1. Jehovache lok kiteak lagon tachi seva kortat?

ZAITEA vorsam adim Jehovache lok tachi seva korunk Jezuchea odhikara khala ‘ap-khuxen tenko ditole’ mhunn Bible-ant bhasaunni kelʼli. (St. 110:3, NW) Ani hi bhasaunni aiz purnn zata tem amkam dison ieta. Dor vorsak, Jehovache sevok porgottnni korunk lakʼkhamnim voram sartat. Ani hem kam korunk tankam pagar mellona, punn te ap-khuxen tem kortat. Toxench tim aplea bhav-bhoinnank gorjecheo vostu mellonk, tankam urba diunk ani Jehovacher tancho bhavarth ghott korunk tankam modot kortat. Tea bhair, vhoddil ani sobheche sevok mittinge pasot toiari korunk ani bhav-bhoinnank urba diunk zaito vell sartat. Tor Jehova pasot ani lokam pasot aslolea mogak lagon Jehovache sevok hem soglem kortat.—Mt. 22:37-39.

2. Romkarank 15:1-3-a pormonnem, Jezun amkam kosli dekh dovorlea?

² Jezun sodanch aplea gorzam poros chodd dusreanchea gorzancher dhean dilem. Tor Jezuchi dekh gheunk ami zata titlo vavr kortat tednam amkanch faido zatolo. (Romkarank 15:1-3 vachat.) Karonn Jezun mhunnttlem: “Dusream koddchem gheunche poros dusreank divop odik vhodd bhag.”—Itihas 20:35.

3. Ami hea lekhant kitem polloitolim?

³ Tor dusreank modot korunk Jezun kitem kelem, ami tachi dekh koxi gheunk zata, ani dusreanchi seva korunk ami amchi itsa koxi vaddounk zata tem ami hea lekhant polloitolim.

4. Jezun aplea gorzam poros chodd dusreanchea gorzancher dhean dilem mhunn amkam koxem kolltta?

⁴Thoklolo astana pasun Jezun dusreank modot keli. Jezu chodd korun Kapernaumachea dongra lagim aslo tednam kitem zalem tea vixim chintat. Jezun akʼkhi rat magnnem kelʼlem. Tor to khub thoklolo astolo. Punn uprant ek vhodd zomo taka mellonk thoim ailo tednam Jezuk tanche churchure disle. Karonn tanchea modem gorib ani duent lok aslo. Ani Jezun fokot tankam borinch korunk nant punn ek ekdom urbebhorit bhaxonn dilem, jea bhaxonnak aiz ami Dongrar Dilʼlo Updes mhunnttat.—Lukas 6:12-20.

5. Familiche vhoddil Jezuchi dekh koxi ghetat?

⁵Familiche vhoddil Jezuchi dekh koxi ghetat? Hea udharonnam vixim chintat: Akʼkho dis kam kelea uprant ek familicho vhoddil khub thokla. Tor to ghora ailea uprant tea sanjer asloli Kuttumbik Bhokti korchi nhoi oxem taka dista. Punn uprant Kuttumbik Bhokti korunk apleak ghottai di mhunn to Jehova lagim magnnem korta. Jehova tachea magnneacho zobab dita ani dor sumana bhaxen tanchi Kuttumbik Bhokti bore toren zata. Hantuntlean tanchea bhurgeank ek gorjechi vost xikonk melltta. Tem mhunnttlear, Jehovachi seva korop tanchea avoi-bapaik sogleam-von chodd mhotvachem zaun asa.

6. Jezun udarponnan aplo vell dusreank koso dilo tem somzaunk ek udharonn diat.

⁶Jezun udarponnan dusream pasot aplo vell dilo. Jezucho ixtt Juanv Batistak jivexim marlo mhunn Jezuk kollon ailem tednam taka kitlem dukh zalem astolem tea vixim chintat. Hea vixim Bible sangta: “Hem aikona fuddem, Jezu thoicho bhair sorlo ani hoddear bosun eke eksure svater, eklo ravche khatir, koddsorun gelo.” (Mt. 14:10-13) Tor Jezu eksuro kiteak ravonk sodhtalo tem ami somzonk xoktat. Karonn aiz zaitim zannam aplea mogacheank mornnant sanddleant mhunn dukh kortat tednam eksurim ravonk sodhtat. Punn Jezuk toxem korunk mellonk na. Karonn tea suvater Jezu pavche poilinch lokancho ek vhodd zomo thoim pavlo. Punn Jezun kitem kelem? Tankam modotichi ani Deva koddlean bhuzvonnechi goroz asa tem Jezun polloilem. Jezuk tanche “churchure disle” ani tannem tankam modot keli. Tem mhunnttlear, thoddeoch vostu nhoi punn “sobar vostu To tankam xikounk laglo.”—Marku 6:31-34; Lukas 9:10, 11.

7-8. Sobhent konnakui modotichi goroz poddtta tednam vhoddil Jezuchi dekh koxi ghetat tem somzaunk ek udharonn diat.

 ⁷Vhoddil Jezuchi dekh koxi ghetat? Jezu bhaxen vhoddil svarth nastana aplo vell dusreank lagon uzar kortat. Ani hea pasot ami tanche khub upkari asat. Punn thodde pavtti vhoddil kortat tea soglea kamam vixim choddxea bhav-bhoinnank khobor asona. Udharonnak, bhav-bhoinnam hospital-ant astana tankam modotichi goroz poddtta zalear Hospital Liaison Somitintle vo HLC-ntle vhoddil rokddech tanchea adarak pavtat. Ani chodd korun ratcheach vellar osli goroz poddtta. Punn vhoddilank ani tanchea familik bhav-bhoinnanchi doia-maia asa dekhun tim vell polloinastana tankam modot korunk fuddem sortat.

⁸ Toxench, vhoddil Raj-ghoram ani her bandkamachea kamant vantto ghetat ani odruxttak sampoddloleank pasun modot kortat. Tea bhair, te amkam sogleank xikounk ani urba diunk aplo zaito vell sartat. Tor hea vhoddilank ani tanchea familink khorench xabaski favo! Ani Jehovachem besanv sodanch tancher asum mhunn ami magtat. Punn ami sogleamnim, khas korun vhoddilamnim somjikai dakhounk zai. Tem mhunnttlear, tannim sobhechea kamamnim itlo vell ghalunk zaina ki tanchea familicheo gorzo purnn korunk tankam velluch mellona.

9. Filipkarank 2:4, 5-a pormonnem, ami sogleamnim kitem korunk zai?

⁹ Filipkarank 2:4, 5 vachat. Ami soglim vhoddil nant tem khorem. Punn Jezu bhaxen ami pasun amchea poros chodd dusreanchea  gorzancher dhean diunk xikonk zata. Bible amkam Jezu vixim sangta ki tannem “gulama-akar dhorlo.” (Filp. 2:7) Hea versa thaun ami kitem xikonk zata? Ek gulam vo chakor aplea dhoniak khuxal korunk, zata titlo vavr korta. Tor ami pasun Jehovache chakor zaun asat ani amchea bhav-bhoinnanchi seva kortat dekhun ami tanchea pasot anikui chodd vavr korunk sodhtat. Ami hem koxem korunk zata tem fuddem polloum-ia.

10. Ami amkanch kosle prosn vicharunk zatat?

¹⁰Tumcho sobhav koso asa tea vixim chintat. Ami amkanch osle prosn vicharunk zatat: ‘Dusreank modot korunk mhojeo gorzo mhaka fatti ghalunk poddttat tednam hanv toxem korunk toiar asa kai? Udharonnak, hospital-ant aslolea eka zannttea bhavak mellonk vo eke zanntte bhoinnik mittingek vhoronk mhaka sanglam zalear hanv kitem kortolo? Odhivexon zauncho asa to zago nitoll korunk vo Raj-ghorachi dekhrekh korunk ap-khuxen vavurpi bhav-bhoinnanchi goroz asa zalear hanv thoim rokddoch modot korunk voitam kai?’ Ami oxem kortat tednam Jehova ekdom khuxal zata. Karonn ami Jehovak somorponn kelʼlem tea vellar ami svarth nastana amcho vell, takot ani amchea lagim asat teo vostu tachi seva korunk uzar kortolim mhunn taka bhas dilʼli. Punn ami khoim tori sudharnni korunk zai mhunn amkam kollon ieta zalear ami kitem korunk zata?

11. Amkam sudharnni korunk disona zalear ami kitem korunk zai?

¹¹Kallzantlean Jehova lagim magnnem korat. Tumi khoim tori sudharnni korunk zai mhunn tumkam kollon ailam astolem. Punn tumkam toxem korunk disona zalear kitem? Jehova Deva lagim kallzantlean magnnem korat. Tumkam koxem bhogta tea vixim taka ukteponnim sangat. Toxench, tumchem ‘mon thir korunk ani tea pormonnem jieunk tumkam boll di’ mhunn Jehova lagim magat.—Filp. 2:13.

12. Bautizm ghetlole tornnatte bhav, sobhek koxe toren modot korunk xoktat?

¹² Tum bautizm ghetlolo ek tornnatto bhav zalear sobhent aslolea bhav-bhoinnank modot korunk tuka itsa di mhunn tunvem Jehova lagim magonk zata. Karonn songottnnent vaddavoll zata toxi, sobhent tornnattea bhavanchi odik chodd goroz asa. Thoddea desant aslolea sobhamnim thoddech sobheche sevok asat ani tantuntle choddxe bhav zanntte asat. Tor sobhent goroz asa tednam tum bhav-bhoinnachi modot korunk toiar asa zalear tum Jehovak manvota tem korunk pavtolo, tum dusreank modot korunk toiar asa mhunn bhav-bhoinnank kollon ietolem, ani dusreank modot kelolean tuka khuxalkai mellttoli.

13-14. Amchea bhav-bhoinnank modot korunk ami kitem korunk zata? (Masikachem fuddlem chitr polloiat.)

¹³Bhav-bhoinnank kosli goroz asa tea vixim chintat. Apostl Paulun Judeiant ravtolea Kristanvank oxem sanglem: “Bhavponnachea mogan ekamekak adar diun borem korunk visrum nakat: kiteak osle iodn Devak manovtat.” (Heb. 13:16) Ho solʼlo tankam ekdom boreak poddlo! Karonn hi chitt mellon thoddeach vella uprant tankam tanchim ghoram, veapar-dhondo ani sotant naslolea soireank soddun “dongracher pollun vechem” poddlem. (Mt. 24:16) Tor Judeiantlea Kristanvamnim pollon voichea poilinch Paulucho solʼlo apnnailʼlo zalear hea vellar pasun eka-mekak modot korunk ani aplea lagim thoddem kitem asa tantunuch dhadoxi ravonk tankam sompem zatolem aslem. Karonn atam oxem korop chodd gorjechem aslem.

¹⁴ Aiz pasun amchea bhav-bhoinnank amchea modotichi goroz asa. Punn tankam modot zai mhunn ti sodanch amkam ieun ghoddie sangchimnant. Udharonnak, eka bhavachi bail bhair poddlea zait. Tor taka jevonn randunk, ghorantlim her kamam korunk, vo khoinsorui vhoron haddunk modot zai astoli. ‘Punn  dusreank gorje bhair tras kiteak?’ oxem chintun to ghoddie modot magonk fatti sorot. Tea vellar ami svota zaun taka modot korunk fuddem sortat zalear taka amchi modot gheunk borem distolem. Tor, konnui dusro taka modot kortolo vo taka adar zai zalear to amkam sangtolo, oxem chintchea bodlek ami amkanch vicharunk zata, ‘Hanv tachea zagear aslo zalear mhaka kosle modotichi goroz poddttoli asli?’

15. Ami dusreank modot korunk sodhtat zalear ami kitem korunk zai?

¹⁵Dusreank tumche lagim ulounk sompem zata toslo sobhav dovrat. Amchea sobhent ami thoddea bhav-bhoinnank vollkhotat astolim, jim dusreank modot korunk sodanch toiar astat. Tim gorjechea vellar amkam modot kortolim mhunn amkam khatri asta, ani ami tankam bejar kortat oxem tim kednanch chintinant. Tor ami pasun tancheach bhaxen zaunk anvddetat. Alan nanvacho 45 vorsancho vhoddil tosloch munis zaunk anvddeta. Jezuchea udharonnacher niall korun Alan oxem mhunntta: “Jezu khub bizi aslo. Tori astana, soglea piraieche lok tache lagim ietale ani tacho adar magonk kednanch fatti-fuddem zainasle. Karonn Jezuk tanchi kallji asli mhunn te zannam asle. Mhaka pasun Jezu bhaxen zaunk zai karonn oxem kelolean hanv mhojea bhav-bhoinnanchi kallji korta mhunn tankam dison ietolem ani mhojea lagim modot magonk tim fattim-fuddem sorchimnant.”

16. Stotr 119:59, 60-ant sanglam tem apnnailolean Jezuchi dekh gheunk amkam koxi modot zata?

¹⁶ Thodde pavtti ami chukonk xoktat ani ami purnn toren Jezu bhaxen zaunk pavchimnant oxem amkam disonk puro. (Jak. 3:2) Punn nirax zainakat. Ugddas dovrat: Ek videarthi aplea xikoupea thaun chitram kaddunk xikta tednam to sarko tacheach bhaxen chitram kaddunk xokona. Punn to xikoupea thaun xikot ravta ani tachea bhaxen chitram kaddunk zata titlo proitn korta tednam to sudharnni korit  ravtolo. Teach bhaxen, ami svotachea Bible obheasant xiktat tem apnnaun sudharnni korit ravtat tednam ami Jezu bhaxen zaunk pavtolim.—Stotr 119:59, 60 vachat.

17-18. Jezuchi dekh gheunk ami zata titlo proitn kortat tednam amkam koso faido zatolo?

¹⁷ Ami amcheo gorzo fatti dovrun dusreank modot korunk fuddem sortat tednam dusreankui toxench korunk urba melltta. Ek vhoddil zachem nanv Tim zaun asa, to oxem sangta: “Amchea sobhent aslolea tornnatteamnim bori vaddavoll kelea ani te tornnatte piraiecheruch sobhecho sevok zaleat. Hachem ek karonn mhunnttlear, dusrim her bhav-bhoinnank modot korunk fuddem sortat tem polloun tankam-i toxench korunk urba mellʼlli. He bhav amche sobhek khub modot korunk pavleat ani vhoddilank pasun tenko diunk pavleat.”

¹⁸ Aiz choddso lok apleach vixim chintat toslea sonvsarant ami jietat. Punn Jehovache sevok, Jezuchi dekh gheunk, zata titlo proitn kortat dekhun hea sonvsarachea lokam poros te veglle asat. Te Jezu bhaxen aplea gorzam poros chodd dusreanchea gorzancher dhean ditat. Ami purnn toren Jezu bhaxen zaunk xokonant tem khorem. Tori astana, tachea ‘pavlamnim cholonk’ ami zata titlo vavr kortat. (1 Ped. 2:21) Ami oxem kortat tednam Jehovak manvota tem ami korunk pavtolim ani hem zannam zaun ami khuxal zatolim.