Tumi hea vorsachim Pahrogopur masikam dhean diun vachleant kai? Toxem zalear hea prosnanche zobab tumi diunk xoktat kai tem polloiat:

Bailam sangata koxem vagchem tea vixim Jehovan kosli dekh dovorlea?

To bailam sangata bhedbhav korina, mhunnche dadle bailam poros vorte oxem to lekhina. To tanchem aikota, mhunnche tankam koxem bhogta ani tankam kosleo oddchonneo asat tacher Jehova dhean dita. Ani to tancher visvas dovorta dekhun aplem kam korcho sueog dita.—w24.01, p. 15-16.

“Tanchea sangata bhagidar zainakat” mhunn Efezkarank 5:7-ant dilʼlo solʼlo ami koso apnnaunk zata?

Jehovachea dorjeam pormonnem jienant tanchea sangata ixttagot dovorna zaunk apostl Paulun amkam xittkaunni dilʼli. Hantunt oslim munxam mellon asat zanchea sangata ami in-person toxench social media-cher vell sartat.—w24.03, p. 22-23.

Ami koslea torechea khottea khobram thaun chotur ravonk zai?

Ghoddie amchim bhav-bhoinnam amkam kosli-i khobor sangot punn ti sarki asa kai na tea vixim tannim choukoxi korunk na astoli. Vo amkam onvollkhi munxam thaun email ieunk xoktat, vo dhorm-broxtt korpi apli vollokh lipoun amkam khotteo khobro sangonk xoktat. Tor oslea khobram thaun ami chotur ravonk zai. —w24.04, p. 12.

Raza Solomonacho, Sodom ani Gomorantlea lokancho, ani buddttent nas zalʼlea lokancho Jehova koso neai kortolo tea vixim amkam kitem khobor asa ani kitem khobor na?

Jehovan tancho sasnak nas kelo oxem ami khatren mhunnonk xokonant. Punn Jehovak soglem khobor asa ani to doien bhorlolo Dev hem ami zannant. —w24.05, p. 3-4.

Jehova “Khoddop” zaun asa, hea vorvim amkam kosli khatri melltta? (D.S. 32:4, NW)

Jehova amcho asro zaun asa. To patieupa sarko asa, mhunnche apnnem dilʼleo bhasaunneo to sodanch samballtta. Ani to sodanch sarkem tem korta ani kednanch bodolna, tem mhunnttlear aplo sobhav ani udʼdhex to kednanch bodolna.—w24.06, p. 26-28.

Tumi eke nove sobhent koxim adjust zaunk xoktat?

Jehovacher patieun ravat. Adim aplea sevokank modot keli toxi to tumkam-i modot kortolo. Toxench, tumchea adle ani nove sobhe modem sor korinakat. Tea bhair, tumche nove sobhent bizi ravat, ani novim ixttam korunk vavr korat.—w24.07, p. 26-28.

Matev odheai 25-ant aslolea tin voparintlean ami koslim lisanvam xiktat?

Menddre ani bokddeanche voparintlean, ami visvaxi asonk zai mhunn xiktat. Xannea ani murkh ankvareanche voparintlean, ami toiar ani zagrut asonk zai mhunn xiktat. Ani talentanche voparintlean, ami khub vavr korunk zai mhunn xiktat.—w24.09, p. 20-24.

Solomonachea mondirachea bolkanvachi unchai kitli asli?

Thoddea hostolekhamnim 2 Itihas 3:4-ant, mondirachea bolkanvachi unchai “120” hat, tem mhunnttlear 53 metr asli mhunn amkam vachunk melltta. Punn thoddea patieupa sarkea hostolekhamnim tachi unchai “20 hat” vo sumar nnov metr asli mhunn vachunk melltta. Mondirachea vontteanchea rundaie pormonnem, hea bolkanvachi unchai “20 hat” asli oxem dison ieta.—w24.10, p. 31.

“Sobhechea sevokak ekuch bail asonk zai” hacho orth kitem? (1 Tim. 3:12)

Hacho orth, to ekuch baile lagim kazar zalʼlo asonk zai ani tannem kednanch onoitik kuddicho sombond dovrunk zaina. Itlench nhoi, tannem dusrea bailam sangata mirchem vo flirt korchem nhoi.—w24.11, p. 19.

Jezun Juanv 6:53-ant mhunnttlolim utram Somiachea Sanjechea Jevnnak lagu zainant oxem ami kiteak mhunnonk zata?

Juanv 6:53-ant Jezuchem mas khaunchea vixim ani tachem rogot pieunchea vixim sanglam. Jezun him utram 32 K.X.-ant Galilient aslolea Judevank mhunnttlim, zannim tacher bhavarth dovrunk zai aslo. Punn hi ghoddnni zaun eka vorsa uprant, tannem Jeruzalemant Somiachem Sanjechem Jevonn stapon kelem. Tea vellar Jezu sangata sorgar raz choloitole tanchea lagim to uloilo.—w24.12, p. 10-11.