgeancho bhavarth vaddounk tumi tankam koslo prosn vicharunk zata?
7 Rochnne vixim chintunk tumchea bhurgeank urba diat. Tumi khoinsorui bhonvonk voitana vo garden-ant kam kortana, rochnnent aslolea veg-vegllea akarancher dhean diunk tumchea bhurgeank modot korat. Oxem kelʼlean, khub zannvai aslolea konnem tori heo vostu rochleat mhunn tankam kollon ietolem. Udharonnak, rochnnent aslolea zaitea vostunk spiral vo bhonvrea sarko akar asa. Ani oslea akaram vixim vidneanik zaitim vorsam meren xikle. Nicola Fameli nanvacho ek vidneanik, hea vixim sangta ki thoddea rochnnent bhonvrea sarke akar astat. He akar umkech ankddeache astat, ani titloch ankddo, toslo akar aslolea dusrea rochnnentui pollounk melltta. Ani hea ankddeak Fibonacci sequence mhunnttat. Bhonvrea sarko akar amkam zaitea rochnnent dista. Zoxem, thoddea galaxy-nim, ximpeamnim, panamnim ani sunflower-amnim. a
8 Toxench tumcho bhurgo iskolant science xiktana, rochnnent aslolea zaitea vostum modem ek-sarkoch akar vo design asa mhunn taka kollon ieit. Udharonnak, zaitea zhaddank ek-sarkoch akar asa. Zoxem, zhaddachea modlea vo mukhel bhaga thaun taka khande ietat ani tea khandeank lhan-lhan fantte ietat. Hea akarak fractals oxem mhunnttat. Tor he sogle akar konnem rochleat? Tumcho bhurgo hea prosna vixim bariksannen chintʼta tednam, Jehova Devanuch hem soglem rochlam mhunn chodd korun tacho bhavarth vaddonk pavtolo. (Heb. 3:4) Tumcho bhurgo vaddot voita toso, Jehovan dilʼle dorje kiteak faideache hem pasun zannam zaunk tumi taka modot korunk zata. Tumi taka vicharunk zata: ‘Jehova Devan amkam rochleant zalear ami khuxal ravonk amkam kitem faideachem tem to bore bhaxen zannam oxem tuka disona?’ Uprant, amkam khuxal ravonk tannem Bible-ant koslem margdorxon dilam tea vixim tumi taka sangonk zata.
NASA, ESA, and the Hubble Heritage (STScl/AURA)-ESA/Hubble Collaboration
Rochnnek itlo sobit akar konnem dila? (Peregraf 7-8 polloiat)
BIBLE-ACHEA NOITIK DORJEAM PASOT TANCHEM UPKARIPONN VADDOIAT
9. Bible-ant jem sanglam tem sarkem nhoi oxem tumcho bhurgo thodde pavtti kiteak sangonk xokta?
9 Thodde pavtti, Bible-ant jem sanglam tem sarkem nhoi mhunn tumcho bhurgo tumkam sangonk xokta. Tor tumcho bhurgo oxem kiteak sangta tem zannam zaunk proitn korat. Bible-ant jem sanglam tem sot mhunn to khoreaninch manun ghena kai, vo aplea patienni vixim dusreank sangonk taka kotthin zata kai? Tachea monant prosn ieunk koslem-i karonn asum, Bible-antle noitik dorje pallop kiteak bore tem somzonk taka modot korat. Oxem korunk, tumi Sasnak Khuxalkaien Jieiat! hem pustok uzar korunk zata. b
10. Jehovachim ghott ixttam zaunk tumi tumchea bhurgeank koxi modot korunk zata?
10 Tumchea bhurgeank Jehovachim ghott ixttam zaunk modot korat. Tanchea sangata Bible obheas kortana, Sasnak Khuxalkaien Jieiat! hea pustokant aslole prosn ani udharonnam uzar korun, veg-vegllea vostum vixim tanchem chintop kitem asa tem somzonk proitn korat. (Mho. 20:5) Zoxem, odheai 8-ant Jehovak eka kallji gheupi Ixttak sor kela, zo amkam faido zata ani amchi rakhonn zata tosle solʼle dita mhunn sanglam. Ani magir 1 Juanv 5:3-a vixim uloilea uprant, tumi tankam oxem vicharunk zata: “Jehova itlo boro Ixtt hem zannam zalʼlean to jem sangta tem ami kiteak korunk zai mhunn dista tumkam?” Ho prosn ghoddie sadho disot, punn to vicharlolean Jehova amcho mog korta dekhun to amkam kaide dita mhunn somzonk tumchea bhurgeank modot zaunk xokta.—Iz. 48:17, 18.
11. Bible-antlim totvam apnnailʼlean amkam koso faido zata tem tumi tumchea bhurgeank koxem somzaunk zata? (Mhonnʼnneo 2:10, 11)
11 Bible-antlim totvam apnnailʼlean amkam koso faido zata tea vixim tanche lagim uloiat. Tumi sangata mellon Bible vo disachem vers vachtat tednam, Bible totvam apnnailʼlean tumchea familik koso faido zala tea vixim uloiat. Udharonnak, mhenot korop ani sodanch sot ulovop kiteak borem tem somzonk tankam modot korat. (Heb. 13:18) Toxench, Bible-antlim totvam apnnailʼlean amchi bholaiki bori urta ani ami khuxal astat mhunn pasun tumi tankam sangonk zata. (Mho. 14:29, 30) Hea toren, Bible-ant sanglam tem amchea jivitant apnnailʼlean amkam koso faido zata tem tumchea bhurgeank somzonk modot zatoli. Ani fuddem vochon tim ap-khuxen Bible-antlim totvam aplea jivitant apnnaitolim.—Mhonnʼnneo 2:10, 11 vachat.
12. Bible-antle solʼle faideak poddttat mhunn somzonk ek bapui aplea putak koxi modot korta?
12 France-ant ravpi Steve ani tache bailek Ethan nanvacho ek put asa. Jehova Dev amcho mog korta dekhun amkam kaide dita hem somzonk tim Ethan-ak koxim modot kortat tem to sangta. To mhunntta: “Ami taka osle prosn vichartat: ‘Ami ho solʼlo apnnailʼlo Jehovak kiteak zai? Hache voilean to amcho mog korta mhunn koxem dison ieta? Ho solʼlo apnnaina zalear kitem zaunk xokta?’” Oxem kelʼlean Jehova Dev dita te solʼle amcheach boreak mhunn Ethan-ak khatri zalea. Steve fuddem sangta: “Bible-antli zannvai munxanche zannvaie poros kitli vorti hem Ethan-ak somzavop amcho dhei zaun asa.”
13. Avoi-bapaimno, Bible-antlim totvam apnnaunk tumi tumchea bhurgeank koxi modot korunk zata? Ek udharonn diat.
13 Bible-antlim totvam apnnaunk tumchea bhurgeank proxikxonn diat. Udharonnak, klasintlim bhurgim tumchea bhurgeak pichʼcher pollounk vo video game khellonk apoit. Tea pichʼcherant vo video game-int aslolim munxam onoitik ani hinvsen bhorlolim kamam kortat zait. Ani tumchea bhurgeakui toxench korunk urba melltta tea toren tea munxam vixim tantunt dakhoilam zait. Tor oslea vellar, Bible-antlea totvam pormonnem tea munxanchi vagnnuk sarki asa kai na tem chintunk tumi tumchea bhurgeak modot korunk zata. (Mho. 22:24, 25; 1 Kor. 15:33; Filp. 4:8) Oxem kelʼlean, tumcho bhurgo aplea klasintlea bhurgeank sakx diunk pavtolo.
APLE PATIENNI VIXIM SOMZAUNK TUMCHEA BHURGEANK MODOT KORAT
14. Tornnatteank khoinchea vixoi-acher ulounk kotthin zaunk puro, ani kiteak?
14 Thodde pavtti, tornnatteank aple patienni vixim ulounk kotthin zaunk puro. Zoxem iskolant evolution-a vixim xikoitat tednam, apunn evolution kiteak patiena tea vixim sangonk tankam bhirant disot. Karonn tancheo ttichereo tem sot mhunn khatren sangonk puro. Tor avoi-bapaimno, tumi tumchea bhurgeank aple patienne vixim ghott khatri korun gheunk koxi modot korunk zata?
15. Tumchim bhurgim jem mantat tem sarkem mhunn khatri korun gheunk tumi tankam koxi modot korunk zata?
15 Tumchim bhurgim jem mantat tem sarkem mhunn khatri korun gheunk tankam modot korat. Tim Rochnnar asa mhunn mantat dekhun tankam bhieunchi koslich goroz na. (2 Tim. 1:8) Khorem mhunnttlear, zaite vidneanik pasun sogleo vostu apxinch ieunk nant mhunn mantat. Karonn rochnnent aslolea vostuncho akar polloun khub zannvai aslolea konnem tori teo rochleat mhunn tankam kollon ailam. Tea pasot, sonvsarbhor iskolamnim xikoitat ti evolution-achi xikounn te manun ghenant. Toxench, ek Rochnnar asa mhunn her bhav-bhoinnam koxi khatri korun gheunk pavlim tea vixim tumchea bhurgeamnim tanche lagim ulounk zata. Oxem kelʼlean, ek Rochnnar asa mhunn tanchi khatri vaddounk tankam modot zatoli. c
16. Avoi-bapaimno, ek Rochnnar asa mhunn aplea patienne vixim dusreank khatren sangonk tumi tumchea bhurgeank koxi modot korunk zata? (1 Pedru 3:15) (Chitr pasun polloiat.)
16 Ek Rochnnar asa mhunn apunn kiteak patieta tea vixim khatren dusreank sangonk tumchea bhurgeank modot korat. (1 Pedru 3:15 vachat.) Oxem korunk, jw.org-acher “Young People Ask—Creation or Evolution?” hea series-ant aslolea lekhancher tumi sangata mellon bhasabhas korunk zata. Oxem kortana, tumchea bhurgeank dusreank khoinche purave somzaunk sompem zatolem tem tankam vicharat. Ani uprant, tim tem koxim somzaitolim tea vixim practice korat. Aplea patienni vixim sangtana, tumchea bhurgeamnim iskolantlea bhurgeam sangata vad-vivad korcho nhoi mhunn tanchea ugddasak haddat. Punn hea vixoi-acher ulounk toiar asat tanche lagim sade ritin ani somzota tea toren ulounk tankam urba diat. Udharonnak, tanchea klasintlo ek bhurgo oxem mhunnot: “Hanv fokot dixtti poddtta tacheruch visvas dovortam, ani Devak tor hanvem kednanch pollounk na.” Tea vellar tumchea bhurgean taka oso zobab diunk zata: “Xara thaun ekdom pois aslolea eka ranant tum pavla mhunn chint. Ani tea ranant tuka ek baim dixtti poddtta. Ti baim thoim apxinch aili mhunn tum mhunnttolo? Ti baim thoim apxinch ieunk na zalear, amchi prithum ani sogli jivi rochnna pasun apxinch ieunk xokona. Hem soglem konnem tori rochlam astolem nhoi?”
Iskolantlea bhurgeam lagim uloitana sade ritin ani tankam somzota tea toren uloiat (Peregraf 16-17 polloiat) d
17. Bible-antlea sota vixim dusreank sangonk vatto sodhunk avoi-bapaimnim aplea bhurgeank koxi modot korunk zata? Ek udharonn diat.
17 Bible-antlea sota vixim dusreank sangonk vatto sodhunk tumchea bhurgeank urba diat. (Rom. 10:10) Dusreank Bible-a vixim xikovop ek songitachem sadhon xikpa sarkem zaun asa. Zo munis songitachem sadhon xikta to survatek ek sadem songit practice korta. Ani uprant vell soron voita toso songitam vazovop taka sompem zata. Teach bhaxen, porgottnni korunk suru kortana eka bhurgean sade toren tem korunk zata. Udharonnak, tannem aplea iskolantlea eka bhurgeak oxem vicharunk zata: “Vidneanik rochnna polloun noveo-noveo vostu toiar kortat mhunn tuka khobor asli? Hea vixim tuka ek video dakhoum?” Ani magir Was It Designed? hea series-antlo ek video dakhoilea uprant tannem oxem vicharunk zata: “Vidneanikamnim rochnnek polloun jem toiar kelam taka lagon dusrim tankam vakhannttat. Tor hem soglem rochlam taka kitli vakhannʼnni favo nhoi!” Hea toren sompe ritin uloilʼlean to bhurgo Jehova vixim anik xikonk sodhit.
TUMCHEA BHURGEANCHO BHAVARTH GHOTT KORUNK TANKAM MODOT KORIT RAVAT
18. Avoi-bapaimno, tumchea bhurgeancho bhavarth ghott korunk tumi tankam koxi modot korit ravonk zata?
18 Aiz ami oslea sonvsarant jietat, zoim choddxea lokank Devacher bhavarthuch na. (2 Ped. 3:3) Tea pasot avoi-bapaimno, tumchea bhurgeam sangata Bible obheas kortana, tankam oslea vixoi-ancher sodh korunk urba diat, jea vorvim Bible-a pasot ani Jehovachea noitik dorjeam pasot tancho resped vaddttolo. Tea bhair, Jehovachi rochnna kitli ojapachi asa tea vixim tanche lagim uloun, tanchi chintpachi tank uzar korunk tankam modot korat. Toxench, purnn zalʼleo Bible-antleo ojapacheo bhasaunneo somzonk tankam adar korat. Ani sogleam-von mhotvachem mhunnttlear, tumchea bhurgeam sangata ani tanchea pasot magnnem korat. Tumi oxem kortat tednam, tumchea bhurgeancho bhavarth ghott korunk tumi zo vavr kortat tacher Jehova besanv ghaltolo mhunn tumi khatri dovrunk zata.—2 It. 15:7.
GIT 133 Tornnattponnar Jehovachi Bhokti Korat
a Anik zannam zaunk, jw.org-acher The Wonders of Creation Reveal God’s Glory—Patterns. ho video polloiat.
b Tumi tumchea bhurgeam sangata Sasnak Khuxalkaien Jieiat! pustokacho obheas korun sompoila zalear, tumi tanchea sangata bhag 3 ani 4-ant aslolea thoddea odheai-am vixim porot ulounk zata. Tantunt Bible-antlea noitik dorjeam vixim sanglolem asa.
c Setembr 2006-achea Zagrut Ravat! masikent, “Why We Believe in a Creator” ho lekh polloiat. Ani The Origin of Life—Five Questions Worth Asking, hi pustika polloiat. Anikui udharonnam pasot, jw.org-acher Viewpoints on the Origin of Life hea video series-ant aslole video polloiat.
d CHITRACHI MAHITI: Ek tornnatto Sakxi aplea iskolantlea eka bhurgeak Was It Designed? hea series-antlo ek video dakhoita. Tea bhurgeak drone-a vixim zannam zaunk umed asa.
