Apostl Paulun Timotak, zo ek vhoddil aslo taka oxem boroilem: “Adim fuddench monant tharai nastana vo bhedbhav korinastana heo suchounneo pall mhunn hanv tuka Deva mukhar, Krist Jezu mukhar ani vinchun kaddlolea devdutam mukhar hukum ditam.”—1 Tim. 5:21.

He vinchun kaddlole devdut konn te zannam zaunk, poilem mhunnttlear tea zomeant konn na tem ami zannam zaum-ia. Hantunt 1,44,000 makhlolim Kristanvam nant. Karonn Paulun Timotak hem boroilem tednam makhlolea Kristanvanchem jivontponn suru zaunk naslem. Tor te ‘vinchun kaddlole devdut’ asonk xokonant.—1 Kor. 15:50-54; 1 Tes. 4:13-17; 1 Ju. 3:2.

Toxench, hea “vinchun kaddlolea devdutam” modem Noah-chea buddtte vellar Jehovak ovisvaxi zalʼle te devdut pasun asonk xokonant. Karonn tannim Soitanak sangat dilo ani te noxtte zale. Hea pasot te Jezuche dusman zaun asat. (Ut. 6:2; Luk. 8:30, 31; 2 Ped. 2:4) Fuddarak Jezu tankam 1,000 vorsam pasot patallant uddoitolo ani uprant Soitana sangata tancho nas kortolo.—Jud. 6; Prok. 20:1-3, 10.

Tor apostl Paulun sanglole ‘vinchun kaddlole devdut’ sorgar aslole devdut oxem ami mhunnonk zata, je ‘Devak ani Krist Jezuk’ visvaxiponnan tenko ditat.

Sorgar lakʼkhamnim-koroddamnim visvaxi devdut asat. (Heb. 12:22, 23) Ani Jehovan tankam sogleank veg-vegllim kamam dileant mhunn dison ieta. (Prok. 14:17, 18) Udharonnak, Jehovan fokot ekuch devdutak Asiriekaranchea 1,85,000 soinikank jivexim marunk sanglem. (2 Raz. 19:35) Toxench, ‘dusreank patkant uddoitat ani noxttim kamam kortat toslea soglea lokank Jezuchea Rajea thaun ektthaim korunk’ zaitea devdutank nemleat astole. (Mt. 13:39-41) Tea bhair, Jehova her devdutank ‘vinchun kaddloleank sorgar ektthaim korunk’ nemunk xokta. (Mt. 24:31) Ani anikui devdutank, ‘soglea vattamnim amchi rakhonn korunk’ Jehovan adnea dilea.—St. 91:11, NW; Mt. 18:10; Matev 4:11 ani Lukas 22:43 sor korat.

1 Timotak 5:21-ant sanglolea ‘vinchun kaddlolea devdutank’ chodd korun sobhanchi dekhrekh korpachi zobabdari dilʼli asa. Bhonvtonnchea versamnim, Paulun sobhentlea vhoddilank tannim tanchi zobabdari koxi samballchi, toxench sobhentlea bhav-bhoinnamnim hea bhavank resped diuncho hea vixim solʼlo dilo. Paulun sanglem ki vhoddilamnim “adim fuddench monant tharai nastana vo bhedbhav korinastana” apleo zobabdareo samballcheo, ani kosle-i nirnnoi gheunchea poilim tannim bariksannen tea vixim chintchem. Vhoddilamnim Paulucho ho solʼlo apnnaunk borem karonn asa. Karonn te “Deva mukhar, Krist Jezu mukhar ani vinchun kaddlolea devdutam mukhar” bhav-bhoinnanchi seva kortat. Hacho orth, Jehova, Jezu ani ‘vinchun kaddlole devdut,’ vhoddil koxe toren apli zobabdari samballttat tacher nodor dovortat. Tor thoddea devdutank sobhank modot korchi zobabdari asa, tem mhunnttlear Jehovachea sevokanchi rakhonn korchi, porgottnnechea kamant tankam modot korchi ani te jem kitem polloitat tea vixim Jehovak kollounchi zobabdari asa mhunn amkam spoxttponnim kollon ieta.—Mt. 18:10; Prok. 14:6.