JANER 18, 2023-achea Budvara disa, jw.org-acher ek khas kollounni kelʼli. Ti mhunnttlear, bhav Gage Fleegle ani bhav Jeffrey Winder, hankam Jehovachea Sakxeanchea Sonchalon Monddollache vangddi mhunn nemle. He dogui bhav, zaitea tempa thaun visvaxiponnan Jehovachi seva korit asat.

Bhav Fleegle, Amerikent, Pennsylvania-chea ostomte vattarant vaddlolo. Tachea Dev-bhirantichea avoi-bapain taka sotant vaddoilo. To tornnatto astana, tachi famil porgottnnaranchi chodd goroz aslolea eka lhanxea xarant geli. Uprant, tannem Novembr 20, 1988-ant bautizm ghetlo.

Purnn vellachi seva korunk, bhav Fleegle-achim avoi-bapui taka sodanch urba ditalim. Tim zaite pavtti sorkittachi dekhrekh korpeank ani Bethel-ant seva korpi bhav-bhoinnank tanger apoitalim. Ani him bhav-bhoinnam kitlim khuxal asat tem bhav Fleegle pollounk xoklo. Tor bautizm ghetlea uprant rokddench, Setembr 1, 1989-ant, tannem niemit pioneer seva suru keli. Toxench, to 12 vorsancho aslo tednam, apunn Bethel-ant seva kortolo mhunn tannem dhei dovorlolo. Tor pioneer seva korun don vorsam uprant, Otumbr 1991-ant to Brooklyn-achea Bethel-ant seva korunk laglo.

Bethel-ant bhav Fleegle-an, atth vorsam Bindery-nt kam kelem ani uprant taka Seva Khateant kam korunk nemlo. Hea vellar tannem thoddim vorsam, Russian bhas uloupi sobhent seva keli. 2006-ant, to bhoinn Nadia lagim kazar zalo ani tim dogaim mellon Bethel-ant seva korunk laglim. Tannim sangata mellon, Portuguese bhas uloupi sobhent seva kelea ani dha vorsam maiz Spanish bhas uloupi sobhent seva kelea. Bhavan zaitim vorsam Seva Khateant kam kelea uprant, taka Xikovop Somiti Ofis ani uprant Seva Somiti Ofisant kam korunk nemlo. Ani Mars 2022-ant, taka Sonchalon Monddollachea Seva Somitik modot korpi mhunn nemlo.

 Bhav Winder, Amerikechea California-nt aslolea Murrieta-nt vaddlolo. Taka tachea avoi-bapain sotant vaddoilʼlo. Ani Mars 29, 1986-ant tannem bautizm ghetlolo. Bautizm gheun fuddlea mhoineant, tannem rokddich sahaiok pioneer seva suru keli. Taka ti itli avoddli ki to pioneer seva korit ravonk sodhtalo. Ani zaite mhoine sahaiok pioneer mhunn seva kelea uprant, Otumbr 1, 1986-ant tannem niemit pioneer seva suru keli.

Bhav Winder tornnatto aslo tednam, Bethel-ant seva korpi tachea don vhoddlea bhavank to mellonk gelo. Taka thoim itlem avoddlem ki fuddem apunnui Bethel-ant seva kortolo mhunn tannem nichov kelo. Uprant, May 1990-ant Wallkill Bethel-ant seva korunk taka apounnem mellʼllem.

Bethel-ant bhav Winder-an veg-vegllea khateamnim kam kelem. Zoxem, Nitoll Korchem Khatem, Farm Department, ani Bethel Ofis. Uprant 1997-ant, to bhoinn Angela lagim kazar zalo, ani tednam thaun tim dogaim Bethel-ant seva kortat. 2014-nt tankam Warwick dhaddlim, zoim bhav Winder-an mukhel ofisachea bandkamant modot keli. Ani 2016-nt tankam Patterson-ant aslolea, Watchtower Educational Center-ant dhaddlim. Thoim bhav Winder-an, Audio/Video-nt kam kelem. Magir char vorsam uprant, tankam porot Warwick-ant apoilim, ani bhavak Bethel Sevok Somitint kam korunk nemlo. Uprant Mars 2022-ant, bhav Winder-ak, Sonchalon Monddollachea Bethel Sevok Somitik modot korpi mhunn nemlo.

He ‘dennim mhunn dilʼle munis’ Devachea Rajeachem kam fuddem vochot ravonk vavr korit ravtat toxe, Jehovan tancher bhorpur besanvam ghalum mhunn ami magtat.—Ef. 4:8.