Jehova Dev fuddar pollounk xokta mhunn Bible amkam sangta. (Iz. 45:21) Punn hem to koxem korta, kednam korta vo kitle meren to fuddar polloita tea vixim Bible-ant amkam bariksannen sangonk na. Tor fuddar pollounchi Jehovachi ji tank asa tea vixim amkam soglench khobor na. Punn thoddeo vostu amkam khobor asat. Tea vixim ami atam polloum-ia.

Jehova apleak zai tem soglem korunk xokta, punn thoddeo vostu to korcho na mhunn to tharaita. Jehovachea zannvaiek xim-mer na. (Rom. 11:33) Dekhun fuddarak kitem zatolem tem to sangonk xokta. Punn taka apleacher purnn toren tabo asa dekhun to soglench zannam zaunk sodhina.—Izaias 42:14 sor korat.

Apli khuxi purnn korunk Jehova kitem-i ghoddoun haddtta. Ho vixoi fuddar sangche tache tankik koxem zuddlolem asa? Hea vixim Izaias 46:10-nt oxem sanglam: “Fuddarak kitem ghoddtolem tem Hanvem survatek thaun sangun dilam, jem ozun ghoddonk na, tem Hanv adinch kollit kortam! Mhoji ievzonn xarthi pavtolich, oxem Hanv sangtam. Mhaka zai tem Hanv kortolonch.”

Tor Jehova fuddar sangonk xokta hachem ek karonn mhunnttlear taka kitem-i korunk xokti asa. Ami ek pichʼcher polloitat tednam ami fast-forward korun xevottak kitem zata tem zannam zaunk xoktat. Punn Jehovak oxem korunk poddona. Karonn oxem kednanch zaina ki ek ghoddnni poilinch ghoddlea ani Jehova ti fast-forward korun polloita, ani uprant ieun fuddarak kitem zatolem tem amkam sangta. Punn umkeach vellar kitem ghoddttolem tem Jehova tharaita, ani to vell ieta tednam to tem ghoddoun haddtta.—Sutt. 9:5, 6; Mt. 24:36; D.I. 17:31.

Hea karonnak lagon Jehova fuddarak kitem korcho asa tea vixim sangonk Bible-ant, “toiar kelolem” ani “ievjilam” him utram uzar keleant. (2 Raz. 19:25; Iz. 46:11) Hea utrank uzar kelʼlem mull utor “kumbar” hea utrak zuddlolem asa. (Jer. 18:4) Udharonnak, aplea kamant huxar aslolo ek kumbar, matieche gulle gheun ani boro akar diun ek sobit vaz toiar korta, teach bhaxen Jehova apli khuxi purnn korunk poristhitik akar dita vo ti ghoddoun haddtta.—Ef. 1:11.

Jehovan munxank borem-vaitt vinchun kaddunk svotontrtai dilea. Eka munxachem jivit koxem astolem vo to kitem kortolo tem Jehova poilinch tharaun dovorna. Vo eka borea munxachem nisonntton zatolem toslem kainch to taka korunk laina. Karonn Jehovan, dor ekleak aplem jivit koxem jieunk zai tem vinchun kaddunk svotontrtai dilea. Punn sogleamnim sarki vatt vinchun kaddloli taka zai.

Hea vixim ami don udharonnancher dhean dium-ia. Poilem udharonn, Nineve xarantlea lokanchem zaun asa. Tea lokanchea noxtteponnak lagon, apunn tea xarachem nisonntton kortolo mhunn Jehovan sanglolem. Punn tannim poschatap kelo tednam, Jehovan “aplea nirnnoi-a vixim porot chintlem, ani apnnem sanglolem tea bhaxen tannem tea xarachem nisonntton korunk na.” (Jon. 3:1-10, NW) Tor Jehovan tankam xittkaunni dilea uprant, Nineventlea lokamnim tanchi vinchun kaddchi svotontrtai uzar korun poschatap kelo. Tea pasot, Jehovan pasun aplo nirnnoi bodolʼlo.

Dusrem udharonn, Persiecho Raza Sirusachem zaun asa. To Judevank gulamponnantlean soddoitolo, ani Jehovachem Devmondir porot bandunk adnea ditolo mhunn Jehovan bhasaunni kelʼli. (Iz. 44:26–45:4) Ani Sirusa udexim hi bhasaunni purnn zali. (Ezr 1:1-4) Punn Sirus khorea Devachi bhokti korinaslo. Tor Jehovan apnnem bhasailʼlem tem purnn korunk Sirusak uzar kelo tem khorem. Punn to konnanchi bhokti kortolo tem vinchun kaddunk taka ji svotontrtai asli ti Jehovan taka uzar korunk dili.—Mho. 21:1.

Tor Jehova fuddara vixim sangta tednam to kiteacher dhean dita, tantuntleo fokot thoddeoch vostu atam ami polloileo. Khorem mhunnttlear, konnuch munis purnn toren Jehovak somzonk xokona. (Iz. 55:8, 9) Tori astana, Jehovan atam meren kitem sanglam tantuntlean, to korta tem sodanch sarkem mhunn amcho bhavarth ghott zata. Tantunt to fuddara vixim jem sangta tem pasun mellon asa.