OBHEASACHO LEKH 7
GIT 15 Jezu Kristak Mhoima!
Jehova Amkam Bhogxita—Hantuntlean Amkam Koso Faido Zata?
“Tujea thaun amkam melltta khorem bhogsonnem.”—ST. 130:4, NW.
MUKHEL MUDʼDO
Jehova amkam jea toren bhogxita tem khas kiteak zaun asa tem somzonk, Bible-ant thoddim udharonnam dilʼlim asat. Tim ami hea lekhant polloitolim. Hea vorvim, Jehova jea toren amkam bhogxita tachea pasot ami upkariponn vaddounk pavtolim.
1. Ek munis, “Hanvem tuka bhogxilo” oxem mhunntta tednam tachea utrancho khoro orth zannam zavop kotthin kiteak asta?
AMI konnakui amchea utramnim vo korneamnim dukhoilam zait. Punn uprant to munis amkam, “Hanvem tuka bhogxilo” oxem sangta tednam amkam kitlem borem dista nhoi! Torui, tachea utrancho khoro orth zannam zavop khub kotthin asta. Karonn tachea utrancho orth ghoddie oso asot, ki ami azunui ghott ixttam asat. Vo ghoddie oso asot, ki jem ghoddlem tea vixim taka anik ulounk naka, ani tachea sangata amchi ixttagot poilim bhaxen uronk na. Tor munxam bhogxitat tednam, tacho orth veg-vegllo asonk xokta.
2. Jehovachea bhogsonnea vixim Bible-ant kitem sanglam? (Futtnott pasun polloiat.)
2 Jehovachea ani munxanchea bhogsonnea modem khub ontor asa. Karonn Jehova jea toren bhogxita, toso konnuch amkam bhogsunk xokona. Tea pasot stotrkaran mhunnttlem: “Tujea thaun amkam melltta khorem bhogsonnem, hea pasot ami tuji bhirant dhortat.” a (St. 130:4, NW) Khorench, fokot Jehova ekloch amkam khorem bhogsonnem dita! Hebrev Bhaxent Boroilʼlea Pustokantlea thoddea versamnim, Bible boroupeamnim Jehovachea bhogsonneak jem utor uzar kelam, tem munxachea bhogsonneak kednanch uzar korunk na.
3. Jehovachem bhogsonnem munxanchea bhogsonnea thaun koxem vegllem asa? (Izaias 55:6, 7)
3 Jehova bhogxita tednam to amchim patkam purnn toren pusun uddoita, ani tachea sangata ami porot ek lagxilʼli ixttagot zoddunk pavtat. Tor Jehova amkam purnn toren ani udar kallzan bhogxita dekhun ami tache kitlim upkari asat nhoi!—Izaias 55:6, 7 vachat.
4. Aplea bhogsonnea vixim somzaunk Jehovan kitem kelam?
4 Jehovachem bhogsonnem munxanchea bhogsonnea poros ekdom vegllem asa zalear, ami opurnn munxam tacho orth koxim somzonk xoktat? Aplea bhogsonnea vixim somzaunk, Jehovan Bible-ant zaitim udharonnam uzar keleant. Tantuntlim thoddim ami hea lekhant polloitolim. Tea udharonnam vorvim, Jehova amchea patkanchem vojem koxem ubarta ani porot tachim ixttam zaunk amkam koso modot korta tem amkam kollttolem. Hea udharonnancher dhean dilʼlean, doiall ani kakutin bhorlolea amchea Bapa pasot amcho mog ani upkariponn vaddttolem. Karonn to amkam zaitea vattamnim bhogxita.
JEHOVA AMCHEA PATKANCHEM VOJEM UBARTA
5. Jehova amkam bhogxita tednam to kitem korta?
5 Bible-ant zaite pavtti amchea patkank eka zodd vojeak sor kelam. Raza Davidan aplea patkam vixim oxem boroilem: “Patkanchi ras matheavoir pavlea, tanchea bhara khal hanv ekdomuch cheptam.” (St. 38:4) Punn poschatap kortat tankam Jehova bhogxita. (St. 25:18; 32:5) Hea versamnim “bhogxita” hea utrak jem Hebrev utor uzar kelam, tacho orth “ubarun vhorop.” Tor eka orthan, Jehova eka bollvont munxa sarko zaun asa, zo amchea khandar aslolem patkanchem zodd vojem ubarta ani amchea thaun pois vhorta.
‘Bhogxilim’ (St. 32:5)
6. Jehova amchim patkam ubarun kitlim pois vhorta?
6 Jehova amchim patkam ubarun kitlim pois vhorta tem somzonk, Bible anik ek udharonn uzar korta. Stotr 103:12 sangta: “Udent ani Ostomt jitleo ekameka thaun pois-pois asat, titlim pois To amchim patkam kaddun uddoita!” Udent ani ostomt eka-meka thaun itlim pois asat ki tim kednanch mellonant. Tor hacho orth, ami chintunk zainant titlim pois Jehova amchim patkam ubarun vhorta. Hantuntlean Jehova amchim patkam purnn toren bhogxita mhunn amkam khatri melltta!
“Udent ani Ostomt jitleo ekameka thaun pois-pois asat, titlim pois” (St. 103:12)
7. Amchea patkam vixim Jehova kitem korta tem somzaunk tannem koslim udharonnam uzar keleant? (Mika 7:18, 19)
7 Amchim patkam ubarun vhelea uprant, Jehova tancho hixob dhorun ravona oxem ami kiteak mhunnonk zata? Raza Hezekian Jehova vixim oxem boroilʼlem: “Sogllem mhojem pap Tunvem nodre velem bhair marleim.” (Iz. 38:9, 17) Hacho orth, poschatap kortat tanchim patkam Jehova ekdom pois ubarun vhorta ani tim porot kednanch polloina. Dusrea utramnim sangchem mhunnttlear, Jehova amchim patkam oxe toren bhogxita, zoxim ami tim kednanch korunkuch naslim. Aplea bhogsonnea vixim somzaunk, Jehovan anik ek udharonn uzar kelam, jem amkam Mika 7:18, 19-ant vachunk melltta. (Vachat.) Thoim sanglam ki Jehova amchim patkam doriache khorik uddoita. Ani adlea kallar, doriache khorik uddoilʼli kosli-i vost porot kednanch mellonasli.
“Sogllem mhojem pap Tunvem nodre velem bhair marleim”(Iz. 38:17)
“Sogllim amchim patkam doriache khorik uddoi” (Mik. 7:19)
8. Atam meren amkam kitem xikonk mellʼllem?
8 Jehova amkam bhogxita tednam to amchim patkam purnn toren kaddun uddoita mhunn Bible sangta. Tor amkam tem patkanchem vojem anik ubarunk poddona. Hea vixim Davidan mhunnttlolim utram kitlim khorim zaun asat. Tannem mhunnttlolem: “Zanchim vaitt kamam bhogxileant ani zanchim patkam dhampleant tim khuxal. Jehova jea munxachea patkancho hixob dovorchona, to munis khuxal.” (Rom. 4:7, 8) Ani hench khorem bhogsonnem zaun asa!
JEHOVA AMCHIM PATKAM DHUVUN KADDTTA
9. Jehova amchim patkam purnn toren bhogxita hem somzaunk Bible-ant koslem udharonn dilam?
9 Soddvonne udexim, poschatap kortat tanchim patkam Jehova koxim bhogxita tem somzaunk, Bible-ant anik ek udharonn dilʼlem asa. Tem mhunnttlear, Jehova eka orthan amchim patkam dhuvun kaddtta. Hea udexim to patki nitoll zata. (St. 51:7; Iz. 4:4; Jer. 33:8) Hacho porinnam kitem zata tea vixim Jehovan svota sanglam. Tannem mhunnttlem: “Zori patkam tumchim lal-tambddim, tori borfa vori zatoleat tumi nitoll-dhovim; zori tim bhirondda sarkim kirmiji-tambddim, tori kapsa vori zatoleat tumi dhovim.” (Iz. 1:18) Eka kopddeacher laglolo tambddo dag dhuvun kaddunk khub kotthin asta. Torui, hea udharonna vorvim Jehova amkam khatri dita ki to amchim patkam hea toren dhuvun kaddtta, ki tancho dag anik urona.
“Zori patkam tumchim lal-tambddim, tori borfa vori zatoleat tumi nitoll-dhovim” (Iz. 1:18)
10. Jehova amkam udar kallzan bhogxita mhunn somzaunk Bible-ant koslem udharonn uzar kelam?
10 Ami fattlea lekhant polloilʼlem toxem, ami kortat tea patkank ‘rinnank’ sor kelam. (Mt. 18:32-35; Luk. 11:4) Tor dor ek pavtti ami Jehova add patok kortat tednam, ami anikui rinnant buddot voitat. Punn Jehova amchim patkam bhogxita tednam, to eka orthan tem rinn bhogxita. Ani to amchea lagim tea patkancho hixob magona. Tor eka munxachem patok bhogsota tednam taka ekdom khuxalkai bhogta tea bhaxen, Jehova amchim patkam bhogxita tednam amkam pasun khub khuxalkai melltta!
“Amchim patkam bhogos” (Mt. 6:12)
11. Jehova amchim patkam ‘pusun uddoita’ hacho orth kitem? (Itihas 3:19)
11 Jehova fokot amchim patkam bhogxina, punn tim sarkinch pusun uddoita. (Itihas 3:19 vachat.) Hem somzonk hea udharonna vixim chintat. Ami konnak tori farik korchem asat tem rinn, to eka kagdacher boroita. Punn tannem tem rinn bhogxilam mhunn dakhounk, to tea ankddeancher ek line voddtta. Tori astana, to ankddo sogleank dista. Punn pusun uddovop, hachea poros khub vegllem zaun asa. Hea vixim somzonk, adlea kallar koslem ink uzar kortale tem ugddas korat. Tem ink eka volea sponge-an puslea uprant, tea kagdacher kainch uronaslem ani tacher kitem boroilʼlem tem konnank disonaslem. Teach bhaxen, Jehova amchim patkam bhogxita itlench nhoi, punn tim sarkinch pusun uddoita mhunn zannam zaun ami tachim kitlim upkari asat nhoi!—St. 51:9.
“To tumchim patkam pusun uddoitolo” (D.I. 3:19)
12. Bible-ant uzar kelʼlea datt kupachea udharonnantlean ami kitem xiktat?
12 Jehova amchim patkam koso pusun uddoita tem somzonk to anik ek udharonn uzar korta. To mhunntta: “Tuje guneanv eka kupa vori, ani tujim patkam dhova sarkim [“eka datt kupan,” NW] Hanvem uboun nanch kelim.” (Iz. 44:22) Tor Jehova amchim patkam bhogxita tednam, eka orthan to datt kupan amchim patkam lipoita. Hea toren, tim amkam toxench taka pasun disonant.
‘Tuje guneanv eka kupa vorim hanvem uboun nanch kele’ (Iz. 44:22)
13. Jehova amchim patkam bhogxita tednam amkam koxem bhogta?
13 Tor Bible-ant sanglolea hea soglea udharonnantlean ami kitem xiktat? Jehovan amkam bhogxilea uprant ami guneanvkari bhavnam gheun ravonk zaina. Karonn Jezu Kristachea rogta udexim, Jehova purnn toren amchim patkam bhogxita. Ani Jehova amkam oxe toren bhogxita, zoxem ami tim patkam kednanch korunkuch naslim. Tor ami poschatap kortat tednam Jehova amkam hea toren khorem bhogsonnem dita.
JEHOVA POROT AMKAM APLIM IXTTAM MHUNN MANUN GHETA
Jehova amkam bhogxita dekhun ami porot tachea sangata lagxilʼli ixttagot zoddunk pavtat (Peregraf 14 polloiat)
14. Jehova amkam purnn toren bhogxita mhunn ami kiteak visvas dovrunk zata? (Chitram pasun polloiat.)
14 Jehova amkam bhogxita tednam to porot amkam aplim ixttam mhunn manun gheta hachi ami khatri dovrunk zata. Ani Jehova amkam purnn toren bhogxita dekhun, amkam guneanvkari bhavnam gheun ravonk poddona. Toxench, Jehova azunui amcher ragar asa ani amkam khast laitolo mhunn pasun amkam bhieunchi goroz na. Karonn Jehova toxem kednanch korchona. Tor to amkam bhogxita mhunn to sangta tednam ami tacher visvas dovrunk zata. Karonn Jehovan provadi Jeremiasak oxem sanglolem: “Hanv tanchem khotteponn bhogxitolom ani tanchea patkancho anink ugddas korcho na.” (Jer. 31:34) Ani tea utrancho ulʼlekh korun Paulun oxem mhunnttlem: ‘Hanv tanchim patkam porot kednanch ugddasak haddcho na.’ (Heb. 8:12) Tor hacho orth kitem?
“Hanv . . . tanchea patkancho anink ugddas korcho na” (Jer. 31:34)
15. Jehova amchim patkam anink ugddas korchona hacho orth kitem?
15 Bible-ant “ugddas” hem utor soglech pavtti, adim jem ghoddlem tea vixim chintop, hakach uzar korunk na. Punn kitem tori korunk fuddem sorop, haka pasun tem uzar kelam. Hem somzonk Jezu borabor khillailʼlea guneanvkaran taka kitem mhunnttlolem tacher dhean diat. Tannem Jezuk sanglolem: “Jezu, tum Raza zata tednam mhozo ugddas kor.” (Luk. 23:42, 43) Tannem Jezuk aplo ugddas kor mhunn sanglem tednam, aplea pasot kitem tori kor mhunn to Jezuk sangtalo. Ani Jezuchea zobabantlean to tea guneanvkarak fuddarak jivont kortolo mhunn kolltta. Hantuntlean ami kitem zannam zatat? Jehova amchim patkam anink ugddas korcho na mhunn sangta tednam, to amkam bhogsunk fuddem sorta ani to fuddarak tea patkam pasot amkam khast launcho na mhunn ami zannam zatat.
16. Jehova amkam bhogxita tednam amkam suttka melltta mhunn somzonk Bible-ant koslem udharonn dilam?
16 Jehova amkam bhogxita tednam amkam suttka melltta. Hem somzonk Bible-ant amkam anik ek udharonn asa. Ami opurnn asat dekhun, ami patkam kortat tednam ami “patkachim gulamam” zatat. Punn Jehova amkam bhogxita tednam ami amkanch oslea gulamak sor korunk zata, zaka “patka thaun suttka” mellʼllea. (Rom. 6:17, 18; Prok. 1:5) Tor eka koideak suttka melltta tednam to khuxal zata tea toren, Jehova amkam bhogxita tednam amkam-i toslich khuxalkai melltta.
“Tumkam patka thaun suttka dili” (Rom. 6:18)
17. Jehovachea bhogsonnea vorvim ami eka orthan borim koxim zatat? (Izaias 53:5)
17 Izaias 53:5 vachat. Ami patki asat dekhun, Bible-ant amkam gombhir duens zalʼlea munxank sor keleant. Punn Jehovan Jezu vorvim dilʼlea soddvonnek lagon amkam eka orthan pekovnni melltta vo ami borim zatat. (1 Ped. 2:24) Patkak lagon Jehova sangata amchi ixttagot piddʼddear zata. Punn soddvonne udexim Jehova amkam bhogsunk xokta ani ami porot tachim ixttam zaunk xoktat. Tor gombhir duens zalʼlo ek munis boro zata tednam taka bhorpur khuxalkai bhogta tea bhaxen, ami porot Jehovachim ixttam zatat ani amkam tachi maniotai melltta tednam amkam-i ekdom chodd khuxalkai bhogta.
“Tachea ghaiank lagun amche ghai pekle” (Iz. 53:5)
JEHOVA AMKAM BHOGXITA TACHO AMKAM KOSO FAIDO ZATA?
18. Jehovachea bhogsonnea vixim Bible-ant aslolea udharonnam thaun ami kitem xiklim? (“Jehova Amkam Koso Bhogxita?” hem boks pasun polloiat.)
18 Jehovachea bhogsonnea vixim Bible-ant aslolea udharonnam thaun ami kitem xiklim? Jehova amkam purnn toren bhogxita. Tem mhunnttlear, ami patok korunkuch naslem tea toren to amkam lekhta. Toxench, amchea patkank lagon to amkam fuddarak khast launcho na mhunn ami khatri dovrunk zata. Ani hea pasot ami amchea sorginchea Bapa sangata porot ek lagxilʼli ixttagot zoddunk pavtat. Tor Jehova koddlean amkam melltta tem khorem bhogsonnem ek dennem koxem zaun asa, jem amkam kednanch favo naslem. Punn Jehova amcho mog korta dekhun to udar kallzan amkam hem dennem dita.—Rom. 3:24.
19. (a) Ami Jehovak kiteak upkari asat? (Romkarank 4:8) (b) Fuddlea lekhant ami kitem polloitolim?
19 Romkarank 4:8 vachat. Jehova amchim patkam bhogxita dekhun ami tache kitlim upkari asat nhoi! (St. 130:4, NW) Punn Jehovan amkam bhogxilʼlim zai zalear, ami pasun kitem tori mhotvachem korunk zai. Tea vixim Jezun kitem sanglem tacher dhean diat. Tannem mhunnttlem: “Tumi dusreancheo chuki bhogxinant zalear, tumcho Bap tumcheo-i chuki bhogxichona.” (Mt. 6:14,15) Tor ami Jehovachi dekh gheun dusreank bhogsunk zai. Hem ami koxem korunk zata tem fuddlea lekhant polloum-ia.
GIT 46 Jehova Bapa, Hanv Upkari Tuka
a Bhogsonnea vixim sangonk hea versant Hebrev bhaxent jem utor uzar kelam, tea vorvim fokot hench khorem bhogsonnem mhunn kolltta. Ani Jehovachem hem bhogsonnem munxanchea bhogsonnea poros ekdom vegllem asa.
