OBHEASACHO LEKH 8
GIT 130 Udar Kallzan Bhogsum-ia
Jehova Amkam Bhogxita—Ami Tachi Dekh Koxi Gheunk Zata?
“Jehovan tumkam kallzant thaun bhogxileant toxem tumi-i bhogsunk zai.”—KOL. 3:13.
MUKHEL MUDʼDO
Amkam dukhoilam tankam bhogsunk ami kitem korunk zai tem ami hea lekhant polloitolim.
1-2. (a) Konnakui bhogsunk amkam khas korun kednam ekdom kotthin zaunk xokta? (b) Bhogsonnea vixim bhoinn Denise-an ekdom borem udharonn koxem dovorlam?
DUSREANK bhogsunk tumkam kotthin zata kai? Amchea modlea zaitea zannank oxem korunk kotthin zata. Khas korun, dusrim amkam toptat toslim utram uloitat vo ekdom dukh dita toslem kitem-i kortat tednam. Punn tancho rag dhorun ravona zaunk ani tankam bhogsunk ami kitem tori korunk zata. Hea vixim amkam bhoinn Denise-achem a ekdom borem udharonn asa. 2017-nt, ti ani tichi famil novench suru zalʼlem Jehovachea Sakxeanchem Mukhel Ofis polloun porot ghora ietalim tednam, tankam ek vhoddlo opghat ghoddlo. Eka driver-an tancher gaddi haddun marli, ani bhoinn sintida bhair geli. Ti sintidant ailea uprant, tichea bhurgeank bhorpur mar laglolo ani ticho ghov Brian-acho jiv gelo mhunn tika kollʼllem. Tea vellar kitem ghoddlem tem chintʼtana, bhoinnin oxem mhunnttlem: “Hanv samkem tutton gelem ani kitem korchem tem mhaka kainch somzonaslem.” Uprant bhoinnik kollon ailem ki to driver soro pieun gaddi choloinaslo vo tannem drugs gheunk nasle vo her koslea-i karonnank lagon tachem dhean halonk naslem. Tor tinnem monachi xanti mellonk Jehova lagim magnnem kelem.
2 Tea driver-ak arrest kelo ani bhoinnichea ghovacho jiv kaddlea pasot tacher kes suru zali. Ani korttan taka guneanvkari tharailo zalear taka bondkhonn favo zatoli asli. Punn korttantlea eka odhikarean bhoinnik sanglem ki tea driver-ak bondkhonn favo zatoli vo na tem ti kitem govai dita tacher adarit asa. Bhoinnin mhunnttlem: “Mhojea jivitantlea sogleam-von vaitt ghoddnne vixim mhaka porot ulounk poddttalem dekhun, konnem tori mhozo ghavo ugddun tantunt mitt bhorlolem oxem mhaka bhoglem.” Thoddea sumanam uprant bhoinn korttant asli, ani jea munxak lagon tika ani tichea familik itlem dukh sosunk poddlem tachea mukhar tinnem govai diunchi asli. Tor tinnem kitem mhunnttlem? Tinnem neai korpeak tea munxak bhogos mhunn sanglem. b Tichem ulovop somplea uprant neai korpi roddonk laglo. Tannem mhunnttlem: “Hanv 25 vorsam thaun hem kam kortam. Punn hanvem aiz poriant oxem kednanch aikonk na. Jea guneanvkarak lagon eke familik itlem dukh sosunk poddlem, taka bhogos mhunn te familin sanglolem ani taka mog dakhoilʼlo hanvem kednanch pollounk na!”
3. Bhoinn Denise-an tea guneanvkarak kiteak bhogxilo?
3 Bhoinn Denise-an tea guneanvkarak kiteak bhogxilo? Jehova amkam koso bhogxita tacher tinnem niall kelo. (Mik. 7:18) Ami oxem kortat tednam Jehova pasot amchem upkariponn vaddttolem ani dusreank bhogsunk pasun amkam modot zatoli.
4. Ami kitem kelʼlem Jehovak zai? (Efezkarank 4:32)
4 Jehova amkam udar kallzan bhogxita toso, ami pasun dusreank udar kallzan bhogxilʼlim Jehovak zai. (Efezkarank 4:32 vachat.) Dusrim amkam dukhoitat tednam ami tankam bhogsunk toiar aslolim Jehovak zai. (St. 86:5, NW; Luk. 17:4) Tor dusreank udar kallzan bhogsunk khoincheo tin vostu amkam modot kortoleo tem ami hea lekhant polloitolim.
TUMKAM KOXEM BHOGTA TEM KALLZANTUCH DOVORNAKAT
5. Mhonnʼnneo 12:18 pormonnem, konnui amkam dukhoita tednam amkam koxem disonk xokta?
5 Konnui amkam tanchea utramnim vo korneamnim dukhoita tednam, ani khas korun to amcho familicho vangddi vo ek lagxilʼlo ixtt asa zalear amkam khub dukh zata. (St. 55:12-14) Thodde pavtti hem dukh, konnem tori amkam suri toplea taka sor korunk zata. (Mhonnʼnneo 12:18 vachat.) Oslea vellar amkam kainch dukh bhogonk na oxem ami chintlem zalear, eka orthan ami ti suri toplea thoinch soddttat oxem zaunk xokta. Punn oxem kelear to ghavo pekchona. Teach bhaxen, amkam koxem bhogta tem ami kallzantuch dovorlear amcho rag vo dukh unnem zaunchem na.
6. Konnui amkam tanchea utramnim vo korneamnim dukhoita tednam ami kitem korunk puro?
6 Konnui amkam tanchea utramnim vo korneamnim dukhoita tednam, sogleam-von poilim amkam rag ieunk puro. Ani amkam rag ieunk xokta mhunn Bible-ant pasun sanglam. Punn rag dhorun ravona zaunk tantunt amkam xittkaunni dilea. (St. 4:4; Ef. 4:26) Karonn amchea bhavnancho amchea vagnnukecher porinnam poddtta. Ani ami ragan kitem-i kortat tednam tacho porinnam boro asona. (Jak. 1:20) Tor ami ugddas dovrunk zai ki amkam rag ietolo khoro, punn to rag ami dhorun ravtolim kai na tem amcher asa.
Amkam rag ietolo khoro, punn to rag ami dhorun ravtolim kai na tem amcher asa
7. Konnui amchea sangata vaitt toren vagta tednam amkam anikui koslim bhavnam ieunk xoktat?
7 Konnui amchea sangata vaitt toren vagta tednam amkam anikui veg-veglle torechim bhavnam ieunk xoktat. Udharonnak, Ann nanvachi bhoinn sangta: “Hanv lhan aslem tednam, mhozo daddy mhoje mummy-k soddun, mhoji kallji gheunk dovorloli tea baile sangata kazar zalo. Hea vellar mhaka khub eksurponn bhoglem. Ani uprant tankam bhurgim zalim tednam, tannim mhoji suvat ghetli ani atam mhoji koslich goroz na, oxem hanv chintunk laglem.” Toxench, bhoinn Georgette-acho ghov tika ovisvaxi zalo tednam tika koxem bhoglem tem ti sangta: “Bhurgeponnar thaun ami borim ixttam aslim ani ami sangata mellon pioneer seva kortalim. Tor tannem mhaka oxem kelem tednam, tannem mhojea kallzak eka orthan bhalo toplea sarkem zalem.” Tea bhair, Naomi nanvachi bhoinn sangta: “Mhozo ghov mhaka itlem dukh ditolo mhunn hanvem sopnant pasun chintunk na. To lipon pornography polloitalo mhunn tannem sanglem tednam, tannem mhaka fottoilem ani mhozo ghat kelo oxem mhaka bhoglem.”
8. (a) Ami dusreank kiteak bhogsunk zai? (b) Ami dusreank bhogxitat tednam amkam kosle faide asat? (“ Konnem Amkam Vaitt Kelam Dekhun Amkam Tras Zait Ravtat Zalear Kitem?” hem boks polloiat.)
8 Dusrim amkam utramnim dukhoitolim vo vaitt toren vagtolim tacher ami tabo dovrunk xokonant. Punn tea vellar ami koxim vagtolim tem amcher asa. Ani oslea vellar ami tankam bhogsunk zai. Karonn ami Jehovacho mog kortat ani ami dusreank bhogxilʼlim taka zai. Ami rag dhorun ravtat ani dusreank bhogxinant zalear, ami amcheruch tras voddun haddttolim. Mhunnche, ami chintinastana vagonk xoktat ani amchi bholaiki piddʼddear korunk xoktat. (Mho. 14:17, 29, 30) Hea vixim bhoinn Christine sangta: “Hanv rag gheun bostam tednam, hanv khuxal asona ani jevnnachea babtint hanv mhojea bholaikechi kallji ghena. Tea bhair, mhaka sarki nhid poddona. Ani mhojea bhavnancher tabo dovrunk mhaka anikui kotthin zata dekhun, hanv mhojea ghovacher ani dusreancher ragar zatam.”
9. Ami rag kiteak dhorun ravonk zaina?
9 Amkam dukhoila to munis apli chuk manun ghena zalear pasun, ami tacho rag dhorun ravonk zaina. Bhoinn Georgette-an pasun oxench kelem. Ti sangta: “Mhojea ghova vixim mhojea kallzant zo rag aslo, to soddun diunk mhaka thoddo vell gelo. Punn oxem kelʼlean mhaka monachi xanti mellʼlli.” Tor ami pasun rag dhorun ravonant tednam, ami dusream sangata bore toren vagonk pavtolim. Itlench nhoi, jem ghoddlem tea vixim chintit ravop ami bond kortolim ani porot amchem jivit khuxalkaien jieunk suru kortolim. Ami oxem kortat tednam, eka orthan ami amkanch ek dennem dilʼlea sarkem zata. (Mho. 11:17) Punn dusreancho rag dhorun ravona zaunk amkam kotthin zata zalear kitem?
RAG DHORUN RAVONA ZAUNK TUMI KITEM KORUNK ZATA?
10. Dusreank kallzantlean bhogsunk vell lagta oxem ami kiteak mhunnonk zata? (Chitram pasun polloiat.)
10 Konnem-i tumkam dukhoilam zalear rag dhorun ravona zaunk tumkam koxi modot zatoli? Hea vixim chintat. Khub mar laglolea eka munxak ilaz zalea uprant pasun, boro zaunk vell lagta. Teach bhaxen, konnui amchim bhavnam dukhoita tednam tankam kallzantlean bhogsunk amkam-i vell lagtolo.—Up. 3:3; 1 Ped. 1:22.
Khub mar laglolea eka munxak boro zaunk vell lagta. Teach bhaxen, konnui amchim bhavnam dukhoita tednam taka kallzantlean bhogsunk amkam-i vell lagtolo (Peregraf 10 polloiat)
11. Magnnea vorvim amkam dusreank bhogsunk koxi modot zaunk xokta?
11 Amchea kallzant rag dhorun ravona zaunk, ami Jehova lagim magnneant modot magonk zai. c Bhoinn Ann, jichea vixim ami poilim uloilʼlim, tika magnnem kelʼlean koxi modot zali tea vixim ti oxem sangta: “Amchea familintlea sogleamnim kelʼlea chukink lagon hanvem Jehova lagim bhogsonnem maglem. Ani uprant hanvem mhojea daddy-k ani tache dusre bailek bhogxilim mhunn sangonk chitt boroili.” Bhoinn sangta ki oxem korop tika sompem naslem. Punn ti mhunntta: “Hanvem Jehovachi dekh gheun tankam bhogxilim dekhun, tim fuddarak Jehova vixim xikonk fuddem sortolim mhunn hanv axetam.”
12. Amkam jem bhogta tacher patieun ravchea bodlek, ami Jehovacher kiteak visvas dovrunk zai? (Mhonnʼnneo 3:5, 6)
12 Toxench, ami amkam jem bhogta tacher patieun ravchem nhoi, punn Jehovacher visvas dovrunk zai. (Mhonnʼnneo 3:5, 6 vachat.) Karonn amchea pasot kitem borem tem Jehova sogleam-von bore toren zannam. (Iz. 55:8, 9) Tea bhair, Jehova kednanch amkam luksonn zata toslem kainch korunk sangchona. Tor to amkam dusreank bhogsunk sangta tednam, tem amcheach borea pasot mhunn ami khatri dovrunk zata. (St. 40:4; Iz. 48:17, 18) Punn amkam jem bhogta tench sarkem oxem ami chintʼtat zalear, ami ghoddie dusreank kednanch bhogsunk pavchimnant. (Mho. 14:12; Jer. 17:9) Ami poilim uloilʼlim bhoinn Naomi oxem sangta: “Hanvem survatek mhojea ghovak bhogsunk na, ani hanv jem kortam tem sarkem asa mhunn hanv chintʼtalem. Karonn to mhaka porot dukhoit vo tannem kelʼli chuk kainch nhoi, oxem to chintit mhunn hanv bhietalem. Toxench, mhaka koxem bhogta tem Jehova somzota mhunn hanv chintʼtalem. Punn hacho orth, hanvem ghetla to nirnnoi Jehovak manvota oxem nhoi mhunn mhaka uprant kollon ailem. Mhaka koxem bhogta ani mhozo rag nivllonk vell lagtolo mhunn to zannam tem khorem, punn hanvem mhojea ghovak bhogxilʼlo pasun taka zai.” d
KITEM BOREM ASA TACHER DHEAN DIAT
13. Romkarank 12:18-21-a pormonnem, ami kitem korunk zai?
13 Amkam dukhoiloleak ami bhogxitat tednam, tea vixim porot kednanch ulounchimnant mhunn ami tharaitat. Ani to amcho Kristi bhav vo bhoinn zalear tachea lagim xanti korunk ami vavr korit ravtolim. (Mt. 5:23,24) Amchea kallzant rag dovorchea bodlek ami taka doia dakhoitolim ani bhogxitolim. (Romkarank 12:18-21 vachat; 1 Ped. 3:9) Oxem korunk amkam kitem modot korunk xokta?
14. Ami kitem korunk vavrunk zai, ani kiteak?
14 Jehova dusreanchea borea gunnancher dhean dita. (2 It. 16:9; St. 130:3) Tor, ami Jehovachi dekh gheunk vavrunk zai ani amkam dukhoila tea munxachea borea gunnancher dhean diunk zai. Jem kitem ami eka munxa bhitor pollounk sodhtat tench amkam melltta, zaum tem borem vo vaitt. Tor ami dusreanchea borea gunnancher dhean ditat tednam tankam bhogsunk amkam sompem zatolem. Hea vixim, Jarrod nanvacho ek bhav oxem sangta: “Mhaka dukhoila tea bhavachea chukicher dhean diunchea bodlek, taka aslolea zaitea borea gunnancher hanv dhean ditam tednam, taka bhogsunk mhaka sompem zata.”
15. Ami dusreank bhogxitat tednam tankam tem sangop kiteak gorjechem?
15 Ami korunk zai ti anik ek mhotvachi vost mhunnttlear, ami dusreank bhogxilam mhunn tankam sangonk zai. Kiteak? Ami poilim uloilʼli bhoinn Naomi kitem sangta tacher dhean diat: “Mhojea ghovan mhaka vicharlem, ‘Tunvem mhaka bhogxilo?’ ‘Hanvem tuka bhogxilo’ mhunn sangonk hanvem mhojem tondd ugoddlem tednam, mhojea tonddantlean tim utram bhairuch sorona zalim. Ani tednam mhaka kollon ailem ki hanvem taka kallzantlean bhogsunk naslo. Punn vell gelo toso, ‘Hanvem tuka bhogxilo’ mhunn hanvem taka sanglem. Hem aikon mhojea ghovachea dolleant dukham ailim. Tea uprant, amkam kitli monachi xanti mellʼlli tem hanv utramnim pasun sangonk xokona. Tednam thaun hanv tacher porot visvas dovrunk pavlem ani atam ami dogaim porot ghott ixttam asat.”
16. Bhogsonnea vixim tumi kitem xiklim?
16 Ami dusreank bhogxilʼlem Jehovak zai. (Kol. 3:13) Tori astana, oxem korunk thodde pavtti amkam kotthin zaunk xokta. Punn amkam koxem bhogta tem ami kallzantuch dovornant tednam, toxench rag dhorun ravona zaunk ami vavr kortat tednam ani borem kitem asa tacher ami dhean ditat tednam dusreank bhogsunk amkam modot zatoli.—“ Dusreank Bhogsunk Ami Gheunk Zai Tim Tin Panvlam,” hem boks polloiat.
DUSREANK BHOGXILʼLEAN KOSLE FAIDE ASAT TACHER DHEAN DIAT
17. Ami dusreank kiteak bhogsunk zai?
17 Dusreank bhogsunk amkam zaitim karonnam asat. Tantuntlim thoddim khoinchim? Poilem, ami amcho doiall Bap, Jehovachi dekh ghetat ani taka manvololim zatat. (Luk. 6:36) Dusrem, Jehovan amkam bhogxileant dekhun ami taka khorench upkari asat mhunn ami dakhoun ditat. (Mt. 6:12) Ani tisrem, amchi bholaiki bori urta ani ami dusream sangata ghott ixttagot samballunk pavtat.
18-19. Dusreank bhogxilʼlean kitem zaunk xokta?
18 Ami dusreank bhogxitat tednam ami chintunk na toslim besanvam amkam mellonk xoktat. Ami peregraf 1-ant uloilʼlea bhoinn Denise-achea babtint kitem ghoddlem tacher dhean diat. Jea munxak lagon tika opghat ghoddlo, tachi kes zalea uprant tea munxan aplo jiv diunk tharailʼlem. Ani tea vellar bhoinnik hea vixim khobor nasli. Punn bhoinnin taka bhogxilo dekhun tacher itlo boro porinnam zalo ki to Jehovachea Sakxeam sangata Bible xikonk laglo.
19 Dusreank bhogsop ami korunk xoktat tem sogleam-von kotthin kam oxem amkam disonk xokta. Punn toxem kelʼlean amkam zaitim besanvam mellonk xoktat. (Mt. 5:7) Tor Jehovachi dekh gheun, dusreank bhogsunk amchean zata tem soglem korit ravom-ia.
GIT 125 “Doia Dakhoitat Tim Khuxal”
a Thoddim nanvam bodolʼleant.
b Oslea poristhitint ek Kristanv kitem kortolo to tacho svotacho nirnnoi zaun asa.
c jw.org-acher, “Forgive One Another,” “Forgive Freely,” ani “Friends Again” he JW gitanche video polloiat.
d Pornography pollovop patok zaun asa ani khub dukh haddtta tem khorem. Punn aplo kazari sangati pornography polloita dekhun Bible-a pormonnem taka divors diunk zaina.
