OBHEASACHO LEKH 49
GIT 147 Sasnachem Jivit Bhasailam
Sasnachem Jivit Mellonk Tumi Kitem Korunk Zai?
“Zo konn Putak vollkhon tacher bhavarth dovorta taka sasnachem jivit mellchem.”—JU. 6:40.
MUKHEL MUDʼDO
Jezuchea bolidanak lagon makhloleank toxench dusrea menddrank koso faido zata tem ami hea lekhant polloitolim.
1. Munis sasnak jieunkuch xokona oxem zaitea lokank kiteak dista?
AIZ zaito lok apli bholaiki samballunk borem jevonn jevtat ani sodanch exercise kortat. Punn hem soglem korunui ek-na-ek dis tim zannttim zatolim ani mortolim mhunn tankam khobor asa. Khorem mhunnttlear, munis sasnak jieunkuch xokona oxem tankam dista. Punn Juanv 3:16 ani 5:24-ant, munxank “sasnachem jivit” mellonk xokta oxem Jezun sanglem.
2. Juanv odheai 6-ant sasnik jivita vixim kitem sanglam? (Juanv 6:39, 40)
2 Jezun vizmit korun hozaramnim lokank unddo ani nustem dilem. a Hem kitlem ojapachem aslem! Punn dusrea disa, Jezuk Galiliechea doria lagim Kapernaumant mellonk ailʼlea lokank tannem jem sanglem tem anikui chodd ojapachem aslem. Tannem tankam melolim jivont zatolim ani tankam sasnak jieunk sondhi mellttoli mhunn sanglem. (Juanv 6:39, 40 vachat.) Hem monant dovrun, mornnant sanddlolea tumchea ixttam ani mogacheam vixim chintat. Jezuchea utrantlean kolltta ki meleant tim zaitim zannam jivont zatolim. Ani tumi, toxench tumchim mogachim sasnak khuxalkaien jieunk xoktat! Punn Juanv odheai 6-ant Jezun fuddem kitem mhunnttlem tem tea kalla voilea lokank somzonk kotthin zalem, ani aizui toxench zata. Tor Jezun kitem mhunnttlem?
3. Juanv 6:51-ant Jezun aplea vixim kitem sanglem?
3 Jezun vizmit korun tea lokank unddo dilo tednam, Jehovan adlea kallar oronnʼnneant aslolea tanchea purvozank vizmit korun manʼna dilʼlem tea vixim tankam ugddas ailo astolo. Bible-ant manʼnak ‘sorgincho unddo’ mhunnttla. (St. 105:40; Ju. 6:31) Tor Jezu tea lokank manʼna vixim sangon kitem tori mhotvachem xikounk sodhtalo. Tem mhunnttlear, Devan vizmit korun sorgar thaun dilʼlem manʼna khailea uprant pasun to lok melo. (Ju. 6:49) Punn aplea vixim sangtana, Jezun tankam mhunnttlem ki to ‘sorgar thaun dilʼlo khoro unddo,’ “Devacho unddo” ani ‘jivit dita toslo unddo’ zaun asa. (Ju. 6:32, 33, 35) Tor manʼna ani aplea modem ek vhoddlo ontor aslo mhunn Jezun tankam somzailem. Tannem mhunnttlem: “Sorgar thaun denvon ailolo jivo unddo hanvuch. Zo ho unddo khata to sasnak jietolo.” (Juanv 6:51 vachat.) Hem aikon te Judev chintunk poddle. Apunn sorgar thaun denvon ailolo “unddo” ani Jehovan tanchea purvozank dilolea manʼna poros odik boro oxem Jezu koso mhunnonk xokta? Hea vixim Jezun uprant oxem mhunnttlem: “Hanv ditolom to unddo mhunnttlear mhoji kudd.” Hacho orth kitem aslo? Ami hem zannam zavop ekdom gorjechem. Karonn hea vorvim amkam toxench amchea mogacheank sasnik jivit koxem mellonk xokta tem ami zannam zaunk pavtat. Tor atam ami Jezuchea utrancho orth zannam zaum-ia.
JIVO UNDDO ANI TACHI KUDD
4. Jezuchim utram aikon thoddim kiteak thottaklim?
4 ‘Sonvsarak jivit mellchem mhunn to apli kudd ditolo’ oxem Jezun sanglem. Thoim aslolea lokank dislem astolem ki Jezu tankam aplem mas khaunk dita mhunn. (Ju. 6:52) Punn uprant Jezun kitem mhunnttlem tem aikon tim samkinch thottaklim. Jezun mhunnttlem: “Jea meren tumi munxachea Putachem mas khainant ani tachem rogot pienant, tea meren tumkam jivit mellchem na.”—Ju. 6:53.
5. Jezun lokank khoreaninch aplem rogot pieunk sangonk na mhunn ami khatren kiteak sangonk xoktat?
5 Noah-chea kallar, Jehovan munxank rogot khainakat mhunn sanglolem. (Ut. 9:3, 4) Toxench uprant Izraelitkarank pasun rogot khainakat mhunn tannem Kaido dilʼlo. Ani jim konn rogot khatalim tim ‘Devache porje bhair poddttolim aslim,’ mhunnche tankam mornnachi xikxa favo zatoli asli. (Lev. 7:27) Ani Jezu, Judevank Devan dilʼle sogle Kaide pallunk xikoitalo. (Mt. 5:17-19) Tor to khoreaninch tankam aplem mas khaunk ani rogot pieunk sangtolo oxem zaunkuch xokonaslem. Khorem mhunnttlear, hea utram vorvim “sasnachem jivit” mellonk tannim kitem korunk zai aslem tem to tankam xikounk sodhtalo.—Ju. 6:54.
6. Jezun Juanv 6:53-ant mhunnttlolea utramnim ek udharonn uzar kelʼlem oxem ami kiteak mhunnonk zata?
6 Jezu tea zomea lagim uloitalo tednam tannem fokot ek udharonn uzar kelʼlem. Oxem ami kiteak mhunnonk zata? To adim Samarieche baile lagim uloilo tednam pasun tannem ek udharonn uzar kelʼlem. Tannem tika mhunnttlolem: “Zo konn hanv ditam tem udok pietolo taka porot kednanch tan lagchina. Jem udok hanv taka ditolom tem tachea bhitor zhor koxi zatoli ani sasnachem jivit diunk vhanvot ravtoli.” (Ju. 4:7, 14) b Tor ti bail umkeach eke baim-chem udok pielear tika sasnik jivit mellttolem oxem Jezu tika sangonk sodhinaslo. Teach bhaxen, to Kapernaumant uloitolea lokanchea zomean khoreaninch tachem mas khalear ani rogot pielear tankam sasnik jivit mellttolem oxem Jezu sangonk sodhinaslo.
DON GHODDNNEAM MODEM ASLOLO ONTOR
7. Jezun Juanv 6:53-ant mhunnttlolea utrank lagon thoddim zannam kitem sangtat?
7 Jezun Juanv 6:53-ant jim utram mhunnttlolim, ani tannem uprant Somiachea Sanjechea Jevnnak jem kitem mhunnttlem tem ek-sarkench aslem. (Mt. 26:26-28) Tea pasot thodde dhormik lok sangtat ki Somiachea Sanjechea Jevnnak hajir zatat tea sogleamnim unddo khaunk zai ani drakxancho soro pieunk zai. Tim sangtat tem sarkem vo na tem ami zannam zavop ekdom gorjechem. Karonn dor vorsa sonvsarbhor lakʼkhamnim lok Jezuchea mornnachea Ugddas Disak hajir zatat. Tor atam ami Juanv 6:53-ant ani Somiachea Sanjechea Jevnnak Jezun jem mhunnttlolem tachea modem kitem ontor asa tem polloum-ia.
8. Hea donui ghoddnneam modem kitem ontor asa? (Chitram pasun polloiat.)
8 Poilem mhunnttlear, Juanv 6:53-56-ant mhunnttlolim utram Jezun kednam ani khoim mhunnttlim? Tannem him utram 32 K.X.-ant Galilient aslolea Judevank mhunnttlim. Ani hi ghoddnni zaun eka vorsa uprant tannem Jeruzalemant Somiachem Sanjechem Jevonn stapon kelem. Dusrem mhunnttlear, tannem him utram konnank mhunnttlim? Hea zomeant hajir aslolea choddxea Judevank Jehova vo tachea Rajeachea bodlek jevnnachem chodd poddlolem aslem. (Ju. 6:26) Khorem mhunnttlear, Jezun sangloleo thoddeo vostu tankam somzonk nant tednam Jezucher tancho bhavarth halʼlo ani te taka soddun gele. Tantuntle thodde Jezuche xis pasun asle. (Ju. 6:14, 36, 42, 60, 64, 66) Punn uprant Somiachea Sanjechea Jevnna vellar poristhiti veglli asli. Karonn hea vellar Jezu sangata tache 11 visvaxi apostl asle. Jezucheo umkeoch xikounneo tankam somzonk nasleo zalear pasun, Jezu sorgar thaun ailʼlo Devacho Put mhunn tankam khatri asli. (Mt. 16:16) Tea pasot Jezun tankam xabaski diun oxem mhunnttlem: “Tumi mhojea koxttanchea vellar mhojea sangata ravleat.” (Luk. 22:28) Tor hea don karonnam vorvim Jezun Juanv 6:53-ant mhunnttlolim utram Somiachea Sanjechea Jevnnak lagu zainant mhunn ami mhunnonk zata. Punn oxem mhunnonk anikui karonnam asat.
Juanv odheai 6-ant Jezu Galilient aslolea Judevanchea vhoddlea zomea lagim uloita (davean). Eka vorsa uprant to aplea 11 visvaxi apostlam lagim uloita (uzvean) (Peregraf 8 polloiat)
JEZUN MHUNNTTLOLEA UTRAM THAUN AMKAM FAIDO ZATA
9. Somiachea Sanjechea Jevnnak Jezun mhunnttlolim utram konnank lagu zatat?
9 Somiachem Sanjechem Jevonn stapon kelem tednam, Jezun khomir naslolo unddo gheun aplea apostlank dilo ani to aplea kuddik suchit korta mhunn sanglem. Toxench tannem tankam soro diun to ‘korarachea rogtak’ suchit korta mhunn sanglem. (Mk. 14:22-25; Luk. 22:20; 1 Kor. 11:24) Jezun hea korara vixim jem kitem sanglem tem khub mhotvachem asa. Hea korarak tannem ‘novo korar’ mhunnttlo. Ani ho korar Jehova ani ‘Izraelacho ghorabo,’ tem mhunnttlear fokot Jezu sangata jim razvottki choloitolim tanchea modem asa. (Heb. 8:6, 10; 9:15) Tea vellar apostl tea korara vixim purnn toren somzonk nant. Punn beginuch tankam povitr xokten makhlea uprant te hea koraracho bhag zatole asle ani Jezu sangata sorgar raz choloitole asle.—Ju. 14:2, 3.
10. Jezun Somiachea Sanjechea Jevnna vellar ani Galilientlea Judevank jem kitem mhunnttlem tantunt anik koslo ontor aslo? (Chitr pasun polloiat.)
10 Jezun Somiachea Sanjechea Jevnna vellar mhunnttlolim utram fokot ‘supurlea hinddak’ lagu zatat. Hea supurlea hinddant sogleam-von poilim tache visvaxi apostl asle je tea vellar tachea sangata tea rumant asle. (Luk. 12:32) Tor te apostl toxench uprant hea zomeacho bhag zatolim tinch drakxancho soro pieunk xoktat ani unddo khaunk xoktat. Karonn fokot tankanch Jezu sangata sorgar raz cholounk sondhi asa. Tor hea donui ghoddnneamnim Jezun jem kitem mhunnttlem tantunt anik ek ontor asa mhunn ami zannam zatat. To mhunnttlear, tannem Somiachea Sanjechea Jevnna vellar apostlank mhunnttlolim utram fokot eka lhanxea zomeak lagu zatalim. Ani tannem Galilientlea Judevank mhunnttlolim utram eka vhoddlea zomeak lagu zatalim.
Ugddas Disak fokot thoddinch zannam unddo khatat ani soro pietat, punn Jezucher bhavarth dovrun sasnak jieunchi sondhi zaitea zannank asa (Peregraf 10 polloiat)
11. Galilient aslolea lokam lagim uloitana Jezun jem mhunnttlem tantuntlean to fokot thoddeach lokam vixim uloinaslo mhunn amkam koxem kolltta?
11 32 K.X.-ant Jezu jea Judevam lagim uloitalo tankam fokot jevonn zai aslem. Punn jevnna poros anik kitem tori chodd mhotvachem asa mhunn Jezu tankam sangonk sodhtalo. Tem mhunnttlear, tankam sasnachem jivit mellonk xoktalem. Toxench jim konn meleant, tim pasun nimannea disa jivont zaunk ani sasnak jieunk xoktolim mhunn Jezun sanglem. Somiachea Sanjechea Jevnna vellar Jezu fokot thoddeach lokam vixim uloilo toso, hea vellar to ulounk na. Punn Galilient Jezun mhunnttlolim utram soglea lokank lagu zatalim. Khorem mhunnttlear tannem mhunnttlem: “Zo ho unddo khata to sasnak jietolo . . . hanv ditolom to unddo mhunnttlear mhoji kudd, sonvsarak jivit mellchem mhunn hanv ti ditolom.”—Ju. 6:51. c
12. Sasnachem jivit mellonk ami kitem korunk zai?
12 Tor hea sonvsarant jietolea soglea lokank sasnachem jivit mellttolem mhunn Jezun sanglolem kai? Na. Punn zo “ho unddo khata,” tem mhunnttlear Jezucher bhavarth dovorta, fokot takach sasnachem jivit mellttolem. Aiz zaito lok apunn Jezucher patietat mhunn sangtat ani taka aplo soddvonndar mhunnttat. (Ju. 6:29) Punn itlench kelear puro nhoi. Karonn Galilient aslolea lokamnim pasun Jezucher poilim bhavarth dovorlolo, punn uprant te taka soddun gele. Kiteak?
13. Jezuchim khorim pattlavdaram zaunk kitem korop gorjechem?
13 Hea Judevam modlim choddxim zannam tankam jem zai te mellom poriant Jezucho pattlav korit ravlim. Jezun fokot vizmitam korun tankam bori kelʼlim, tankam funkott jevonn dilʼlem ani tankam jem aikonk borem dista tem sanglolem zai aslem. Punn Jezun tankam spoxttponnim sanglem ki to hea prithumer tankam zai tem korunk ieunk na, punn aplim khorim pattlavdaram zaunk tannim kitem korunk zai tem xikounk ailʼlo. Tor tannim Jezuchem apounnem manun tachea “lagim ieunk” zai aslem. Tem mhunnttlear, tachi xikounn manun gheunk zai asli ani to sangta tem soglem korunk zai aslem.—Ju. 5:40; 6:44.
14. Jezuchea kuddi ani rogta thaun amkam faido mellonk ami kitem korunk zai?
14 Jezun tea zomeak sanglem ki to apli kudd ani rogot bolidan mhunn bhettoun tankam sasnachea jivitachi vatt ukti kortolo mhunn. Tea lokamnim hea sotacher bhavarth dovrunk zai aslo toso ami pasun dovrunk zai. (Ju. 6:40) Juanv 6:53-ant sanglam toxem Jezuche kuddi ani rogta thaun amkam faido mellttolo zalear, tannem dilʼlea soddvonnecher ami bhavarth dovrunk zai. Ani soddvonnecher bhavarth dovrun sasnachem jivit mellchi sondhi aiz zaitea lokank asa.—Ef. 1:7.
15-16. Juanv odheai 6-ant ami koslim mhotvachim lisanvam xiklim?
15 Juanv odheai 6-ant ami zaitim mhotvachim lisanvam xiklim, jea vorvim amkam urba mellʼlli. Hantuntlean Jezuk lokanchi kitli kallji asa tem ami polloilem. Tannem duentank borim kelim, lokank Devachea Rajea vixim xikoilem ani goroz tednam tankam jevonn dilem. (Luk. 9:11; Ju. 6:2, 11, 12) Ani sogleam-von mhotvachem mhunnttlear, apunn “jivit ditam toslo unddo” mhunn tannem lokank xikoilem.—Ju. 6:35, 48.
16 Toxench Jezun sanglolim “dusrim menddram,” Ugddas Disak unddo khainant ani soro pienant ani tannim toxem korchem nhoi. (Ju. 10:16) Punn tim eka orthan ‘jivit dita toslo unddo’ khatat. Tem mhunnttlear, tim Jezuchea bolidanacher ani tachea vorvim mellttat tea besanvancher bhavarth dovortat. (Ju. 6:53) Punn Ugddas Disak jim konn unddo khatat ani soro pietat, tim apunn novea koraracho bhag zaun asat ani tankam sorgar Jezu sangata raz cholouncho bhorvonso asa mhunn tim dakhoun ditat. Tor ami makhlolim vo her menddram zaum, Juanv odheai 6-ant ami zaitim mhotvachim lisanvam xiktat. Sasnachem jivit mellonk Jezuchea soddvonnecher ghott bhavarth asop ekdom gorjechem mhunn ami xiktat.
GIT 150 Razvottki Devachi Svikar Kor
a Juanv 6:5-35-a vixim amkam fattlea lekhant sanglam.
b Jezun sanglolem udok, munxank sasnachem jivit mellonk Jehovan jem kitem kelam ani korta taka suchit korta.
