Hanv 1927-ant Chicago, U.S.A.-ntlea Illinois nanvachea eka lhanxea xarant zolmolʼlom. Ami soglim mellon panch bhurgim—Jetha, Don, hanv, Karl, ani Joy. Ami sogleamnim purnn kallzan Jehovachi seva korunk nichov kelʼlo. Jetha 1943-ant Gilead-achea dusrea korsak gelem. Don 1944-ant Brooklyn Bethel-ant gelo. Tachea uprant, 1947-ant Karl pasun Bethel-ant gelo ani magir 1951-ant Joy pasun gelem. Tanchea, toxench mhojea avoi-bapaichea borea udharonnak lagon mhaka-i Jehovache sevent anik chodd vavr korunk urba mellʼlli.

Mummy-daddy Bible vachtalim ani Devacho khub mog kortalim. Tannim amkam-i toxench korunk xikoilem. Punn Poilea Vixv Zhuza vellar daddy Europe-ant soinik mhunn seva korunk gelo tednam thaun, igorjecher tacho visvas moddlo. Zhuza uprant to surokxit ghora ailo mhunn mummy khub khuxal zali. Tinnem daddy-k mhunnttlem: “Karl, ami sodanche bhaxen igorjent ia nhoi?” Daddy-n tika mhunnttlem: “Hanv tuka thoim pavoitam, punn hanv bhitor ieuncho na.” Tednam tinnem vicharlem: “Kiteak?” Daddy-n zobab dilo: “Zhuza vellar donui vatten aslole padri ap-aplea soinikancher ani tanchea hotʼtearancher besanv ghaltale. Te ekuch dhormache asle. Tor Devan konnank tenko dilo?”

Uprant mummy igorjent asli tednam, don Sakxi amchea ghora ailim. Tannim daddy-k Light nanvachim don pustokam dakhoilim, zantunt Prokasovnni pustoka vixim somzonni dilʼli. Daddy-k tim pustokam avoddlim ani tannem tim ghetlim. Mummy ghora ailea uprant tinnem tim pustokam polloilim tednam, tinnem tim vachunk suru kelim. Ek dis mummy-n eka newspaper-acher ek advertisement polloilo, zantunt Light pustokam uzar korun Bible xikonk sogleank apounnem aslem. Mummy thoim geli. Thoim pavlea uprant ek zanntti bail darar aili. Mummy-n hatant pustok dhorun tika vicharlem: “Tumi hanga hantuntlean xikoitat?” Tea bailen mhunnttlem: “Hoi baie, bhitor ieo.” Fuddlea sumanak mummy amkam soglea bhurgeank thoim gheun geli. Ani tea uprant ami dor sumanak thoim vochonk laglim.

Sobheche eke mittinge vellar, bhavan mhaka Stotr 144:15 vachunk sanglem. Thoim sanglam ki Jehovachi bhokti kortat to lok khub khuxal. Hem vers mhaka avoddlem. Toxench mhaka anikui don versam avoddlim. Tim mhunnttlear, 1 Timotak 1:11, zoim sanglam ki Jehova ek ‘khuxal Dev’ zaun asa, ani Efezkarank 5:1 zoim amkam ‘Devachi dekh  gheunk’ urba dilea. Tor hanvem khuxalkaien mhojea Rochnnarachi seva korunk zai ani tannem mhaka apli seva korunk ho man dila mhunn tache upkar attounk zai mhunn mhaka kollon ailem. Ani heo donui vostu korunk hanvem jivitbhor vavr kelo.

Ji sobha amkam sogleam-von lagim asli ti 32 kilometr pois, Chicago-nt asli. Tori astana ami mittingek hajir zatalim. Ani oxem kelʼlean, hanv Bible-a vixim anikui zannam zaunk pavlom. Mhaka ugddas asa ki eke mittingek Jetha-n zobab dilo tednam hanvem monantuch mhunnttlem: ‘Are! Hem tor hanv-ui zannam aslom. Hanvem pasun zobab diunk hat ubarunk zai aslo.’ Tednam thaun hanv mittinge pasot anikui toiari korunk laglom ani mhojea utramnim zobab diunk laglom. Punn mhotvachem mhunnttlear, mhojea donui bhavam ani bhoinnam bhaxen hanv Jehovak anikui lagim sorot ravlom. Ani 1941-ant hanvem bautizm ghetlo.

1942-ant, Cleveland Ohio-nt zalʼlea odhivexona vixim mhaka khas korun ugddas asa. Amchi famil anikui zaitea familim sangata, odhivexona laginch eka zagear toiar kelʼlea tombumnim ravli. Toxench, Amerikentlea 50-am poros chodd xarantlim bhav-bhoinnam hem odhivexon fona vorvim aikotalim. Tea vellar Dusrem Vixv Zhuz choltalem ani Jehovachea Sakxeank chodd-ani-chodd dhumalleacho fuddo korunk poddttalo. Sanjechea vellar thoddea bhavamnim apli gaddi hea toren park kelʼli ki tacho fuddlo bhag bhaile vatten aslo mhunn hanvem polloilem. Ani dor eke gaddient konn tori rat-bhor zago ravtolo mhunn tannim tharailʼlem. Tannim koslo-i dhoko polloilo zalear, akromonn korunk ietat tancher light marun te horn vazoitole asle. Oxem kelʼlean, dusrim modot korunk rokddinch ietolim aslim. Hi manddavoll polloun hanvem chintlem, ‘Jehovacho lok sogle poristhitink lagon bori toiari kortat.’ Tor hanv surokxit asa mhunn zannam zaun mhaka bori nhid poddli, ani tea ratik pasun kainch vaitt zaunk na.

Zaitea vorsam uprant, tea odhivexona vixim ugddas kortana mhaka kollon ailem ki mummy-k tea vellar kosloch usko zaunk na vo tika bhirant disonk na. Tinnem Jehovacher ani tache songottnnecher purnn visvas dovorlolo. Tinnem dovorloli bori dekh hanv kednanch visorchona!

Odhivexonachea thoddea vella poilim mummy-n niemit pioneer seva suru kelʼli. Tor purnn vellachea seve vixim aslolim bhaxonnam tinnem dhean diun aikolim. Odhivexona thaun ami ghora ietalim tednam tinnem mhunnttlem: “Mhaka pioneer seva chaluch dovrunk zai. Punn pioneer seva korchea sangata, ghoracho-i bore toren samball korunk mhaka kotthin zata.” Tea pasot ami tika modot korunk toiar astolim kai mhunn tinnem vicharlem. Ami hoi mhunnttlem. Tor tinnem amchea modlea dor ekleak, breakfast-a poilim ek vo don rum nitoll korunk sanglem. Ami iskolak gelea uprant, ghor nitoll asa kai na tem ti polloitali ani magir sevek voitali. Ti khub bizi asli. Torui ti amkam sogleank vell ditali. Ami donparam jevnna vellar ani iskol zalea uprant ghora ietalim tednam, ti sodanch ghora astali. Ghora ailea uprant thodde pavtti ami tichea sangata porgottnnek voitalim. Oxem kelʼlean, pioneer seva korop mhunnttlear kitem tem ami somzonk pavlim.

Hanv 16 vorsancho aslo tednam hanvem pioneer seva suru keli. Tea vellar mhozo daddy Sakxi naslo.  Torui, mhoji seva koxi cholta mhunn to zannam zaunk sodhtalo. Ek dis sanjechea vellar hanvem taka sanglem ki zaito proitn korun pasun mhaka ekui Bible obheas mellonk na. Uprant hanvem taka vicharlem: “Tum mhojea sangata Bible obheas kortolo?” Tannem thoddo vell ravon oxem mhunnttlem: “Tuka na mhunnonk mhaka koslench karonn na.” Hoi, mhozo poilo Bible vidʼdhearthi mhozo daddy aslo. Ani ho mhaka ek vhodd sueog zaun aslo!

Ami “The Truth Shall Make You Free” hea pustokantlean obheas kelo. Vell soron gelo toso mhaka kollon ailem ki mhozo daddy mhaka ek boro Bible-acho vidʼdhearthi ani xikoupi zaunk modot kortalo. Udharonnak, ek dis sanjechea vellar ek peregraf vachlea uprant mhojea daddy-n mhaka vicharlem: “Hem pustokant boroilʼlem asa mhunn hanv zannam, punn hem sarkem mhunn tum koso zannam?” Tea vellar hanv taka zobab diunk toiar naslom. Tor hanvem taka sanglem: “Sodʼdheak mhoje lagim zobab na. Punn amchea fuddlea obheasa vellar hanv tuka hacho zobab ditolom.” Ani hanvem toxench kelem. Ami uloitale to mudʼdo sarko asa mhunn purave ditat toslim versam hanvem sodhlim. Ani tea uprant, hanv Bible obheasa pasot anikui bori toiari korunk laglom ani hanv sodh korunk xiklom. Oxem kelʼlean hanv Bible-acho ek boro vidʼdhearthi zaunk pavlom ani mhojea daddy-kui modot zali. Apunn xiktalo tem tannem apnnailem ani 1952-ant tannem bautizm ghetlo.

17 vorsanche piraier hanv kuxin ravonk laglom. Jetha a mixinori seva korunk gelem ani Don Bethel-ant seva korunk gelo. Tanchi seva tankam khub avoddttali. Tem polloun mhaka-i khub urba mellʼlli. Tor hanvem Bethel-ant seva korunk toxench Gilead Korsa pasot fom bhorlem, ani urlolem soglem Jehovachea hatant soddlem. Uprant 1946-ant mhaka Bethel-ant apoilo.

Vorsam gelim toxim, hanvem Bethel-ant zaitim kamam kelim ani hanv zaiteo noveo vostu xiklom. Bethel-ant seva korun mhaka 75 vorsam zalim. Thoim mhaka novim pustokam koxim korchim ani accounting koxem korchem tem xikonk mellʼllem. Toxench Bethel-ant vostu koxeo vikteo gheuncheo ani mhotvacheo vostu koxeo dusrea zagear dhaddcheo tem-ui mhaka xikonk mellʼllem. Punn Bethel-ant mhaka sokallchi bhokti ani Bible adarit bhaxonnam vorvim ji xikounn melltta, ti mhaka chodd avoddtta.

Toxench hanv mhozo dhaktto bhav Karl-a thaunui xiklom. To 1947-ant Bethel-ant ailo. To Bible-acho ekdom boro vidʼdhearthi ani xikoupi aslo. Eka vellar mhaka bhaxonn diunchem aslem tednam hanvem tachi modot ghetli. Mhojea bhaxonna pasot hanvem zaiti mahiti ektthaim kelea ani ti koxi uzar korop tem mhaka kollona mhunn hanvem taka sanglem. Punn tannem mhaka ekuch prosn vicharlo: “Joel,  tujea bhaxonnacho vixoi kitem?” Tea vellar mhaka rokddench kollon ailem ki mhojea vixoi-ak zuddloli asa tich mahiti hanvem uzar korunk zai. Ani hem lisanv hanv kednanch visronk na!

Bethel-ant seva kortana ami khuxal asonk zai zalear ami urben porgottnni korunk zai. Oxem kelear amkam zaite bore onnbhov mellttat. Osloch ek onnbhov mhunnttlear, ek pavtti hanv ani ek bhav New York xarant eke bailek bhett diunk gele. Tinnem adim Pahrogopur ani Zagrut Ravat! masikam ghetlolim. Ami tika mellʼlle tednam tika mhunnttlem: “Hea sanjer ami sogleank mellon Bible-ant asloleo boreo vostu zannam zaunk tankam modot kortat.” Tinnem mhunnttlem: “Hoi? Bible-ant aslolem sangtat zalear bhitor ieiat.” Tor Devachem Raj ani novea sonvsara vixim aslolim zaitim versam vachun ami tea vixim uloilim. Tika tem khub avoddlem ani fuddlea sumanak tinnem aplea zaitea ixttankui apoun haddlim. Uprant ti ani ticho ghov Sakxi zalim.

Hanv kazar zatolom mhunn hanvem chintlem ani 10 vorsam uprant mhaka ek borem kazari sangati mellʼllem. Ek borem sangati mellonk hanvem Jehova lagim magnnem kelem ani hea prosna vixim chintlem: ‘Kazar zalea uprant ami sangata mellon kitem korunk sodhtat?’

Uprant 1953-ant Yankee Stadium-ant odhivexon zalem tea vellar, mhaka Mary Aniol nanvachi ek bhoinn mellʼlli. Mary ani Jetha Gilead-achea dusrea korsak sangata hajir zalʼlim ani tim ekach zagear mixinori mhunn seva kortalim. Mary-n mhaka urben Caribbean-ant tachi seva koxi choltali ani taka mellʼllolea Bible obheasam vixim sanglem. Ami eka-mekak zannam zalim toxim, amkam dogainkui Jehovache sevent ek-sarke dhei asat mhunn kollon ailem. Uprant ami mogant poddlim ani Abril 1955-ant kazar zalim. Mary Jehova koddlean mhaka ek dennem zaun aslem. Toxench, tannem mhaka ek bori dekh dovorli. Jehovache sevent taka mellʼllolem khoinchem-i kam korunk tem khuxal aslem. Tem khub mhenoti aslem, taka dusreanchi khorench kallji asli ani tannem Devachem Raj aplea jivitant sodanch poilem dovorlem. (Mt. 6:33) Ami tin vorsam sorkittachem kam kelem ani 1958-ant amkam Bethel-ant seva korunk apoilim.

Hanv Mary koddlean zaitem xiklom. Udharonnak, kazar zalea uprant rokddench ami sangata mellon Bible vachop korunk tharailem. Ami dor ek pavtt sumar 15 versam tori vachtalim. Uprant, tantunt kitem sanglam ani tem ami amchea jivitant koxem apnnaunk zata tea vixim ami uloitalim. Mary mhaka zaite pavtti tem Gilead korsak vo mixinori seva kortana kitem xiklem tem sangtalem. Oxem kelʼlean mhaka anikui zannvai mellʼlli. Hea vorvim hanv anik borim bhaxonnam toiar korunk pavlom ani bhoinnank bore toren koxi urba diunchi tem hanv xiklom.—Mho. 25:11.

2013-nt mhojem mogall Mary bhair poddlem. Novea sonvsarant taka pollounk hanv axeun asam. Punn tea mhunnosor, Jehova koddlean xikonk ani purnn kallzan tacher visvas dovrunk hanvem nichov kela. (Mho. 3:5, 6) Devache lok novea sonvsarant kitem kortole tea vixim chintlolean mhaka khuxalkai ani bhuzvonn melltta. Tea vellar, ami amchea Vhodd Xikoupea koddlean ani tache vixim zaiteo noveo vostu xiktolim. Khorench, Jehovan mhaka aiz meren jem xikoilam ani jea toren tannem mhaka favo nasloli doia dakhoilea, tea pasot hanv purnn toren tache upkar kednanch attounk pavchonam!