OBHEASACHO LEKH 7
GIT 51 To God We Are Dedicated!
Nazaritam Thaun Ami Kitem Xikonk Zata?
“Nazarit aso-sor to Sorvesporak bhettoilolo astolo.”—LOK. 6:8.
MUKHEL MUDʼDO
Nazaritanchem udharonn amkam Jehovachi seva dhiran korunk ani tachea pasot ap-khuxen teag korunk koxem modot kortolem, tem ami hea lekhant polloitolim.
1. Adlea kallar thaun Jehovachea sevokamnim tankam kitem moladik asa mhunn dakhoilam?
JEHOVA lagim amchi ixttagot amkam khub moladik zaun asa. Ani adim pasun, zaitea lokank Jehova lagim tanchi ixttagot khub moladik asli. (St. 104:33, 34) Jehovachi bhokti korunk tannim zaite teag pasun kelʼle. Zoxem adlea kallar, Izraelant aslole Nazarit. Te konn asle, ani tanchea koddlean ami kitem xikonk zata?
2. (a) Nazarit konn asle? (Lokgonnti 6:1, 2) (b) Thoddim Izraelitkaram Jehovak Nazarit zaunchi bhas kiteak ditalim?
2 “Nazarit” hem utor jea Hebrev utrantlean ghetlam, tacho orth zaun asa, “Vinchun Kaddlolo,” “Kuxin Kaddlolo,” vo “Ek Khas Torechi Seva Korunk Bhettoilʼlo.” Hem utor oslea Izraelitkarank uzar kortale je eke khas toren Jehovachi seva korunk aplea jivitant umkech teag kortale. Moizesa udexim dilʼlea Kaidea khala, ek dadlo vo bail aplea jivitant umkoch temp poriant ek Nazarit mhunn seva kortolim mhunn bhas diunk xoktalim. a (Lokgonnti 6:1, 2 vachat.) Hi bhas ditalim tea Izraelitkarank osle kaide pallunk poddttale, je her Izraelitkarank pallchi goroz nasli. Tori astana, tim Jehovacho khub mog kortalim ani tannem dilʼlea denneam pasot upkari aslim dekhun, tim taka hi bhas ditalim.—D.S. 6:5; 16:17.
3. Devache lok aiz Nazaritam bhaxen koxe zaun asat?
3 “Kristacho kaido” ailo tednam, Moizesa udexim dilʼle Kaide pallop bond zale. (Gal. 6:2; Rom. 10:4) Tea pasot, Jehovachim sevokam Nazarit zaunk xokonaslim. Punn Nazaritam bhaxen aiz Jehovacho lok soglea kallzan, jivan, monan ani bollan tachi seva korunk fuddem sortat. (Mk. 12:30) Ani tim Jehovak aplem jivit somorpit kortat tednam, tim eka orthan Nazaritam bhaxen ap-khuxen bhas ditat. Tor hi bhas pallunk tannim Jehovachi khuxi korunk zai, ani tachi seva korunk teag korunk zai. Tor Nazaritamnim dilʼli bhas pallunk tim kitem kortalim tantuntlean, ami dilʼli bhas pallchea vixim ami zaitem xikonk zata. b (Mt. 16:24) Tea vixim atam polloum-ia.
AP-KHUXEN TEAG KORAT
4. Lokgonnti 6:3, 4-a pormonnem, Nazaritamnim ap-khuxen kosle teag kele?
4 Lokgonnti 6:3, 4 vachat. Nazarit asloleamnim soro pieunk zainaslo. Tannim drakxam ani pasam pasun khaunk zainaslim. Punn her Izraelitkaram hem soglem khaunk ani pieunk xoktalim. Ani hantunt kaim chukichem naslem. Karonn ‘soro munxachem kalliz khuxal korta,’ ani hem Devachem dennem mhunn Bible sangta. (St. 104:14, 15) Tori astana, Nazarit heo sogleo vostu ap-khuxen teag kortalim. c
Tumi Nazaritam bhaxen ap-khuxen teag korunk toiar asat kai? (Peregraf 4-6 polloiat)
5. Madian ani Marcela-n kosle teag kele, ani kiteak?
5 Nazaritam bhaxen, Jehovache sevent anik chodd vavr korunk ami pasun amchea jivitant teag kortat. Hea vixim amkam Madian ani Marcela-cho onnbhov asa. d Hem zoddpem ek susegad jivit jietalem. Madian-ak borea pagarachi sirvis asli. Ani tim eka vhoddlea flat-ant ravtalim. Punn tim Jehovachi seva vaddounk sodhtalim dekhun, tannim tanchea jivitant bodlav kele. Tim sangtat: “Ami amcho khorch unno kelo. Toxench ami eka lhan flat-ant ravonk laglim, ani amchi gaddi vikli.” Madian and Marcela-k he teag korchi goroz nasli. Tori astana, tim Jehovache sevent anik chodd vavr korunk sodhtalim dekhun, tannim ap-khuxen he teag kele. Ani oxem kelʼlean tankam tanchea jivitant dhadosponn ani khuxalkai mellʼlli.
6. Aiz Kristanvam kiteak teag kortat? (Chitr pasun polloiat.)
6 Jehovache sevent anik chodd vell sarunk, tache lok ap-khuxen teag kortat. (1 Kor. 9:3-6) Udharonnak, thoddim ghoddie apleak ek ghor bandinant vo zonvar poxinant vo apleak avoddtta toslem kam korinant, jem korop vaitt nhoi. Toxench, zaitim zannam tim anik thoddo vell ankvar ravtolim, vo kazara uprant tankam rokddinch bhurgim nakat mhunn tharaitat. Tea bhair, aplea famili ani ixttam thaun pois vochon porgottnnaranchi chodd goroz asa toslea zageancher thoddim seva kortat. Jehova tankam he teag korat mhunn sangona. Tori astana Jehovak aplem boreantlem-borem diunk amchea modlim zaitim, ap-khuxen he teag kortat. Ani ami Jehovache sevent kelʼle teag lhan vo vhodd asum, to tancho khub valor korta mhunn ami khatri dovrunk zata.—Heb. 6:10.
DUSREAM POROS VEGLLIM ASAT MHUNN DAKHOUN DIAT
7. Nazaritank tanchi bhas samballunk thodde pavtti kiteak kotthin zatalem astolem? (Lokgonnti 6:5) (Chitr pasun polloiat.)
7 Lokgonnti 6:5 vachat. Aple kens katorche nant mhunn Nazarit bhas ditale. Hea toren te Jehovak purnn toren khalti asat mhunn dison ietalem. Ek Izraelitkar khub temp Nazarit mhunn ravonk sodhtalo zalear, tache vaddlole kens dusrim pollounk xoktalim. Konnui Nazarit zaunk fuddem sortalo tednam lok taka man ani urba ditalo zalear, taka tachi bhas samballunk sompem zatalem. Punn dukhachem mhunnttlear, thoddim toxem korinaslim. Udharonnak, provadi Amosachea tempar, Devachi bhokti korop soddun dilʼle Izraelitkar, ‘Nazaritank soro pieunk boll kortale vo dobhav ghaltale.’ (Am. 2:12) Karonn tannim tanchi bhas moddloli tankam zai asli. Tor dusream thaun vegllim ravonk ani apli bhas samballunk thodde pavtti tankam dhirachi khub goroz asli.
Apli bhas pallttalo to Nazarit dusream poros vegllo aslo mhunn dakhoun diunk toiar aslo (Peregraf 7 polloiat)
8. Benjamin-achea onnbhovantlean tumkam kitem korunk urba mellʼlli?
8 Jehovache modotin ami pasun dhiran, ami dusream poros vegllim mhunn dakhounk zata. Ami loztat zalear pasun, ami dhirvont zaunk xoktat. Ani hench Norway-ntlea, dha vorsanchea Benjamin-an kelem. Ukraine-achea zhuza vellar, tachea iskolant ek kariavoll dovorloli, jea vorvim tim Ukraine-ak tenko ditat mhunn dakhounk sodhtalim. Tor bhurgeamnim Ukraine-achea bavtteak aslolea rongache kopdde ghalun ek git mhunnonk zai aslem. Punn Benjamin hantunt bhag gheunk sodhinaslo dekhun, to pois vochon ubo ravlo. Torui, eke tticherin taka polloilo ani vhoddlean ulo marun oxem mhunnttlem: “Ami soglim tuka ravleant, begin hanga ieo!” Benjamin tticheri fuddeant ailo ani tannem dhiran oxem sanglem: “Hanv konnachich bazu ghena ani hanv rajkaronnant bhag ghena. Khorem mhunnttlear zaitea Jehovachea Sakxeank tim zhuzant bhag ghenant dekhun, bondkhonnint ghatleant.” Tednam tticherin taka sanglem ki tannem bhag gheunchi goroz na. Punn tachea klasintlim bhurgim to kiteak bhag ghena mhunn vicharunk laglim. Tea vellar Benjamin samko bhielo ani to roddonk pavlo. Tori astana, tannem dhiran tticherik sanglolim tinch utram klasintlea soglea bhurgeank sanglim. Uprant tannem ieun aplea familik sanglem ki Jehovan taka modot keli dekhunuch to aplea bhavartha vixim tankam sangonk pavlo.
9. Ami Jehovachem kalliz koxem khuxal korunk zata?
9 Ami Devachem aikotat dekhun, ami dusream poros vegllim asat mhunn tim pollounk xoktolim. Iskolant vo kamachea zagear ami Jehovachim Sakxi mhunn sangonk amkam dhirachi goroz poddot. Ani hea sonvsarachi poristhiti anik vaitt zait voita toxi, Bible-antlea totvam pormonnem jieunk ani dusreank bori khobor sangonk amkam khub kotthin zait. (2 Tim. 1:8; 3:13) Punn Jehovachi bhokti korinant tea lokam poros ami vegllim asat mhunn dhiran dakhoitat tednam, ami ‘Jehovachem kalliz khuxal kortat’ mhunn ami sodanch ugddas dovrunk zai.—Mho. 27:11; Mal. 3:18.
JEHOVAK TUMCHEA JIVITANT POILO ZAGO DIAT
10. Lokgonnti 6:6, 7-ant dilʼli adnea pallop Nazaritank ekdom kotthin kiteak asli?
10 Lokgonnti 6:6, 7 vachat. Nazarit konnacheach moddea lagim vochonk xokonasle. Hantunt titlem vhoddlem kaim na, oxem thoddeank disot. Punn eka Nazaritacho lagxilʼlo konnui mortalo tednam, ti adnea pallunk taka kitlem kotthin zatalem astolem tea vixim ami chintunk zata. Toxench tea tempa voilea riti-rivazam pormonnem, lokamnim moddea lagim asonk zai aslem. (Ju. 19:39, 40; D.I. 9:36-40) Tori astana, Nazarit bhas ditalim dekhun, tim heo riti-rivazo pallinaslim. Ani ekdom kotthin vellar, mhunnche tanchea familintlo konnui mortalo tednam pasun, tim Jehovak dilʼli bhas pallttalim. Hea vorvim, tankam Jehovacher ghott bhavarth asa mhunn tim dakhoun ditalim. Ani ti ekdom kotthin poristhiti sosunk, Jehova hea visvaxi sevokank modot kortalo mhunn kainch dubhav na.
11. Famili sombondit nirnnoi ghetana eka Kristanvan kitem monant dovrunk zai? (Chitr pasun polloiat.)
11 Ami Kristanvam, somorponna vellar Jehovak dilʼli bhas ekdom mhotvachi mhunn lekhtat. Tor famili sombondit ami kosle-i nirnnoi ghetat tednam, hi bhas ami amchea monant dovortat. Amchea ghorcheanchi kallji gheunk ami khub vavr kortat tem khorem. Punn Jehovak fatti dovrun, ami amchea familik khuxal korop poilea zagear dovornant. (Mt. 10:35-37; 1 Tim. 5:8) Tor haka lagon thodde pavtti amkam osle nirnnoi gheunk poddot, jea vorvim amchea soireank vo ghorcheank rag ieunk puro. Punn oxem kelʼlean, ami Jehovak khuxal kortat mhunn ami ugddas dovrunk zai.
Ekdom kotthin poristhitint pasun, Jehovachi khuxi poilea zagear dovrunk tumi toiar asat kai? (Peregraf 11 polloiat) e
12. Bhav Alexandru-che bailen tacho virodh kelo tednam tannem kitem kelem ani kitem korunk na?
12 Hea vixim ami Alexandru ani tachi bail Dorina-cho onnbhov polloum-ia. Ek voros Bible-acho obheas kelea uprant, Dorina-n Bible xikpachem bond kelem. Ani Alexandru-n pasun toxench kelʼlem tika zai aslem. Punn tannem xantponnim ani tika dukhoina tea toren apunn Bible obheas chaluch dovortolo mhunn tika sanglem. Punn hem Dorina-k avddonk na, ani Bible-acho obheas bond korunk tinnem bhavacher khub dobhav ghatlo. Tika oxem kiteak bhogtalem tem somzonk tannem proitn kelo, punn toxem korop sompem naslem mhunn bhav sangta. Karonn thodde pavtti ti taka kitem-kitem mhunnttali ani tachea sangata krur toren uloitali. Tor tea vellar, apunn Bible obheas korop bonduch kortolo mhunn bhavan chintlem. Tori astana, Jehovak tachea jivitant poilo dovrunk bhavan khub vavr kelo. Ani teach borabor tannem aple bailek mog dakhoilo ani resped dilo. Tor tachea hea borea udharonnak lagon, Dorina-n uprant porot Bible obheas suru kelo ani magir bautizm ghetlo.—jw.org-acher “Bible Jivit Bodolta” hea series-ant aslolo, Alexandru and Dorina Văcar: “Mog Pasiensan ani Doiallaien Vagta” ho video polloiat.
13. Ami Jehova ani amchea familicho mog kortat mhunn koxem dakhounk zata?
13 Familichi manddavoll Jehovan kelea, ani familintlim soglim khuxal aslolim taka zai. (Ef. 3:14, 15) Tor amkam khori khuxalkai mellonk, Jehovak zai toxench ami korunk zai. Amcheo familicheo gorzo purnn korunk, tankam mog ani resped diunk, toxench Jehovachi bhokti korunk ami je teag kortat tancho Jehova valor korta mhunn ami khatri dovrunk zai.—Rom. 12:10.
EKA-MEKAK NAZARITAM SARKO SOBHAV DAKHOUNK URBA DIAT
14. Ami amchea utramnim khas korun konnank urba diunk zai?
14 Jehovachi bhokti kortat tim soglim, tacho mog kortat dekhun tache sevent teag korunk fuddem sortat. Punn thodde pavtti oxem korunk amkam kotthin zait. Tor amchea utram vorvim dusreank urba diun, ami eka-mekak Nazaritam sarko sobhav dakhounk modot korunk zata. (Job 16:5) Zoxem, amche sobhent oslim bhav-bhoinnam asot, jim Jehovache sevent anik vavr korunk, aplem jivit sadem dovrunk proitn kortat astolim. Toxench, amchim iskolant xikpi bhurgim tim dusream poros vegllim asat mhunn dakhoun diunk dhir dakhoitat zait. Tea bhair, Bible vidʼdhearthi ani sobhentlim bhav-bhoinnam, famili thaun virodh asonui visvaxi ravonk khub vavr kortat astolim. Tor him bhav-bhoinnam dhir dakhoitat ani Jehova pasot teag kortat dekhun, ami tancho kitlo valor kortat tem tankam sangom-ia. Ani tankam urba diunk amchean zata tem soglem korunk ami ghott nichov korum-ia.—Fil. 4, 5, 7.
15. Purnn vellachi seva korpi bhav-bhoinnank thoddeamnim koxi modot kelea?
15 Thodde pavtti purnn vellachi seva korpi amchea bhav-bhoinnank, ami modot korunk fuddem soronk zata. (Mho. 19:17; Heb. 13:16) Visvaxiponnan Jehovachi seva korpi, Sri Lanka-ntle eke zanntte bhoinnin toxench korunk tharailem. Poixeanchea unneponnak lagon, pioneer seva korpi don tornnattea bhoinnank, tanchem porgottnnechem kam chaluch dovrunk kotthin zatalem mhunn tika kollʼllem. Tea pasot, tichem pension vaddlem tednam, tanchim fonachim bill-am farik korunk apunn tankam dor mhoineak umkech poixe ditoli mhunn tinnem tharailem. Khorench, te bhoinnin kitlo boro sobhav dakhoilo nhoi!
16. Nazaritam koddlean ami kitem xikonk zata?
16 Nazaritam koddlean ami zaitem xikonk zata. Khas korun tanche vixim ami zannam zatat tednam, amkam amcho sorgincho Bap, Jehova vixim kitem tori kollon ieta. Tem mhunnttlear, ami kallzantlean Jehovak manvota tem korunk sodhtat ani somorponna vellar ami dilʼli bhas pallunk ami teag korunk toiar asat, hachi taka khatri asa mhunn amkam kolltta. Toxench, ami tacho kitlo mog kortat tem dakhoun diunk to amkam ek sueog dita. (Mho. 23:15, 16; Mk. 10:28-30; 1 Ju. 4:19) Nazaritanchea manddavollintlean, ami Jehova pasot je teag kortat, tacher to dhean dita ani tacho valor korta mhunn ami zannam zatat. Tor ap-khuxen Jehovachi seva korit ravonk, ani taka amchem boreantlem-borem diunk ami ghott nichov korum-ia.
TUMCHO ZOBAB KITEM?
-
Nazaritamnim ap-khuxen teag kele ani dhirvont asle mhunn tannim koxem dakhoun dilem?
-
Nazaritam sarko sobhav dakhounk ami eka-mekak koxi urba diunk zata?
-
Nazaritanchea manddavolli thaun Jehovak amchea vixim kosli khatri asa mhunn kollon ieta?
GIT 124 Chittkun Ravum-ia
a Jehovan thoddeank Nazarit zaunk vinchun kaddle, punn choddxim Izraelitkaram ap-khuxen Nazarit zaunk fuddem sorlim.—“ Jehovan Vinchun Kaddlole Nazarit,” hem boks polloiat.
b Thodde pavtti amchea prokaxonamnim, purnn vellachea sevokank Nazaritank sor kelʼlim. Punn hea lekhant, Jehovak somorponn kelʼlea soglea sevokamnim, Nazaritam sarko sobhav koso dakhounk zata tacher ami dhean ditolim.
c Pollounk gelear, Nazaritank ghoddie apli bhas pallunk umkech torechem khas kam korchi goroz nasli zait.
d jw.org-acher, “Experiences of Jehovah’s Witnesses,” hea bhagant, “We Decided to Simplify Our Lives” ho lekh polloiat.
e CHITRACHI MAHITI: Ghorache mallier ravon, ek Nazarit aplea familintlea konnachem tori moronn vhortat tem polloita. Punn tannem Jehovak bhas dilea dekhun to tantunt bhag ghena.
