1. Soglim makhlolim Kristanvam kednam sorgar astolim?

 ZAITEA vorsam poilim, Jehovachea lokanchea monant ek prosn aslo. To mhunnttlear, ‘Prithumer aslolea urlolea makhlolea Kristanvam modlo sogleam-von nimanno kednam sorgar voitolo?ʼ Ami poilim chintʼtalim ki Armageddonachem zhuz zalea uprant, thoddim makhlolim ghoddie thoddea vella pasot prithumer sobit bagent jietolim. Punn Julay 15, 2013-chea Pahrogopur-ant ami xiklim ki Armageddonachem zhuz suru zaunchea poilim, soglim makhlolim Kristanvam sorgar astolim.—Mt. 24:31.

2. Thoddim kitem vicharit, ani ami kitem polloitolim?

² Punn thoddim oxem vicharit: ‘Vhodd sonkoxttachea’ vellar visvaxiponnan Jehovachi seva kortolea Jezuchea ‘dusrea menddreanchem’ kitem zatolem? (Ju. 10:16; Mt. 24:21) Tor amchim mogall makhlolim bhav-bhoinnam sorgar gelea uprant amchem kitem zatolem, mhunn amkam usko zaunk xokta. Kiteak? Ghoddie Bible-antlea don ghoddnneank lagon. Tor teo don ghoddnneo ami polloum-ia, ani amkam kiteak usko korchi goroz na tem-ui polloum-ia.

KITEM ZAUNCHEM NA?

3-4. Thoddim ghoddie kitem chintit, ani kiteak?

³ Sonchalon Monddollantle makhlole bhav hea prithumer amkam margdorxon diunk aschenant tednam, dusrim menddram  sot soddun voitolim kai mhunn thoddim chintit. Bible-antlea umkeach ghoddnneank lagon tankam oxem disonk xokta. Tor ami don udharonnancher dhean dium-ia. Poilem, Mha-iadnik Jehoiadachem. To Jehovak visvaxi aslo. Tannem ani tachi bail Jehosheban, Jehoash lhan astana tachi rakhonn kelʼli ani taka sarkem tem korunk xikoilʼlo. Dekhun to ek boro raza zaunk pavlo. Ani zanntto Jehoiada jivo asosor Jehoash Jehovak visvaxi aslo. Punn Jehoiada melea uprant Jehoash rokddoch Jehovak ovisvaxi zalo. To noxttea kunvrachem aikonk laglo ani tannem Jehovachi seva korop soddun dili.—2 It. 24:2, 15-19.

⁴ Dusrem udharonn, dusrea xekddeantlea Kristanvanchem zaun asa. Jezuchea apostlam modlo sogleam-von nimanno melo to apostl, Juanv zaun aslo. To jivo asosor tannem zaitea Kristanvak visvaxiponnan Jehovachi seva korunk modot kelʼli. (3 Ju. 4) Jezuchea her apostlam bhaxen, Juanvan pasun sobhent aslolea dhorm-broxtt munxam thaun bhav-bhoinnanchi rakhonn korunk zaito vavr kelʼlo. (1 Ju. 2:18; 2 Tes. 2:7-acher aslole study note polloiat.) Punn apostl Juanv melea uprant, dhorm-broxtt korpeanchi xikounn sobhamnim ujea sarki posorli, ani zaitim zannam dhorm-broxtt zalim. Thoddea vorsam uprant, him munxam soglea sobhamnim anikui khotteo xikounneo xikoitalim, ani gombhir patkam kelear pasun tem kainch nhoi mhunn chintʼtalim.

5. Bible-antleo heo don ghoddnneo vachun ami kitem chintchem nhoi?

⁵ Tor heo don ghoddnneo vachun, makhlolim Kristanvam sorgar gelea uprant Jezuchim dusrim menddram, Jehoasha bhaxen Jehovachi bhokti korop soddun ditolim vo dusrea xekddeantlea Kristanvam bhaxen dhorm-broxtt zatolim, oxem ami chintchem nhoi. Karonn oxem kainch zaunchem na! Makhlolim Kristanvam sorgar gelea uprant pasun, dusrim menddram visvaxiponnan Jehovachi seva korit ravtolim ani Jehova tanchi kallji ghetolo mhunn ami purnn khatri dovrunk zata. Kiteak?

JEHOVACHO LOK VISVAXIPONNAN TACHI SEVA KORIT RAVTOLO

6. Ami atam khoinchea tin kallam vixim zannam zatolim?

⁶ Fuddem poristhiti anikui kotthin zatoli. Tori astana, Jehovacho lok visvaxiponnan tachi seva korit ravtolo mhunn ami kiteak khatri dovrunk zata? Karonn Bible-ant sanglam ki aiz ami jietat to kall Izraelitkaram jielʼlim tea kalla poros, toxench apostl melea uprant dusrea xekddeantlim Kristanvam jielʼlim tea kalla poros ekdom vegllo asa. Tor atam ami hea tin kallam vixim bariksannen zannam zaum-ia. Te mhunnttlear: (1) Izraelitkaram jielʼlim to kall, (2) dusrea xekddeantlim Kristanvam jielʼlim to kall, ani (3) ami jietat to kall, mhunnche ‘sogleo vostu poilim bhaxen porot zauncho kall.’—D.I. 3:21.

7. Lok vaitt kamam kortale tednam pasun thoddea Izraelitkarank Jehovachi seva visvaxiponnan korunk kiteak modot zali?

⁷ Izraelitkaram jielʼlim to kall. Morchea thoddeach vella poilim, Moizesan Izraelitkarank oxem sanglolem: “Hanv mortoch, hi porza odikuch vikott zatoli ani hanvem xikoilam titlem-i nakartoli, hem hanv zannom.” (D.S. 31:29) Toxench, Izraelitkaram Jehovachem aikonant zalear tankam koidi korun vhortole mhunn Moizesan tankam xittkaunni dilʼli. (D.S. 28:35, 36) Ani oxench zalem. Xemboramnim vorsam porian, zaitea razamnim Jehovache nodren vaitt tem kelem. Ani lok tanche bhaxen khotti bhokti korunk laglo. Hea pasot, Jehovan hea noxttea lokank xikxa dili ani aplea porjecher razamnim raz cholounchi manddavoll bond keli. (Ez. 21:30-32) Punn Jehovan kitem sanglolem tem ghoddon ailem mhunn visvaxi Izraelitkaramnim polloilem tednam, Jehovachi seva visvaxiponnan korit ravonk tankam modot zali.—Iz. 55:10, 11.

8. Dusrea xekddeantle Kristi sobhent khotteponn vaddlem mhunn ami kiteak ojap zainant?

 ⁸ Apostl melea uprant dusrea xekddeantlim Kristanvam jielʼlim to kall. Dusrea xekddeantle Kristi sobhent khotteponn vaddlem mhunn ami ojap zainant. Karonn hea vixim Jezun adim fuddench bhasaunni kelʼli. Dhorm-broxtt korpi ietole mhunn Jezun sanglolem. (Mt. 7:21-23; 13:24-30, 36-43) Ani poilea xekddeant Jezuchi hi bhasaunni purnn zaunk lagloli mhunn apostl Paulu, Pedru, ani Juanvan pasun dakhoun dilʼlem. (2 Tes. 2:3, 7; 2 Ped. 2:1; 1 Ju. 2:18) Dusrea xekddeant Kristi sobhent khotteponn anikui vaddlem ani dhorm-broxtt zalʼli Kristi sobha Bollixtt Babilonachi vo sonvsarantlea soglea khottea dhormanchi bhag zali. Tor, Jezun dilʼli bhasaunni purnn zatali.

9. Ami jietat to kall Izraelitkaram jielʼlim tea kalla poros, toxench apostl melea uprantchea kalla poros vegllo asa oxem ami kiteak mhunnonk zata?

⁹ ‘Sogleo vostu poilim bhaxen porot zauncho kall.’ Ami jietat to kall Izraelitkaram jielʼlim tea kalla poros, toxench apostl melea uprantchea kalla poros vegllo asa. Ami chodd korun hea kallak ‘nimanne dis’ mhunnttat. (2 Tim. 3:1) Punn heach vellar, anik ek khas ani vhoddlo kall suru zalo mhunn Bible-ant sanglam. Ho kall 1914-nt suru zalo ani Kristachea Ek Hozar Vorsanchea Razvottkechea xevottak, munxam poripurnn zatolim ani prithum ek sobit bag zatoli tednam poriant to choltolo. Hea kallak, ‘sogleo vostu poilim bhaxen porot zauncho kall’ mhunnttla. (D.I. 3:21) Tor hea kallar kitem poilim bhaxen zalem? Ek mhunnttlear, 1914-nt Jezu Krist sorgar Raza zalo. Tor Jehovan porot ek pavtti Davidachea sonstintlean ek raza vinchun kaddlo. Toxench, hachea uprant rokddench Jehovan aplea sevokank taka manvota tea toren porot tachi bhokti korunk modot keli. (Iz. 2:2-4; Ez. 11:17-20) Punn Jehovacho lok tachi khori bhokti korop soddun ditolim kai?

10. (a) Amchea tempar zatolea khore bhokte vixim Bible-ant kitem sanglolem? (Izaias 54:17) (b) Oslea bhasaunneam vorvim amkam dhir kiteak melltta?

¹⁰ Izaias 54:17 vachat. Hea bhasaunne vixim chintat: “Tuje add ghoddlolea koslea-i hatiarak kednanch ies mellchem na.” Jehovan sanglolim him utram aiz purnn zatat. Amchea kallar anik ek bhasaunni purnn zait asa. Ti mhunnttlear: “Sogllea tujea bhurgeank khud Sorvespor xikxonn ditolo. Tujea bhurgeank bhogunk melltoli xantichi bhorti. Doiallaiechea nitivontponnache buniadicher tuka thir korun dovortolom . . . Mat-ui bhieum naka, karonn tujer kosloch akant ieuncho na.” (Iz. 54:13, 14) Tor Jehovache lok aiz tachea vixim xikoupachem jem kam kortat tem, ‘hea sonvsaracho devʼ Soitan pasun bond korunk xokona. (2 Kor. 4:4) Tor Jehovachi bhokti porot suru zalea ani ti kednanch  bond zaunchina. Jehovache lok sasnak tachi khori bhokti korit ravtole. Karonn amchea add ghoddlolea koslea-i hotʼtearak kednanch ies mellchem na!

KITEM ZATOLEM?

11. Makhlolim sorgar voitoch vhoddlea zomeak margdorxon mellop bond zaunchem na mhunn ami kiteak khatri dovrunk zata?

¹¹ Makhlolim sorgar voitoch kitem zatolem? Jezu Krist amcho Gonvlli ani Kristi sobhecho mukheli mhunn ami ugddas dovrunk zai. Tannem spoxttponnim oxem sanglolem: “Tumcho ekuch Fuddari asa, to mhunnttlear Krist.” (Mt. 23:10) Jezu aiz sorgar raz choloita ani to aplea pattlavdarancho ekdom bore toren kallji gheta. Tor Jezu amkam margdorxon ditolo mhunnttoch amkam bhieunk koslich goroz na. To tea vellar amkam koso margdorxon ditolo tea vixim amkam sogli khobor na tem khorem. Punn to apli zobabdari ekdom bore toren samballttolo mhunn ami khatri dovrunk zata. Kiteak? Hem zannam zaunk ami Bible-antlea thoddea udharonnancher dhean dium-ia.

12. (a) Moizes melea uprant Jehovan tachea lokanchi kallji koxi ghetli? (b) Elijak Judant seva korunk dhaddlea uprant Jehovan aplea lokanchi kallji koxi ghetli? (Chitr pasun polloiat.)

¹² Izraelitkaram Bhasailʼlea Desant bhitor sorchea poilim Moizes bhair poddlo. Tor tea vellar Jehovan aplea lokanchi kallji ghevop bond keli kai? Na. Oxem ami kiteak mhunnonk zata? Karonn tim Jehovak visvaxi aslim tea meren, Jehovan sodanch tanchi kallji ghetli. Zoxem Moizes morchea poilim, Jehovan taka Joshuak lokancho fuddari mhunn nemunk lailo. Ani zaitim vorsam porian Moizes Joshuak proxikxonn di-it aslo. (Sutt. 33:11; D.S. 34:9) Toxench, Izraelant her mukheli pasun asle, zankam hozar, xembor, ponʼnas ani dha zannam voir pasun odhikar dilʼlo. (D.S. 1:15) Elijachea vellar oxench zalem. Tannem zaitim vorsam Izraelitkarank visvaxiponnan Jehovachi seva korunk modot keli. Punn uprant Jehovan taka Judant seva korunk dhaddlo. (2 Raz. 2:1; 2 It. 21:12) Punn Izraelachea dha kullanchi kallji gheunk tannem Elishak uzar kelo. Elija zaitim vorsam porian Elishak proxikxonn di-it aslo. Toxench, thoim “provadeanche put” pasun asle zankam proxikxonn mellʼllolem. (2 Raz. 2:7, NW) Tor Devachea lokam modem fuddakar gheunk zaite visvaxi munis asle. Hantuntlean, Jehova aplo udʼdhex purnn korta ani aplea lokanchi ekdom bore bhaxen kallji gheta mhunn kolltta.

13. Hebrevank 13:5b-ant Jehova amkam kosli khatri dita? (Chitr pasun polloiat.)

¹³ Him udharonnam polloilea uprant, soglim makhlolim sorgar voitoch kitem zatolem  oxem tumkam dista? Bible amkam hea vixim oxi khatri dita: Jehova aplea lokank modot korop kednanch bond korchona. (Hebrevank 13:5b vachat.) Moizes ani Elija bhaxen, dusreank proxikxonn divop kitlem mhotvachem, tem aiz fuddakar gheupi makhloleancho lhan zomo ekdom bore bhaxen zannam. Tea pasot, zaitea vorsam thaun Sonchalon Monddollache vangddi dusrea menddreanche bhag zaun aslolea bhavank proxikxonn di-it asat. Udharonnak, vhoddilank, sorkittachi dekhrekh korpeank, Xakha Somitichea vangddeank, Bethel-antlea dekhrekh korpeank, toxench her bhavank proxikxonn diunk tannim zaitea korsanchi manddavoll kelea. Toxench, te svota zaun Sonchalon Monddollak modot korpi bhavank proxikxonn ditat. He modot korpi bhav aiz visvaxiponnan songottnnecheo zaiteo zobabdareo samballttat, ani fuddem pasun Kristachea xellianchi kallji gheunk te atanch thaun purnn toren toiar asat.

14. Ami hea lekhant xiklim to mhotvacho mudʼdo khoincho?

¹⁴ Ami hea lekhant xiklim to mhotvacho mudʼdo mhunnttlear, vhodd sonkoxtt sompot ieta toso, urlolea makhlolea Kristanvam modlea sogleam-von nimanneak sorgar vhelea uprant, Jehovache lok visvaxiponnan tachi seva korit astole. Amcho Fuddari Jezuchea margdorxona khala, prithumer khori bhokti kednanch bond zaunchina. Tea vellar Magogacho Gog, mhunnche raxttrancho zomo amcher akromonn kortolo tem khorem. (Ez. 38:18-20) Punn tankam ies mellchona. Tor amkam bhieupachi kainch goroz na, karonn Jehova amkam salvar kortolo. Hem amkam apostl Juanvak mellʼllolea dorxonantlean kollon ieta. Tannem tea dorxonant, Kristachea dusrea menddreancho “ek vhoddlo zomo” polloilo, zo ‘vhodd sonkoxtta thaun bhair sortalo.’ (Prok. 7:9, 14) Hoi, Jehova aplea lokank salvar kortoloch mhunn ami purnn khatri dovrunk zata!

15-16. Prokasovnni 17:14 pormonnem, Armageddonachea zhuza vellar makhlolim Kristanvam kitem kortolim, ani hem zannam zalʼlean amkam urba kiteak melltta?

¹⁵ Punn thoddim ghoddie chintit: ‘Makhlolea Kristanvam vixim kitem? Sorgar gelea uprant tim kitem kortolim?’ Hea vixim Bible sangta ki sonvsarache sorkar “Menddrea sangata zhuztole.” Punn tea zhuzant sorkar hartole mhunn  amkam kosloch dubhav na. Karonn “Menddro tancher zoit melloun ghetolo.” Ani ‘apoilʼlim,’ ‘vinchlolim’ ani “visvaxi” asat tim Menddreak modot kortolim. (Prokasovnni 17:14 vachat.) Him zaun asat makhlolim Kristanvam. Tor vhodd sonkoxtt sompot ieta tednam, prithumer urlolim makhlolim Kristanvam sorgar gelea uprant, tanchem poilem kam zhuzpachem astolem. Hem kitlem vegllem ani ojapachem kam astolem nhoi! Thoddim makhlolim Kristanvam, Jehovachim Sakxi zaunchea poilim zhuzari aslim, thodde soinik pasun asle. Punn Kristanvam zalea uprant, tim xantin jieunk xiklim. (Gal. 5:22; 2 Tes. 3:16) Zhuzam korop tannim soddun dilem. Punn sorgar gelea uprant, Jezu Krist ani devdutam sangata, Devachea dusmanam add tim nimannem zhuz zhuztolim.

¹⁶ Hea vixim chintat: Prithumer aslolim thoddim makhlolim Kristanvam zannttim ani oskot asat. Punn sorgar gelea uprant, tim bollixtt astolim ani kednanch morchimnant. Toxench, tim amcho Zhuzari-Raza Jezu Krista sangata mellon zhuz kortolim. Ani Armageddonachem zhuz kabar zalea uprant, tim Jezu Krista sangata akʼkhea munxakullak sovkas-sovkas poripurnn zaunk modot kortolim. Tor prithumer astana tim jea toren tanchea bhav-bhoinnank modot kortalim, tachea poros chodd sorgar gelea uprant tim korunk pavtolim.

17. Armageddonachea zhuza vellar Jehovachim soglim visvaxi sevokam surokxit astolim mhunn ami koxim zannant?

¹⁷ Ami dusrea menddram modlim asat zalear, Armageddonachem zhuz suru zata tednam, ami kitem korunk poddttolem? Fokot itlench: Jehovacher visvas dovrop ani tachem margdorxon pallop. Bible-ant amkam oso solʼlo dila: “Cholat, porje mhoje, tumchea ap-aplea kuddamnim vochat, tumche pattlean tumchim daram dhampat. Krodhacho zhopatto vocho porian ilo vogot lipun ravat.” (Iz. 26:20) Tor hea vellar Jehovachim soglim visvaxi sevokam, zaum tim sorgar vo prithumer, tim surokxit astolim. Ani apostl Paulu bhaxen, ‘sorkar, nhoi mhunn aicheo vostu, nhoi mhunn ieuncheo asat teo vostu amkam Devachea moga thaun vegllim korunk xokcheo nant’ mhunn amkam purnn khatri asa. (Rom. 8:38, 39) Tor Jehova amcho mog korta, ani to amkam kednanch sanddchona mhunn ami sodanch ugddas dovrum-ia!