OBHEASACHO LEKH 51
GIT 3 Tunch Adar, Tunch Visvas, Tujer Bhorvonso
Tumchim Dukham Jehovak Khub Moladik
“Mhojim dukam mezun-mapun Tujea dobeant bhorun dovorleai?”—ST. 56:8.
MUKHEL MUDʼDO
Ami ekdom dukhi astat tednam amkam koxem bhogta tem Jehova ekdom bore bhaxen somzota ani to amkam goroz ti bhuzvonn koso dita tem ami hea lekhant polloitolim.
1-2. Amchea dolleamnim kiteak lagon dukham ieunk xoktat?
AMI kednam-na-kednam amchea jivitant dukham golloileant. Thodde pavtti ami khub khuxal astat tednam amchea dolleamnim dukham ietat. Udharonnak, amchea jivitant kitem tori khas ghoddlem zalear amchea dolleamnim khuxalkaiechim dukham ietat. Zoxem tumchem bhurgem zolmolem tednam, vo tumchea jivitant ghoddloli ek bori ghoddnni tumchea ugddasak aili tednam, vo tumchea eka ghott ixttak tumi zaitea tempa uprant mellʼllim tednam.
2 Punn choddxe pavtti ami khub dukhant astat ani tras sostat tednam amchea dolleamnim dukham ietat. Udharonnak, konnui amkam dukhoita tednam, eka duensak lagon amkam tras sosunk poddttat tednam vo amcho konnui mogacho bhair poddtta tednam ami dukham golloitat. Oslea poristhitimnim, Babilonkaramnim Jeruzalemacho nas kelo tednam Jeremiasak jem bhoglem toxench amkam bhogonk xokta. Tannem mhunnttlem: “Mhojea dolleantleo vhanvtat dukancheo nodi . . . thar nastana, visov nastana, mhojea dolleantlim vhanvtolim dukam!”—Vil. 3:48, 50.
3. Amchim dukham polloun Jehovak koxem bhogta? (Izaias 63:9)
3 Amkam fuddo korunk poddtta tea kotthin poristhitink lagon ami kitle pavtti dukham golloileant tem Jehova ekdom bore bhaxen zannam. Amkam tras sosche poddttat tea dor ek poristhiti vixim to zannam ani ami dukham golloun tache lagim modoti pasot vinoti kortat tednam to kan diun aikota mhunn Bible amkam khatri dita. (St. 34:15) Punn Jehova amche tras fokot polloun ani aikon vogich ravona. To amcho Bapui zaun asa ani amcho khub mog korta. Tea pasot amchim dukham polloun, taka khub dukh bhogta ani to rokddoch amkam modot korunk fuddem sorta.—Izaias 63:9 vachat.
4. Hea lekhant ami Bible-antlim konnanchim udharonnam polloitolim, ani Jehova vixim kitem xiktolim?
4 Aplea adlea sevokamnim dukham golloilʼlim tea vellar, Jehovak koxem bhoglem ani tannem tankam koxi modot keli tem Bible-ant sanglam. Hea vixim amkam Hana, David, ani Raza Hezekiachem udharonn asa. Tannim kiteak lagon dukham golloilim? Jehovan tankam koxi modot keli? Toxench ami khub dukhi astat, amcho konnui ghat korta vo amkam kosloch bhorvonso na mhunn chintun ami dukham golloitat tednam Jehova amkam koso bhuzvonn dita? Tem ami hea lekhant polloum-ia.
TUMI KHUB DUKHI ASAT MHUNN GOLLOILʼLIM DUKHAM
5. Hanak je tras sosunk poddle taka lagon tika koxem bhoglem?
5 Hanak tichea jivitant zaitea trasancho fuddo korunk poddlo, zaka lagon ti khub dukhi zali ani roddli. Tichea ghovak anik ek bail asli. Tichem nanv Penina ani ti Hanacho dves kortali. Toxench Hanak bhurgim naslim, punn Peninak aslim. (1 Sam. 1:1, 2) Hea karonnak lagon Penina Hanak tomnne martali. Tumi Hanachea poristhitint aslim zalear tumkam koxem bhogtolem aslem? Hana itli niraxi zalʼli ki ti “roddtali ani kai jei-khainasli.” Toxench, ti ‘soglich khontibhorit zalʼli.’—1 Sam. 1:6, 7, 10.
6. Hanak bhuzvonn koxi mellʼlli?
6 Punn Hanak bhuzvonn koxi mellʼlli? Tinnem keli ti ek vost mhunnttlear, Jehovachi bhokti korunk ti tombunt geli. Thoim ghoddie tombu bhair aslolea angnnachea dara lagim pavtanch ti “dukham golloun . . . Sorvesporak prarthon korunk lagli.” Tinnem oxi vinoti keli: ‘Tuje chakorniche choddfodde polloun ticho ugddas kor.’ (1 Sam. 1:10b, 11) Tor aplea kallzant aslem tem soglem tinnem Jehovak sanglem. Tea vellar, apli moladik dhuv dukham golloun aplea lagim vinoti korta tem polloun Jehovak koxem bhoglem tea vixim chintat. To ticho khub mog kortalo ani to tika bhuzvonn diunk fuddem sorlo mhunn kainch dubhav na!
7. Apleak jem bhogtalem tem Jehovak sanglea uprant Hanak koxem bhoglem?
7 Apleak jem bhogtalem tem Jehovak sanglea uprant, Jehova tichea magnneacho zobab ditolo mhunn Mha-iadnik Elin tika khatri dili. Hem aikon Hanak koxem bhoglem? Bible sangta: “Ti aple vattek lagli ani jevli ani tichem mukh anink kednanch khontin bhorlolem disunk na.” (1 Sam. 1:17, 18) Tichi poristhiti teach vellar bodlonk na tem khorem. Tori astana, tika monachi xanti mellʼlli. Karonn tinnem aplo soglo vojeacho bhar Jehovacher ghatlo. Ani Jehovan tichem dukh polloilem, tichem magnnem aikolem ani tika bhurgim zaunchem dennem dilem.—1 Sam. 1:19, 20; 2:21.
8-9. Mittingek hajir zaunk ami amchean zata tem soglem kiteak korunk zai? (Hebrevank 10:24, 25) (Chitr pasun polloiat.)
8 Ami kitem xiktat? Tumi eka kotthin poristhiticho fuddo kortat kai, zaka lagon tumi khub niraxi asat? Ghoddie tumi tumchea familintlea konn ekleak vo tumchea eka lagxilʼlea ixttak mornnant sanddla astolo. Oslea vellar tumkam ekttinch ravonk disot ani hantunt kainch vaitt na. Punn Hana vixim chintat. Ti tombunt geli ani Jehovan tika thoim bhuzvonn dili. Teach bhaxen, tumi thoklolim ani dukhi astat zalear pasun mittingek voitat tednam, Jehova tumkam bhuzvonn ani urba ditolo. (Hebrevank 10:24, 25 vachat.) Mittingent amkam bhuzvonn melltta toslim Bible-antlim versam aikonk mellttat. Hea vorvim amchea trasam vixim chintina zaunk Jehova amkam modot korta. Ani tea pasot amchi poristhiti rokddich bodolna zalear pasun amkam monachi xanti melltta.
9 Toxench, mittingek bhav-bhoinnam amkam urba ani bhuzvonn ditat ani tim amcho kitlo mog kortat tem amkam dakhoitat. Ani ami tanchea sangata astat tednam amkam khub borem dista. (1 Tes. 5:11, 14) Hea vixim khas pioneer seva korpi eka bhavacho amkam onnbhov asa. Tannem tache bailek mornnant hogddaili. To sangta: “Thodde pavtti mhaka mhojea bailecho itlo ugddas ieta ki hanv mhojem roddop thambounkuch xokona. Punn hanv mittingek voita tednam mhaka urba melltta. Bhav-bhoinnanchea doiall utram thaun ani tanchea zobabam thaun mhaka bhuzvonn melltta. Mittingek voichea poilim hanv kitlo-i niraxi asum vo mhaka kitlo-i usko zaum, punn thoim pavlea uprant mhaka sodanch borem dista.” Tor ami mittingek voitat tednam bhav-bhoinnam vorvim Jehova amkam modot korunk xokta.
Bhav-bhoinnam vorvim amkam bhuzvonn mellonk xokta (Peregraf 8-9 polloiat)
10. Ami khub dukhi astat tednam ami Hanachi dekh koxi gheunk zata?
10 Toxench, ami ugddas dovrunk zata ki Hanan Jehova lagim magnnem korun aplea kallzant aslem tem soglem taka sanglea uprant tika bhuzvonn mellʼlli. Tor ami pasun ‘amchea soglea uskeancho bhar Jehovacher ghalunk’ zata ani to amchem aikotolo mhunn khatri dovrunk zata. (1 Ped. 5:7) Ek bhoinn, jichea ghovak choramnim jivexim marlo ti oxem sangta: “Mhojea kallzacho eka orthan samko churo zalʼlo oxem mhaka dislem. Ani mhoji dukh kednanch unni zaunchina oxem mhaka bhoglem. Punn hanvem mhojea sorginchea Bapa lagim magnnem kelem tednam mhaka bhuzvonn mellʼlli. Thodde pavtti mhaka koxem bhogtalem tem sangonk mhojea tonddant utranch ienaslim. Punn Jehovan mhoji poristhiti somzon ghetli. Hanv khub dukhi astalem ani mhaka usko zatalo tednam, mhaka xant ravonk modot kor mhunn hanvem tache lagim maglem. Tea vellar mhaka rokddich monachi xanti mellʼlli ani hea vorvim hanv mhojim sodanchim kamam korunk xoklem.” Tor tumi pasun dukham golloun Jehova lagim vinoti kortat ani tumchea kallzant asa tem soglem taka sangtat tednam, taka pasun tumchi poristhiti polloun khub dukh zata ani tumkam koxem bhogta tem to somzota. Tumchi poristhiti rokddich bodolna zalear pasun, to tumkam bhuzvonn ami monachi xanti diunk xokta. (St. 94:19; Filp. 4:6, 7) Taka visvaxi ravonk tumi kortat tea soglea vavracher to dhean dita ani to tumkam inam ditoloch!—Heb. 11:6.
TUMCHO GHAT KELA DEKHUN TUMI GOLLOILʼLIM DUKHAM
11. Dusrim Davida sangata vaitt toren vaglim tednam taka koxem bhoglem?
11 Davidak tachea jivitant zaitea kotthin poristhitincho fuddo korunk poddlo dekhun tannem dukham golloilim. Zaite lok tacho dves kortale. Tache thodde ixtt ani familintlim munxam pasun taka ovisvaxi zalim ani taka marunk sodhtalim. (1 Sam. 19:10, 11; 2 Sam. 15:10-14, 30) Hea kotthin vellar taka koxem bhoglem tea vixim tannem boroilem: “Haskar-suskar soddun mhaka puro zalem, ratche rati roddun-roddun bhizoitam mhojem uxem, khattir golltat dukhancheo zhori.” Taka oxem kiteak bhoglem? ‘Taka sotaitolea munxank lagon’ mhunn to sangta. (St. 6:6,7, NW) Dusrim tachea sangata khub vaitt toren vaglim dekhun to itlo niraxi zalo ki to khub roddlo.
12. Jehova vixim Davidak kosli khatri asli? (Stotr 56:8)
12 Davidachea jivitant zaiteo oddchonneo asleo tem khorem. Punn Jehova aplo mog korta mhunn taka khatri asli. Tea pasot tannem mhunnttlem: “Sorvesporan mhojem rudon aikolem.” (St. 6:8) Toxench anik eka vellar Davidan Stotr 56:8-antlim kallzak lagtat toslim utram mhunnttlim. (Vachat.) Hea utrantlean Jehova amcho mog korta ani taka amchi kallji asa mhunn dison ieta. Jehova eka orthan Davidachim dukham ektthaim korun eka dobeant samballun dovorta mhunn Davidan sanglem. Toxench, apleak koslem dukh asa tacher Jehova dhean dita ani to tem kednanch visorna mhunn Davidak khatri asli. Apleak kosleo oddchonneo asat titlench nhoi, punn tea oddchonneank lagon apleak kitlem dukh sosunk poddlem tem pasun aplea mogall sorginchea Bapak khobor asli mhunn Davidak dubhav naslo.
13. Tumkam konnem-i dukhoilam vo tumcho ghat kela zalear tumi kitem ugddas dovrunk zai? (Chitr pasun polloiat.)
13 Ami kitem xiktat? Tumi dolle dhampun visvas dovortalim tea munxan tumkam khub dukhoilem zait vo tumcho ghat kelo zait. Ghoddie tumi dating kortalim to munis, vo tumcho kazari sangati tumkam soddun gelo zait, vo tumchea konnem-i mogachean Jehovachi seva korop bond keli astoli. Hea pasot tumchem kalliz samkem tuntton gelem astolem. Ek bhav, zache bailen pordvar kelo ani taka soddun geli to oxem sangta: “Mhaka oxem ghoddttolem mhunn hanvem sopnant pasun chintunk na. Hanv kainch faideacho nhoi oxem mhaka disonk laglem. Hanv ekdom dukhi zalom ani mhaka khub rag ietalo.” Tumkam konnem-i khub dukhoilam vo tumcho ghat kela zalear, Jehova tumkam kednanch sanddchona hem ugddas dovorlolean tumkam bhuzvonn mellonk xokta. To bhav fuddem sangta: “Mhaka kollon ailem ki munis ghoddie ovisvaxi zaunk xokta, punn Jehova amchem Khoddop zaun asa. Hea pasot ami tacher visvas dovrunk xoktat.” (St. 37:28) Amchea jivitant kitem-i zaum, to sodanch amkam modot korunk toiar asa. Aplea visvaxi sevokank to kednanch sanddina. Toxench, konnam-i poros Jehova amcho sogleam-von chodd mog korta hem ami sodanch ugddas dovrunk zai. Tor amkam konnui dukhoita vo amcho ghat korta tednam amkam bhorpur dukh zata tem khorem. Punn amchea vixim Jehovachem chintop kednanch bodolna. Ami taka khub moladik zaun asat! (Rom. 8:38, 39) Ugddas dovrat, dusrim tumchea sangata koxe-i toren vagom, tumcho sorgincho Bap sodanch tumcho mog korta.
Zanchem mon kollvolltta-vollvolltta Jehova tanchea laginch asa mhunn Stotranchea pustokantlean amkam khatri melltta (Peregraf 13 polloiat)
14. Stotr 34:18-ntlean amkam bhuzvonn koxi melltta?
14 Konnem-i tumkam ghat kela zalear Stotr 34:18-nt Davidan boroilʼlea utram thaun pasun tumkam bhuzvonn mellonk xokta. (Vachat.) “Zanchem mon kollvollta vollvollta” tankam fuddem ani kainch boreponn na oxem disonk xokta. Oxem bhogta tankam Jehova koxi modot korta? Ek bhurgem roddtta tednam tachim avoi-bapui taka vengent gheun bhuzvonn ditat toxim, tumchem mon kollvolltta-vollvolltta tednam Jehova tumchea ‘sorxim vo laginch’ asta. Konnem-i tumcho ghat kela vo tumkam soddun geleant dekhun tumi dukhant asat zalear, Jehova tumchem dukh somzota ani to rokddoch tumkam modot korunk fuddem sorta. Tumi samkinch tunttleant ani tumkam kainch valor na oxem tumkam bhogta zalear, Jehova tumkam bhuzvonn diunk sodhta. Toxench to fuddara pasot tumkam ek bhorvonso dita, jea vorvim atanche tras sosunk tumkam modot zatoli.—Iz. 65:17.
KOSLOCH BHORVONSO NA MHUNN CHINTUN TUMI GOLLOILʼLIM DUKHAM
15. Hezekia dukhamnim kiteak roddonk laglo?
15 Judacho Raza Hezekia 39 vorsancho aslo tednam taka ekdom gombhir duens zalem. Tea vellar, provadi Izaiasan taka Jehovacho sondex pavoilo ani sanglem ki tea duensak lagon tacho jiv voitolo. (2 Raz. 20:1) Hem aikon Hezekia itlo dukhi zalo ki to dukhamnim roddonk laglo ani tannem modoti pasot Jehova lagim vinoti keli.—2 Raz. 20:2, 3.
16. Jehovan Hezekiachea magnneak koso zobab dilo?
16 Jehovan Hezekiachi vinoti aikoli ani tachim dukham polloilim tednam taka tachi doia-maia disli. Jehovan taka mhunnttlem: “Hanvem tujem magnnem aikolem ani tujim dukham pollelim. Hanv tuka boro kortolom.” Tor apunn Hezekiak anik thoddim vorsam jieunk ditolo ani Asiriekaranchea hatantlean Jeruzalemachi rakhonn kortolo mhunn Jehovan Izaiasa vorvim bhas dili.—2 Raz. 20:4-6.
17. Amkam gombhir duens asa zalear Jehova amkam koso modot korta? (Stotr 41:3) (Chitr pasun polloiat.)
17 Ami kitem xiktat? Tumkam ek oslem duens asa kai zaka kosloch ilaz na? Hoi zalear, Jehova lagim magnnem korat. Tumkam roddonk ieta zalear pasun, tumi roddon tumkam koxem bhogta tem Jehovak sangonk zata. Karonn “to doien bhorlolo Bap ani sogle torechi bhuzvonn diupi Dev,” zo amkam amchea soglea sonkoxttamnim bhuzvonn dita mhunn Bible amkam khatri dita. (2 Kor. 1:3, 4) Jehova amche sogle tras kaddun uddoitolo mhunn ami opekxa korinant tem khorem. Punn to amkam sodanch modot kortolo mhunn ami visvas dovrunk zata. (Stotr 41:3 vachat.) Tache povitr xokte vorvim amche tras sosunk to amkam ghottai, zannvai ani monachi xanti dita. (Mho. 18:14; Filp. 4:13) Toxench, fuddarak konnuch duent aschona mhunn to amkam Bible-a vorvim bhorvonso dita. Ani hea udexim amkam bhuzvonn melltta.—Iz. 33:24.
Jehova amkam ghottai, zannvai ani monachi xanti diun amchea magnneancho zobab dita (Peregraf 17 polloiat)
18. Ekdom kotthin poristhiticho fuddo kortana tumkam khoinchea versa vorvim bhuzvonn mellʼllea? (“ Ami Dukham Golloitat Tednam Bhuzvonn Ditat Toslim Versam,” hem boks polloiat.)
18 Hezekiak Jehovachea utram vorvim bhuzvonn mellʼlli. Amkam pasun Bible-ant aslolea Jehovachea utram vorvim bhuzvonn mellonk xokta. Ekdom kotthin poristhitincho fuddo kortana amkam ghottai melltta ani xant ravonk modot zata, toslim bhuzvonnechim utram Jehovan amchea pasot Bible-ant boroun dovorleant. (Rom. 15:4) West Africa-ntlea eke bhoinnik tika cancer asa mhunn kollʼllem tednam tinnem zaite dis dukham golloun kaddle. Ti sangta: “Mhaka khas korun modot zali tem ek vers mhunnttlear Izaias 26:3. Choddxe pavtti amchi poristhiti ami bodlunk xokonant tem khorem. Punn hea versa vorvim Jehova mhaka monachi xanti diunk xokta, jea vorvim koslea-i trasancho hanv fuddo korunk xoktam mhunn mhaka khatri mellʼlli.” Tumi-i oslea poristhitincho fuddo kela kai, jednam tumkam fuddem kosloch bhorvonso na oxem dislam? Oslea vellar tumkam khoinchea versa vorvim bhuzvonn mellʼllea?
19. Fuddarak kitem zatolem mhunn ami axeun ravleant?
19 Ami ekdom nimanneachea-nimannea disamnim jietat. Tor amche dukh-tras anikui vaddttole mhunn ami opekxa korunk zata. Ani taka lagon amkam anikui dukham gollounk poddot. Punn Hana, David ani Raza Hezekiachea udharonnantlean, ami golloilʼlea dukhancher Jehova dhean dita ani taka pasun khub dukh zata mhunn amkam kolltta. Amchim dukham taka khub moladik asat. Tor amkam koslea-i oddchonneancho fuddo korunk poddtta tednam amchea kallzant asa tem soglem ami magnneant Jehovak sangom-ia. Toxench, amchea mogall bhav-bhoinnam sangata mellon ievop ami kednanch soddun diunchem nhoi. Ani Bible-ant Jehovan boroilʼlea utram vorvim ami bhuzvonn melloun gheum-ia. Ami Jehovak xevott poriant visvaxi ravlim zalear ami khatri dovrunk zata ki Jehova amkam inam ditolo. Tem mhunnttlear, ami khub dukhant asat, amcho konnem-i ghat kela ani fuddarak amkam kosloch bhorvonso na mhunn chintun ami golloilʼlim dukham Jehova pusun kaddttolo. (Prok. 21:4) Uprant amchea dolleantlean fokot khuxalkaiechim dukham vhanvtolim!
GIT 4 Jehova Mhozo Gonvlli
