1. Kazar zaunchea vixim chintana eke bhoinnin svotak khoinche prosn vicharunk zai?

JEZUCHO pattlav kortat tim soglim tachea poripurnn odhikara khala asat. Punn ek Kristi bhoinn kazar zata tednam, ti eka oporipurnn dadleachea odhikara khala ieta ani hem tika sompem aschem na. Tor kazar zaunchea poilim tinnem apnnakuch he prosn vicharunk zai: ‘Ho bhav kazara uprant familicho ek boro vhoddil zatolo mhunn mhaka koxem dison ieta? To aplea jivitant Jehovak poilo dovorta kai? To atam oxem korina zalear, kazara uprant Jehova sangata amchi ixttagot samballunk to vavurtolo kai?’ Punn tinnem he-ui prosn svotak vicharunk zai: ‘Amchea kazari jivitant faideak poddttat tosle khoinche gunn mhaka asat? Mhaka pasiens asa kai? Hanv udar-kallzachem asa kai? Jehova lagim mhoji ixttagot ghott asa kai?’ (Up. 4:9, 12) Eke bhoinnin kazara poilim bore nirnnoi ghetle zalear tichem kazari jivit khuxalkaiechem zatolem.

2. Hea lekhant ami kitem xiktolim?

² Lak’khamnim Kristi bhoinnamnim aplea ghovank adhin ravon ek bori dekh dovorlea. Tankam xabaski favo! Hea visvaxi bhoinnam sangata Jehovachi seva korunk amkam khub khuxalkai bhogta. Hea lekhant ami hea tin prosnanche zobab polloitolim: (1) Bailank koslea thoddea oddchonneancho fuddo korcho poddtta? (2) Ek bail aplea ghovak adhin kiteak ravta? (3) Jezu, Abigail, ani Marie thaun, Kristi ghovamnim ani bailamnim adhin ravchea vixim kitem xikonk zata?

3. Soglea kazari zoddpeank kiteak oddchonneancho fuddo korcho poddtta?

³ Kazar hem Devachem poripurnn dennem. Punn munxam oporipurnn asat. (1 Juanv 1:8) Taka lagon, kazari  zoddpeanchea jivitant oddchonneo vo “sonvsari jivitache upodre-koxtt astole” mhunn Devachem Utor xittkaita. (1 Kor. 7:28) Tor eke bailen fuddo korcho poddtta toslea thoddea oddchonneam vixim ami polloum-ia.

4. Eke bailek aplea ghovak adhin ravop opmanachem oxem kiteak disonk xokta?

⁴ Thoddea zagear bailank oxem dista, ki ghovank adhin ravop opmanachem. United States-antli Marisol nanvachi ek bail oxi mhunntta: “Hanv jea zagear vaddlam thoim bailamnim soglea vostumnim dadlea sarkench asonk zai mhunn bailank porot-porot sangtale. Jehovan ghovank odhikar dila ani tea odhikarak bailamnim khaltim ravlolim taka zai. Toxench, bailankui ghovan resped dilolo zai mhunn hanv zannam. Punn familint odhikarachea manddavolli vixim sarkem chintop dovrunk sodanch sompem asona.”

5. Thoddea dadleank bailam vixim koslem chukichem chintop asa?

⁵ Tea bhair thodde ghov, bailank dadleam poros unnea molachim mhunn lekhtat. Dokxinn Amerikent ravpi Ivon nanvachi bhoinn mhunntta, “Ami ravtat thoim dadle poilim jevtat ani uprant bailam jevtat. Bhurgeam modem cheddvank ghorant randunk ani nitoll korunk laitat. Punn cheddeank ‘ghorantlo raza koso’ lekhtat. Ani avoi-n ani tachea bhoinnimnim tachi seva-chakri korunk zai mhunn sangtat.” Yingling nanvachi Azia-ntli bhoinn mhunntta, “Mhojea bhaxent ek mhunn’nni asa zacho orth, dadleank asta ti zannvai vo kola bailank aschi goroz na. Tannim fokot ghorantlem kam korpachem. Ani khoinchea-i vixoi-acher apleak koxem dista tem ghovak sangonk tankam porvangi na.” Ek ghov aplea bailecho mog korina ani Bible sangta tachea pormonnem cholona zalear, to tea bailek khuxal korina, Jezuchea dekhin cholona ani Jehovakui khuxal korina.—Ef. 5:28, 29; 1 Ped. 3:7.

6. Jehova lagim ixttagot vaddoit ravonk bailamnim kitem korunk zai?

⁶ Ami fattlea lekhant polloilam toxem, Kristi ghovamnim Jehova sangata aplea familichi ixttagot ghott keloli, tancheo bhavnatmik ani her gorzo purnn keloleo Devak zai. (1 Tim. 5:8) Tori astana, eke kazari bhoinnin Devachem Utor vachun tacher niall korunk ani Jehova lagim kallzant thaun magnnem korunk dor disa vell kaddunk zai. Oxem korunk thoddeank kotthin zaunk xokta. Bailank zaitim kamam astat dekhun hem soglem korunk tankam vell ani xokti na oxem disonk puro. Punn hem korunk tannim kiteak vell kaddunk zai? Karonn dor eklean aplea sangata ixttagot vaddoit ravloli Jehovak zai.—Itihas 17:27.

7. Eke bailek aplea ghovak adhin ravonk kednam sompem zatolem?

⁷ Hem khorem ki eke bailek, aplea opurnn ghovak adhin ravonk khub proitn korcho poddtta. Punn oxem kiteak korop hachea vixim Bible kitem sangta tem somzon ti manun gheta zalear, tika ghovachea adhin ravonk sompem zatolem.

8. Efezkarank 5:22-24-a pormonnem, ek Kristi bail aplea ghovachea adhin kiteak ravta?

⁸ Ek Kristi bail aplea ghovachea adhin ravta, karonn tinnem oxem kelolem Jehovak zai. (Efezkarank 5:22-24 vachat.) Ti aplea sorginchea Bapacher visvas dovorta, karonn to ticho mog korta ani tika jem kitem korunk sangta tem tichea boreak mhunn tika khobor asa.—D.S. 6:24; 1 Juanv 5:3.

9. Ek Kristi bhoinn aplea ghovachea adhin ravta tednam kitem zata?

⁹ Sonvsarache lok, Jehovache dorje nakarunk ani ghovachea adhin ravop opmanachem mhunn lekhunk bailank urba ditat. Oslem chintpi lokank amchea mogall Devachi vollokh na. Karonn Jehova aplea  opurbaiechea dhuvank tancho opman zata toslem kainch korunk sangcho na. Ek bhoinn Jehovan tika korunk sanglam tem korunk vavurta tednam ti tichea familint xanti dovrunk modot korta. (St. 119:165) Hea toren tika, tichea ghovak ani tichea bhurgeank faido zata.

10. Carol-achea utrantlean ami kitem xikonk xoktat?

¹⁰ Ek bail aplea oporipurnn ghovachea adhin ravta tednam, ti odhikarachi manddavoll kelolea Jehovacho mog korta ani taka man dita. Dokxinn Amerikentli, Carol nanvachi bhoinn mhunntta, “Mhozo ghov chuki kortolo mhunn hanv zannam. Punn to chuki korta tednam hanv tachea sangata koxem vagta tantuntlean Jehova lagim aslolea mhojea ixttagoticho hanv kitlo valor korta tem dakhoun dita. Tor mhaka mhojea sorginchea Bapak khuxal korunk zai dekhun hanv mhojea ghovachea adhin ravonk proitn korta.”

11. Aneese nanvachea bhoinnik aplea ghovak bhogsunk koxi modot zata, ani ami tichea utrantlean kitem xiktat?

¹¹ Ek ghov aplea bailechim bhavnam ani chintnachi porva korina oxem eke bailek dista tednam tika aplea ghovak resped dakhounk ani adhin ravonk kotthin zaunk xokta. Punn oxem zata tednam apunn kitem korta tem Aneese nanvachi ek kazari bhoinn sangta, “Hanv ragar zaina zaunk proitn korta. Ami soglim chuki kortat mhunn hanv ugddas dovorta. Jehovachi dekh gheun hanv mhojea ghovak bhogsunk proitn korta. Hanv oxem korta tednam mhaka monachi xanti melltta.” (St. 86:5) Ek bail aplea ghovak bhogxita tednam tika adhin ravonk sompem zata.

12. Bible-ant koslim udharonnam asat?

¹² Dusreank adhin astat tim oskot mhunn thoddeank disonk puro. Punn hem khorem nhoi. Karonn Bible-ant dusreanchea adhin ravlolea zaiteanchim udharonnam asat. Punn tim oskot naslim. Atam ami Jezu, Abigail, ani Mariechea udharonnantlean kitem xikonk xoktat tem polloum-ia.

13. Jezu Jehovachea adhin kiteak asa? Somzaiat.

¹³ Jezu Jehovachea adhin asa. Hacho orth, taka kola vo zannvai unni asa oxi nhoi. Karonn taka zannvai asli dekhun to sadea  ani spoxtt ritin xikounk xoktalo. (Juanv 7:45, 46) Ani taka kola asli mhunn Jehovan taka vixv rochtana aplea sangata kam korunk uzar kelo. (Mho. 8:30; Heb. 1:2-4) Ani punorjivont zalea uprant, Jehovan taka ‘sorgar ani sonvsarar, soglo odhikar dila.’ (Mt. 28:18) Taka itli kola aslear pasun to margdorxonak lagon sodanch Jehovacher patieun ravta. Kiteak? Karonn to aplea Bapacho mog korta.—Juanv 14:31.

14. (a) Jehova jea toren bailak lekhta tachea thaun ek ghov kitem xikonk xokta? (b) Mhonn’nneo 31-a thaun eka ghovak kitem xikonk melltta?

¹⁴ Ghovamnim kitem xikonk zata. Jehovan bailank ghovachea adhin ravonk sanglam, hacho orth to bailank dadleam-von unnea molachim lekhta oso nhoi. Karonn, Jezu sangata razvottki cholounk Jehovan dadleank ani bailank pasun vinchun kaddlam. (Gal. 3:26-29) Jehovak Jezucher bhorvonso asa dekhun tannem taka sorgar ani prithumer odhikar dila. Teach bhaxen, ek zannvai aslolo ghov aplea bailek thoddo odhikar ditolo. Ek bori bail kitem korta tea vixim Bible amkam sangta: Ti ghorantlem kam samballtta, zomin vikta ani vikti gheta ani veapar dhondo korta. (Mhonn’nneo 31:15, 16, 18 vachat.) Eka vixoi-acher apleak koxem dista tem sangcho odhikar naslolea eka chakra sarki ti na. Punn ticho ghov ticher visvas dovorta ani ti kitem sangonk sodhta tem to aikota. (Mhonn’nneo 31:11, 26, 27 vachat.) Hea toren, ghov aplea bailek man dita tednam tachea adhin ravonk ti khuxal zatoli.

15. Jezuchea udharonna thaun bailamnim kitem xikonk zata?

¹⁵ Bailamnim kitem xikonk zata. Jezun vhodd kamam kel’lim tori astana, Jehovak odhin ravop opmanachem mhunn taka disonk na. (1 Kor. 15:28; Filp. 2:5, 6) Teach bhaxen, ek zannvaiechi bail Jezuchi dekh gheta zalear aplea ghovak adhin ravop opmanachem mhunn tika dischem na. Aplea ghovacho mog korta dekhun ti taka tenko ditoli. Punn oxem korunk tichem mukhel karonn mhunnttlear, ti Jehovacho mog korta ani taka man dita.

16. 1 Samuel 25:3, 23-28-a pormonnem, Abigail-ak koslea oddchonneancho fuddo korcho poddlo? (Masikachem fuddlem chitr polloiat.)

¹⁶ Abigail-acho ghov Nabal ek svarthi, gorvixtt ani onupkari munis aslo. Tori astana, tinnem taka soddun vochonk chintunk na. Tinnem toxem chintlolem zalear, David ani tache lok tichea ghovak marunk aile tednam ti vogich ravonk xoktali. Punn tinnem toxem korunk na. Tinnem aplea ghovak ani tanchea vhodd gharanneak rakhonk pavl ghetlem. Hot’tearam dhorun aslolea 400 dadleam fuddem vochon, Davida lagim respedan ulounk tika kitlo dhir zai aslo tea vixim chintat! Aplea ghovacheo chukeo pasun ti apleacher gheunk toiar asli. (1 Samuel 25:3, 23-28 vachat.) Ek vhodd chuk korinastana ravonk Jehovan hea dhirvont bailek uzar korun apleak sol’lo dilo mhunn Davidak rokddench koll’llem.

17. David ani Abigail-a thaun ghovamnim kitem xikonk zata?

¹⁷ Ghovamnim kitem xikonk zata. Abigail-ak bori zannvai asli. Toxench, Davidak-ui zannvai asli dekhun tannem ticho sol’lo manun ghetlo ani zaitea lokancho jiv salvar zalo. Teach bhaxen, zannvai aslolo ek ghov mhotvache nirnnoi gheunchea poilim apli bail kitem sangta tea vixim bariksannen chinta. Oxem kelolean to ghoddie bore nirnnoi gheunk pavtolo.

18. Abigail-achea udharonnantlean bailam kitem xikonk xoktat?

¹⁸ Bailamnim kitem xikonk zata. Ek bail Jehovacho mog korta ani taka man dita tednam, ticho ghov Jehovachi seva korina vo tachea dorjea pormonnem jiena zalear pasun, tichea familicher ticho boro porinnam  poddonk xokta. Abigail-a bhaxen, ti aplem kazari jivit moddunk proitn korchi na. Bodlek, ti aplea ghovak man ditoli ani tachea adhin ravtoli. Oxem kelolean, ticho ghov tichem borem udharonn polloun Jehova vixim ghoddie xikonk pavtolo. (1 Ped. 3:1, 2) To Jehova vixim xikona zalear pasun, ti tachea adhin ravtoli. Ani hem polloun Jehova khub khuxal zatolo.

19. Khoinchea poristhitimnim ek bail, aplo ghov sangta tem korchi na?

¹⁹ Ek Kristi bail sodanch aplea ghovachea adhin ravta. Punn to tika Bible-antle kaide ani totvam moddunk laita zalear, ti toxem korchi na. Udharonnak, Jehovachi bhokti korina toslo ek ghov ek Kristi bailek fott ulounk, chori korunk vo Bible chuk mhunn sangta toslem kam korunk laita zalear ti tem korchi na. Karonn tinnem, toxench soglea Kristanvamnim poilim Jehovachem Utor manunk zai. Tichea ghovan tika Bible-achea add kitem-i kam korunk sanglem zalear tinnem tem nakarunk zai. Ani apunn kiteak nakarta tem doiall ani spoxtt utramnim sangonk zai.—Itihas 5:29.

20. Mariechi Jehova lagim ghott ixttagot asli mhunn ami koxim zannant?

²⁰ Mariechi Jehova lagim ghott ixttagot asli. Tika Devachea Utrachi bori vollokh asli. Karonn Juanv Batistachi avoi Elizabetha lagim uloitana Marien 20-a poros chodd pavtti Devachea Utra thaun ul’lekh kelo. (Lukas 1:46-55) Ani hea vixim chintat: Mariechi Juze lagim soirik zal’li. Tori astana, Jehovacho ainz poile pavtti Juze lagim nhoi, punn Marie lagim uloilo ani ti Devachea Putak zolm ditoli mhunn tannem sanglem. (Lukas 1:26-33) Jehovak Mariechi bori vollokh asli ani ti aplea Putachi kallji ghetoli ani tacho mog kortoli mhunn taka khatri asli. Jezu melea uprant ani jivont zaun sorgar gelea uprant pasun, tichi Jehova lagim bori ixttagot asli mhunn amkam dubhavuch na.—Itihas 1:14.

21. Marie vixim Bible-ant jem boroilam tantunlean ghovamnim kitem xikonk zata?

²¹ Ghovamnim kitem xikonk zata. Aplea bailek Devachea Utrachi bori vollokh aslear ek zannvai aslolo ghov bejar zaina, punn khuxal zata. Tor ti familichi vhoddil zaunk sodhta mhunn to chintina. Karonn tika Bible ani Bible  totvanchim bori vollokh asa zalear familik faideak poddttolem mhunn to vollkhun gheta. Apli bail aplea poros chodd xikloli asa zalear pasun, apli famil Jehovachi bhokti kortana zoxem kuttumbik bhoktent bhag ghetana, fuddakar gheunchi zobabdari aplich asta mhunn to vollkhun gheta.—Ef. 6:4.

22. Bailamnim Marie thaun kitem xikonk zata?

²² Bailamnim kitem xikonk zata. Eke bailen aplea ghovachea adhin ravonk zai. Tori astana, aplo bhavarth ghott korpachi zobabdari tichi svotachi zaun asa. (Gal. 6:5) Tor oxem korunk tinnem svotacho obheas ani niall korunk vell kaddunk zai. Oxem kelolean ti sodanch Jehovacho mog korun taka man diunk pavtoli ani aplea ghovachea adhin ravonk ti khuxal astoli.

23. Bailam adhin ravtat tednam tankam, tanchea familik ani sobhek koso faido zata?

²³ Jehovacho mog kortat dekhun aplea ghovachea adhin ravtat teo bailo, odhikarachi manddavoll nakartat tea bailam poros chodd khuxal ani dhadoxi astat. Tim tornnattea dadleank ani bailank ek bori dekh dovortat. Tim fokot familint nhoi, punn sobhent pasun mog ani xanti samballunk modot kortat. (Titak 2:3-5) Jehovachi seva visvaxiponni kortoleam modem aiz bailancho ankddo chodd asa. (St. 68:11) Dadle zaum bailam, sobhent khuxalkai vaddounk ami soglim vavrunk xoktat. Hem ami dor eklean koxem korunk zata tea vixim fuddlea lekhant polloitolim.