Mhojim avoi-bapui Catholic ani khub Dev-bhirantichim aslim. Punn Jehovachem nanv kollʼllea uprant, tim Jehovachim Sakxi zalim ani tachi seva urben korunk laglim. Mhozo bapui thovoi aslo ani poilo to Jezucheo murteo kortalo. Punn sot xiklea uprant tannem tem soddun dilem ani amchea ghoracho ground floor Raj-ghor kelem. Hem Philippines-achi rajdhani, Manila-nt aslolea, San Juan del Monte hantuntlem poilem Raj-ghor aslem.

Hanv 1952-ant zolmolʼlom. Mhojea avoi-bapain, mhojea char vhoddlea bhavank ani tin vhoddlea bhoinnank Jehova vixim xikoilʼlem toxem mhaka-i xikoilem. Hanv vaddlea uprant daddy-n mhaka dor disa Bible-acho ek odheai vachunk urba dili ani to mhojea sangata zaitea Bible adarit prokaxonancho obheas kortalo. Mummy-daddy kednam-kednam sorkittachi dekhrekh korpeank ani xakha ofisantlea prothinidink amger ravonk apoitalim. Tanche onnbhov aikon amchi famil khub khuxal zatali. Ani amkam sogleank Jehovachi seva amchea jivitant poilea zagear dovrunk urba mellʼlli.

Mhojim mummy-daddy visvaxiponnan Jehovachi seva kortalim. Ani tannim mhaka ekdom bori dekh dovorli. Mummy duent zaun bhair poddlea uprant 1971-ant, hanvem ani daddy-n pioneer seva suru keli. Punn 1973-ant, hanv 20 vorsancho aslom tednam, daddy bhair poddlo. Mummy-daddy mhojea sangata naslim dekhun mhaka eksurponn bhogtalem. Punn Bible-antlo “khatri dovorpa sarko ani ghott” bhorvonso aslolean choddui niraxi zaunchea bodlek hanv thir ani Jehovachea lagim ravonk pavlom. (Heb. 6:19) Uprant mhaka rokddoch Palawan prantantlea Coron nanvachea zunvear khas pioneer seva korunk apounnem ailem ani hanv thoim gelom.

Hanv 21 vorsancho aslom tednam Coron zunvear pavlom. Thoim udkachem ani light-ichem unnemponn aslem. Toxench, provas korunk sarkeo gaddio pasun nasleo. Hanv xarant vaddlolom dekhun hem soglem polloun ojap zalom. Thoim thodde bhav  asle tem khorem, punn mhojea sangata pioneer seva korunk konnuch naslo dekhun thodde pavtti mhaka ekleakuch porgottnni korunk poddli. Thoim ieun poilea mhoineant, mhaka mhojea ixttancho ani familicho khub ugddas ietalo. Ratchea vellar hanv noketram polloitalom tednam mhojea dolleantlean dukham ietalim, ani mhoji seva soddun porot ghora vochom-xem distalem.

Oslea vellar mhojea monant ani kallzant aslem tem soglem hanv Jehovak sangtalom. Toxench Bible ani amchea prokaxonantle urba ditat tosle vichar hanv monant haddttalom. Hanv zaite pavtti Stotr 19:14 ugddas kortalom. Tea vellar, Jehovak manvota tem kelear, mhunnche tachea kamancher ani gunnancher niall kelear to ‘mhojem Khoddop ani mhozo Tarok’ zatolo mhunn mhaka kollʼllem. Tea bhair, “You Are Never Alone” a hea Pahrogopur-antlea eka lekha thaun mhaka khub modot zali. Hanv to lekh porot-porot vachtalom. Eksuro astana hanv Jehova sangata asa oxem mhaka bhogtalem. Ani to vell hanv magnnem korunk, niall korunk ani obheas korunk uzar kortalom.

Coron zunvear pavon thoddea vella uprant mhaka sobhecho vhoddil mhunn nemlo. Tea sobhent hanv ekloch vhoddil aslom dekhun dor sumanak hanv Theocratic Ministry School, Seva Meeting, Sobhechi Book Study ani Pahrogopur Obheas kortalom. Toxench dor sumanak hanv jahir bhaxonn pasun ditalom. Tor eksurponn bhogonk mhaka velluch uronaslo.

Hea zunvear mhaka porgottnnent boro porinnam mellʼllo. Hanv Bible obheas ghetalom tantuntlea thoddea zannamnim uprant bautizm pasun ghetlo. Porgottnnechea vattarant vochonk thodde pavtti mhaka ordo dis cholonk poddttalem ani thoim pavlea uprant hanv rat khoim sartolom ti pasun mhaka khobor nasli. Amchea sobhechea vattarant zaite lhan-lhan zunve pasun asle. Thoim mhaka boat gheun vochonk poddttalem ani choddxe pavtti hanv vadollantlean provas kortalom. Itlench nhoi, mhaka penvonkui kollonaslem! Torui hea soglea poristhitimnim Jehovan mhaka rakhlo ani samballʼllo. Uprant mhaka kollʼllem ki Jehova mhaka fuddarak anikui kotthin poristhitim pasot toiar kortalo.

1978-ant mhaka Papua New Guinea-nt seva korunk dhaddlo, zo Australia-chea utʼtore vatten asa. Hea desant zaite dongor asat, thoim sumar 30 lakh lok ravtat ani te 800 poros chodd bhaso uloitat, hem kollʼllea uprant hanv ojap zalom. Punn borem mhunnttlear, thoim choddso lok Melanesian Pidgin, zaka Tok Pisin mhunnttat ti bhas uloitat.

Mhaka thoddea vella pasot Papua New Guinea-chi rajdhani, Port Moresby-ntlea Inglez sobhent seva korunk dhaddlo. Punn uprant hanv Tok Pisin sobhent gelom ani ti bhas xikonk eke klasik vochonk laglom. Ti bhas hanv porgottnnent pasun uzar kortalom dekhun hanv ti anikui begin xiklom. Hanvem rokddench Tok Pisin bhaxent jahir bhaxonn dilem. Uprant zaitea vhoddlea prantamnim aslolea Tok Pisin sobhancho sorkittachi dekhrekh korpi mhunn mhaka nemlo. Hem aikon hanv ekdom ojap zalom. Karonn Papua New Guinea-nt ieun mhaka ek voros pasun zaunk naslem.

Thoincheo sobha pois-pois asleo dekhun mhaka zaitea sorkitt zomatinchi manddavoll, ani khub provas pasun korunk poddttalo. Survatek, mhaka eksurponn bhogonk laglem, karonn hanv eka novea desant aslom zoim lokanchi bhas ani sonskruti veglli asli. Thoim dongor asle ani thoinche roste  sarke nasle dekhun, dor sumanak mhaka plane-an provas korunk poddttalo. Thodde pavtti plane-ar anik konnuch passenger asonasle. Tea bhair, tea plane-ak ekuch engine astalem ani tacho maintenance pasun korinasle. Boat-int provas korunk mhaka bhirant distali toxi plane-an provas korunk pasun bhirant distali!

Thoim choddxea lokam lagim fon nasle. Tor hanv sobhank chitteo boroitalom. Punn choddxe pavtti chitt pavche poilim hanv thoim pavtalom ani bhav-bhoinnank sodhunk, mhaka thoinchea lokank vicharunk poddttalem. Punn dor ek pavtt bhav-bhoinnam mellʼllea uprant, tim mogan mhaka ieukar ditalim ani to mog polloun hanv tancheach pasot itlom vavr kortam hem ugddas dovrunk mhaka modot zatali. Jehovan zaitea vattamnim mhaka tenko dilo mhunn hanvem onnbhovlem, ani tachea sangata mhoji ixttagot anikui ghott zali.

Hanv poilech pavtti Bougainville zunvear mittingek gelʼlom tednam, ek zoddpem mhoje sorxim ailem ani smile korun oxem vicharunk laglem: “Tunvem amkam vollkhilim?” Tednam mhaka ugddas ailo ki hanv poilech pavtti Port Moresby-nt gelʼlom tednam hanvem tankam porgottnni kelʼli ani Bible obheas pasun suru kelʼlo. Uprant hanvem to obheas dusrea bhavak gheunk sanglo. Tannim dogaimnim atam bautizm ghetlolo! Tor hanvem tin vorsam Papua New Guinea-nt seva keli tednam, Jehovan mhaka dilʼlea zaitea besanvam modlem, hem ek besanv aslem.

1978-ant, Coron soddun voichea poilim hanv Adel-ak mellʼllom. Tem niemit pioneer seva kortalem ani aplea poros dusreanchi taka khub kallji asli. Taka don bhurgim aslim—Samuel ani Shirley. Toxench, tem aple zanntte avoichi pasun kallji ghetalem. May 1981-ant, hanv tachea sangata kazar zaunk porot Philippines-ant ailom. Kazara uprant, ami sangata niemit pioneer seva korunk ani familichi kallji gheunk laglim.

Familichi zobabdari aslear pasun 1983-ant mhaka porot khas pioneer mhunn nemlo ani Palawan prantantlea, Linapacan zunvear dhaddlo. Ami soglim thoim gelim. Thoim anik konnuch Sakxi asonk na. Thoim vochon ek vorsa uprant, Adel-achi avoi bhair poddli. Punn porgottnnechea kamant bizi ravlolean tem dukh sosunk amkam modot zali. Ami zaitea lokam lagim Bible obheas suru kelo ani tim mittingek ieunk laglim. Tor thoim ami ek lhan Raj-ghor bandlem. Ami thoim vochon fokot tin vorsam uprant, 110 lok Ugddas Disak hajir zale tem polloun ami khub khuxal zalim. Ani tantuntlea zaitea zannamnim ami thoinchean gelea uprant pasun vaddavoll korun bautizm ghetlo.

1986-ant mhaka Culion zunvear seva korunk dhaddlo, zoim eka vattarant leprosy zalʼlim munxam ravtalim. Thoim pavlea uprant, Adel-ak pasun khas pioneer mhunn nemlem. Survatek hea munxam lagim ulounk ami fattim-fuddem zatalim. Punn thoim ravpi bhav-bhoinnamnim amkam khatri dili ki tancho ilaz zala ani ami bhieunchi goroz na. Tantuntlim thoddim eke bhoinnichea ghorant mittingek hajir zatalim. Tor ami amchem chintop rokddench bodolʼlem ani tankam bori khobor porgottunk laglim. Karonn munxamnim toxench  Devan pasun apleak soddun dileant oxem tankam bhogtalem. Punn fuddarak amkam ekdom bori bholaiki astoli, hea Bible-antlea bhorvonxea vixim ami tankam sangtalim tednam tim khub khuxal zatalim. Hem polloun ami pasun khuxal zatalim.—Luk. 5:12, 13.

Sovkas-sovkas korun Culion-ant amchim bhurgim pasun adjust zaunk laglim. Tanchea sangata vell sarunk ami Coron-a thaun don tornnattea bhoinnank apoilim. Samuel, Shirley, ani tea donui bhoinnamnim khuxalkaien zaitea zannank sot xikonk modot keli. Tim bhurgeam sangata Bible obheas kortalim ani ami tanchea avoi-bapaim sangata Bible obheas kortalim. Ek vell oso ailo ki ami 11 familim sangata Bible obheas kortalim. Tim khub vaddavoll korunk laglim ani amkam ek novi sobha suru korunk poddli!

Tea vellar Culion-ant atth ani Marily ganvant nnov porgottnnaram aslim. Thoinsor hanv ekttoch vhoddil aslom mhunnttoch, xakha ofisan mhaka hea donui zageancher sumanancheo mittingo korunk sanglem. Punn Culion-a thaun Marily-nt vochonk amkam tin voram boat-in provas korunk poddttalo. Uprant ami Halsey nanvachea ganvant Bible obheas gheunk voitalim. Ani oxem korunk amkam zaitim voram dongri vattarantlean cholon vochonk poddttalem.

Marily ani Halsey-nt zaito lok sotant ailo ani ami tea donui zageancher Raj-ghoram bandlim. Linapacan-chea bhav-bhoinnam sarkim, hanga aslolea bhav-bhoinnamnim ani sot xikonk umed dakhoiloleamnim, amkam Raj-ghoram bandunk gorjecheo vostu dileo ani choddxem bandkam tanninch kelem. Marily-ntlea Raj-ghorant 200 lok ieunk xoktalo ani tem vaddoun thoim zomati pasun korunk zataleo.

Amchim bhurgim vaddlea uprant, 1993-ant, hanv ani Adel, Philippines-ant sorkittachem kam korunk gelim. Uprant 2000-ant, hanv Ministerial Training School-ak gelom, zoim mhaka xikoupi mhunn proxikxonn mellʼllem. Hi novi zobabdari samballunk hanv purto na oxem mhaka distalem. Punn Jehova mhaka modot kortolo mhunn Adel-an mhaka urba dili. (Filp. 4:13) Adel hem sangonk pavlem karonn tannem svota hem onnbhovlolem. Tachi bholaiki  bori asonasli torui Jehovachea modotin tem tachi seva korit aslem.

2006-ant, hanv xikoupi mhunn seva kortalom tednam Adel-ak Parkinsonʼs duens asa mhunn amkam kollʼllem. Ami sarkim thottaklim! Hanvem mhoji zobabdari soddun tachi kallji gheunk chintlem tednam, Adel-an mhunnttlem, “Tum fokot mhozo ilaz korunk boro dotor sodh. Jehova amkam tachi seva korit ravonk modot kortolo.” Fuddlim sov vorsam tannem zata tea toren Jehovachi seva keli. Tem cholonk xokonaslem tednam pasun wheelchair uzar korun porgottnni kortalem. Taka ulounk kotthin zatalem tednam pasun tem ek vo don utramnim mittingent zobab ditalem. Tachea borea udharonnak lagon bhav-bhoinnam taka sodanch message-o dhaddttalim. Punn 2013-nt tem bhair poddlem. Adel khub mogall ani visvaxi aslem ani ami 30 vorsam sangata sarlim. Punn atam porot hanv khub dukhi zalom ani mhaka eksurponn bhogonk laglem.

Hanvem Jehovachi seva korit ravloli Adel-ak zai asli ani hanvem toxench kelem. Jehovache sevent bizi aslolean eksurponn pois korunk mhaka modot zali. 2014 tem 2017 meren, mhaka Tagalog uloupi sobhent dhaddlo. Teo sobha aslolea zageancher amchea kamacher bondi asli. Uprant, Taiwan, Amerika ani Canada-ntlea Tagalog bhaxechea sobhank hanvem bhett dili. 2019-ant, hanvem Bharot ani Thailand-ant Inglez bhaxechea Raj Porgottnnarank Korsak xikoilem. Heo sogleo zobabdareo samballʼllolean hanv khub khuxal aslom. Hanv Jehovache sevent bizi astam tednam mhoje khuxalkaiek xim-mer asona!

Novi zobabdari mellʼlli title-i pavtti bhav-bhoinnamnim mhaka khub mog dakhoilo. Tor tankam soddun vochop sompem naslem. Punn oslea vellar hanv purnn toren Jehovacher patieun ravonk xiklom. Jehovan mhaka sodanch tenko dila mhunn hanvem onnbhovlam. Haka lagon, mhojea jivitant vo zobabdarent bodlav zale tednam te apnnaunk mhaka modot zali. Aiz hanv Philippines-ant khas pioneer mhunn seva kortam. Hanv nove sobhent khuxal asam ani bhav-bhoinnam mhozo khub mog kortat ani kallji ghetat. Toxench, Samuel ani Shirley aplea avoichea bhavarthachi dekh ghetat tem polloun mhaka khub gorv bhogta.—3 Ju. 4.

Hanvem zaitea oddchonneancho fuddo kelo. Mhoji mogachi bail ek trasanchem duens sosun morta tem hanvem polloilem. Toxench, veg-vegllea desant Jehovachi seva kortana, mhaka veg-vegllea poristhitincho fuddo korunk poddlo. Tori astana, Jehova “amchea modlea konnam thaunuch pois na” tem hanvem polloilem. (D.I. 17:27) Toxench eksurea vattarant pasun aplea sevokank tenko ani ghottai diunk Jehovacho “hat mottvo zalo na” tem hanvem polloilem. (Iz. 59:1) Khorench, mhojea akʼkhea jivitant Jehovach mhojem Khoddop zaun asa. Ani hea pasot hanv tacho khub upkari. Hanv kednanch ekttom naslom.