1. Khoinchea eka karonnak lagon Jehovachea lokam modem ekvottkai asa?

AMI Jehovachea lokancho bhag asat dekhun ami khuxal asat. Punn amchea modem xanti ani ekvottkai kiteak asa? Ek karonn mhunnttlear, Jehovan zankam thoddo odhikar dila tankam man diunk ami zata titlo proitn kortat. Khorem mhunnttlear, Jehovan dovorlolea odhikarachi manddavoll ami kitlea borea toren somzotat titli amchi ekvottkai ghott zata.

2. Hea lekhant ami khoinchea prosnanche zobab polloitolim?

² Sobhent konnank odhikar asa, tea vixim ami hea lekhant polloum-ia. Tea bhair, ami hea prosnanche zobab polloitolim: Jehovan bhoinnank sobhent koslem kam dilam? Dor ek bhav, dor eke bhoinnichem mostok zaun asa kai? Sobhentlea vhoddilank ani familichea vhoddilank ek-sarkoch odhikar asa kai? Punn poilim ami amchea bhoinnank koxem lekhunk zai tem polloum-ia.

3. Amchim bhoinnam kortat tea kamam pasot amchem upkariponn ami koxem vaddounk zata?

³ Aplea familichi kallji gheunk, bori khobor porgottunk, ani sobhentlea bhav-bhoinnank modot korunk koxtti vavr korpi bhoinnanche ami upkari asat. Hea bhoinnank Jehova ani Jezu koxe lekhtat tem zannam zalolean bhoinnam pasot amchem upkariponn ami anik vaddounk xoktat. Tea bhair,  tanchea sangata ami koxem vagonk zai, tem ami apostl Pauluchea udharonnam thaun xikonk zata.

4. Jehova bailancho ani toxench dadleancho valor korta mhunn Bible-antlean koxem kolltta?

⁴ Jehova bailancho toxench dadleancho valor korta mhunn Bible-a thaun kollon ieta. Udharonnak, poilea xekddeant, Jehovan bailank toxench dadleank apli povitr xokti dili. Tea udexim, tim ojapachim kamam korunk pavlim. Zoxem, veg-veglle bhaxent tim ulounk pavlim mhunn Bible sangta. (Itihas 2:1-4, 15-18) Bailank toxench dadleank povitr xokte udexim obhixikt kelam ani tim Krista sangta razvottki choloitolim. (Gal. 3:26-29) Bailank toxench dadleank prithumer sasnank jieuncho bhorvonso pasun asa. (Prok. 7:9, 10, 13-15) Ani dadleank ani bailank bori khobor porgottchi zobabdari asa. (Mt. 28:19, 20) Udharonnak, Dhormdutanchea Itihasant amkam Prisila nanvachea bhoinni vixim vachunk melltta. Ti ani ticho ghov Akuilan, bori xikounn aslolea Apollos-ak sotachi anik bori xikounn dili.—Itihas 18:24-26.

5. Lukas 10:38, 39, 42-a pormonnem, Jezun bailank resped dilo mhunn koxem kolltta?

⁵ Jezun bailank man ani resped dilo. Jezu bailam sangata Farizevam bhaxen vagonk na. Farizev bailank, dadlea poros unnea molache mhunn lekhtale ani dusreanchea hujir tanchea sangata uloinasle. Ani Devachea Utra vixim tor, tanchea sangata ulounchech nasle. Punn Jezu Devachea Utrantlea mhotvachea sotam vixim bailam, toxench dadleam lagim uloitalo. * (Lukas 10:38, 39, 42 vachat.) Jezu porgottnnechea bhonvdder voitalo tednam bailam pasun tachea sangata voitalim. (Lukas 8:1-3) Aplea punorjivontponnam vixim apostlank sangcho sueog pasun Jezun bailank dilo.—Juanv 20:16-18.

6. Apostl Paulun apunn bailank resped dita mhunn koxem dakhoilem?

⁶ Bailank man diunk Apostl Paulun Timotak ugddas kelo. Tannem Timotak “zanntea bailank avoio koxeo” ani ‘unne piraiechea bailank bhoinni koxeo’ lekhunk sanglem. (1 Tim. 5:1, 2) Timotacho bhavarth ghott korunk, Paulun taka zaiti modot keli. Punn survatek tachea avoin ani xemain taka ‘Povitr Pustokantlean’ xikoilolem mhunn to visronk na. (2 Tim. 1:5; 3:14, 15) Paulun Romkarank boroil’lea chittient zaitea bhoinnank noman kelo. Tannem tanchea kamancher dhean dilem ani tancho valor korta mhunn sanglem.—Rom. 16:1-4, 6, 12; Filp. 4:3.

7. Atam ami khoinchea prosnanche zobab polloitolim?

⁷ Ami atam meren xiklim toxim, bhoinno bhavam poros unnea molachim mhunn Bible sangona mhunn kolltta. Tim mogall ani udar kallzachim asat ani sobhent xanti ani ekvott samballunk vhoddilank tenko ditat. Punn thoddea prosnanche zobab ami zannam zaunk zai. Zoxe, thoddea vellar eke bhoinnin apli tokli dhampunk zai mhunn Jehova kiteak opekxa korta? Fokot bhav, sobhent vhoddil ani sobhecho sevok mhunn seva kortat dekhun dor ek bhav dor eke bhoinnichem mostok zaun asa kai?

8. Efezkarank 5:23-ant sanglolea pormonnem, dor ek bhav dor eke bhoinnichem mostok zaun asa kai? Somzaiat.

⁸ Sobhentlo dor ek bhav dor eke bhoinnichem mostok na. Punn Krist tancho mostok zaun asa. (Efezkarank 5:23 vachat.) Eka familint ghovak aplea bailecher  odhikar asa. Punn bautizm ghetolo put aplea avoichem mostok nhoi. (Ef. 6:1, 2) Ani sobhent vhoddilank bhav-bhoinnancher purnn odhikar na. (1 Tes. 5:12; Heb. 13:17) Aplea avoi-bapai sangata ravonant tim ankvar bhoinnam aplea avoi-bapaik ani vhoddilank resped ditat. Punn sobhentlea her bhavam sarkem tanchem mostok fokot Jezu zaun asa.

9. Bhoinnamnim thodde pavtti apli tokli kiteak dhampunk zai?

⁹ Sobhent bhokti korchea ani xikounchea kamant fuddarkar gheunk Jehovan dadleank nemla. Punn bailank tannem ho odhikar diunk na. (1 Tim. 2:12) Teach bhaxen, tannem Jezuk dadleancho mostok mhunn nemla. Oxem kelolean sobhent soglem manddavollin cholonk xokta. Punn thodde pavtti sobhent eke bhoinnik, ek bhav korta tem kam korunk poddot. Tea vellar, tinnem apli tokli dhampunk zai mhunn Jehova axeta. * (1 Kor. 11:4-7) Hacho orth, to bhoinnank unnea molachim lekhta oxem nhoi. Tachea bodlek, tannem dovorlolea odhikarachea manddavollik resped dakhounk, hea toren to tankam ek sondhi dita. Hem soglem motint dovrun ami hea prosnacho zobab polloum-ia: Familichea vhoddilank ani sobhechea vhoddilank kitlo odhikar asa?

10. Ek vhoddil sobhe pasot kaide korunk kiteak fuddem soronk xokta?

¹⁰ Vhoddil Kristacho mog kortat ani Jehovan ani Jezun tankam kallji gheunk dilolea ‘xelliancho-i’ te mog kortat. (Juanv 21:15-17) Ani taka lagon eka bapai sarko apunn sobhechea bhav-bhoinnancho mostok mhunn ek vhoddil chintunk puro.  Udharonnak, eka familichea vhoddilak aplea familichi rakhonn korunk kaido korpacho odhikar asa zalear, sobhentlea bhav-bhoinnanchi rakhonn korunk sobhe pasot kaide korunk apleak odhikar asa oxem taka disonk puro. Ani sobhentlim thoddim bhav-bhoinnam, sobhechea vhoddilank aplea pasot nirnnoi ghe mhunn sangon tankam aplo mostok koso korunk puro. Punn sobhechea vhoddilank ani familichea vhoddilank ek-sarkoch odhikar asa kai?

11. Familichea vhoddilank ani sobhechea vhoddilank aslolea odhikarant kitem ek-sarkench asa?

¹¹ Familichea vhoddilank ani ani sobhechea vhoddilank aslolea odhikarant thodde ek-sarkench asa mhunn Paulun sanglem. (1 Tim. 3:4, 5) Udharonnak, familichea sodoxiamnim familichea vhoddilanchem aikol’lem Jehovak zai. (Kol. 3:20) Toxench, sobhentlea bhav-bhoinnamnim sobhentlea vhoddilanchem aikol’lem taka zai. Tea bhair, familiche vhoddil ani sobheche vhoddil zanchi kallji ghetat, tanchea pasot hem soglem kelolem Jehovak zai: Jehovacho mog korunk tannim tankam modot korunk zai, tancheo bhavnatmik gorzo purnn korunk zai ani trasank sampoddloleank modot korunk zai. (Jak. 2:15-17) Toxench, tannim Devache kaide pallunk tankam modot korunk zai. Punn toxem kortana ‘boroil’lem asa tachea  bhair vochunk nozo’ mhunn Bible sangta.—1 Kor. 4:6.

12-13. Romkarank 7:2-a pormonnem, familichea vhoddilank ani sobhechea vhoddilank aslolea odhikarant kitem ontor asa?

¹² Punn sobhechea vhoddilank ani familichea vhoddilank aslolea odhikarant thoddo forok pasun asa. Udharonnank, Jehovan sobhechea vhoddilank neai korpi mhunn nemleat, karonn patok adarun poschatap zainant tosleank sobhentlean bhair ghalchi zobabdari pasun Jehovan tankam dilea.—1 Kor. 5:11-13.

¹³ Teach bhaxen, Jehovan familichea vhoddilank oslo odhikar dila zo sobhechea vhoddilank na. Udharonnak, familichea vhoddilank aplea famili pasot kaide korunk ani tim te pallttat mhunn khatri korun gheuncho odhikar asa. (Romkarank 7:2 vachat.) Zoxem, aplea bhurgeamnim kitlea vorancher ghora porot ieunk zai hem eka familichea vhoddilan tharaunk zata. Ani tannim tem pallunk na zalear tankam xikxa diuncho odhikar pasun taka asa. (Ef. 6:1) Punn to aplea famili pasot oslo kitem-i kaido korta zalear, to aplea baile lagim uloilea uprant kortolo. Karonn tim dogaim ‘ek, vo ek kudd’ mhunn Bible sangta. *—Mt. 19:6.

14. (a) Marku 10:45-ant sanglolea pormonnem, Jezu sobhecho mostok zaunk kiteak purto asa? (b) Sonchalon Monddollachi zobabdari kitem? (“ Sonchalon Monddollachi Zobabdari” hem boks polloiat.)

¹⁴ Jehovan soddvonnechi manddavoll korun, sobhentlea dor ekleak ani Jezucher bhavarth dovortolea sogleank viktim ghetleant. (Marku 10:45 vachat; Itihas  20:28; 1 Kor. 15:21, 22) Tor, aplo jiv bolidan korun, soddvonn dilolo Jezu Krist sobhecho mostok zaunk purto asa. To amcho mostok aslolean dor eklea pasot, famili pasot ani sobhe pasot kaide korche hok’k taka asa. Ami te kaide pallttat kai na te khatri korcho hok’k pasun taka asa. (Gal. 6:2) Punn Jezu fokot kaide korina, punn to dor ekleachi kallji gheta ani mog korta.—Ef. 5:29.

15-16. Bhoinn Marley ani bhav Benjamin-achea utrantlean tumi kitem xiktat?

¹⁵ Apli kallji gheunk Jehovan nemlolea dadleanchem margdorxon bhoinno pallttat tednam tim Kristak resped dakhoitat. Zaitea bhoinnank koxem dista tem amkam United States-ant ravtolea Marley nanvachea bhoinnichea utrantlean kollon ieta. Ti mhunntta: “Ek bail ani sobhentli bhoinn mhunn aslolea suegacho hanv valor korta. Jehovan mhojea ghovak ani vhoddilank dilolea odhikarak resped diunk mhaka proitn korit ravchem poddtta. Punn te mhaka resped ditat ani mhojea kamacho valor kortat mhunn sangtat dekhun he korunk mhaka sompem zata.”

¹⁶ Jehovan dovorlolea odhikarachi manddavoll manun ghetat te bhav, bhoinnank resped ani man ditat. England-ant ravpi Benjamin nanvacho ek bhav mhunntta: “Bhoinnamnim mittingent zobab dilolean, obheas korcheo veg-veglleo vatto ani porgottnni anik bore toren koxi korchi tea vixim sanglolean, mhaka tanchea thaun zaitem xikonk mell’llem. Tim kortat tem kam khub valorachem mhunn mhaka dista.”

17. Jehovan thoddeank odhikar dila hem ami kiteak manun gheunk zai?

¹⁷ Jehovan thoddeank odhikar dila mhunn sobhentlim soglim zoxe, dadlem, bailam, familiche vhoddil ani sobheche vhoddil manun ghetat tednam sobhent xanti asta. Ani sogleant mhotvachem mhunnttlear, amcho mogall sorgincho Bap Jehovak vakhann’nni melltta.—St. 150:6.