1-2. (a) Aiz zaiteank odhikar asloleancher visvas dovrunk kiteak kotthin zata? (b) Hea lekhant ami kitem polloitolim?

AIZ zaitea lokank odhikar asloleancher visvas dovrunk khub kotthin zata. Karonn montri zaum vo korttacho neai-korpi, te girestank favor kortat ani goribam sangata onʼneai kortat. Ani heach pasot, Bible oxem sangta: “Sonvsarant thoddeach lokank podvi asta, ani urlole tanchea xeka thala koxttovtat.” (Up. 8:9) Toxench, aiz dhormik fuddari khub vaitt kamam kortat tem polloun, thoddea lokank Devacher visvas uronk na. Ani hea pasot, ami konnachea-i sangata Bible obheas kortat tednam Jehovacher ani tachea songottnnent fuddakar ghetoleancher visvas dovrunk tankam kotthin zaunk puro. Tor tea vellar ami tankam modot korunk zai.

² Punn fokot amchea Bible videartheaninch nhoi, sotant zaitim vorsam aslolim ami pasun, Jehova ani tachem songottonn sodanch sarkem tench korta mhunn amkam aslolo visvas ghott korunk zai. Punn thodde pavtti, Jehovacher aslolea amchea visvasachi porikxa zaunk xokta. Tantuntleo tin poristhiti ami hea lekhant polloitolim: (1) Bible-antleo thoddeo ghoddnneo vachtat tednam, (2) Jehovachea songottnne thaun margdorxon melltta tednam, (3) Amkam fuddarak oddchonneancho fuddo korcho poddttolo tednam.

3. Bible-antleo thoddeo ghoddnneo vachtana amchea monant kosle prosn ieunk xoktat?

 ³ Ami Bible vachtat tednam Jehova eka munxa sangata umkech toren kiteak vaglo vo tannem umkoch nirnnoi  kiteak ghetlo tem somzonk amkam kotthin zaunk xokta. Udharonnak, Lokgonntichea pustokant ek Israelitkar, Sabatachea disa lakddam punzaitalo dekhun Jehovan taka mornnachi khast dili mhunn ami vachtat. Punn Dusrea Samuelant, zaitea vorsam uprant, David, Bathsheba sangata pordvar korta ani tichea ghovak jivexim marun uddoita tednam Jehova taka bhogxita mhunn ami vachtat. (Lok. 15:32, 35; 2 Sam. 12:9, 13) Tor heo donui ghoddnneo vachtana ami ghoddie oxem chitunk puro, ‘Tea Israelitkaran itli lhan chuk keli tednam Jehovan taka itli vhoddli khast kiteak dili? Ani Raza Davidan itlem vhoddlem patok adarlem tednam Jehovan taka kiteak bhogxilo?’ Osle prosn amchea monant ietat tednam hea tin vostuncher dhean dilear amkam amchea prosnanche zobab mellttole.

4. Utpoti 18:20, 21, ani Dusri Somurt 10:17-ntlean, Jehova korta tem sodanch sarkem mhunn amcho visvas koso ghott zata?

⁴Eke ghoddnne vixim Bible amkam sodanch soglich mahiti dina. Udharonnak, Davidan khoreanich poschatap kelʼlo mhunn amkam Bible sangta. (St. 51:2-4) Punn Sabatacho kaido moddlolo to munis koslo aslo tea vixim Bible amkam sangona. Zoxem, apnnem kelam tea vixim taka vaitt dislem kai vo adim tannem Jehovache kaide pallunk nant kai vo zaite pavtti xittkaunni mellon pasun tannem teo kanar gheunk nant kai, hache vixim Bible amkam kainch sangona. Punn ami ek ugddas dovrunk zai ki Jehova “nitt titlem-i to korta.” (D.S. 32:4) To kednanch onʼneai korina. Tor Jehova bhed-bhav korun vo lok kitem mhunnttat tachea adarit nirnnoi ghena, nhoi mhunn anik koslea-i karonnank lagon onʼneai korina. Punn tache nirnnoi sodanch puraveancher adarit astat. (Utpoti 18:20, 21; Dusri Somurt 10:17 vachat.) Tor jitlim chodd ami Jehova Deva vixim ani tachea dorjeam vixim xiktolim, titlench, to korta tem sarkem mhunn tacher amcho visvas vaddttolo. Tor ami Bible vachtat tednam amkam amchea prosnanche zobab atam mellonant zalear pasun, ami hi khatri dovrunk zata ki “Sorvesporacheo vatto soglleoch promannikponnacheo.”—St. 145:17.

5. Ami opurnn aslolean kitem zaunk xokta? (“ Ami Opurnn Aslolean Eka Vixoi-a vo Poristhiti Vixim Amchem Chintop Chukonk Xokta” hem boks pasun polloiat.)

⁵Ami opurnn asat dekhun ami soglech pavtti sarke toren nit korunk xokonant. Jehovan amkam apleach sarkim rochleant dekhun, dusream sangata onʼneai zalolo amkam naka. (Ut. 1:26) Punn ami opurnn asat dekhun  eka vixoi-a vixim amkam sogli khobor aslear pasun, ami nit kortat tednam chukonk xoktat. Hea vixim amkam Jonasachem udharonn asa. Nineveh xarantlea lokamnim poschatap kelea uprant, Jehovan tankam doia dakhounk tharailem tednam, Jonas kitlo ragar zalo tem ugddas korat. Punn Jehovan tea lokank doia dakhoilolean kitem zaunk pavlem? (Jonas 3:10–4:1) Poschatap kelolea 1,20,000-a poros chodd Ninevehchea lokancho jiv salvar zalo! Tor hantuntlean amkam kollon ieta ki Ninevehchea lokam vixim Jehova nhoi, punn Jonas sarke toren nit korunk chuklo.

6. Apunn gheta tea nirnnoi-anchi Jehovan somzonni diunchi kiteak goroz na?

⁶Apnnem umkoch nirnnoi kiteak ghetla tem Jehovan munxank sangchi goroz na. Hem khorem ki adlea kallar, apnnem nirnnoi gheunchea poilim ani nirnnoi ghetlea uprant, tea vixim aplea sevokank koxem distalem tem Jehovan aikolem. (Ut. 18:25; Jonas 4:2,3) Toxench, thodde pavtti apnnem ghetlolea nirnnoi-a vixim tannem tankam somzailem. (Jonas 4:10, 11) Punn Jehova amcho Rochnnar zalʼlean, nirnnoi gheunchea poilim vo uprant, tannem amkam vicharpachi goroz na, nhoi mhunn tannem umkoch nirnnoi kiteak ghetlo tea vixim somzaupachi-i goroz na.—Iz. 40:13, 14; 55:9.

7. Amkam kitem korunk kotthin zaunk puro, ani kiteak?

⁷ Jehova sodanch sarkem tem korta mhunn tacher visvas dovrunk amkam sompem asa astolem. Punn tannem aplea songottnnent fuddakar gheunk nemlolea bhavancher visvas dovrunk amkam ghoddie kotthin zaunk puro. Karonn, te Jehovachea margdorxona pormonnem nirnnoi ghetat kai apleak zai tem kortat, oso amchea monant ghoddie dubhav ieunk xokta. Bible-ant sanglolea thoddea lokank pasun osloch dubhav ailo astolo. Oxem ami kiteak mhunnonk zata? Hem zannam zaunk,  peregraf 3-ant polloilʼlea udharonnacher ami portun dhean dium-ia. Sabatacho kaido moddlolea munxachea eka soirean oxem chintlem astolem, ‘Mornnachem formonn marche poilim Moizesan khoreaninch Jehovacho solʼlo ghetlolo kai?’ Toxench Davidan Bathsheba sangata pordvar kelea uprant tichea ghovachea eka ixttan oxem chintlem astolem, ‘Davidak moronn favo. Punn to ek raza dekhun tannem aplo odhikar uzar korun apleak vattailo astolo.’ Punn ami hem ugddas dovrunk zai ki Jehova fuddakar gheunk nemta tancher to visvas dovorta. Tor ami tancher visvas dovornant zalear amkam Jehovacher pasun visvas na mhunn ami dakhoitat.

8. Itihas 16:4, 5-ant jem sanglam ani aiz Kristi sobha jea toren cholta tantunt kitem ek-sarkem asa?

⁸ Aiz Jehova “visvaxi ani xannea chakrak” uzar korun prithumer aslolea aplea songottnnek margdorxon dita. (Mt. 24:45) Poilea xekddeantlea sonchalon mondolla bhaxen, ho chakor sonvsarbhor choltolea Devachea lokanchem kam polloun gheta ani sobhenk vhoddilam udexim margdorxon dita. (Itihas 16:4, 5 vachat.) Tor Jehovache songottnne thaun ani vhoddilam thaun ieta tem margdorxon ami palltat tednam Jehovachea margdorxonacher amkam visvas asa mhunn ami dakhoitat.

9. Vhoddilam thaun ieta tem margdorxon pallunk amkam kednam kotthin zaunk puro, ani kiteak?

⁹ Punn thodde pavtti, vhoddilam thaun ieta tem margdorxon pallunk amkam kotthin zaunk puro. Udharonnak, halinchea vorsamnim zaitea sobhamnim ani sorkittamnim bodlav zala. Zoxem Raj-ghorant sogleank bosonk suvat asonk zai dekhun vhoddilamnim thoddea porgottnnarank dusrea eke sobhent vochonk sanglam. Osle nirnnoi ghetana vhoddilank sorgar thaun kaim prerona mellona. Tor tea vellar, tannim sarko nirnnoi ghetla kai na tem chintchea bodlek ami tancher visvas dovrunk  zai. Karonn te ghetat tea nirnnoi-ancher Jehovak visvas asa. *

10. Hebrevank 13:17 pormonnem, vhoddil ghetat te nirnnoi ami kiteak manun gheunk zai?

¹⁰ Punn vhoddil ghetat te nirnnoi amkam avoddnant zalear ami kitem kortolim? Ami khaltikaien te manun gheunk zai. Karonn ami oxem kortat tednam sobhent ekvott urta ani vaddavoll zata. (Ef. 4:2, 3; Hebrevank 13:17 vachat.) Ani mhotvachem mhunnttlear, Jehovak tancher visvas asa dekhun tanchem ami aikotat tednam amkam Jehovacher visvas asa mhunn ami dakhoun ditolim.—Itihas 20:28.

11. Vhoddil ditat tea margdorxonacher amcho visvas ami koso vaddounk zata?

¹¹ Vhoddil ditat tem margdorxon sarkem asa mhunn amcho visvas ami koso vaddounk zata? Ami hea vixim chintunk zata. Poilem mhunnttlear, sobhe vixim kosle-i nirnnoi gheunchea poilim, vhoddil magnneam udexim Jehovachi povitr xokti magtat. Dusrem, tea nirnnoi-ak lagu zatat toslim Bible-antlim totvam ani songottnne thaun ieta tem margdorxon te bariksannen polloitat. Toxench, te ghetat tea nirnnoi-ank lagon tannim Jehovak hixob diuncho poddttolo mhunn te ugddas dovortat. (1 Ped. 5:2, 3) Tea bhair, te Jehovak manvota tem korunk ani tachea lokanchi bori kallji gheunk vavurtat. Hea vixim chintat. Eke vatten zat, dhorm, ani rajkaronnak lagon sonvsarant futt poddlea. Punn, dusrea vatten Jehovachi bhokti kortoleam modem ekvott asa. Ani hem, Jehovachem besanv tachea songottnnecher asa dekhunuch zaunk pavlam.

12. Eka munxan khorench poschatap kela kai na tem zannam zaunk vhoddil kitem-kitem kortat?

¹² Toxench sobha nitoll dovorchi vhodd zobabdari Jehova Devan vhoddilank dilʼli asa. Tor ek Kristanv ek vhodd patok adarta tednam, taka sobhent dovorcho vo sobhentlean bhair kaddcho tea vixim vhoddilamnim nirnnoi ghetlolo Jehovak zai. Tor sarko to nirnnoi gheunk vhoddilank zaito sodh korcho poddtta. Zoxem, tea munxan khoreaninch poschatap kela kai na tem tannim zannam zaun gheunk zai. To ghoddie hoi mhunnot punn apnnem khorench poschatap kela mhunn to aplea kornneamnim dakhoita kai? Apnnem kitem kelam tachi taka vitt ieta kai? Apunn tem porot korchona mhunn tannem nichov kela kai, vo vaitt sangateank lagon to tem korunk pavla zalear tea vaitt sangateank soddunk to toiar asa kai? Hem soglem vhoddil polloitat. Toxench, te Jehova lagim magnnem kortat, purave polloitat, ani Bible hache vixim kitem sangta tea vixim chintʼtat. Tea bhair, patok adarlam tacho sobhav pasun te polloitat. Ani hem soglem polloilea uprant, taka sobhent dovorcho kai na ho nirnnoi te ghetat. Punn thodde pavtti taka sobhentlean bhair kaddcho mhunn te tharaitat.—1 Kor. 5:11-13.

13. Amchea eka laginchea ixttak vo familichea sodoxiak sobhentlean bhair kaddlo zalear ami ghoddie kitem chintunk puro?

¹³ Vhoddil konnakui sobhentlean bhair kaddttat ani to munis amcho lagincho ixtt vo sodoxia nhoi zalear, vhoddilancho ho nirnnoi manun gheunk amkam ghoddie chodd kotthin zaunchem na. Punn to munis amcho lagincho ixtt vo familicho sodoxia zalear, vhoddilancho ho nirnnoi manun gheunk amkam kotthin zatolem kai? Oslea vellar vhoddilamnim sogle purave bariksannen pollounk nant vo Jehovak zai tea toren tannim nirnnoi gheunk na oxem ami chintʼtolim kai? Tor sarkem chintop dovrunk ani vhoddilancher visvas dovrunk amkam koxi modot zatoli?

14. Amchea eka laginchea ixttak vo familichea sodoxiak sobhentlean bhair kaddla zalear, vhoddilanchea nirnnoi-acher visvas dovrunk kitem ugddas dovorlolean amkam modot zatoli?

¹⁴ Patok adarta taka sobhentlean bhair kaddop, hi Jehovachi manddavoll mhunn  ami ugddas dovrunk zai. Toxench, hea vorvim sobhek faido zata. Karonn patok adarta taka sobhentlean bhair kaddinant zalear dusrim pasun tachi vaitt dekh gheunk xoktat. (Gal. 5:9) Tea bhair, oxem kelolean patok adarlam taka tannem kitlo vhoddlo guneanv kela tem kollon ietolem ani tachem chintop ani vagnnuk bodlunk ani Jehova lagim ixttagot zoddunk to fuddem soronk pavtolo. (Up. 8:11) Toxench, sobhentlean konnakui bhair kaddop hi ek gombhir zobabdari mhunn vhoddil vollkhon ghetat. Karonn Israelant aslolea neai korpeam bhaxen te ‘munxam khatir nhoi punn Jehova khatir nit kortat’ mhunn te ugddas dovortat.—2 It. 19:6, 7.

15. Jehova thaun ieta tem margdorxon ami atam pallop kiteak gorjechem?

¹⁵ Jehova korta tem sodanch sarkem mhunn ami tacher amcho visvas vaddounk zai. Kiteak? Karonn beginuch hea vaitt sonvsaracho nas zauncho asa, ani vhodd sontapa vellar amkam ghoddie somzonk vo apnnaunk kotthin zata toslem margdorxon mellonk xokta. Ani hem margdorxon Jehova amkam svota zaun diunchona. Punn chodd korun tache songottnnent fuddakar ghetolea bhavam udexim to tem margdorxon ditolo. Tor tea vellar ami ghoddie chintunk puro, ‘Hem margdorxon khorench Jehova koddlean ailam kai? Vo fuddakar ghetole bhav apleak zai toxem kortat?’ Hea ekdom gorjechea vellar, ami Jehovacher ani tache songottnnecher visvas dovortolim mhunn koxi khatri korun gheunk zata? Jehovache songottnne thaun ieta tem margdorxon atam ami pallttat zalear fuddarak vhodd sontapa vellar mellttolem tem margdorxon pallunk amkam sompem zatolem.—Lukas 16:10.

16. Armageddona vellar Jehovachea nirnnoi-ancher visvas dovrunk amkam kiteak kotthin zaunk xokta?

¹⁶ Ami anik eka vixoi-acher dhean diunk zai. Ami ghoddie chintunk puro ki sotant naslolim amchea familintlim vo amchim soirim xevott ieunchea poilim Jehovachi seva korunk lagtolim ani salvar zatolim. Punn Armageddona vellar vo hea noxttea sonvsarachi zhoddtti zata tednam Jehovan konnank doia dakhounchi ani konnank dakhounchi nhoi tem ami tharaunchim nant. (Mt. 25:34, 41, 46) Karonn konn salvar zatolo tem Jezu udexim fokot Jehova Dev tharaitolo. (Mt. 25:31-33; 2 Tes. 1:7-9) Tor tea vellar, Jehova gheta to nirnnoi sarko asa mhunn ami manun ghetolim, vo tannem sarko nirnnoi gheunk na oxem chintun ami tachi seva korop soddun ditolim? Atam ami Jehovacher amcho visvas ghott kortat zalear fuddarak to gheta tea nirnnoi-ancher purnn toren visvas dovrunk amkam sompem zatolem.

17. Armageddonachea vellar Jehovan ghetlolea nirnnoi-am udexim amkam koso faido zatolo?

¹⁷ Armageddonachea vellar Jehovan ghetlolea  nirnnoi-am udexim sogleank kitlo faido zatolo tea vixim chintat. Poilem mhunnttlear, khotto dhorm aschona. Axeche veapar-dhonde vo lokancher dobhav ghalun tankam tras kortat tosle sorkar aschenant. Duensam ani zanntteponn aschem na. Toxench, ami amchea mogacheank mornnant sanddchinant. Soitan ani tache dut hozar vorsam porian bondkhonnint astole, ani tankam lagon zalʼlem soglem vaittponn anik aschem na. (Prok. 20:2, 3) Khorench, tea vellar Jehovachea nirnnoi-ancher ami visvas dovorlo mhunn ami kitlim khuxal zatolim!

18. Lokgonnti 11:4-6 ani 21:5-ant sanglolea Israelitkaranchea udharonnantlean amkam kosli xittkaunni melltta?

¹⁸ Punn novea sonvsarant Jehovacher visvas dovrunk amkam kotthin zaunk xokta kai? Israelitkarank, Ejiptantlea gulamponnantlim soddoilim tednam kitem zalem tea vixim chintat. Ejiptant mellttolea tajea jevnna vixim chintun tim gunngunnunk laglim ani Jehovan dilʼlea manʼna pasot tannim upkariponn dakhounk na. (Lokgonnti 11:4-6; 21:5 vachat.) Punn vhodd sontap zalea uprant, amkam-i toxem zaunk xokta kai? Karonn hi prithum saf korunk ani sovkas-sovkas ti ek sobit bag korunk amkam ghoddie zaito vavr korcho poddttolo. Ani survatek soglem sompem aschem na. Tor tea vellar Jehova amkam jem kitem dita tea vixim ami gunngunnttolim kai? Ami ek ugddas dovrunk zai: Jehova dita tea soglea vostum pasot ami atam upkari asat zalear, ami fuddarakui chodd korun upkari astolim.

19. Hea lekhant tumi kitem xiklim?

¹⁹ Tor Jehova jem kitem korta tem sodanch sarkem, mhunn ami khatri dovrum-ia. Toxench, aple songottnnent margdorxon diunk tannem nemleat tancher ami visvas dovrum-ia. Ani Jehovan, Izaias provadia udexim sanglolim him utram ami sodanch ugddas dovrum-ia: “Xant ravun Mhojer visvas tthevxat tor, Hanv tumkam bollixtt kortolom.”—Iz. 30:15.