1. Bible kallar unddo kitlo mhotvacho aslo?

 BIBLE kallar zaitea zannanchem jevonn mhunnttlear unddo zaun aslo. (Ut. 14:18; Luk. 4:4) Unddo tankam itlo mhotvacho aslo ki Bible-ant jevnnache bodlek “unddo” hem utor uzar kelʼlem asa. (Mt. 6:11) Jezun kelʼlea don famad vizmitamnim tannem unddo uzar kelo. (Mt. 16:9, 10) Hantuntlem ek vizmit amkam Juanv odheai 6-ant vachunk melltta. Tor hea vizmita thaun aiz ami koslim lisanvam xikonk zatat tem atam polloum-ia.

2. Hozaramnim lokank jevnnachi goroz kednam poddli?

² Jezuchea apostlamnim porgottnni kelea uprant Jezu tankam vhoddeant Galiliecho Doria par korun, Bethsaida xarant konnuch na toslea eka zagear gheun gelo. Karonn tankam visov gheunk mellttolo aslo. (Mk. 6:7, 30-32; Luk. 9:10) Punn Jezu thoim asa mhunn lokamnim aikolea uprant, hozaramnim lok taka rokddoch mellonk ailo. Hea vellar Jezun tanchi beporva korunk na. Punn to tanchea sangata doiall toren vaglo. Tannem tankam Devachea Rajea vixim xikoilem ani duentank borim kelim. Punn sanz zali dekhun, itlea lokank jevonn koxem mellttolem mhunn Jezuchea xisank usko zalo. Tanchea modlea thoddeam lagim thoddem jevonn aslem astolem, punn choddxea zannank ganvant vochon jevonn viktem gheunk poddttolem aslem. (Mt. 14:15; Ju. 6:4, 5) Tor atam Jezu kitem kortolo aslo?

JEZUN VIZMIT KORUN LOKANK UNDDO DILO

3. Jezun aplea apostlank kitem sanglem? ( Chitr pasun polloiat.)

³ Jezun aplea apostlank oxem sanglem: “Tankam vochpachi  goroz na; tuminch tankam kitem-i khaunk diat.” (Mt. 14:16) Punn oxem zaunkuch xokonaslem! Karonn thoim aslole dadlech sumar 5,000 asle. Ani bail-bhurgeank mezlear sogle mellon thoim ghoddie 15,000 lok asle zait. (Mt. 14:21) Tednam Andren Jezuk mhunnttlem: “Hanga ek lhan cheddo asa, tachea lagim panch undde ani don nustim asat. Punn hanga ektthaim zalʼlea itlea vhoddlea lokanchea zomeak itlench koxem pavtolem?” (Ju. 6:9) Bible kallar zovariche undde lokanchem sodanchem jevonn aslem. Ani tea lhan bhurgea lagim aslolem nustem mitt lavun sukoilʼlem zait. Tori astana, tachea lagim aslolem jevonn itlea lokank koxem pavtolem aslem?

4. Juanv 6:11-13-ntlean ami kitem xikonk zata? (Chitram pasun polloiat.)

⁴ Jezuk thoim aslolea lokancho poramos korunk zai aslo dekhun, tannem soglea lokank lhan-lhan zome korun tonnacher bosonk sanglem. (Mk. 6:39, 40; Juanv 6:11-13 vachat.) Uprant tannem unddeam ani nusteam pasot Devache upkar attoile. Oxem korun tem jevonn Jehovanuch dilam mhunn tannem dakhoun dilem. Jezun amchea pasot kitlem borem udharonn dovorlam nhoi! Ami ekttim asum vo amchea bhonvtonnim lok asum, jevnna poilim ami magnnem korop khub mhotvachem zaun asa. Uprant Jezun aplea xisank jevonn vanttunk sanglem ani soglo lok pottbhor jevlo. Tori astana, thoim bhorpur jevonn urlolem. Tor tem jevonn ghoddie fuddle pavtti jevunk Jezun tem aplea xisank ektthaim korunk sanglem. Oxem korun tannem jevonn ibadd zaunk diunk na. Amchea lagim asat teo vostu piddʼddear korina zaunk Jezun amkam ek borem udharonn dovorlam. Tumi avoi-bapui zalear, Jezuchem hem udharonn uzar korun jevnna poilim  magnnem korop, dusreancho poramos korop ani udar kallzachim zavop, hea vixim tumi tumchea bhurgeank mhotvachim lisanvam xikounk zatat.

5. Tea disa Jezun kelʼlim vizmitam polloun lok kitem korunk sodhtalo, punn Jezun kitem kelem?

⁵ Jezu jea toren xikoitalo ani vizmitam kortalo tem polloun lok ojap zatale. Jehova tanchea modlo ek khas provadi upzoitolo mhunn tannem Moizesa vorvim sanglolem tem tim zannam aslim. Tor ho provadi Jezuch kai mhunn tim chintunk laglim. (D.S. 18:15-18) Toxench tim chintʼtalim ki Jezu raza zalo zalear kitlem borem zatolem aslem! Karonn to Izraelantlea sogleank unddo diunk xoktalo. Tea pasot te ‘taka dhorun raza korunk sodhtale.’ (Ju. 6:14, 15) Punn Jezu raza zalʼlo zalear, to Romi sorkara khala aslolea Judevanchea rajkaronnant bhag gheta oxem zatolem aslem. Punn tannem toxem korunk na. Bible amkam sangta ki “to ekttoch . . . dongrar gelo.” Tor apleacher dusreancho dobhav aslear pasun, rajkaronnant bhag ghenastana Jezun amkam ek ekdom borem udharonn dovorlam.

6. Ami Jezuchi dekh koxi gheunk zata? (Chitr pasun polloiat.)

⁶ Amkam konnui vizmitam korunk launchona vo raxttracho fuddari korchona tem khorem. Punn ek umkoch munis boreponn haddunk xokta oxem tankam dista zalear, tea munxak vote ghalunk vo taka tenko diunk tim amcher dobhav ghalunk xoktat. Punn oslea vellar ami Jezuchem udharonn ghott monant dovrunk zai. Tannem rajkaronnant bhag gheunk saf nakarlem.  Ani uprant oxem pasun mhunnttlem: “Mhojem Raj hea sonvsarantlem nhoi.” (Ju. 17:14; 18:36) Ami Kristanvamnim Jezuchem chintop apnnaunk zai ani tachi dekh gheunk zai. Tachea bhaxen ami visvaxiponnan fokot Jehovachea Rajeak tenko ditat, tea Rajea vixim dusreank porgottʼttat ani tem Raj ieum mhunn magnnem kortat. (Mt. 6:10) Atam ami porot Jezun kelʼlea unddeachea vizmitacher dhean dium-ia ani ami anik kitem xikonk zata tem polloum-ia.

‘UNDDEACHEA VIZMITACHO ORTH’

7. Jezun koslem vizmit kelem, ani tem polloun apostlamnim kitem kelem? (Juanv 6:16-20)

⁷ Jezun tea zomeak jevonn dilea uprant, tannem aplea xisank vhoddear boson Kapernaumant dhaddle ani to apunn dongrar ekttoch gelo. Karonn lokamnim apleak raza kelʼlo taka naka aslem. (Juanv 6:16-20 vachat.) Punn apostl vhoddeant astana, okosmat ek bhirankull vadoll ailem ani vhoddlim-vhoddlim lharam marunk laglim. Tea vellar Jezu udkacher cholon tanchea lagim ailo ani tannem apostl Pedruk pasun toxench korunk sanglem. (Mt. 14:22-31) Punn Jezu vhoddear boslea uprant tem vadoll thamblem. Hem polloun xisamnim mhunnttlem: “Khorench tum Devacho Put.” a (Mt. 14:33) Hem kitlem ojapachem ki Jezun vizmit korun unddo dilo tednam nhoi, punn to udkacher cholʼlea uprant xisamnim hem vollkhon ghetlem. Hea ghoddnne vixim Marku kitem sangta tacher dhean diat. Tannem mhunnttlem: “[Apostl] khub ojap zale, karonn unddeachem vizmit polloun pasun jem tankam kollonk zai aslem tem tankam kollonk na. Tanchem mon tacho orth somzonk pavlem na.” (Mk. 6:50-52) Tor Jehovan Jezuk fokot unddeachem vizmituch nhoi, punn anikui zaitim vhoddlim-vhoddlim kamam korunk xokti dilea mhunn te somzonk nasle. Uprant Jezu rokddoch tanchea lagim unddeachea vizmita vixim porot ulounk laglo, zantuntlean ami anik ek lisanv xikonk zata.

8-9. Lok Jezuk kiteak sodhunk ailʼlo? (Juanv 6:26, 27)

⁸ Jezun vizmit korun jea zagear lokank jevonn dilʼlem te lok dusrea disa teach zagear Jezuk sodhunk aile. Punn Jezu, toxench tache apostl thoim nant mhunn tankam kollʼllem. Tor tea zagear Tiberiasa thaun ailolea thoddea vhoddeancher boson te taka sodhunk Kapernaumant gele. (Ju. 6:22-24) Tankam Devachea Rajea vixim anik zannam zaunk zai aslem dekhun tannim oxem kelem kai? Na. Khorem mhunnttlear, tankam Jezu koddlean anik unddo zai aslo. Hem ami koxem zannant?

⁹ Tim Jezuk Kapernaumant mellʼllim tednam kitem ghoddlem tacher dhean diat. Tannim vizmitam polloilʼlim dekhun nhoi, punn tannim “pottbhor undde khalʼle” dekhun tim apleak sodhunk aileant mhunn Jezun tankam ukteponnim sanglem. Tor tanchem dhean ‘piddʼddear zata toslea jevnnacher’ asa mhunn Jezuk kollʼllem. Ani hea pasot tannem tankam “sasnachem jivit dita toslea jevnnak lagon vavr korat” mhunn urba dili. (Juanv 6:26, 27 vachat.) Ani hem jevonn aplo Bap ditolo mhunn Jezun sanglem. Hem jevonn koslem kai mhunn tim chintunk poddlim astolim. Tor tankam koslem jevonn sasnik jivit diunk xoktalem ani tankam tem koxem mellttolem aslem?

10. “Sasnachem jivit mellonk” Judevamnim kitem korunk zai aslem?

¹⁰ Jezu hea jevnna vixim uloilo tednam, Moizesa udexim dilʼlea Kaideantlim “kamam” thoddea Judevanchea monant ailim astolim. Tannim him kamam kelear tankam sasnik jivit mellonk xokta oxem tannim chintlem zait. Punn Jezun tankam sanglem: “Devachi maniotai zai zalear tannem zaka dhaddla tacher bhavarth dovrat.” (Ju. 6:28, 29) Tor “sasnachem jivit mellonk” Devachea prothinidicher  bhavarth dovrop gorjecho. Hea vixim Jezun tankam poilim pasun sanglolem. (Ju. 3:16-18, 36) Ani to tanchea lagim hea vixim uprant pasun uloilo.—Ju. 17:3.

11. Judevanchem dhean fokot jevnnacher aslem mhunn amkam koxem kolltta? (Stotr 78:24, 25)

¹¹ Judevamnim Jezucher bhavarth dovrunk zai mhunn manun gheunk te toiar nasle. Boltench zalear tannim Jezuk vicharlem: “Tum koslem vizmit korun dakhouncho asa, jem polloun ami tujer bhavarth dovortole?” (Ju. 6:30) Uprant, tanchea purvozank Moizesachea kallar mellʼllolea manʼna vixim te ulounk lagle, jem tanchem dispottʼttem jevonn aslem. (Ne. 9:15; Stotr 78:24, 25 vachat.) Tor hantuntlean amkam kolltta ki tanchem mon fokot jevnnacher aslem. Toxench uprant, Jezu tanchea lagim Jehovan ‘sorgar thaun dilʼlea khorea unddea’ vixim uloilo. (Ju. 6:32) Ho unddo manʼna bhaxen naslo, karonn hea unddea vorvim tankam sasnachem jivit mellonk xoktalem. Punn ho unddo kitem tem zannam zauncho proitn pasun tannim korunk na. Tanchem soglem dhean fokot jevnnacher aslem. Ani sasnachem jivit mellonk tannim kitem korunk zai aslem tea vixim Jezu tankam jem xikoitalo tem tim aikonaslim. Hantuntlean ami kitem xiktat?

AMKAM KITEM CHODD MHOTVACHEM ASONK ZAI?

12. Amkam kitem chodd mhotvachem asonk zai mhunn Jezun dakhoilem?

¹² Juanv odheai 6-antlean ami ek mhotvachem lisanv xiktat. Tem mhunnttlear, Jehovachem aikop ani tachea sangata ek ghott ixttagot asop khub gorjechem zaun asa. Soitanan Jezucher tallnni haddli tednam jevnna poros Jehovachem aikop chodd mhotvachem mhunn Jezun dakhoilem. (Mt. 4:3, 4) Toxench Dongrar Dilʼlea Xikounnent, Jehova sangata ghott sombond asop kitlem gorjechem tem Jezun xikoilem. (Mt. 5:3) Tor ami amkanch vicharunk zata: ‘Jea toren hanv mhojem jivit jietam, tantuntlean mhojea itsam poros Jehova sangata aslolea mhojea ixttagotik hanv chodd valor ditam mhunn dison ieta kai?’

13. (a) Jevonn jevun khuxal zavop chukichem kiteak nhoi? (b) Apostl Pauluchea utrantlean amkam kosli xittkaunni melltta? (1 Korintkarank 10:6, 7, 11)

¹³ Ami jevnna pasot magnnem korop ani jevonn jevun khuxal zavop vaitt nhoi tem khorem. (Luk. 11:3) Karonn Bible sangta: “Apnnem zoddllam tachem foll khavop pievop ani khuxal ravop, hachea poros anink kainch borem na. Hem-i Devachea hatantlem ieta.” (Up. 2:24; 8:15; Jak. 1:17) Torui, hea vostunk ami chodd mhotv dina zaunk chotrai dovrunk zai. Apostl Paulun pasun Kristanvank hea vixim xittkaunni dilʼli. Tannem tankam oronnʼnneant aslolea Izraelitkarancho ugddas kelʼlo ani mhunnttlolem: “Tannim vaitt vostunchi axa dhorli toxi ami dhorchi nhoi.” (1 Korintkarank 10:6, 7, 11 vachat.) Jehovan vizmit korun Izraelitkarank manʼna dilʼlem. Punn Izraelitkaram itlim axechim zalim ki tench manʼna tankam eka orthan ‘vaitt vost’ koxi zaunk pavli. (Lok. 11:4-6, 31-34) Tea bhair tim bhangrachea paddkuleachi bhokti korunk laglim tednam, tim jevunk ani pieunk boslim ani uprant mouza korunk laglim. Tor Jehovachi adnea pallchea bodlek, heo vostu tankam chodd mhotvacheo asleo mhunn tannim dakhoilem. (Sutt. 32:4-6) Apostl Paulun Kristanvank hea vostum vixim xittkailem tednam Jeruzalem xaracho ani tachea mondiracho beginuch, tem mhunnttlear 70 K.X.-ant nas zauncho aslo. Aiz ami pasun hea noxttea sonvsaracho xevott ekdom lagim pavla toslea kallar jietat. Tor apostl Paulun dilʼlea xittkaunnek ami dhean divop khub gorjechem.

14. Novea sonvsarant jevnna vixim Bible-ant kitem bhasailam?

¹⁴ “Aichea disa pasot amkam unddo di” mhunn Jezun magonk xikoilem tednam Devachi khuxi “sorgar zata, toxi sonvsarant zaum” mhunn pasun tannem amkam magonk sanglem. (Mt. 6:9-11) Hem aikon tumchea monant  koslem chitr ieta? Bible amkam dakhoita ki sogleank borem jevonn mellʼllolem Devachi khuxi zaun asa. Izaias 25:6-8-antlean, Devachea Rajeant bhorpur ruchichem jevonn astolem mhunn amkam kolltta. Toxench, Stotr 72:16 sangta: “Porvotanche tengxe meren subhamponnan desant piktolo dhanno.” Tor tumi hea vella pasot axeun asat kai, jednam tumi tumchem avddichem jevonn randtolim ani noveo-noveo recipe try kortolim, toxench tumi tumche drakxanche molle roitolim ani drakxam khatolim? (Iz. 65:21, 22) Ani tumchea sangata, prithumer aslolim soglim him besanvam onnbhovtolim.

15. Novea sonvsarant jivont zatolea lokank kitem xikonk mellttolem? (Juanv 6:35)

¹⁵ Juanv 6:35 vachat. Jezun jea lokank unddo ani nustem dilʼlem tanche vixim portun chintat. Tanchea modlea zaitea zannamnim Jezucher bhavarth dovrunk na. Punn tim ghoddie jivontponnant portun ietolim ani tantuntlim thoddim zannam amkam mellot. (Ju. 5:28, 29) Punn Jezun mhunnttlolea hea utrancho orth tannim xikonk zai. Jezun mhunnttlolem: “Hanv jivit ditam toslo unddo. Zo mhojea lagim ieta taka porot kednanch bhuk lagchina.” Tor tannim soddvonnecher bhavarth dovrunk poddttolo. Khorem mhunnttlear novea sonvsarant jivont zatolea lokank ani thoim zolmotolea bhurgeank Jehova vixim ani tachea udʼdhexa vixim xikounn mellttoli. Oslea lokank xikounk amkam khub khuxalkai bhogtoli. Ani hi khuxalkai, thoim jevonn jevun mellttolea khuxalkaie poros chodd astoli!

16. Ami fuddlea lekhant kitem polloitolim?

¹⁶ Hea lekhant, Juanv odheai 6-acho thoddo bhag ami polloilo. Punn Jezun ‘sasnachea jivita’ vixim anik zaitem xikoilem. Tachem aikotale tea Judevamnim to jem sangtalo tacher bariksannen dhean diunk zai aslem ani ami pasun toxench korunk zai. Tor Juanv odheai 6-achea urlolea bhagant kitem sanglam tem ami fuddlea lekhant polloum-ia.