OBHEASACHO LEKH 6
GIT 18 Soddvonne Pasot Upkari
Jehova Amkam Bhogxita—Tea Pasot Ami Upkari Kiteak Asat?
“Devan sonvsaracho itlo mog kelo ki tannem aplea ekleach Putak dilo.”—JUANV 3:16.
MUKHEL MUDʼDO
Jehovan amkam bhogsunk kosli manddavoll kelea tea vixim ami hea lekhant xiktolim. Hem zannam zalʼlean Jehova amkam bhogxita tea pasot ami amchem upkariponn vaddounk pavtolim.
1-2. Munxakullachi poristhiti peregraf 1-ant sanglolea tornnattea sarki koxi asa?
EKA tornnatteachim avoi-bapui ekdom girest asat. Punn ek dis, tim eka accident-ant bhair poddttat. Hem aikon to ekdom dukhi zata. Punn uprant taka anik ek vaitt khobor aikonk melltta. Tem mhunnttlear, tachea avoi-bapain bhorpur rinn ghetlolem mhunn taka kolltta. Tor familichem daiz mhunn girestkai mellchea bodlek, tachea avoi-bapain ghetlolem rinn atam tachea mathear asa. Ani rinn dilʼle munis, tem beginchea-begin farik kor mhunn tachea fattik lagleat. Punn dukhachem mhunnttlear, tem rinn itlem asa ki to tornnatto tem kednanch farik korunk xokchona.
2 Amchi poristhiti tea tornnattea sarkich asa. Amchim poilim avoi-bapui Adanv ani Eve, ekdom girest aslim. Mhunnche tim poripurnn aslim ani sobit bagent jietalim. (Ut. 1:27; 2:7-9) Toxench, Jehovan tankam sasnak jieunchi sondhi dilʼli. Punn ek dis ekdom vaitt ghoddlem. Tem mhunnttlear, Adanv ani Even patok adarlem. Hea pasot, Jehovan tankam Sobit Bagentlim bhair ghatlim ani tannim sasnak jieunchi sondhi pasun hogddaili. Tor Adanva koddlean amkam daiz mhunn kitem mellʼllem? Bible sangta: “Eka munxa udexim patok hea sonvsarant bhitor sorlem ani patka udexim moronn. Hea toren moronn soglea munxam modem posorlem karonn tannim sogleamnim patok kelʼlem.” (Rom. 5:12) Tor Adanva koddlean amkam patok daiz mhunn mellʼllem ani haka lagon amcher moronn ailem. Hem patok eka vhoddlea rinna sarkem zaun asa, jem amchea modlim konnuch, kednanch farik korunk xokchimnant.—St. 49:8.
3. Amchea patkank ‘rinnank’ kiteak sor korunk zatat?
3 Jezun patkank ‘rinnank’ sor keleant. (Mt. 18:32-35; Luk. 11: 4) Ami patok adartat tednam, eka orthan ami Jehovachim rinnkarim zatat. Ani amchea patkanchem farikponn ami taka diunkuch zai. Amchim patkam bhogsunk Jehovan manddavoll korunk nasli zalear, amkam amchea mornna udexim tem farik korunk poddttolem aslem ani amkam porot jieuncho bhorvonso ascho naslo.—Rom. 6:7, 23.
4. (a) Jehovan amkam bhogsunchi manddavoll korunk nasli zalear, amchem kitem zatolem aslem? (Stotr 49:7-9) (b) Bible-ant uzar kelʼlea “patok” hea utracho orth kitem? (“ Patok” hem boks polloiat.)
4 Tor Adanv ani Even jem kitem hogddailem tem ami svota zaun kednanch melloun gheunk pavchim naslim. (Stotr 49:7-9 vachat.) Jehovan amkam bhogsunchi manddavoll korunk nasli zalear, amkam fuddara pasot vo jivontponnacho bhorvonso ascho naslo. Khorem mhunnttlear, ami zonvaram bhaxen mortolim aslim ani kednanch jivont zaunchim naslim.—Up. 3:19; 2 Ped. 2:12.
5. Amchea patkanchem rinn farik korunk Jehovan kitem kelam? ( Chitr polloiat.)
5 Survatek sanglolea tornnattea vixim ami porot chintum-ia. Ek girest munis ieun apunn tachem soglem rinn farik kortolo mhunn taka sangta. Hem aikon tea tornnatteak koxem bhogtolem oxem tumkam dista? Tannem dilʼlem dennem gheun to tacho kitlo upkari astolo nhoi! Heach bhaxen, Adanva koddlean amkam daiz mhunn mellʼllolem patok farik korunk, amchea mogall Bap Jehovan amkam ek dennem dilam. Tea vixim Jezun oxem mhunnttlolem: “Devan sonvsaracho itlo mog kelo ki tannem aplea ekleach Putak dilo. Tacher bhavarth dovortat tea sogleancho nas zaina zaunk punn tankam sasnachem jivit mellchem mhunn tannem oxem kelem.” (Ju. 3:16) Itlench nhoi, Jehova dita tea dennea udexim ami tachea sangata ek lagxilʼli ixttagot zoddunk pavtat.
Soddvonne udexim Jehova amchim patkam bhogxita hea bore khobre vixim Jezun porgottlem. (Juanv 3:16) Ani uprant ti soddvonn diunk tannem ap-khuxen aplo jiv bolidan kelo (Peregraf 5 polloiat)
6. Hea lekhant ami kitem zannam zatolim, ani kiteak?
6 Jehovachea hea dennea udexim amkam koso faido zaunk xokta ani amkam patkanchem bhogsonnem koxem melltta? Hea prosnacho zobab zannam zaunk, ami Bible-antlim thoddim utram ani tanchi somzonni zannam zaum-ia. Amchim patkam bhogsunk Jehovan ji manddavoll kelea tacher ami niall kortat tednam tachea pasot amchem upkariponn anikui vaddttolem.
DHEI: AMI TACHIM IXTTAM ZALʼLIM JEHOVAK ZAI
7. (a) Adanv ani Even anik kitem hogddailem? (b) Ami Adanv ani Evechim bhurgim aslolean amkam kosli modot zai? (Romkarank 5:10, 11)
7 Adanv ani Even patok kelem tednam tannim sasnak jieunchi sondhi hogddaili. Teach borabor, tannim Jehova sangata asloli tanchi ixttagot pasun hogddaili ani tim Devachim dusmanam zalim. Patok korchea poilim tim Devachea familicho bhag aslim. (Luk. 3:38) Punn patok kelea uprant Jehovan tankam aplea familintlim bhair ghatlim. (Ut. 3:23, 24) Tachea uprant tankam bhurgim zolmolim. (Ut. 4:1) Tor tanchim bhurgim, tem mhunnttlear ami pasun Devachim dusmanam zalim ani Jehova sangata porot ixttagot zoddunk amkam modot zai. (Romkarank 5:10, 11 vachat.) Ani ojapachem mhunnttlear, amcho ixtt zaunk Jehovan poilem panvl ghetlem. Koxem?
VATT: FARIKPONNACHI MANDDAVOLL
8. Farikponn mhunnttlear kitem?
8 Farikponn mhunnttlear, patki munxamnim Jehova sangata porot ixttagot zoddunk Jehovan kelʼli manddavoll. Hantunt, ek vost melloun gheunk teach molachi dusri vost farik korop mellon asa. Hea toren ji vost sanddlea vo piddʼddear zalea ti porot mellonk xokta. Eka munxan Jehova sangata xanti korun ixttagot zoddunk, Jehovan koxi manddavoll kelea tea vixim Grik Bhaxent Boroilʼlea Pustokamnim pasun sanglolem asa.—Rom. 3:25.
9. Izraelitkaranchim patkam bhogsunk Jehovan kosli manddavoll keli?
9 Izraelitkaranchim patkam bhogsunk ani tankam aplim ixttam korunk Jehovan ek manddavoll keli. Ti mhunnttlear, vorsak ek pavtti Izraelitkaram ek khas porob monoitalim, zaka Farikponnacho Dis mhunnttla. Hea disa, Mha-iadnik lokanchea patkam pasot zonvaranchim bolidanam ditalo. Hea bolidanam vorvim lokank purnn toren tanchea patkanchem bhogsonnem mellonaslem tem khorem, punn Izraelitkaram poschatap kortalim ani Jehovak zai tim bolidanam ditalim tea meren, Jehova tanchim patkam bhogsunk toiar aslo. (Heb. 10:1-4) Tea bhair, Izraelitkaram Farikponnachea Disak ani her vellar jim bolidanam ditalim, tea vorvim tim patki asat mhunn vollkhonk ani tanchea patkanchem purnn toren bhogsonnem mellonk, tankam zonvaranchea bolidanam poros kitem tori vortem zai aslem mhunn tanchea ugddasak ietalem.
10. Munxakullachim patkam purnn toren bhogsunk Jehovan kosli manddavoll keli?
10 Munxakullachim patkam purnn toren bhogsunk Jehovan kosli manddavoll keli? “Zaitea lokanchea patkanchem vojem ubarun vhoronk Kristan ekuch pavtti sodankala pasot aplem bolidan” diunk Jehovan manddavoll keli. (Heb. 9:28) Tea pasot, Jezun “aplo jiv bolidan korun zaitea zannam pasot soddvonn” dili. (Mt. 20:28) Tor soddvonn mhunnttlear kitem?
MOL: SODDVONN
11. (a) Soddvonnechem mol farik korchi kiteak goroz asli? (b) Soddvonnechem mol konn farik korunk xoktalo?
11 Amchea patkanchem bhogsonnem mellonk ani ami porot Jehovachim ixttam zaunk, Jehovan soddvonnechem ek mol tharailam mhunn amkam Bible-antlean kolltta. a Tor Adanvan jem hogddailem tem porot mellonk, koslem mol farik korunk zai mhunn Jehovan tharailam? Hea vixim zannam zaunk, Adanv ani Even kitem hogddailem tem ugddas dovrat. Tannim aplem poripurnn jivit ani teach borabor tankam asloli sasnak jieunchi sondhi hogddaili. Tor tannim jem hogddailʼlem tem porot melloun gheunk soddvonnechem sarkem mol farik korchi goroz asli. (1 Tim. 2:6) Ani hem osloch ek vaddlolo munis korunk xoktalo zo, (1) poripurnn aslo; (2) hea prithumer sasnak jieunk xoktalo; ani (3) amchea pasot ap-khuxen aplo jiv bolidan korunk toiar aslo. Fokot osloch ek munis soddvonnechem sarkem mol farik korunk xoktalo!
12. Jezu soddvonnechem mol kiteak farik korunk xoktalo?
12 Tor Jezuch soddvonnechem mol kiteak farik korunk xoktalo, tachim tin karonnam polloum-ia: (1) To poripurnn aslo—“tannem koslench patok korunk na.” (1 Ped. 2:22) (2) Hea karonnak lagon, to prithumer sasnak jieunk xoktalo. (3) To ap-khuxen munxakulla pasot aplo jiv bolidan korunk toiar aslo. (Heb. 10:9, 10) Tor patok korchea poilim, Adanv poripurnn aslo tea bhaxen Jezu poripurnn aslo. (1 Kor. 15:45) Ani aplem poripurnn jivit bolidan korun to soddvonnechem sarkem mol farik korunk xoklo. (Rom. 5:19) Hea vorvim to “nimanno Adanv” zaunk pavlo. Tor Adanvan jem hogddailem tem porot melloun gheunk, Jezuchea bhair anik eka poripurnn munxachi goroz nasli. Karonn Jezun “ekuch iodn sodankala pasot bhettoilo.”—Heb. 7:27; 10:12.
13. Ami kiteak lagon Jehova sangata ek bori ixttagot korunk pavtat?
13 Ami kiteak lagon Jehova sangata ek bori ixttagot korunk pavtat? Amchim patkam bhogsunk Jehovan ek vatt ukti keli. Ani Jezun aplem moladik rogot varoun amchea patkanchem sarkem mol farik kelem.—Ef. 1:7; Heb. 9:14.
FAIDE: JEHOVA AMKAM PATKANTLEAN ANI MORNNANTLEAN SODDOITA ANI NITIVONT MHUNN THARAITA
14. Ami atam kitem polloitolim, ani kiteak?
14 Jehovan amchea pasot jem kitem kelam tacho amkam koso faido zata? Hea prosnacho zobab zannam zaunk ami Bible-antlean don utranchi somzonni polloitolim, jea vorvim Jehova amkam bhogxita dekhun amkam koso faido zata tem somzonk amkam modot zatoli.
15-16. (a) Bible-ant amkam kiteak suttka melltta mhunn sanglam? (b) Hem zannam zalʼlean amkam koxem bhogta?
15 Bible sangta ki soddvonnechem mol farik kelam dekhun, amkam patkantlean ani mornnantlean suttka melltta. Hea vixim apostl Pedrun oxem mhunnttlem: “Tumi zannant ki tumchea purvozam koddlean tumi jem faido naslolem jivit jieunk xiklolim tantuntlean tumkam suttka mellʼllea. Hi suttka tumkam, bhangar vo chandi sarkea nas zata tea vostunk lagon mellonk na. Punn hi suttka tumkam Kristachea moladik rogta udexim mellʼllea, zo khot naslolo ani guneanv naslolo menddro zaun asa.”—1 Ped. 1:18, 19; ftn.
16 Patkak ani mornnak lagon amkam zaite tras sosunk poddttat. Punn soddvonne udexim amkam tantuntlean suttka melltta. (Rom. 5:21) Tor Jezuchea moladik rogta vorvim amkam suttka melltta dekhun, ami Jehovache ani Jezuche kitlim upkari asat nhoi!—1 Kor. 15:22.
17-18. (a) Jehova amkam nitivont tharaita hacho orth kitem? (b) Jehova amkam nitivont tharaita dekhun amkam koso faido zata?
17 Toxench, Jehova aplea sevokank nitivont tharaita mhunn Bible-ant sanglam. Hacho orth, to amchim patkam pusun uddoita. Punn oxem korun Jehova aplea nitivont dorjeam add vochona. Oxem ami kiteak mhunnonk zata? Karonn ami svota zaun tachea mukhar nitivont zaunk nant. Toxench, ami patok korop taka manvota oxem nhoi. Punn tannem ani Jezun soddvonn diunk jem kitem kelam tacher ami bhavarth dovortat dekhun, Jehova amchim patkam bhogxita.—Rom. 3:24; Gal. 2:16.
18 Tor Jehova amkam nitivont tharaita dekhun amkam koso faido zata? Nitivont mhunn tharailʼlea munxam modlea thoddea zannank, Jezu Krista borabor sorgar raz cholounk vinchun kaddleant ani tim Devachim bhurgim zaleant. (Tit. 3:7; 1 Ju. 3:1) Toxench, Jehovan tanchim patkam bhogxileant ani tim Devachea Rajeachim bhag zaunk purtim asat mhunn to lekhta. (Rom. 8:1, 2, 30) Toxench, jea munxank sasnak hea prithumer jieuncho bhorvonso asa, tanchim patkam Jehova bhogxita ani tankam aplim ixttam mhunn lekhta. (Jak. 2:21-23) Tea bhair, Armageddonantlean salvar zatolea vhodd zomeak sasnak jieunchi sondhi melltta. (Ju. 11:26) Itlench nhoi, jim “nitivont” ani “onitivont” munxam moron geleant, tankam jivontponnacho bhorvonso asa. (D.I. 24:15; Ju. 5:28, 29) Tor Jehovak visvaxi ravpi prithumer aslolea tachea soglea sevokank fuddarak “Devachim bhurgim mhunn mhoimebhorit svotontrtai mellttoli.” (Rom. 8:21) Khorench, amcho mogall Bap Jehova amkam aplim poripurnn bhurgim mhunn lekhtolo tea vella pasot ami kitlim axeun ravleant nhoi!
19. Jehovan ani Jezun amchea pasot jem kelam taka lagon amchi poristhiti koxi bodolʼli? (“ Jehova Amkam Bhogxita” hem boks pasun polloiat.)
19 Khorench, amchi poristhiti peregraf 1-ant sanglolea tornnattea bhaxen asli. Tannem aplem soglem hogddailʼlem, ani tachea mathear itlem rinn aslem ki to tem kednanch farik korunk xokcho naslo. Punn Jehovan amkam modot keli. Amchim patkam bhogsunk tannem vatt toiar keli. Ani Jezun soddvonnechem mol farik kelem dekhun, amchi poristhiti bodolʼli. Toxench, ami Jezucher bhavarth dovortat tednam amkam patkantlean ani mornnantlean suttka melltta. Ani Jehova jednam amchim patkam bhogxita, tednam to oxe toren bhogxita zoxem ami tim patkam kednanch korunk naslim. Ani sogleam-von mhotvachem mhunnttlear, ami atam amcho mogall sorgincho Bap Jehova sangata ek lagxilʼli ixttagot zoddunk pavtat.
20. Ami fuddlea lekhant kitem polloitolim?
20 Jehovan ani Jezun amchea pasot jem kitem kelam tea vixim ami niall kortat tednam tanchea pasot amchem upkariponn vaddtta. (2 Kor. 5:15) Tannim amkam modot korunk nasli zalear, amkam kosloch bhorvonso ascho naslo. Tor Jehova amkam bhogxita tednam amkam svota zaun koso faido zata tem Bible-ant aslolea zaitea udharonnantlean amkam kollon ieta. Hea vixim ami fuddlea lekhant polloum-ia.
GIT 10 Jehova Devak Vakhannia!
a Thoddea bhasamnim, “soddvonn” mhunn bhaxantor kelʼlea utracho orth, “jivitachem mol” vo “farik kelʼlem mol” oso zaun asa.
