SOMURTI khala, Israelitkaramnim Jehovak parve ani kovdde bhettounni mhunn diunk zatale. Ani Bible-ant bhettounne vixim kaide vachtana, hea donui suknneam vixim sodanch borabor sanglolem asa. Tor Jehovan kovdde ani parve, him donui torechim suknnim bhettounni mhunn manun ghetlolean Israelitkarank boreak koxem poddlem? (Lev. 1:14; 12:8; 14:30) Ek karonn mhunnttlear, kovdde sodanch sompeponnim mellonasle. Kiteak? Israelant kovdde fokot gormecheach disamnim astat.

Dor vorsak, Otumbr mhoinneant, kovdde gormi aslolea dusrea desamnim voitat ani Israelant thonddeche dis kabar zalea uprant te thoim porot ietat. (Git. 2:11, 12; Jer. 8:7) Tor hea pasot, adlea tempar Israelitkarank bhettounni korunk kovdde mellonk khub kotthin zatalem.

Punn dusre vatten parve mellonk khub sompem aslem, karonn te voros-bhor Israelantuch astale ani lok parveank postale. (Juanv 2:14, 16 sor korat.) Bible Plants and Animals hea pustoka pormonnem, “Palestine-ant aslolea soglea ganvamnim ani xaramnim lok parve postale. Tor dor eka ghorant vonnttir suknneank ravonk zago korun dovortale.”—Izaias 60:8 sor korat.

Tor voros-bhor Israelitkar Jehovak suknnim bhettounni mhunn diunk xoktale ani Jehova tem manun ghetalo. Hantuntlean, Jehova kitlo mogall ani somjikaiecho asa tem amkam kollon ieta.